Maˍlaˍhkiˆ li‸ 1
1
Gʼuiˬsha Iˉsaˍreˍlaˆ chaw hta‸ ha‸ ve
1Chi lehˬ Iˉsaˍreˍlaˆ chaw hui hta‸ kʼoˆ piˇ tuˬ, Maˍlaˍhkiˆ geh gaˬ la ve Gʼuiˬsha ve tawˇ hkawˇ hpeh‸ ve yoˬ.
2Ngaˬ nawˬ hui hta‸ hkʼaˬ htaˆ ka‸ ha‸ chehˇ ve yoˬ, teh‸ Gʼuiˬsha kʼoˆ ve yoˬ.
Ya‸ hkʼaˇ nawˬ hui lehˬ, Nawˬ ngaˬ hui hta‸ ha‸ ve hkʼaˬ hkʼe te hpeu‸ maˍ laˇ ve le, teh‸ kʼaw‸ yaw hkʼaw‸ piˇ ve yoˬ.
Gʼuiˬsha kʼaw‸ yaw hkʼaw‸ leh kʼoˆ ve, Iˉsawˇ leh Yaˍkoˆ lehˬ awˬ viˉ awˬ nyi hpeh‸ ve yoˬ. Ya‸ hkʼaˇ, ngaˬ lehˬ Yaˍ koˆ leh yawˇ ve awˬ ceuˬ awˬ hkʼaˇ teˇ hpaˍ hta‸ ha‸ leh, 3Iˉsawˇ leh yawˇ ve awˬ ceuˬ awˬ hkʼaˇ teˇ hpaˍ hta‸ canˇ ve yoˬ. Ngaˬ lehˬ, Iˉsawˇ ve mvuhˇmiˬ hta‸ te luˬ te sheˆ leh, to nuˇ to shaˆ teˇ hpaˍ ve chehˇ kuiˬ hpeh‸ la piˇ taˍ ve yoˬ, teh‸ kʼoˆ ve yoˬ.
4Iˉsawˇ ve awˬ ceuˬ awˬ hkʼaˇ Eˇdonˍ chaw teˇ hpaˍ lehˬ, Ngaˬ hui ve venˇ teˇ hpaˍ luˬ kʼai peuˬ. Ya‸ hkʼaˇ, ngaˬ hui kʼaw‸ gu te tuˬ yoˬ, teh‸ kʼoˆ ve teˇ yanˇ, Gʼuiˬsha kʼaw‸ yaw hkʼaw‸ leh kʼoˆ ve, Nawˬ hui kʼaw‸ gu te gaˇ ve kʼo kʼaw‸ gu te-o. Ya‸ hkʼaˇ, ngaˬ kʼaw‸ te luˬ laˇ tuˬ yoˬ. Chaw yaˇ teˇ hpaˍ lehˬ mvuhˇmiˬ oˇ ve hta‸, haiˬ ve mvuhˇmiˬ leh Gʼuiˬsha co co taiˍ taiˍ nyi ma zuhˆ ve mvuhˇmiˬ, teh‸ kʼoˆ tuˬ yoˬ.
5Chi hkʼe hpeh‸ la ve hta‸ Iˉsaˍreˍlaˆ chaw teˇ hpaˍ mehˆ shiˍ hkʼa tawˍ lehˆ gʼa mawˬ leh, Gʼuiˬsha lehˬ awˬ nu ve mvuhˇmiˬ teˇ hpaˍ awˬ hkʼoˆ lo htawˇ kanˇ paˆ cawˬ ve yoˬ teh‸ nawˬ hui kʼoˆ tuˬ yoˬ.
Paw hkuˇ teˇ hpaˍ hta‸ Gʼuiˬsha deˇ maˍ ve
6Paw hkuˇ teˇ hpaˍ hta‸ Gʼuiˬsha chi hkʼe kʼoˆ piˇ ve yoˬ. Yaˇ paˍ lehˬ, awˬ pa hta‸ taˍ uiˍ leh, awˬ ceˬ lehˬ awˬ shehˍ hpaˇ hta‸ taˍ uiˍ ve yoˬ. Ngaˬ lehˬ, nawˬ hui ve awˬ pa hpeh‸ ve yoˬ. Aˬ hto‸ ma pa taw, nawˬ hui ngaˬ hta‸ maˇ taˍ uiˍ ve le. Ngaˬ lehˬ, nawˬ hui ve awˬ shehˍ hpaˇ hpeh‸ ve yoˬ. Aˬ hto‸ ma pa taw, nawˬ hui ngaˬ hta‸ maˇ yawˆ yan ve le. Nawˬ hui ngaˬ hta‸ chiˇ baˬ leh, Ngaˬ hui nawˬ hta‸ hkʼaˬ hkʼe te chiˇ baˬ ve le, teh‸ kʼoˆ chehˇ ve yoˬ. 7Chi hkʼe yoˬ. Nawˬ hui lehˬ cha‸ chiˆ ve caˇ tuˬ teˇ hpaˍ hta‸ ngaˬ ve tuˉ tanˇ kuiˬ hkʼoˆ lo tuˉ tanˇ leh, Ngaˬ hui nawˬ hta‸ hkʼaˬ hkʼe maˇ yawˆ maˇ yan te ve le, teh‸ kʼoˆ chehˇ ve yoˬ. Ngaˬ nawˬ hui hta‸ kʼoˆ laˇ shaˍ. Nawˬ hui lehˬ, ngaˬve tuˉ tanˇ kuiˬ hta‸ maˇ shawˍ maˇ caˆ te ve yoˬ. 8Nawˬ hui lehˬ, mehˆ cuˉ ve, naˬ chehˇ ve, hkui hteh ve to nuˇ to shaˆ hta‸ yuˬ veu laˇ leh, ngaˬ hta‸ ca tuˉ tanˇ laˇ ve chi, cawˇ chehˇ ve yoˬ, teh‸ nawˬ hui dawˇ ve laˇ. Nawˬ hui hta‸ uˉ peunˍ chehˇ ve jawˇmawˇ hta‸, chi hkʼe ve to nuˇ to shaˆ ca yuˬ piˇ hkʼa nyi. Yawˇ nawˬ hui hta‸ nyi ma cawˇ tuˬ ve laˇ, teh‸ kʼoˆ ve yoˬ.
