Yoˇhanˬ li‸ 19
19
1Oˇ htaˇ jawˇmawˇ Piˉla‸ lehˬ, Yeˍsuˆ hta‸ yuˬ leh jaw‸ ve yoˬ. 2Ma‸ yaˇ teˇ hpaˍ lehˬ, aˉ chuˇ te hta‸ yuˬ leh shi uˉ tcuhˍ hkʼe te gʼa‸ sheˬ leh, yawˇ ve oˉ kʼoˍ hta‸ hkʼawˆ piˇ ve yoˬ. Peuˬ leh, nyi naˆ meuˉ lehˍ ve aˉ po‸ zuhˬ ma yawˇ hta‸ deh piˇ ve yoˬ. 3Oˇ htaˇ, yawˇ hui yawˇ geh laˬ leh, Yuˇda‸ chaw hui ve Hkunˉ hawˉ hkanˇ-oˬ, nawˬ awˬ bon uiˍ piˇ-oˆ teh‸ kʼoˆ leh, yawˇ hta‸ hta hpehˇ ve yoˬ.
4Jawˇmawˇ Piˉla‸ teˇ pawˆ kʼaw‸ tawˆ la leh kʼoˆ ve, Chaw chi hpaˇ awˬ hkʼaw lo ngaˬ ya‸ kuiˬ te‸ chiˉ maˇ mawˬ ve hta‸ nawˬ hui gʼa shiˍ tuˬ, ngaˬ yawˇ hta‸ nawˬ hui geh shiˍ tawˆ la ve yoˬ teh‸, yawˇ hui hta‸ kʼoˆ piˇ ve yoˬ. 5Oˇ htaˇ, Yeˍsuˆ lehˬ aˉ chuˇ uˉ tcuhˍ hta‸ hkʼawˆ taˍ leh, nyi naˆ meuˉ lehˍ ve aˉ po‸ zuhˬ ma hta‸ deh taˍ leh tawˆ la ve yoˬ. Jawˇmawˇ Piˉla‸ lehˬ, Chaw chi hpaˇ hta‸ nyi-o teh‸ yawˇ hui hta‸ kʼoˆ piˇ ve yoˬ.
6Paw hkuˇ lonˉ teˇ hpaˍ leh bon yehˬ lonˉ ve ma‸ yaˇ teˇ hpaˍ lehˬ, Yeˍsuˆ hta‸ gʼa mawˬ ve teˇ yanˇ, Yawˇ hta‸ la‸ ka hkʼoˆ lo hta‸ pehˍ loˬ, hta‸ pehˍ loˬ teh‸ gʼaˇ hte‸ kuˬ ve yoˬ.
Jawˇmawˇ Piˉla‸ kʼoˆ ve, Nawˬ hui hkʼaˇ nawˬ hui yawˇ hta‸ yuˬ leh la‸ ka hkʼoˆ lo hta‸ pehˍ-o‸. Ngaˬ lehˬ yawˇ awˬ hkʼaw lo ya‸ kuiˬ te‸ chiˉ maˇ mawˬ teh‸, yawˇ hui hta‸ kʼoˆ piˇ ve yoˬ.
7Yuˇda‸ chaw teˇ hpaˍ kʼaw‸ kʼoˆ ve, Ngaˬ hui awˬliˇtawˇhkawˇ cawˬ taˍ ve hkʼe te ve kʼo, yawˇ lehˬ suh keunˍ ve yoˬ. Awˬ lawn kʼo, yawˇ lehˬ yawˇ awˬ to hta‸ Gʼuiˬ sha ve Yaˇ hpu hpeh‸ ve yoˬ teh‸ kʼoˆ ve pa taw yoˬ.
8Jawˇmawˇ Piˉla‸ tawˇ oˇ ve hta‸ gʼa kaˇ ve teˇ yanˇ, leuˉ leh kawˆ jaˇ ve yoˬ. 9Yawˇ hawˉ yehˬ awˬ hkʼaw lo teˇ pawˆ kʼaw‸ lo‸-e leh, Nawˬ hkʼaˬ lo laˬ ve chaw le teh‸, Yeˍsuˆ hta‸ na nyi ve yoˬ.
Ya‸ hkʼaˇ, Yeˍsuˆ yawˇ hta‸ te‸ chiˉ maˇ yaw hkʼaw‸ piˇ. 10Hkʼe te leh jawˇmawˇ Piˉla‸ kʼaw‸ kʼoˆ ve, Nawˬ ngaˬ hta‸ tawˇ maˇ yaw laˇ leh laˇ. Nawˬ hta‸ hpehˇ laˇ tuˬ maˇ kʼoˆ, la‸ ka hkʼoˆ lo hta‸ pehˍ tuˬ maˇ kʼoˆ, ngaˬ kanˇ paˆ cawˬ ve hta‸ nawˬ maˇ shiˍ leh laˇ teh‸, yawˇ hta‸ kʼoˆ piˇ ve yoˬ.
