Iˉsaˍyaˆ li‸ 1
1
1Yuˇda‸ mvuhˇmiˬ awˬ hkʼaw lo, Awˇziˆ, Yawˇtanˍ, Aˍhkaˆ leh Heˍsaˍ kiˆ jawˇmawˇ te chehˇ htaˇ, Gʼuiˬsha lehˬ Yeˍruˆsaˍlehnˍ venˇ leh Yuˇ da‸ mvuhˇmiˬ hta‸ caˉ da‸ ve awˬ lawn chi teˇ hpaˍ Aˍmoˆ ve yaˇ Iˉsaˍ yaˆ hta‸ kʼoˆ piˇ ve yoˬ.
Gʼuiˬsha yawˇ ve chaw hui hta‸ deˇ maˍ piˇ ve
2Gʼuiˬsha kʼoˆ ve, Miˬguiˬ leh mvuhˇ naw ma-oˬ, ngaˬ kʼoˆ chehˇ ve tawˇ teˇ hpaˍ hta‸ na taˍ-oˬ. Ngaˬ ha‸ shaˉ piˇ taˍ ve yaˇ teˇ hpaˍ ngaˬ hta‸ hpfuhˆ kʼai peuˬ ve yoˬ. 3Nuˇ teˇ hpaˍ lehˬ, a shu yawˇ awˬ shehˍ hpaˇ hta‸ shiˍ leh, piˉlaˬ teˇ hpaˍ htawˇ a shu yawˇ ve awˬ shehˍ hpaˇ caˍ piˇ jaw ve chehˇ kuiˬ hta‸ shiˍ ve yoˬ. Ya‸ hkʼaˇ, ngaˬ ve Iˉsaˍreˍlaˆ chaw teˇ hpaˍ lehˬ, oˇ hkʼe ceh ka‸ maˇ shiˍ puiˉ. Yawˇ hui lehˬ, te‸ chiˉ maˇ shiˍ puiˉ ve chaw teˇ hpaˍ hpeh‸ ve yoˬ.
4Venˇbaˆ uiˍ leh haiˬ jaˇ ve nawˬ hui teˇ hpaˍ lehˬ, gʼa luˬ gʼa sheˆ tuˬ yoˬ. Nawˬ hui te taˍ ve venˇbaˆ lehˬ nawˬ hui hta‸ gʼawˬ ce chehˇ ve yoˬ. Nawˬ hui lehˬ, da‸ kehˬ jaˇ ve Iˉsaˍreˍlaˆ ve Jawˇmawˇ Gʼuiˬsha hta‸ chiˇ baˬ leh, yawˇ hta‸ hpfuhˆ kʼai peuˬ ve yoˬ. 5Aˬ hto‸ ma pa taw, nawˬ hui Yawˇ hta‸ kʼaw‸ hpfuhˆ ve le. Nawˬ hui leuˉ leh ciˍ yanˍ ve hta‸ hkanˍ gaˇ sheˍ ve laˇ. Iˉsaˍreˍlaˆ chaw teˇ hpaˍ-oˬ, nawˬ hui ve oˉ kʼoˍ lehˬ hkʼaw kuiˬ naˬ kuiˬ hkʼa biˇ cawˬ leh, nawˬ hui ve nyi ma htawˇ naˬ chehˇ ve yoˬ. 6Nawˬ hui ve oˉ kʼoˍ hta‸ te leh hkui taw peh lo hkʼa gaˬ, hkʼaw kuiˬ naˬ kuiˬ maˇ cawˬ ve teˇ kaˬ ka‸ maˇ cawˬ. Nawˬ hui ve awˬ to teˇ to hkʼa peu-eˬ, hkʼaw kuiˬ naˬ kuiˬ hkʼa biˇ cawˬ ve htawˇ, oˇ ve teˇ hpaˍ hta‸ tsuhˇ baˬ leh naˆ tsuhˉ maˇ gu, maˇ peh piˇ.
