Yuˇda‸ li‸ 1
1
Awˬ chawˇ hui hta‸ dawˇ nawˇ ve hkawˇ
1Ngaˬ lehˬ Yeˍsuˆ Hkri‸ ve awˬ ceˬ, Yaˍkoˆ ve awˬ nyi paˍ Yuˇda‸ hpeh‸ ve yoˬ.
Kuˬ yuˬ taˍ ve nawˬ hui teˇ hpaˍ hta‸ ngaˬ li‸ chi bvuh‸ laˇ ve yoˬ. Awˬ pa Gʼuiˬsha nawˬ hui hta‸ ha‸ leh, Yeˍsuˆ Hkri‸ nawˬ hui hta‸ ha‸ shaˉ chehˇ ve yoˬ.
2Ha kʼaˉ ve teˇ ceuˬ, dawˇ sha ve teˇ ceuˬ leh, ha‸ pehnˇ ve teˇ ceuˬ nawˬ hui awˬ hkʼaw lo maˇ la piˇ-oˆ.
Yonˍ ve teˇ ceuˬ awˬ pon gʼaˇ hte‸ te-o
3Ha‸ ve chaw teˇ hpaˍ-oˬ, ngaˬ hui teˇ geh hkʼa shuˍ shuˍ gʼa taˍ ve htaiˍ hkʼaw‸ ve teˇ ceuˬ awˬ lawn, ngaˬ nawˬ hui hta‸ bvuh‸ laˇ gaˇ jaˇ ve yoˬ. Ya‸ hkʼaˇ, Hkri‸ yaˇ hui hta‸ teˇ pawˆ ceh tiˉ chiˇ a‸ piˇ taˍ ve yonˍ ve teˇ ceuˬ awˬ pon nawˬ hui gʼaˇ hte‸ te tuˬ, ngaˬ nawˬ hui hta‸ awˬ gʼaˇ piˇ leh li‸ chi teˇ kʼoˆ gʼa bvuh‸ laˇ ve yoˬ. 4Awˬ lawn kʼo, chaw teˇ hpaˍ hpaˍ ngaˬ hui geh hkʼawˇ lo‸ la peuˬ. Gʼuiˬsha hta‸ maˇ yawˆ maˇ yan ve chaw chi teˇ hpaˍ lehˬ, haiˬ ve leh cha‸ chiˆ ve laiˉ ceuˬ te tuˬ awˬ pon, Gʼuiˬsha ve awˬ bon hta‸ yuˬ hpfuhˆ piˇ ve yoˬ. Peuˬ leh, Yeˍsuˆ Hkri‸ ceh tiˉ ngaˬ hui ve Uˉ peunˍ shehˍ hpaˇ leh Jawˇmawˇ hpeh‸ ve ka‸, yawˇ hui yawˇ hta‸ chiˇ baˬ ve yoˬ. Ciˍ yanˍ ve chi hta‸ yawˇ hui gʼa hkanˍ tuˬ, aˬ sho-eˬ htaˇ ka‸ kʼoˆ cheˆ taˍ peuˬ ve yoˬ.
Maˇ heˆ heˆ ve saˍ la‸ teˇ hpaˍ hta‸ Gʼuiˬsha ciˍ yanˍ piˇ tuˬ ve
5Nawˬ hui teˇ pawˆ hkʼa deh‸ shiˍ peuˬ ve htawˇ, ngaˬ nawˬ hui hta‸ chi hkʼe kʼaw‸ dawˇ nawˇ laˇ gaˇ ve yoˬ. Jawˇmawˇ Gʼuiˬsha lehˬ, Eˇjiˇtu‸ mvuhˇ miˬ awˬ hkʼaw lo chaw ceuˬ teˇ ceuˬ hta‸ htaiˍ hkʼaw‸ piˇ peuˬ hkʼaw‸ nawˉ, maˇ yonˍ ve chaw teˇ hpaˍ hta‸ yawˇ te luˬ te sheˆ piˇ ve yoˬ. 6Chi hkʼoˆ ka‸, a shu yawˇ ve aˉ yaˇ hta‸ baˬ taˉ leh, a shu yawˇ ve chehˇ kuiˬ hta‸ baˬ taˉ ve mvuhˇ naw ma tcuh yaˇ teˇ hpaˍ hta‸ yawˇ co co taiˍ taiˍ yeˬ ve sho caˆ hpeh taˍ leh, naˆ ho‸ ve awˬ hkʼaw lo haw taˍ ve yoˬ. Suhˉ jehˬ tuˬ awˬ pon, uiˍ jaˇ ve awˬ nyi teˇ nyi htaˇ hkʼa gaˬ, yawˇ yawˇ hui hta‸ chi hkʼe haw taˍ ve yoˬ. 7Oˇ ve hkʼa shuˍ shuˍ, Sawˉdonˍ venˇ, Gawˇmawˇra‸ venˇ leh, awˬ paˇ awˬ kui lo cawˬ ve venˇ teˇ hpaˍ htawˇ, ngaˬ hui awˬ pon henˇ yuˬ jawˬ yuˬ tuˬ hpeh‸ ve yoˬ. Venˇ yaˇ oˇ ve teˇ hpaˍ lehˬ, haˉ chawˇ haˉ paˆ te ponˬ te leuˉ leh, hawˉ hkʼaˆ chawˇ hawˉ hkʼaˆ ka‸ peh‸ ve tzuhˆ ve hta‸ te ve pa taw, co co taiˍ taiˍ aˬ miˍ to‸ chehˇ ve ciˍ yanˍ ve hta‸ gʼa hkanˍ chehˇ ve yoˬ.
