MATHI 27
27
Jisu Pilat Jungto Leian Haubü
(Mk 15.1; Lk 23.1-2; Jn 18.28-32)
1Ladang lang ngekei, ungshedbou shuong hoba jaishou shuong pendouei Jisu haitila shanga hao khulimbo lauyokei; 2hoba haoenei hao khühkei, hoba leian hauan Pilat governor la khümbo meiko kuan apbei.
Judas Haibü
(Ykj 1.18-19)
3Ladang hao yakshaubou Judasei Jisu la shedbü kubü hapbei, hao jembü lolo maangpon sepeikei, hoba ungshedbou shuong si jaishou shuong jungto nam khujin kho sungbako laukei, 4“Shedbü akibü müt che haitila yaakshaubü ka ngei shabü shona.” Lausikei haoenei laukei, “Hoei künla ai yingla? Kamaang leshi.” 5Haoei lembü chema nam kho apyoan satkei, hoba hao satan jembü lolo phenetnyu haikei. 6Ungshedbou shuongei nam kho jungan laukei, “Ho sii munam yingsije ho lembü chem namphot to jinjan aying.” 7Haoenei lau- yoan khoei yensiau mang khünshang shanga chakyaüboueibü kao phoukei. 8khoei tat sühko kho kao to Siieibü Sekphai dogo lauda. 9Kheijinei Jeremia thuseibouei laubü ngüh kho loushedkei: “Israel shousi yoa atei laobou müt shangabü namngüm tetkei, kho namngün tetbü müteibü mu sempak khujin haoenei lekei, 10hoba Bunyubouei kü la sakkubü tegü, haoenei kho chakyaüboueibü sekphai shanga kukei.”
Pilatei Jisu to Ngüh Phebü
(Mk 15.2-5; Lk 23.3-5; Jn 18.33-38)
11Jisu governor thedanga lotikei, hoba governorei hao to phekei, “No Jihudabü Choba sai?” Jisuei laukei, “Kho nyi lauda.” 12Ungshedbou shuong hoba jaishou shuongei hao yuktijinei haoei ai ajongai. 13Kheijinei Pilatei hao to laukei, “Haoenei ka khu limbo aukabü lajuche sungbada kho nyi aditda lo?” 14Lausikei haoei hao to ngühpem che ongkei ajongai, khoei governor aeibou maangpangkei.
Jisu Haibü
(Mk 15.6-15; Lk 23.13-25; Jn 18.39—19.16)
15Kho lema, shuong la maangangbü thüngdang kabü che haoen la litikulabü kho governor song kikei. 16Kheijinei Baraba nyenbü amaibü nyenshen che thüngdanga kiteikei. 17Hibü haoen liko takshatan kijinei Pilatei haoen to laukei, “Ngei kan la ao litila kanei maangangda? Baraba si ayingsi Messia dogo laubou Jisu?” 18Aishanga theshoubüei haoenei hao khümbo kukei dogo haoei ngekei.
19Hao matjem setshanga setan kijinei haoyakei hao jungto hautiko laukei, “Ho shedbü akibü müt shanga nyi ai teküm aishanga ngo tat hao shangabüa mangha aeibou khonsaka.”
20Lausikei ungshedbou shuong si jaishou shuongei haoen shanga Baraba litian Jisu haitishi dogo lautila noknyüh suletkei. 21Governorei haoen to jongaikei, “Khünyi yo ka ngei kan la ao litikula kanei maangangda?” Haoenei laukei, “Baraba.” 22Pilatei haoen to laukei, “Khülonga Messia dogo laubou Jisu to ngei ai kümla?” Haoen pendouei laukei, “Hao peiseia thüngashi!” 23Haoei laukei, “Aila, haoei ai amaibü kümbei?” Lausikei haoenei aei aei kaangbou ngekko laukei, “Hao peiseia thüngashi!” 24Pilatei hao ngüh ai ühaüthük lausikei noknyüh pühnyintibü ong hapan, haoei dei sungbaan noknyüh thedanga ik sakko laukei, “Ho müt haibüa ngeibü onat aki. Kan maang leshi.” 25Müt pendouei jongaikei, “Hao sii kün thükto hoba kün shousi shuong thükto yingshi.” 26Kheijinei haoei haoen jungto Baraba litikei, lausikei haoei Jisu to sembei hoba peiseia thüngla khümbomeiko kukei.