11Yeˍsuˆ kʼaw‸ kʼoˆ ve, Mvuhˇ naw ma lo nawˬ hta‸ kanˇ paˆ maˇ piˇ ve hkʼe kʼo, nawˬ ngaˬ awˬ hkʼoˆ te‸ chiˉ kanˇ paˆ maˇ cawˬ. Chi hta‸ pa taw, nawˬ ve la‸ hkʼaw lo ngaˬ hta‸ chiˇ a‸ laˇ ve chaw teˇ gʼaˇ lehˬ, leuˉ leh venˇbaˆ uiˍ ve yoˬ teh‸, yawˇ hta‸ kʼoˆ piˇ ve yoˬ.
12Chi hkʼe kʼoˆ ve teˇ yanˇ, jawˇmawˇ Piˉla‸ lehˬ Yeˍsuˆ hta‸ hpehˇ piˇ tuˬ ya‸ kʼaw ca ve yoˬ. Ya‸ hkʼaˇ Yuˇda‸ chaw teˇ hpaˍ kuˬ leh kʼoˆ ve, Nawˬ chaw chi hpaˇ hta‸ hpehˇ piˇ ve kʼo, nawˬ jawˇmawˇ Kehˉsaˍ ve awˬ chawˇ hpeh‸ ve maˇ heˆ. A shu yawˇ hkʼaˇ yawˇ hkunˉ hawˉ hkanˇ te ve chaw teˇ gʼaˇ le le lehˬ, jawˇmawˇ Kehˉsaˍ ve canˇ paˍ hpeh‸ ve yoˬ teh‸ kʼoˆ ve yoˬ.
13Tawˇ oˇ ve hta‸ jawˇmawˇ Piˉla‸ gʼa kaˇ htaˇ, yawˇ Yeˍsuˆ hta‸ shiˍ tawˆ-e leh, suhˉ jehˬ ve kʼaw jaw hkʼoˆ lo ca mui ve yoˬ. Chehˇ kuiˬ oˇ ve lehˬ, Heˍbrehˇ hkawˇ Gaˍbaˍtaˆ teh‸ kʼoˆ ve, haˉ pui hkʼawˇ taˍ ve chehˇ kuiˬ teˇ kaˬ hpeh‸ ve yoˬ. 14Awˬ nyi oˇ ve lehˬ, Paˍsaˍhkaˍ pawehˇ te tuˬ awˬ pon gu ve awˬ nyi hpeh‸ leh, awˬ yanˇ lehˬ mvuhˇ law‸ kʼaw tcuhˆ hkʼe teˇ yanˇ hpeh‸ ve yoˬ. Jawˇmawˇ Piˉla‸ lehˬ, Yuˇda‸ chaw hui hta‸ kʼoˆ piˇ ve, Nawˬ hui ve Hkunˉ hawˉ hkanˇ hta‸ nyi loˬ.
15Yawˇ hui kʼoˆ ve, Yawˇ hta‸ tiˇ pehˍ loˬ, tiˇ pehˍ loˬ. La‸ ka hkʼoˆ lo hta‸ pehˍ loˬ teh‸, gʼaˇ hte‸ kuˬ ve yoˬ.
Jawˇmawˇ Piˉla‸ kʼoˆ ve, Nawˬ hui ve Hkunˉ hawˉ hkanˇ hta‸ la‸ ka hkʼoˆ lo ngaˬ gʼa hta‸ pehˍ tuˬ ve laˇ teh‸ yawˇ hui hta‸ na nyi htaˇ, Kehˉsaˍ maˇ heˆ kʼo, ngaˬ hui hkunˉ hawˉ hkanˇ maˇ cawˬ teh‸, paw hkuˇ lonˉ teˇ hpaˍ kʼaw‸ kʼoˆ piˇ ve yoˬ.
16Oˇ htaˇ, Yeˍsuˆ hta‸ la‸ ka hkʼoˆ lo hta‸ pehˍ tuˬ, jawˇmawˇ Piˉla‸ lehˬ yawˇ hui ve la‸ sheh awˬ hkʼaw lo chiˇ a‸ piˇ ve yoˬ.