9Paw hkuˇ teˇ hpaˍ-oˬ, Gʼuiˬsha nawˬ hui hta‸ bon na‸ laˇ tuˬ, chi beu‸ bon gʼaˇ hte‸ lawˬ-o‸. Yawˇ nawˬ hui ve bon lawˬ hkawˇ hta‸ na yuˬ laˇ tuˬ ve maˇ heˆ. Chi hkʼe hpeh‸ ve lehˬ, nawˬ hui ve venˇbaˆ hta‸ pa taw yoˬ. 10Kanˇ paˆ uiˍ ve Jawˇmawˇ Gʼuiˬsha kʼoˆ ve, Ngaˬ ve tuˉ tanˇ kuiˬ hkʼoˆ lo nawˬ hui te‸ chiˉ awˬ bon maˇ cawˬ ve aˬ miˍ maˇ gʼa ca tuˉ tuˬ, nawˬ hui awˬ hkʼaw lo ve chaw teˇ gʼaˇ gʼaˇ, bon yehˬ ve yehˬ miˉ hta‸ ngaˬ ca hoˆ tcuh piˇ lawˬ gaˇ ve yoˬ. Nawˬ hui te chehˇ ve kanˉ hta‸ ngaˬ nyi ma maˇ cawˇ. Ngaˬ geh yuˬ veu laˇ ve tanˇ tuˬ hta‸ htawˇ ngaˬ ha‸ yuˬ laˇ tuˬ ve maˇ heˆ. 11Miˬguiˬ hkʼoˆ hkʼaˬ ti chi ti lo chehˇ ve chaw yaˇ teˇ hpaˍ ngaˬ hta‸ taˍ uiˍ chehˇ ve yoˬ. Teˇ kaˬ le le lo, yawˇ hui lehˬ ngaˬ hta‸ sha hawnˉ tuˉ tanˇ laˇ chehˇ leh, ngaˬ ha‸ yuˬ hpeh‸ ve tanˇ tuˬ tanˇ laˇ chehˇ ve yoˬ. Yawˇ hui hkʼa peu-eˬ ngaˬ hta‸ taˍ uiˍ chehˇ ve yoˬ. 12Ya‸ hkʼaˇ, nawˬ hui lehˬ ngaˬ ve tuˉ tanˇ kuiˬ chi te‸ chiˉ tcuhˉ kuiˬ maˇ cawˬ teh‸ kʼoˆ leh, nawˬ hui baˬ taˍ ve caˇ tuˬ teˇ hpaˍ oˇ kaˬ lo tuˉ tanˇ ve pa taw, nawˬ hui ngaˬ hta‸ maˇ yawˆ maˇ yan te ve yoˬ. 13Ngaˬ hui kanˉ chi teˇ hpaˍ hta‸ gʼa te ve hkʼaˬ ma hkeu‸ jaˇ ve le, teh‸ nawˬ hui kʼoˆ leh, ngaˬ hta‸ maˇ shawˍ maˇ caˆ te laˇ ve yoˬ. Nawˬ hui lehˬ, hkʼawˇ yuˬ veu laˇ ve, hkui hteh ve, leh naˬ chehˇ ve to nuˇ to shaˆ ngaˬ hta‸ ca tuˉ tanˇ la ve yoˬ. Tuˉ tanˇ tuˬ oˇ ve hta‸ ngaˬ ha‸ yuˬ laˇ tuˬ yoˬ, teh‸ nawˬ hui dawˇ ve laˇ. 14Ngaˬ hta‸ piˇ laˇ tuˬ ka ti‸ te taˍ ve da‸ jaˇ ve yawˬ ehˉ hkʼa biˇ cawˬ taˍ ve htawˇ, heˍ ve awˬ hkʼaw lo cha‸ chiˆ ve to nuˇ to shaˆ hta‸ yuˬ leh ngaˬ hta‸ ca tuˉ tanˇ la ve chaw lehˬ, hkeu ve hta‸ gʼa hkanˍ tuˬ yoˬ. Awˬ lawn kʼo, ngaˬ lehˬ uiˍ jaˇ mvuh jaˇ ve Jawˇmawˇ hpeh‸ leh, chaw ceuˬ hkʼa peu-eˬ ngaˬ hta‸ kawˆ chehˇ ve yoˬ, teh‸ Gʼuiˬsha kʼoˆ ve yoˬ.
Currently Selected:
Maˍlaˍhkiˆ li‸ 1: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.