Sepai shuongei Jisu Nyikubü
(Mk 15.16-20; Jn 19.2-3)
27Kheijinei governor sepai shuongei Jisu Choba chemto leian atkei; hoba sepai san pendou hao kaijembo kambei. 28Haoenei haoeibü nei khuokkei hoba hao la nakthüngle sakbü nei che neikukei; 29hoba jakei Choba khun che yikan haoeibü khua hankukei; hoba haoeibü mae ika liju che jungtikei; hoba haoenei hao thedanga khüpetan nyikuko laukei, “Jihudabü Choba, maisho kishi!” 30Haoenei hao to eokei thokkei, hoba liju kho soan haoeibü khu to ngümbei. 31Haoenei hao la nyikuan phaia, hao ka nakthüngle sakbü nei kho sungngaikei hoba hao la jembü neisimei lekukei, hoba hao peiseia thüngla leilangkei.
Jisu Thüngbü
(Mk 15.21-32; Lk 23.26-43; Jn 19.17-27)
32Haoen longjinei haoenei Simon nyenbü Kurinibü müt che hapbei. Haoenei hao la Jisueibü peisei pela jangkukei. 33Ladang haoen Golgotha, tetlabü, “Khulo kaoen” che to loukei, 34haoenei Jisu la ih khauekbü to kheian yungla kukei; lausikei haoei kho jepan chühan yungla asunglet. 35#NC 22.18 Haoenei hao peiseia thüngan phaia phaang pakko, haoeibü neisimei janan lekei; 36hoba haoen setan hao lombo kikei. 37Haoeibü khu thüka, “HO JIHUDABÜ CHOBA JISU” dogo doan thipbei.
38Kheijinei hao yoa kokbü müt nyi, che maenei hoba che nanaenei dogo thüngkei. 39Haubü ngaibü shuongei jembü khu ngomeiko hao to nyikuko 40laukei, “No Lembüchem leilutian chalou semnyeta danglabü mút, no lolo püetashi; no Mühghaü Shou longa peisei ka lotashi.”
41Kho tegü ong ungshedbou shuongeikei, Ngühkhüm lenbou shuong si jaishou shuong yoa hao nyikuko laukei, 42“Haoei mü püetkei; jembüje püetla athük. Hao Israelbü Choba yingkei! Tou hao peisei ka lotashi hoba künei hao to mailemlabü. 43Haoei Mühghaü to maanglembei; Mühghaüei hao to maangshikda longa, tou hao Mühghaüei napüeta; aishanga haoei, ‘Ngo Mühghaü Shou’ dogo laukei.” 44Hao yoa peiseia thüngbü kokbü shuongeikei kho tegütham hao to nyikukei.
Jisu Haibü
(Mk 15.34-41; Lk 23.44-49; Jn 19.28-30)
45Anthüknyi jih ka sem jih sühko kaodak khümboa nakthühkei. 46Sem jih thünga Jisuei ngüh yaangbüei ngekko laukei, “Eli, Eli, lema sabakthani?” kho tetlabü, “Kü Mühghaü, kü Mühghaü, aila nyi ngo apyokei?” 47Khünei loan kibü atei kho ditjinei laukei, “Haoei Elija ngada.” 48Haoen yoa müt cheei langjung hauan, od che sungbakei hoba kho haijepbüa haman phodong chenei lonan hao la yungla kukei. 49Lubü shuongei laukei, “Elija hao püetla loula si aloulaje senei chühkho.” 50Jisuei nyibou ngüh yaangbüei ngekkei hoba jembü soushou bangtikei. 51Lembüchem thangtet nei kho thük ka koubü kaoa atko penyi la jitnyinkei, hoba selo nyikei, hoba laangdak shuong nyinkei, 52hoba hee shuong ipbei hoba nyeket shibü saopobü mang juongnyu langngaitikei; 53hoba hao langngaian phaia haoen hee ka longkei hoba Saopobü Sangnyu to atan juong la haptikei. 54Saongao thükkabou, hoba hao yoa lombo kibü shuongei selonyibü hoba haüthükbü kümsilei shuong hapan aeibou hatkei. Haoenei laukei, “Maimaitham ho müt Mühghaü Shou yinga!” 55Yaksa shuong juong hebü ka chühko kikei. Haoen Galil ka Jisu phai sembei hoba hao to thuiyokei.