8Ya‸ hkʼaˇ, chaw chi teˇ hpaˍ lehˬ, zuh‸ maˆ mawˬ ve hta‸ cuˇ ve awˬ hkʼaw lo, chi hkʼa shuˍ shuˍ a shu yawˇ ve awˬ suhˍ awˬ shaˍ hta‸ cha‸ chiˆ tuˬ te ve yoˬ. Yawˇ hui lehˬ, uˉ peunˍ ve chaw teˇ hpaˍ hta‸ hpfuhˆ baˬ leh, awˬ me‸ awˬ hponˇ cawˬ ve chaw teˇ hpaˍ hta‸ maˇ shawˍ maˇ caˆ kʼoˆ ve yoˬ. 9Uiˍ ve mvuhˇ naw ma tcuh yaˇ Miˆhkeˍlaˆ lehˬ, Moˉseˍ suh taˍ ve awˬ to awˬ lawn neˇhaiˬ hta‸ tawˇ gʼawˬ da‸ ve teˇ yanˇ, maˇ shawˍ maˇ caˆ kʼoˆ ve awˬ hkʼaw lo yawˇ hta‸ suhˉ taˆ maˇ haˆ. Jawˇmawˇ Gʼuiˬsha nawˬ hta‸ deˇ maˍ laˇ tuˬ yoˬ teh‸, yawˇ yawˇ hta‸ kʼoˆ piˇ ve yoˬ. 10Ya‸ hkʼaˇ, chaw chi teˇ hpaˍ lehˬ, yawˇ hui maˇ shiˍ ve awˬ ceuˬ teˇ hpaˍ awˬ lawn maˇ shawˍ maˇ caˆ kʼoˆ ve yoˬ. Maˇ dawˇ shiˍ puiˉ ve to nuˇ to shaˆ hkʼa shuˍ shuˍ, yawˇ hui lehˬ a shu yawˇ hkʼaˇ yawˇ shiˍ taˍ ve awˬ hkʼaˇ suh te kʼai ve pa taw, luˬ kʼai sheˆ kʼai ve yoˬ. 11Yawˇ hui gʼa dawˇ haˍ jaˇ tuˬ yoˬ. Awˬ lawn kʼo, Kaˍiˉnaˆ ve ya‸ kʼaw awˬ hkʼaˇ suh yawˇ hui kʼai ve yoˬ. Chi hkʼoˆ ka‸, yawˇ hui awˬ hpfuhˇ gʼa tuˬ awˬ pon, Baˍlanˍ te ya‸ ve awˬ hkʼaˇ suh gʼuiˇ kʼai leh, Kawˇraˆ hpfuhˆ kʼai ve hkʼe, yawˇ hui htawˇ hpfuhˆ kʼai ve pa taw gʼa luˬ gʼa sheˆ ve yoˬ. 12Nawˬ hui ha‸ pehnˇ ve pawehˇ hta‸ caˇ htaˇ, yawˇ hui lehˬ iˉ kaˆ awˬ hkʼaw lo cawˬ ve, kawˆ tuˬ uiˍ ve haˉ pui shiˍ teˇ hpaˍ hkʼe hpeh‸ ve yoˬ. Yawˇ hui teˇ geh hti caˇ hti dawˬ ve awˬ hkʼaw lo, maˇ kawˆ puiˉ leh, a shu yawˇ awˬ to awˬ pon ceh tiˉ dawˇ nyi puiˉ ve yoˬ. Yawˇ hui lehˬ, mvuhˇ haw meuˆ chiˇ veu ve, iˉ kaˆ maˇ cawˬ ve moˬ teˇ hpaˍ hkʼe hpeh‸ ve yoˬ. Mvuhˇ goˇ htaˇ, awˬ shiˍ maˇ naw‸ leh, gʼawˬ baˬ peuˬ leh nyiˇ pawˆ suh peuˬ ve iˉ shiˍ cehˬ hkʼe htawˇ yawˇ hui hpeh‸ ve yoˬ. 13Yawˇ hui lehˬ, htawˇhpfuhˆnawˬhpfuhˆ te ve laˇ tsuhˇ gʼuiˬ gʼuiˬ baˇ teˇ hpaˍ awˬ fuˇ tawˆ la piˇ ve hkʼa shuˍ shuˍ, a shu yawˇ ve ya‸ taw tuˬ teˇ hpaˍ hta‸ tawˆ la piˇ ve yoˬ. Yawˇ hui lehˬ, htawˇ kʼaw‸ nawˬ kʼaw‸ kʼai ve meu‸ keu shiˍ teˇ hpaˍ hkʼe hpeh‸ ve yoˬ. Naˆ ho‸ jaˇ ve chehˇ kuiˬ yawˇ hui awˬ pon co co taiˍ taiˍ teh taˍ ve yoˬ.
14Aˍdanˍ hta‸ tanˬ leh suhˍ co-e teˇ co-e awˬ hkʼaw lo chehˇ ve Eˇnawˆ teˇ gʼaˇ htawˇ, yawˇ hui awˬ lawn bon maˍ leh kʼoˆ ve, Nyi loˬ, Jawˇmawˇ Gʼuiˬsha lehˬ, yawˇ ve da‸ kehˬ ve chaw awˬ meunˍ awˬ shehnˉ geh teˇ geh laˬ ve yoˬ. 15Yawˇ laˬ ve lehˬ, chaw hkʼa peu-eˬ hta‸ suhˉ jehˬ tuˬ awˬ pon yoˬ. Chi hkʼoˆ ka‸, Gʼuiˬsha hta‸ maˇ yawˆ yan ve chaw hkʼa peu-eˬ, yawˇ hui maˇ yawˆ maˇ yan te leh haiˬ ve kanˉ hkʼa te ve hkʼa peu-eˬ awˬ pon maˇ kʼoˆ, Gʼuiˬsha hta‸ maˇ yawˆ yan ve venˇbaˆ yaˇ chi teˇ hpaˍ yawˇ hta‸ tawˇ tzuhˇ tawˇ shaˆ hkʼa yaw ve tawˇ hkawˇ hkʼa peu-eˬ awˬ pon maˇ kʼoˆ, yawˇ yawˇ hui hta‸ suhˉ taˆ leh ciˍ yanˍ piˇ tuˬ awˬ pon htawˇ yawˇ laˬ ve yoˬ teh‸ kʼoˆ taˍ ve yoˬ.#Bon 33:2, Zhk 14:5
16Chaw oˇ ve teˇ hpaˍ lehˬ, beu puiˉ hkʼaiˉ puiˉ ve chaw, kʼoˆ puiˉ shanˬ puiˉ ve chaw, a shu yawˇ ve awˬ suhˍ awˬ shaˍ a loˍ awˬ hkʼaˇ suh kʼai ve chaw, caˆ muiˬ leh tawˇ uiˍ tawˇ mvuh yaw ve chaw leh, shu geh teˇ ceuˬ ceuˬ gʼa tuˬ shu hta‸ chiˇ uiˍ chiˇ mvuh piˇ puiˉ ve chaw hpeh‸ ve yoˬ.
