Daniele 7
7
Cilengano cabanyama bone aca-Mwanaamuntu
1 #
Dan 2:28
Mumwaka mutaanzi wabwami bwa-Belisazara mwami wa-Babuloni, Daniele wakalota ciloto akubona zilengano mumoyo wakwe naakelede abulo bwakwe. Mpawo wakalemba ciloto akwaamba mitwe yamakani. 2Daniele wakati, Ndakabona cilengano cangu ciindi camasiku. Ndakabona myuuwo yone yakujulu ilakopenganya maanzi aamulwizi lupati. 3#Zek 6:1-4; Ciy 13:1; 17:8Elyo mulwizi mwakazwa banyama bapati bone. Boonse bone kabali amisyobo misyobo. 4#Dt 28:49; Jer 4:7,13; Ciy 13:2Mutaanzi kali mbuli mulavu, alimwi kajisi mababa aasikwaze. Lino nendakacili kweebela, mababa aakwe akamonsoka, alimwi wakasumpulwa kuzwa ansi akwiimikwa azituta zyakwe zyobile mbuli muntu, alimwi wakapegwa moyo wabuntu, 5#Dan 2:39Lino kwakaboneka munyama aumwi wabili, kali mbuli masekese, kanyampwide cituta kulubazu lomwe, alimwi kalumide mampango otatwe mukanwa lyakwe, Lino wakaambilwa kuti, Buka, ulye nyama nyingi. 6#Dan 8:8,22Lino ndaka langa alimwi, ndabona aumwi munyama uuli mbuli siluwe, kajisi mababa one aamuyuni andelo zyakwe. Oyu munyama kajisi mitwe yone, nkabela wakapegwa bwami. 7#Ciy 12:3; 13:1Lino kusule lyayaaya ndakacili kubona muzilengano zyamasiku, nkabela ndakabona munyama aumwi wane, munyama uuyoosya uugambya, uujisi inguzu loko. Kajisi meno mapati aalubulo, nkabela wakali kulya akutyolaula, aceeco icakasyeede wakacilyataula ansumba zyakwe, Kaandeene abanyama boonse ibakamutaangunina, alimwi kajisi meja aali ikumi. 8#Dan 8:9; Ciy 13:5-6Lino nendakacili kweebela meja, ndakabona kuti kwakamena keja akamwi akati kao. Lino kunembo lyakaako meja mataanzi otatwe akanonkolwa, Alimwi mukeja ako mwakali meso mbuli meso aamuntu amulomo uuamba makani aayoosya.
9 #
1 Kor 15:24; Int 90:2; 104:2-4; Ciy 20:4; 1:14 Lino nendakacili kweebela, ndakabona zyuuno zibikidwe, nkabela kwakakede umwi sinsiku. Zyakusama zyakwe zyakali kutuba buu mbuli nyengenge, amasusu aakumutwe wakwe akali mbuli boya bwambelele bubotu. Cuuno cakwe cakali mabangabanga aamulilo, amavili aaco akali mulilo uuyakisya. 10#Dt 33:2; Int 68:17; Mt 25:31,32; Ciy 5:11; 20:12Oko nkwaakabede kwakazwa mulonga wamulilo. Basimilimo bakwe bakali cuulu cazyuulu, abaabo ibakaimvwi kubusyu bwakwe bakali zyuulu zili ikumi zyazyuulu zili ikumi. Lino basinkuta bakakala, amabuku akajalulwa.
11 #
Ciy 19:20
Mpawo ndakalanga nkaambo kamajwi aayoosya keja ngekakali kwaamba. Nkabela nindakacili kulanga, munyama wakajayigwa, amutunta wakwe wakanyonyoonwa, wawaalwa mumulilo kuti utentwe, 12Abanyama bamwi, bakanyanzigwa bwami bwabo, pele kupona bakazumizigwa kucipona mane kusikila kuciindi ceelede.