56Haoen yoa Mari Magdalin, Jakob si Josefeibü nyu Mari, hoba Zebedi shousi shuongeibü nyu yoan kikei.
Jisu Khünbü
(Mk 15.42-47; Lk 23.50-56; Jn 19.38-42)
57Chasem, Arimathia ka Josef nyenbü keibü müt che, haokei Jisu eik, khüto loukei. 58Hao Pilat jungto haukei hoba Jisueibü mang hikei. Kheijinei Pilatei kho kuan apla sakkukei. 59Josefei mang kho sungletkei hoba kho hinseibü nei inyaibüei shokei 60hoba haoei laang jakenan phobü jembü hee haanbüa kho phokei, hoba haoei hee koukhüna laang yaangbünyu thangan phoan satkei. 61Mari Magdalin si lubü Mari heekou tangko setan kikei.
Heekhüna Lombü
62Nyibounyet, kho Lamlebü chalou phainyet, ungshedbou shuong liko Pilat jungto loukei 63hoba laukei, “Yaangbou, ho yepeibouei, ‘Chalou semnyet kian ngo langngailabü’, dogo hao lang kijinei laubü künei damenda. 64Hibü sembounyet sühko hee lomla ngühkhüm kubüma, aingenyu hao eikshuong louan hao koklanglabü hoba mütshuong to, ‘Hao haibü ka langngaia’ dogo laulabü; hoba thonbou khüpsilang kho shaangbou tokei amaibou yinglabü.” 65Pilatei haoen to laukei, “Lombü leashi. Hauashi hoba hee kho kanei thükbü tegü lomtiashi.” 66Haoen haukei hoba lombü shuong thedanga laanga amaaphilabü shangjinan lomtikei.
Currently Selected:
MATHI 27: CHANGBSI
Highlight
Share
Copy
Want to have your highlights saved across all your devices? Sign up or sign in
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.
MATHI 27
27
Jisu Pilat Jungto Leian Haubü
(Mk 15.1; Lk 23.1-2; Jn 18.28-32)
1Ladang lang ngekei, ungshedbou shuong hoba jaishou shuong pendouei Jisu haitila shanga hao khulimbo lauyokei; 2hoba haoenei hao khühkei, hoba leian hauan Pilat governor la khümbo meiko kuan apbei.
Judas Haibü
(Ykj 1.18-19)
3Ladang hao yakshaubou Judasei Jisu la shedbü kubü hapbei, hao jembü lolo maangpon sepeikei, hoba ungshedbou shuong si jaishou shuong jungto nam khujin kho sungbako laukei, 4“Shedbü akibü müt che haitila yaakshaubü ka ngei shabü shona.” Lausikei haoenei laukei, “Hoei künla ai yingla? Kamaang leshi.” 5Haoei lembü chema nam kho apyoan satkei, hoba hao satan jembü lolo phenetnyu haikei. 6Ungshedbou shuongei nam kho jungan laukei, “Ho sii munam yingsije ho lembü chem namphot to jinjan aying.” 7Haoenei lau- yoan khoei yensiau mang khünshang shanga chakyaüboueibü kao phoukei. 8khoei tat sühko kho kao to Siieibü Sekphai dogo lauda. 9Kheijinei Jeremia thuseibouei laubü ngüh kho loushedkei: “Israel shousi yoa atei laobou müt shangabü namngüm tetkei, kho namngün tetbü müteibü mu sempak khujin haoenei lekei, 10hoba Bunyubouei kü la sakkubü tegü, haoenei kho chakyaüboueibü sekphai shanga kukei.”
Pilatei Jisu to Ngüh Phebü
(Mk 15.2-5; Lk 23.3-5; Jn 18.33-38)
11Jisu governor thedanga lotikei, hoba governorei hao to phekei, “No Jihudabü Choba sai?” Jisuei laukei, “Kho nyi lauda.” 12Ungshedbou shuong hoba jaishou shuongei hao yuktijinei haoei ai ajongai. 13Kheijinei Pilatei hao to laukei, “Haoenei ka khu limbo aukabü lajuche sungbada kho nyi aditda lo?” 14Lausikei haoei hao to ngühpem che ongkei ajongai, khoei governor aeibou maangpangkei.
