MATHI 20
20
Semlühlaaka Khüpbü shuong
1“Khuthük Sangle sekbubou che haoeibü semlühlaaka khüptila shanga ngeyang ete eik lamla haubü phatkei. 2Haoei mulambü shuong to chaloua sempak che bang kula theyoan, haoei semlühlaak to haoen koutikei. 3Hao ngeyang angh gü thünga haukei hoba lubü at ai kümlaleila akiko namyakshanga loan hapbei; 4hoba haoei haoen to laukei, ‘Kankei semlühlaak to kouashi, hoba ngei kan la ai mulaje kho kulabü.’ 5Hobaje haoen koukei. Tokei hao chajihboua hoba chasemlamto sem thünga dogo haukei hoba jeteitham kümbei. 6Angh ngao thünga hao haukei, hoba lubü shuong loan hapbei. Haoei haoen to laukei, ‘Kan hanei aila chaseko ai kümbo loda?’ 7Haoenei hao to laukei, ‘Aishanga kün aoeikei eik alam.’ Haoei haoen to laukei, ‘Kankei semlühlaak to kouashi.’
8“Ladang chasem sühkei sekbunyuei haoeibü ikjaibou to laukei, ‘Kümbüleibü shuong ngaashi, hoba haoen phaibou ka khangan shaangboubü sühko la, jembü mu kuashi.’ 9Chasemlamto angh ngao jih thünga koutibü shuong loukei hoba haoen mütpem wekoei sempak che bang sungletkei. 10Ladang shaang koutibü shuong loukei, haoenei aei haplabü dogo dambei; lausikei haoeneikei sempak che bang ong hapbei. 11Ladang haoenei kho hapbei haoenei sekbubou khulimbo nyamnyambo, 12laukei, ‘Habü phai loubü shuongei angh che ong kümbeileikei, hoba kün aoyouei chaseko hüko chanyuei juokbü natko khüpbei, nyi haoen kün to jeteitham yeitikei!’
13“Haoei haoen yo kabü che to jongaikei, ‘Jena, ngei ka to aikei thechühbü akümda. Nyi kü to sempak che shanga atheyo lo? 14Ka shangabü ai yingkeije kho sungashi hoba ngaiashi. Ho phaibou la ka to jetei kulabü kho kü maang yingkei. 15Ngeibüei ngei kü maangleko kümjan aying lo? Ngo maangshikbü shanga nyi nyekto shatda sai?’ 16Hibü phaibü shuong shaanglabü hoba shaangbü shuong phailabü.”
Jisuei Hao Hailabü shangabü Semboula Lenbü
(Mk 10.32-34; Lk 18.31-34)
17Jisu Jerusalem to angjinei, eikshuong anthüknyi kho ong hao yoa leikei, hoba lama haoei haoen to laukei, 18“Ditashi, sen Jerusalem to angda, hoba Müteibü Shou ungshedbou shuong hoba Ngühkhüm lenbou shuong ik to khümbo kuan aplabü. Haoenei hao haitila shedbü kulabü, 19hoba nyikulabü, semlabü hoba peiseia thünglabü shanga küksithang ikmang to khümbo kuan aplabü, hoba hao sembounyet langngailabü.”
Nyu cheei Subüjabü
(Mk 10.35-45)
20Kheijinei Zebedi shou nyieibü nyu jembü shounyi yoa hao jungto louan, hao lembo, hao to denche sukeijakei. 21Haoei sao to laukei, “Nyi ai mangsühda?” Saoei hao to laukei, “Habü kü shounyi, ka Sanglea kaibü mae aenei che hoba nanaenei che settila sakkuashi.” 22Jisuei haoen to laukei, “Kanei ai phedaje kho kanei angekei. Ngei tou yungla kibü thung kho kanei yungenlep lo?” Haoenei hao to laukei, “Künei thükakei.” 23Haoei haoen to laukei, “Maimaitham kü thung ka yunglabü, lausikei kü mae aenei hoba nanaenei settila khoje ngei kulabü ji; lausikei Kübouei kho aoyou shanga lamlekei khübü shangabü ki.”
24Ladang an khoei ditkei, haoenei jaisinanyi khüto mang- pokkei. 25Lausikei Jisuei haoen ngakei hoba laukei, “Küksithang songdakbü shuongei haoen thüka bunyu yeida, hoba haoeneibü yaangbü shuongei haoen thüka hau jungeida, kho kanei ngekei. 26Kan yoaje khei ayinglabü, lausikei kan yoa aoei yaangmang sühda, hao kan khangenbou yingjan, 27hoba kan yoa ao shaangmang sühda, hao kaneibü aao yingjan. 28Kho tegütham Müteibü Shou khangentila ji, lausikei khangenla, hoba juongnyu angla jembü langkei kula loukei.”
Jisuei Nyekthubü Müt Nyi Maitibü
(Mk 10.46-52; Lk 18.35-43)
29Haoenei Jerikho apyojinei mütshang yaang haophai sembei. 30Lamkoa setan kibü nyekthubü müt nyiei Jisu danko ditan ngekko laukei, “Dawid Shou Yaangbou, küsi to onoukai!”
31“Alemenko kiashi” dogo noknyühei haosi to hakkei, lausikei haosiei aei kaangbou ngekkei, “Dawid Shou Yaangbou, küsi to onoukai!” 32Hibü Jisuei sangsembo loan, haosi ngako laukei, “Ngei kasi shanga ai kümtimang sühda?” 33Haosiei hao to laukei, “Yaangbou, küsieibü nyek iptikumang sühda.” 34Jisuei sanouko dambei hoba haosieibü nyek to meitikei. Kheijinei haosiei hapbei hoba haophai sembei.
Currently Selected:
MATHI 20: CHANGBSI
Highlight
Share
Copy
Want to have your highlights saved across all your devices? Sign up or sign in
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.