13 #
Is 9:6,7; Ezk 1:26; Mt 24:30; 26:64; Mk 13:26; 14:62; Lk 21:27; Ciy 1:7,13; 14:14 Lino ndakabona muzilengano zyamasiku, ndabona umwi uuli mbuli mwana amuntu uleza amayoba aakujulu, wasika afwaafwi akuli-Sinsiku, watambulwa kulinguwe. 14#Int 2:6; 110:1; Mt 11:27; Joh 3:35; Is 9:7; Ob 1:21; Mik 4:7; Lk 1:33; Heb 12:28; Ciy 11:15Nkabela wakapegwa bweendelezi abulemu abwami, kuti bantu bazisi zyoonse abamisyobo yoonse abamyaambo yoonse bamumanine milimo. Bweendelezi bwakwe mbweendelezi butamani butakonzyi kweela, abwami bwakwe tabukonzyi kunyonyoonwa.
15Lino mebo nde-Daniele, moyo wangu wakapenzegwa mukaango kangu, azilengano zyamoyo wangu zyakali kundikataazya. 16Mpawo ndakaswena kufwaafwi kuluumwi wabaabo ibakaimvwi nkuko, ndamubuzya makani aya oonse ncaamba, Nkabela wakandaambila akundipandulwida makani mbaamba, 17Wati, Aba banyama bapati bone mbami bone bati buke ansi. 18#Is 60:12; Ciy 22:5Pele basalali ba-Sijulu wamajulu bayootambula bwami, nkabela bayoovuba bwami lyoonse mane kukabe kutamani.
19Mpawo ndakayandisya kuziba makani aamunyama wane, iwakaandeene abamwi boonse, uuyoosya loko, uuli ameno aalubulo amaala aamukuba, iwakali kulya akutyolaula akulyataula zisyeede ansumba zyakwe, 20amakani aameja aali ikumi aakali amutwe wakwe aluja lumwi ilwakamena, ameja otatwe aakawa kunembo lyalo, luja ilwakajisi meso amulomo wakwaambya zintu ziyoosya, aciwa cibi cipati kwiinda ziwa zyabeenzinyina, 21#Ciy 11:7; 13:7Nindakacili kulanga, olo luja lwakabusizya basalali inkondo akubazunda, 22#Ciy 1:6; 20:4; 2 Tes 2:8; 1 Kor 6:2mane lumwi Sinsiku wasika, elyo basalali ba-Sijulu bakabetekwa kabotu, aboobo cakasika ciindi cabasalali cakutambula bwami. 23Lino mbuboobu mbwaakaamba. Munyama wane, nkokuti kuyoobuka bwami bwane ansi ano bwaandeene amami amwi oonse. Obo bwami buyoolya nyika yoonse, buyooilyataula akwiityolaula. 24#Ciy 17:12Ameja aali ikumi, nkokuti kubwami obo kuyoobuka bami bali ikumi, alimwi kusule lyabaabo kuyoobuka umbi uuandeene aboonse bakutaanguna, nkabela uyoozunda bami botatwe. 25#Is 37:23; Ciy 17:6; 18:24; Dan 2:21; 12:7; Ciy 12:14; 13:5-6Uyooamba majwi aakusampaula Sijulu, abalo basalali ba-Sijulu uyoobafwabya. Uyooyeeya kusandula ziindi amilao, Nkabela bayooabwa mumaanza aakwe mwaka amyaka yobile acisela camwaka. 26Pele kuyooba inkuta yakubeteka makani, elyo bweendelezi bwakwe buyoonyanzigwa, kuti bunyonyoonwe akulobesegwa mane kusikila kumamanino. 27#Int 146:10; Lk 1:33; Ciy 11:5; Ciy 20:4; 22:5Lino bwami abweendelezi abupati bwazisi zyoonse zyaansi, zyoonse ziyooabwa mumaanza aabantu babasalali ba-Sijulu, Bwami bwakwe mbwami buteeli, nkabela misyobo yoonse iyoomulemeka akumumanina milimo.
28 #
Lk 2:19
Mpaamanina makani awa. Lino mebo nde-Daniele, miyeeyo yangu yakali kundikataazya loko, aciwa cangu cakasanduka, Pele makani ndakacilaayobwede mumoyo wangu.
Currently Selected:
Daniele 7: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.