Jisu Haibü
(Mk 15.6-15; Lk 23.13-25; Jn 18.39—19.16)
15Kho lema, shuong la maangangbü thüngdang kabü che haoen la litikulabü kho governor song kikei. 16Kheijinei Baraba nyenbü amaibü nyenshen che thüngdanga kiteikei. 17Hibü haoen liko takshatan kijinei Pilatei haoen to laukei, “Ngei kan la ao litila kanei maangangda? Baraba si ayingsi Messia dogo laubou Jisu?” 18Aishanga theshoubüei haoenei hao khümbo kukei dogo haoei ngekei.
19Hao matjem setshanga setan kijinei haoyakei hao jungto hautiko laukei, “Ho shedbü akibü müt shanga nyi ai teküm aishanga ngo tat hao shangabüa mangha aeibou khonsaka.”
20Lausikei ungshedbou shuong si jaishou shuongei haoen shanga Baraba litian Jisu haitishi dogo lautila noknyüh suletkei. 21Governorei haoen to jongaikei, “Khünyi yo ka ngei kan la ao litikula kanei maangangda?” Haoenei laukei, “Baraba.” 22Pilatei haoen to laukei, “Khülonga Messia dogo laubou Jisu to ngei ai kümla?” Haoen pendouei laukei, “Hao peiseia thüngashi!” 23Haoei laukei, “Aila, haoei ai amaibü kümbei?” Lausikei haoenei aei aei kaangbou ngekko laukei, “Hao peiseia thüngashi!” 24Pilatei hao ngüh ai ühaüthük lausikei noknyüh pühnyintibü ong hapan, haoei dei sungbaan noknyüh thedanga ik sakko laukei, “Ho müt haibüa ngeibü onat aki. Kan maang leshi.” 25Müt pendouei jongaikei, “Hao sii kün thükto hoba kün shousi shuong thükto yingshi.” 26Kheijinei haoei haoen jungto Baraba litikei, lausikei haoei Jisu to sembei hoba peiseia thüngla khümbomeiko kukei.
Sepai shuongei Jisu Nyikubü
(Mk 15.16-20; Jn 19.2-3)
27Kheijinei governor sepai shuongei Jisu Choba chemto leian atkei; hoba sepai san pendou hao kaijembo kambei. 28Haoenei haoeibü nei khuokkei hoba hao la nakthüngle sakbü nei che neikukei; 29hoba jakei Choba khun che yikan haoeibü khua hankukei; hoba haoeibü mae ika liju che jungtikei; hoba haoenei hao thedanga khüpetan nyikuko laukei, “Jihudabü Choba, maisho kishi!” 30Haoenei hao to eokei thokkei, hoba liju kho soan haoeibü khu to ngümbei. 31Haoenei hao la nyikuan phaia, hao ka nakthüngle sakbü nei kho sungngaikei hoba hao la jembü neisimei lekukei, hoba hao peiseia thüngla leilangkei.
Jisu Thüngbü
(Mk 15.21-32; Lk 23.26-43; Jn 19.17-27)
32Haoen longjinei haoenei Simon nyenbü Kurinibü müt che hapbei. Haoenei hao la Jisueibü peisei pela jangkukei. 33Ladang haoen Golgotha, tetlabü, “Khulo kaoen” che to loukei, 34haoenei Jisu la ih khauekbü to kheian yungla kukei; lausikei haoei kho jepan chühan yungla asunglet. 35#NC 22.18 Haoenei hao peiseia thüngan phaia phaang pakko, haoeibü neisimei janan lekei; 36hoba haoen setan hao lombo kikei. 37Haoeibü khu thüka, “HO JIHUDABÜ CHOBA JISU” dogo doan thipbei.
38Kheijinei hao yoa kokbü müt nyi, che maenei hoba che nanaenei dogo thüngkei. 39Haubü ngaibü shuongei jembü khu ngomeiko hao to nyikuko 40laukei, “No Lembüchem leilutian chalou semnyeta danglabü mút, no lolo püetashi; no Mühghaü Shou longa peisei ka lotashi.”