Shaˍ ti‸ piˇ leh awˬ gʼaˇ piˇ ve
17Ha‸ ve chaw teˇ hpaˍ-oˬ, ponˬ laˬ htaˇ ngaˬ hui ve Jawˇmawˇ Yeˍsuˆ Hkri‸ ve tcuh yaˇ teˇ hpaˍ kʼoˆ taˍ ve tawˇ hkawˇ teˇ hpaˍ hta‸ nawˬ hui dawˇ nawˇ-oˆ. 18Awˬ lawn kʼo, yawˇ hui kʼoˆ ve, Awˬ leh meuˇ ve awˬ yanˇ awˬ hkʼaw lo, Gʼuiˬsha hta‸ maˇ yawˆ yan leh a shu yawˇ ve awˬ suhˍ awˬ shaˍ a loˍ awˬ hkʼaˇ suh te kʼai leh, hkʼa mvuhˇ hkʼa na kʼoˆ guiˇ gʼuiˬ guiˇ ve chaw teˇ hpaˍ tawˆ la tuˬ yoˬ teh‸, nawˬ hui hta‸ kʼoˆ taˍ laˇ peuˬ. 19Chaw oˇ ve teˇ hpaˍ lehˬ, awˬ moˍ hta‸ hpaˆ da‸ tuˬ te ve chaw hpeh‸ ve yoˬ. Yawˇ hui awˬ hkʼaw lo Awˬ ha hpu maˇ chehˇ leh, awˬ suhˍ awˬ shaˍ hpawˇ hta‸ ceh tiˉ caˉ da‸ ve chaw hpeh‸ ve yoˬ. 20Ha‸ ve chaw teˇ hpaˍ-oˬ, da‸ kehˬ jaˇ ve nawˬ hui yonˍ ve teˇ ceuˬ awˬ hkʼaw lo uiˍ la yeˬ la piˇ leh, da‸ ve kehˬ ve Awˬ ha hpu awˬ hkʼaw lo bon lawˬ chehˇ-oˆ. 21Nawˬ hui lehˬ, Gʼuiˬsha ve ha‸ pehnˇ ve awˬ hkʼaw lo a shu yawˇ awˬ to yeˬ chaweh chehˇ taˍ-o‸. Co ti‸ ha ti‸ gʼa htaˇ hkʼa gaˬ, ngaˬ hui ve Jawˇmawˇ Yeˍsuˆ Hkri‸ ve ha kʼaˉ puiˉ ve awˬ ceuˬ hta‸ law chehˇ taˍ-o‸.
22Hkʼa deh‸ maˇ yonˍ ve chaw teˇ hpaˍ yonˍ la tuˬ ga piˇ-oˆ. 23Chaw teˇ hpaˍ hpaˍ hta‸ ponˬ piˇ tuˬ, aˬ miˍ awˬ hkʼaw lo gʼawˬ tawˆ-oˆ. Peuˬ leh, kawˆ ve awˬ hkʼaw lo chaw teˇ hpaˍ hpaˍ hta‸ ha kʼaˉ-oˆ. Awˬ suhˍ awˬ shaˍ a loˍ hta‸ pa taw cha‸ chiˆ kʼai ve veu‸ kʼaˇ teˇ hpaˍ hta‸ canˇ-oˆ.
Bon na‸ piˇ ve hkawˇ
24Nawˬ hui maˇ gʼa paiˍ tuˬ, Gʼuiˬsha lehˬ nawˬ hui hta‸ nyi ha‸ shaˉ puiˉ ve yoˬ. Nawˬ hui ya‸ kuiˬ jiˆ kuiˬ maˇ cawˬ leh, yawˇ ve awˬ me‸ awˬ hponˇ hkʼa biˇ cawˬ kuiˬ lo nawˬ hui ha lehˬ ha kʼa gʼa chehˇ tuˬ yawˇ te puiˉ ve yoˬ. 25Ngaˬ hui ve Jawˇmawˇ Yeˍsuˆ Hkri‸ awˬ hkʼaw lo, ngaˬ hui ve Htaiˍ hkʼaw‸ paˍ Gʼuiˬsha teˇ gʼaˇ tiˉ ve hta‸ awˬ me‸ awˬ hponˇ teˇ ceuˬ, uiˍ ve mvuh ve teˇ ceuˬ, kanˇ paˆ teˇ ceuˬ leh, uˉ peunˍ ve teˇ ceuˬ, awˬ hkuiˉ puiˍ htaˇ ka‸, chi beu‸ ka‸, co co taiˍ taiˍ ka‸ cawˬ piˇ-oˆ. A menˬ.
Currently Selected:
Yuˇda‸ li‸ 1: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.