Yeˍsuˆ hta‸ la‸ ka hkʼoˆ lo hta‸ pehˍ ve
17Hkʼe te leh, yawˇ hui Yeˍsuˆ hta‸ yuˬ leh yawˇ hta‸ sheh tawˆ-e ve yoˬ. Yawˇ lehˬ yawˇ ve la‸ ka hta‸ taˆ leh, oˉ koˆ teh‸ kʼoˆ ve chehˇ kuiˬ lo kʼai ve yoˬ. Chehˇ kuiˬ oˇ ve lehˬ Heˍbrehˇ hkawˇ kʼo, Gawˇlaˍgawˇtaˆ meh ve yoˬ. 18Oˇ kaˬ lo yawˇ hui yawˇ hta‸ la‸ ka hkʼoˆ lo hta‸ keu taˍ ve yoˬ. Yawˇ geh teˇ geh awˬ kaˍ awˬ nu chaw nyiˇ gʼaˇ hta‸ htawˇ, teˇ hpawˇ lo teˇ gʼaˇ la‸ ka hkʼoˆ lo hta‸ keu taˍ leh, Yeˍsuˆ hta‸ awˬ kʼaw ji lo hta‸ keu piˇ taˍ ve yoˬ. 19Jawˇmawˇ Piˉla‸ lehˬ, li‸ bvuh‸ leh, la‸ ka hkʼoˆ lo nehˉ taˍ ve yoˬ. Li‸ oˇ ve lehˬ, Yuˇda‸ chaw hui ve Hkunˉ hawˉ hkanˇ Naˍzaˍrehˆ chaw Yeˍsuˆ yoˬ teh‸ bvuh‸ taˍ ve yoˬ. 20Yeˍsuˆ hta‸ la‸ ka hkʼoˆ lo hta‸ pehˍ ve teˇ kaˬ lehˬ, venˇ hta‸ neˇ ve pa taw, Yuˇda‸ chaw laiˉ gʼaˇ li‸ oˇ ve hta‸ gʼaw ve yoˬ. Li‸ oˇ ve lehˬ, Heˍbrehˇ li‸, Roˉma‸ li‸ leh Heˍlaˍsaˆ li‸ bvuh‸ taˍ ve yoˬ. 21Hkʼe te leh, Yuˇda‸ chaw hui ve paw hkuˇ lonˉ teˇ hpaˍ lehˬ, jawˇmawˇ Piˉla‸ hta‸ kʼoˆ piˇ ve, Yuˇda‸ chaw hui ve Hkunˉ hawˉ hkanˇ yoˬ teh‸ taˇ bvuh‸. Ngaˬ lehˬ Yuˇda‸ chaw hui ve Hkunˉ hawˉ hkanˇ yoˬ teh‸ chi hpaˇ yawˇ kʼoˆ ve yoˬ teh‸ bvuh‸-o‸.
22Jawˇmawˇ Piˉla‸ lehˬ, Ngaˬ bvuh‸ taˍ ve hta‸ ngaˬ maˇ kʼaw‸ gu bvuh‸-o teh‸ kʼaw‸ kʼoˆ piˇ ve yoˬ.
23Ma‸ yaˇ teˇ hpaˍ lehˬ, Yeˍsuˆ hta‸ la‸ ka hkʼoˆ lo hta‸ keu taˍ peuˬ hkʼaw‸ nawˉ, yawˇ ve veu‸ kʼaˇ hta‸ yuˬ leh awˇ pun pehˬ leh, teˇ gʼaˇ teˇ pun yuˬ ve yoˬ. Awˬ hkʼaw ve aˉ po‸ zuhˬ ma hta‸ htawˇ yawˇ hui yuˬ ve yoˬ. Aˉ po‸ oˇ ve lehˬ, awˬ hkʼawˇ ma maˇ cawˬ. Hpaw kʼawˍ hta‸ tanˬ leh hpaw mehˍ hkʼa gaˬ te chiˇ taˍ ve aˉ po‸ hpeh‸ ve yoˬ. 24Hkʼe te leh yawˇ hui kʼoˆ ve, Aˉ po‸ chi hta‸ ngaˬ hui maˇ tzuh‸ hkoˇ leh, a shu gʼa cawˇ ve hta‸ shiˍ tuˬ kuˇ da‸ yuˬ-a veuˬ teh‸, teˇ gʼaˇ leh teˇ gʼaˇ kʼoˆ da‸ ve yoˬ. Yawˇ hui chi hkʼe te ve lehˬ,
Ngaˬ ve veu‸ kʼaˇ hta‸ yawˇ hui pehˬ yuˬ leh,
ngaˬ ve aˉ po‸ hta‸ htawˇ yawˇ hui kuˇ da‸ yuˬ ve yoˬ,
teh‸ Li‸ hpu hkʼaw bvuh‸ taˍ ve tawˇ hkawˇ biˇ la tuˬ awˬ pon hpeh‸ ve yoˬ.#Chi 22:18
25Yeˍsuˆ ve la‸ ka paˇ lo yawˇ ve awˬ e, awˬ e ve awˬ nyi ma, Kaˍlawˉhpaˆ ve awˬ miˇ ma Maˍriˆ leh, Maˍriˆ Maˍgaˍdaˍlaˆ hui huˉ chehˇ taˍ ve yoˬ. 26Yeˍsuˆ lehˬ, yawˇ ve awˬ e leh yawˇ ha‸ ve awˬ la‸ gʼawˇ yawˇ awˬ paˇ lo huˉ chehˇ ve hta‸ gʼa mawˬ htaˇ, yawˇ ve awˬ e hta‸ yawˇ kʼoˆ piˇ ve, Yaˇ miˇ-oˬ, nawˬ ve yaˇ paˍ hta‸ nyi-o teh‸ kʼoˆ ve yoˬ.