41Kho tegü ong ungshedbou shuongeikei, Ngühkhüm lenbou shuong si jaishou shuong yoa hao nyikuko laukei, 42“Haoei mü püetkei; jembüje püetla athük. Hao Israelbü Choba yingkei! Tou hao peisei ka lotashi hoba künei hao to mailemlabü. 43Haoei Mühghaü to maanglembei; Mühghaüei hao to maangshikda longa, tou hao Mühghaüei napüeta; aishanga haoei, ‘Ngo Mühghaü Shou’ dogo laukei.” 44Hao yoa peiseia thüngbü kokbü shuongeikei kho tegütham hao to nyikukei.
Jisu Haibü
(Mk 15.34-41; Lk 23.44-49; Jn 19.28-30)
45Anthüknyi jih ka sem jih sühko kaodak khümboa nakthühkei. 46Sem jih thünga Jisuei ngüh yaangbüei ngekko laukei, “Eli, Eli, lema sabakthani?” kho tetlabü, “Kü Mühghaü, kü Mühghaü, aila nyi ngo apyokei?” 47Khünei loan kibü atei kho ditjinei laukei, “Haoei Elija ngada.” 48Haoen yoa müt cheei langjung hauan, od che sungbakei hoba kho haijepbüa haman phodong chenei lonan hao la yungla kukei. 49Lubü shuongei laukei, “Elija hao püetla loula si aloulaje senei chühkho.” 50Jisuei nyibou ngüh yaangbüei ngekkei hoba jembü soushou bangtikei. 51Lembüchem thangtet nei kho thük ka koubü kaoa atko penyi la jitnyinkei, hoba selo nyikei, hoba laangdak shuong nyinkei, 52hoba hee shuong ipbei hoba nyeket shibü saopobü mang juongnyu langngaitikei; 53hoba hao langngaian phaia haoen hee ka longkei hoba Saopobü Sangnyu to atan juong la haptikei. 54Saongao thükkabou, hoba hao yoa lombo kibü shuongei selonyibü hoba haüthükbü kümsilei shuong hapan aeibou hatkei. Haoenei laukei, “Maimaitham ho müt Mühghaü Shou yinga!” 55Yaksa shuong juong hebü ka chühko kikei. Haoen Galil ka Jisu phai sembei hoba hao to thuiyokei.
56Haoen yoa Mari Magdalin, Jakob si Josefeibü nyu Mari, hoba Zebedi shousi shuongeibü nyu yoan kikei.
Jisu Khünbü
(Mk 15.42-47; Lk 23.50-56; Jn 19.38-42)
57Chasem, Arimathia ka Josef nyenbü keibü müt che, haokei Jisu eik, khüto loukei. 58Hao Pilat jungto haukei hoba Jisueibü mang hikei. Kheijinei Pilatei kho kuan apla sakkukei. 59Josefei mang kho sungletkei hoba kho hinseibü nei inyaibüei shokei 60hoba haoei laang jakenan phobü jembü hee haanbüa kho phokei, hoba haoei hee koukhüna laang yaangbünyu thangan phoan satkei. 61Mari Magdalin si lubü Mari heekou tangko setan kikei.
Heekhüna Lombü
62Nyibounyet, kho Lamlebü chalou phainyet, ungshedbou shuong liko Pilat jungto loukei 63hoba laukei, “Yaangbou, ho yepeibouei, ‘Chalou semnyet kian ngo langngailabü’, dogo hao lang kijinei laubü künei damenda. 64Hibü sembounyet sühko hee lomla ngühkhüm kubüma, aingenyu hao eikshuong louan hao koklanglabü hoba mütshuong to, ‘Hao haibü ka langngaia’ dogo laulabü; hoba thonbou khüpsilang kho shaangbou tokei amaibou yinglabü.” 65Pilatei haoen to laukei, “Lombü leashi. Hauashi hoba hee kho kanei thükbü tegü lomtiashi.” 66Haoen haukei hoba lombü shuong thedanga laanga amaaphilabü shangjinan lomtikei.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.