Incito 9
9
Kusanduka kwa-Saulo (ngo-Paulo) munzila yaku-Damasko
1Eno Saulo mbwaakacifundilide kupenzya akujaya basikwiiya ba-Mwami, wakainka kumupaizi mupati 2kuyoomukumbila magwalo aakuya kuzikombelo zyaku-Damasko, kuti aakujana benzila eyi, nobaba baalumi nobaba bakaintu, abalete ku-Jerusalemu balaangidwe. 3Eno mukweenda kwakwe naakasika kufwaafwi ku-Damasko, ndilyonya kwakamumwekela mumuni uuzwa kujulu, 4wakawida ansi, wamvwa ijwi liti kulinguwe, Saulo, Saulo, undipenzezyanzi? 5Wabuzya kuti, Ino nduweni, Mwami? Wakavuwa wati, Ndime Jesu ngopenzya, 6pele nyamuka unjile mumunzi, moyooambililwa ncoti kacite, 7Eno bantu mbaakali kweenda abo bakaima kabataambi, mbobalimvwa ijwi, pele kutabona muntu. 8Mpoonya Saulo wakabuka ansi, anamune meso aakwe taboni cintu, bamutembaizya ejanza, bamutola mu-Damasko, 9Mazuba otatwe kataboni, katalyi, katanywi cintu,
10Eno mu-Damasko kwakali sikwiiya uwali kutegwa Hananiya, Nkabela Mwami wakamwaambila mucilengaano kuti, Hananiya. Wavuwa wati, Ndimuuno, O mwami. 11Mwami wakati kulinguwe, Nyamuka uinke kunzila iitegwa lisuumene, kuŋanda ya-Juda, ukabuzye muntu uutegwa Saulo waku-Tarso, nkaambo ulakomba, 12walo wakabona mucilengaano mwaalumi uutegwa Hananiya ulanjila, ulamubika maanza kuti abone. 13Kwalo Hananiya wakavuwa wati, O mwami, ndakamvwa banjibanji aamuntu oyo, abubi bupati mbwaakacitila basalala bako bamu-Jerusalemu, 14mane akookuno ujisi bwami mbwaakapegwa kubapaizi bapati kwaanga boonse abakomba kuzina lyako. 15Mwami wateeti kulinguwe, Koya nkaambo oyu ndamusala abe uutola zina lyangu kulibamasi, akubami, akubana ba-Israyeli, 16nkaambo ndiyoomutondezya zinjizinji nzyeclede kuyoopengela zina lyangu, 17Nkabela Hananiya wakainka, waakunjila muŋanda eyo, wamubika maanza wati, Saulo mukwesu, Mwami, nguwenya Jesu uwakalibonya kulinduwe munzila njookaleta, wandituma kuti ubone, uzyule Muuya Uusalala. 18Ndilyonya kwakazwa kumeso aakwe aaba anga mapapa, wabona, Mpoonya wakanyamuka wabapatizigwa. 19Naakalya zilyo wakajana nguzu.
Elyo Saulo wakakala mazuba amwi abasikwiiya bamu-Damasko, 20Ndilyonya wakakambauka muzikombelo kuti Jesu Mwana a-Leza. 21Boonse abakamuswiilila bakayoowa bati, Sena oyu tali nguwe uwakali kuundunganya mu-Jerusalemu abakomba kuzina eli? Akookuno wakazida kuti abatole balaangidwe kubapaizi bapati. 22Kwalo Saulo wakali kuya bukomena kunguzu, wakabainda ba-Juda abakakede mu-Damasko kusinizya kuti Jesu ngu-Kristo.
23Naakamana mazuba manjimanji ba-Juda bakavwiyana kumujaya, 24pele Saulo wakaziba kukanza kwabo, Bakiilindilila milyango isikati amasiku kuti bamujaye, 25kwalo basikwiiya bakwe bakamutola masiku, bamuselusya kubwaanda mucisuwo.
26Eno Saulo naakasika ku-Jerusalemu, wakasoleka kuswaangana abasikwiiya, pele bakamuyoowa boonse, teebakali kusyoma kuti ngusikwiiya. 27Kwalo Barnaba wakamubweza wamutola kubaapostolo, wabalungulwida mbwaakabona Mwami munzila, akuti wakaamba awe, ambwaakali ecamba kukukambauka mu-Damasko muzina lya-Jesu, 28Elyo wakali kuya buzelengana abo mu-Jerusalemu, 29ulakambauka ecamba muzina lya-Mwami. Alimwi wakaambaula akukazyanya aba-Juda aba-Helene, pele balo bali kusoleka kumujaya. 30Kwalo babunyina nobakamvwa obo, bakamutola ku-Kaisareya, bamutuma ku-Tarso.
31Eno imbungano yamu-Judaya moonse, amu-Galilaya, amu-Samariya, yakaba aluumuno akuyumizigwa, alimwi yakayungililwa mboyakali kweenda akumuyoowa Mwami akubotezegwa Muuya Uusalala.
Makani aa-Petro a-Eneya
32Petro, naakaandulula mumasena oonse, wakasika kubasalala abakakede mu-Luda, 33Oko wakaakujana muntu uutegwa Eneya, uwakalilede abulo bwakwe myaaka iili musanu mwiitatu, nkaambo kayuminide mubili. 34Mpoonya awo Petro wakamwaambila kuti, Eneya, Jesu Kristo wakuponya, buka uyalule bulo bwako. Ndilyonya wakabuka. 35Eno bakamubona boonse abakakede mu-Luda amu-Sarona, bakasandukila ku-Mwami.
Makani aa-Tabita
36Eno mu-Jopa kwakalimo sikwiiya uwali kutegwa Tabita nkokuti neli sandulwa, Dorika. Oyo mukaintu wakalizywide milimo mibotu, aluzyalo ndwaakali kucita, 37Kumazuba ayo wakaciswa, wafwa. Nkabela bamusanzya, bamubika muŋanda yamujulu, 38Eno mbokuli kufwaafwi kuzwa ku-Jopa kuya ku-Luda, basikwiiya nobakamvwa kuti Petro nkwali, bamutumina bantu bobile kuyoomukumbila kuti, Utamuki kusika kulindiswe. 39Elyo Petro wakanyamuka wakainka abo. Nobakasika bakamutola muŋanda yamujulu. Kwakali awe bamukabafu boonse, balalila akumutondezya zibaki ezyakusama nzyaali kucita Dorika naacili abo. 40Kwalo Petro wakabatandila anze boonse, wafugama, wakomba. Nkabela wasandukila kumutunta wati, Tabita, buka. Ndilyonya wanamuna meso aakwe, naakabona Petro wakakala. 41Mpoonya awo wakamujata ejanza akumwiimika, naakaita basalala abamukabafu wakamubika kumbele lyabo muumi. 42Oku kwakamvwigwa moonse mu-Jopa, elyo banjibanji bakasyoma ku-Mwami. 43Eno wakakala ku-Jopa mazuba manjimanji kuli-Simoni, musuki wamasalu.
Currently Selected:
Incito 9: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.