27Awˬ la‸ gʼawˇ oˇ ve teˇ gʼaˇ hta‸ htawˇ, Nawˬ ve awˬ e hta‸ nyi-o teh‸ kʼoˆ piˇ ve yoˬ. Oˇ ve teˇ yanˇ hta‸ tanˬ leh, awˬ la‸ gʼawˇ oˇ ve teˇ gʼaˇ lehˬ, yawˇ ve aˉ hkʼaw lo Yeˍsuˆ ve awˬ e hta‸ shiˍ teh taˍ ve yoˬ.
Yeˍsuˆ suh ve
28Oˇ ve awˬ hkʼaw‸ nawˉ, kanˉ hkʼa peu-eˬ te peuˬ ve hta‸ Yeˍsuˆ shiˍ leh, Ngaˬ iˉ kaˆ shiˉ ve yoˬ teh‸ yawˇ kʼoˆ ve yoˬ.#Chi 69:21 Yawˇ oˇ hkʼe kʼoˆ ve lehˬ, Li‸ hpu tawˇ hkawˇ kʼoˆ taˍ ve hkʼe biˇ la ve yoˬ.
29Oˇ kaˬ lo ci ve awˬ gʼuiˬ hkʼa biˇ cawˬ ve mu‸ hkʼu teˇ shiˍ cawˬ ve yoˬ. Yawˇ hui lehˬ, laˇ tsuhˇ gʼuiˬ mvuhˬ teˇ maˬ hta‸ yuˬ leh ci ve awˬ gʼuiˬ awˬ hkʼaw lo tuˍ peuˬ hkʼaw‸ nawˉ, lo taˬ hta‸ choˆ leh yawˇ ve maw‸ kʼaw hta‸ chiˇ daw‸ piˇ ve yoˬ. 30Yeˍsuˆ lehˬ, ci ve awˬ gʼuiˬ hta‸ chaw‸ dawˬ peuˬ hkʼaw‸ nawˉ, Kanˉ te peuˬ teh‸ kʼoˆ leh, oˉ kʼoˍ kʼaw‸ lehˍ te sheˬ leh shaˉ cheˆ ve yoˬ.
Yeˍsuˆ ve nyi kuˇ hpawˇ hta‸ gehˇ juˆ ve
31Oˇ ve teˇ nyi lehˬ, pawehˇ awˬ pon gu ve awˬ nyi hpeh‸ leh, awˬ hkʼaw‸ nawˉ teˇ nyi kʼo, uiˍ jaˇ ve shinˉ nyi hpeh‸ ve pa taw, shinˉ nyi teˇ nyi awˬ hkʼaw lo la‸ ka hkʼoˆ lo suh taˍ ve awˬ to teˇ hpaˍ maˇ gʼa teh taˉ tuˬ, Yuˇda‸ chaw hui lehˬ jawˇmawˇ Piˉla‸ geh kʼai leh, chaw oˇ ve teˇ hpaˍ ve hkui sheh hta‸ dawˆ hteh leh, suh taˍ ve awˬ to oˇ ve teˇ hpaˍ hta‸ yuˬ baˬ tuˬ, yawˇ hta‸ lawˬ ve yoˬ. 32Hkʼe te leh, ma‸ yaˇ teˇ hpaˍ laˬ leh, Yeˍsuˆ geh teˇ geh la‸ ka hkʼoˆ lo hta‸ keu taˍ ve chaw nyiˇ gʼaˇ ve hkui sheh hta‸ dawˆ hteh ve yoˬ. 33Ya‸ hkʼaˇ, Yeˍsuˆ geh gaˬ la htaˇ, yawˇ suh peuˬ ve hta‸ gʼa mawˬ ve pa taw, yawˇ ve hkui sheh hta‸ yawˇ hui maˇ dawˆ hteh. 34Ma‸ yaˇ teˇ gʼaˇ yawˇ ve nyi kuˇ hpawˇ hta‸ gehˇ juˆ leh, awˬ suhˍ leh iˉ kaˆ teˇ cawˬ haˉ tawˆ la ve yoˬ. 35Nawˬ hui htawˇ gʼa yonˍ tuˬ, oˇ ve hta‸ gʼa mawˬ ve