MATHI 8
8
Jisuei Müt che Maitibü
(Mk 1.40-45; Lk 5.12-16)
1Hobaje ladang hao shongh ka louyenkei, noknyüh yaangbü che hao phai sembei. 2Hobaje chühashi, hao jungto imbü che louan hao thedanga lembo laukei, “Yaangbou, nyi maangangsije nyi ngo saüenkula thükkei.” 3Hobaje Jisuei haoeibü ik shingan hao to meitiko laukei, “Ngei maangangda; no saüenashi.” Kheijineitham haoeibü imshat ka saüenkei. 4Jisuei hao to laukei, “Chühashi, nyi aotokei telen; lausikei hauashi hoba no lolo ungshedbou la lenashi, hoba no maia dogo haoen to aukabü künla shanga Mosaei sakkubü jongsak lemashi.”
Jisuei Rombü Yaangbüeibü Sambü Maitibü
(Lk 7.1-10)
5Hobaje ladang hao Kapernaum to atkei, Saongao thükkabou che hao jungto louan hao to sukojako laukei, 6“Yaangbou, kü sambü tuokshatei shatko, aeibou khon kuko chema phetetnyu yepakei.”
7Hobaje haoei hao to laukei, “Ngo loulabü hoba hao maitilabü.” 8#NC 107.20 Lausikei Saongao thükkabouei jongaikei, “Yaangbou, no ngeibü chemsophang to lotla ngei amukei, lausikei ngüh kho ong lauashi hoba kü sambü mailabü. 9Aishanga kü phanga lakjaibü shuong phoan, ngokei songdak hau phanga kibü müt che ki. Hobaje ngei khüto lauda, ‘Khou’, hoba hao hauda; hoba lubü to, ‘Kaiya’, dogo lauda, hoba hao louda; hoba ngei ngeibü sambü to, ‘Ho kümashi’ dogo lauda, hoba haoei kho kümda.” 10Hobaje ladang Jisuei kho ditkei, hao maangpangkei hoba phaisembü shuong to laukei, “Ngühmaia ngei kan to lenda, ho tegübü mailem yaangbü Israel yoa ngei aineikei ühüp. 11#Mal 1.11 Ngei kan to lenda, chaang hoba chanep ka juongnyu loulabü hoba Abraham hoba Isak hoba Jakob yoa setshanga khuthüka setlabü; 12lausikei Sangleeibü püshi shuongje nongbü nakthüha aplabü; khonei haapbü hoba hauh uyobü kilabü.” 13Hobaje Jisuei Saongao thükkabou to laukei, “Hauashi, nyi mailembü tegü kho shanga kümlabü.” Hobaje sambü kho kho jih khünei maian apbei.
Jisuei Müt juongnyu Maitibü
(Mk 1.29-34; Lk 4.38-41)
14Hobaje ladang Jisu Peter chem to loukei, haoei Peter yakeibü nyu mangpokei shatko shena lengan hapbei. 15Hobaje Bunyubouei saoeibü ika jungkei hoba mangpokei sao apyokei, hoba sao laksepbei hoba hao la nongnaekukei.
16Hobaje ladang chasem sühkei haoenei hao jungto shabü souei lapbü juongnyu leibakukei. Hobaje haoei shabü sou shuong kho welausansanbü ngüh cheei shian sattikei, hoba shatsinyat pendou maitikei. 17#Isa 53.4 Kho Isaia thuseibüei, “Haoei sen athükamin langkukei, hoba seneibü shatsinyat thonglangkukei” dogo laubü ngüh loushedtila yingan kiteikei.
Jisueibü Eik Yingjan shuong
(Lk 9.57-62)
18Ladang Jisuei hao kaijembo noknyüh yaangbü che hapbei, haoei dei thidang to khatla ngühkhüm kukei. 19Hobaje Ngühkhüm lenbou che loukei hoba hao to laukei, “Lenbou, no lae to haulaje ngei kaphai semlabü.” 20Hobaje Jisuei hao to laukei, “Selong shuongei laangbob ki hoba mühkabü au shuongei hap kia; lausikei Müteibü Shouje hao khu nongshang aki.” 21Haoeibü eik cheei hao to laukei, “Yaangbou, ngo shaang hauan kübou khünla sakkubü.” 22Lausikei Jisuei hao to laukei, “Kü phai semashi, hoba haibü shuong la haoen haibü khünla phoyoashi.”
Jisuei Yeinak Thaktibü
(Mk 4.35-41; Lk 8.22-25)
23Hobaje ladang hao long che to atkei hao eikshuongei haophai sembei. 24Hobaje chühashi, thim khonei yeishik yaang lotkei, khoei long kho deishouei danglepbo yeikei. Lausikei Jisu je yepan kiteikei. 25Hobaje haoen hao jungto loukei hoba pitiko laukei, “Bunyubou, kün püetashi, kün shemetda.” 26#NC 65.7 Hobaje haoei haoen to laukei, “Kan aila hatda, mailem hanbü shuong?” Kheijinei hao laksepkei, hoba yei si deishou to kaang hakkei, hoba jemetshouko kikei. 27Hobaje mütshuongei maangpangkei hoba laukei, “Yei si deiei mangkei hao ngüha lelabü ho ailaibü müt?”
Jisuei Shabü Sou kibü Müt Nyi Maitibü
(Mk 5.1-20; Lk 8.26-39)
28Hobaje hao yungko thidang to Gadara kaonyek to loukei, hoba shabü souei lapbü müt nyi heelaak ka longbüei hao to haüyokei. Haosi aeibou sekbülakbü yingsije aoeikei kho lam to adan. 29Hobaje chühashi, haosiei ngekko laukei, “Mühghaü Shou, nyi aila kün peksekda? Jih asühko kün khonkutila no hato loukei lo?” 30Haoen ka tuisho hean uk shuong che lamshauko kiteikei. 31Shabü sou shuongei hao to sukojako laukei, “Nyi kün shian sattisije, kün ukshuong yoto hautikai.”
32Jisuei haoen to laukei, “Hauashi.” Hobaje haoen longkei hoba ukshuong to atkei; hoba ukshuong pendou laanglip to nyuyoko yungnyu to atkei hoba deia shemetkei. 33Hobaje uklombü shuong satyokei hoba sangnyu to haukei. Khünei haoenei kongnyu leko shabü souei lapbü shangabü hoba haüthükbü ajanjan pendou lenkei. 34Hobaje chühashi, sangnyubü shuong pendou Jisu to haüyola longkei, hoba ladang haoenei hao hapbei, haoeneibü kaophei apyola shanga haoenei hao to sukeijakei.
Currently Selected:
MATHI 8: CHANGBSI
Highlight
Share
Copy
Want to have your highlights saved across all your devices? Sign up or sign in
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.