teˇ gʼaˇ shaˉ hkiˆ hkanˍ ve yoˬ. Yawˇ shaˉ hkiˆ hkanˍ ve lehˬ hteˇ ve cawˇ ve yoˬ. Yawˇ kʼoˆ ve tawˇ hkawˇ lehˬ, hteˇ ve cawˇ ve yoˬ teh‸ yawˇ shiˍ ve yoˬ. 36Oˇ hkʼe hpeh‸ la ve lehˬ, Yawˇ ve awˬ mu‸ ku teˇ ma ka‸ maˇ gʼa dawˆ hteh teh‸, Li‸ hpu hkʼaw bvuh‸ taˍ ve tawˇ hkawˇ biˇ la tuˬ awˬ pon hpeh‸ la ve yoˬ.#Chi 34:20, Taw 12:46 37Li‸ hpu awˬ hkʼaw lo awˬ kaˍ awˬ nu teˇ kaˬ kʼoˆ taˍ ve, Yawˇ hui juˆ pawnˍ taˍ ve teˇ gʼaˇ hta‸ yawˇ hui nyi tuˬ yoˬ teh‸ kʼoˆ taˍ ve yoˬ.#Zhk 12:10
Yeˍsuˆ hta‸ tuˍ piˇ ve
38Oˇ ve awˬ hkʼaw‸ nawˉ, Aˍriˆma‸htehˍ venˇ yaˇ Yoˇseh‸ lehˬ, Yeˍsuˆ ve awˬ to hta‸ gʼa yuˬ kʼai tuˬ jawˇmawˇ Piˉla‸ geh ca lawˬ leh, jawˇmawˇ Piˉla‸ yawˇ hta‸ a hkaw-anˬ piˇ ve yoˬ. Hkʼe te leh yawˇ laˬ leh, Yeˍsuˆ ve awˬ to hta‸ yuˬ kʼai ve yoˬ. Yoˇseh‸ oˇ ve teˇ gʼaˇ lehˬ, Yeˍsuˆ ve awˬ la‸ gʼawˇ hpeh‸ ve htawˇ, Yuˇda‸ chaw hui hta‸ kawˆ ve pa taw, awˬ la‸ gʼawˇ hpeh‸ ve yoˬ teh‸ shu hta‸ maˇ shiˍ tcuh. 39Ponˬ laˬ htaˇ Yeˍsuˆ geh lo tanˇ hkuinˇ htaˇ laˬ ve Niˆkawˇdeˍ teˇ gʼaˇ htawˇ laˬ ve yoˬ. Yawˇ lehˬ, muˇraˍ leh aˬ cawˍ hkaw‸ da‸ taˍ ve, aˬ laˬ hkʼe shehˆ chi cawehˬ yuˬ laˬ ve yoˬ. 40Yawˇ huiˉ maˬ lehˬ, Yeˍsuˆ ve awˬ to hta‸ yuˬ leh, Yuˇda‸ chaw hui chaw tuˍ ve awˬ liˇ cawˬ ve hkʼe, sha hawnˉ teˇ hpaˍ hta‸ keu leh, hpa hpu yuˬ htiˆ taˍ ve yoˬ. 41Yawˇ hta‸ la‸ ka hkʼoˆ hta‸ pehˍ kuiˬ lo, hko teˇ hko cawˬ ve yoˬ. Hko oˇ ve awˬ hkʼaw lo chaw teˇ gʼaˇ hta‸ ka‸ maˇ tuˍ jaw sheˍ ve tuˍ hpfuh awˬ suhˉ teˇ maˬ cawˬ ve yoˬ. 42Oˇ ve teˇ nyi lehˬ, Yuˇda‸ chaw hui ve pawehˇ awˬ pon gu ve awˬ nyi hpeh‸ leh, tuˍ hpfuh oˇ ve htawˇ awˬ paˇ lo cawˬ ve pa taw, yawˇ huiˉ maˬ yawˇ hta‸ oˇ kaˬ lo ca tuˍ ve yoˬ.
Currently Selected:
Yoˇhanˬ li‸ 19: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.