7Nawˬ hui ve mvuhˇmiˬ luˬ kʼai sheˆ kʼai peuˬ leh, nawˬ hui ve venˇ teˇ hpaˍ htawˇ, aˬ miˍ tuˉ baˬ ve hta‸ gʼa hkanˍ peuˬ ve yoˬ. Awˬ nu ve chaw ceuˬ teˇ hpaˍ lehˬ, nawˬ hui mehˆ gʼuˇ suhˍ lo, nawˬ hui ve mvuhˇmiˬ hta‸ hiˉ yuˬ leh, awˬ ceuˬ hkʼa peu-eˬ ve hta‸ te luˬ te sheˆ ve yoˬ. 8Yeˍruˆsaˍlehnˍ venˇ lehˬ, a pehˉ meuˇ hko leh aˉ hpehˇ hko hkʼaw cawˬ ve aˉ po kʼo hkʼa shuˍ hpeh‸ kʼai tuˬ yoˬ. 9Kanˇ paˆ uiˍ ve Jawˇmawˇ Gʼuiˬsha lehˬ chaw teˇ hpaˍ hpaˍ hta‸ maˇ ponˬ piˇ ve hkʼe kʼo, Yeˍruˆsaˍlehnˍ venˇ lehˬ Sawˉdonˍ leh Gawˇmawˇra‸ venˇ hkʼa shuˍ luˬ kʼai sheˆ kʼai tuˬ yoˬ.
10Yeˍruˆsaˍlehnˍ venˇ-oˬ, nawˬ ve jawˇmawˇ leh nawˬ ve venˇ yaˇ teˇ hpaˍ lehˬ, Sawˉdonˍ leh Gawˇmawˇra‸ venˇ yaˇ oˇ ve teˇ hpaˍ hkʼa shuˍ hpeh‸ ve yoˬ. Gʼuiˬsha nawˬ hta‸ maˍ laˇ chehˇ ve tawˇ teˇ hpaˍ hta‸ hkʼa deh‸ na yuˬ-o‸. 11Yawˇ kʼoˆ ve, Nawˬ hui ngaˬ hta‸ awˬ caˆ maˇ cheˆ tanˇ laˇ chehˇ ve tuˉ tanˇ tuˬ teˇ hpaˍ hta‸ ngaˬ heuˆ gaˇ ve yoˬ, teh‸ nawˬ hui dawˇ ve laˇ. Nawˬ hui tuˉ tanˇ laˇ chehˇ ve yawˬ ehˉ leh da‸ jaˇ ve awˬ chu teˇ hpaˍ hta‸ ngaˬ nyi bawˬ jaˇ peuˬ. Nuˇ awˬ suhˍ, yawˬ ehˉ awˬ suhˍ, leh aˉ che‸ awˬ suhˍ chi teˇ hpaˍ hta‸ htawˇ ngaˬ cha‸ naˬ jaˇ peuˬ. 12Nawˬ hui ngaˬ hta‸ oˉ kʼoˍ ca pui la htaˇ awˬ ceuˬ chi teˇ hpaˍ hta‸ yuˬ laˬ tuˬ, a shu nawˬ hui hta‸ kʼoˆ laˇ ve le. Ngaˬ ve bon yehˬ hkʼaw lo chi hkʼe ca te tuˬ a shu nawˬ hui hta‸ tcuh laˇ ve le. 13Te‸ chiˉ tcuhˉ kuiˬ maˇ cawˬ ve tanˇ tuˬ chi teˇ hpaˍ hta‸ ngaˬ maˇ nyi gaˇ. Nawˬ hui tuˉ tanˇ chehˇ ve sha hawnˉ hta‸ ka‸ nga‸ nyi bawˬ jaˇ peuˬ. Ha pa tawˬ ha pa cheˆ htaˇ nawˬ hui te chehˇ ve pawehˇ teˇ hpaˍ, nawˬ hui ve shinˉ nyi teˇ hpaˍ leh nawˬ hui te chehˇ ve bon pawehˇ teˇ hpaˍ hta‸ htawˇ ngaˬ maˇ nyi gaˇ. Awˬ ceuˬ oˇ ve hkʼa peu-eˬ lehˬ, nawˬ hui ve venˇbaˆ hta‸ pa taw cha‸ chiˆ kʼai peuˬ. 14Ha pa tawˬ ha pa cheˆ htaˇ nawˬ hui te chehˇ ve pawehˇ teˇ hpaˍ leh, da‸ kehˬ ve awˬ nyi teˇ hpaˍ hta‸ ngaˬ canˇ ve yoˬ. Nawˬ hui oˇ hkʼe te chehˇ ve hta‸ ngaˬ maˇ nyi gaˇ.
15Nawˬ hui la‸ sheh chiˇ leh bon lawˬ chehˇ ve htawˇ, ngaˬ nawˬ hui hta‸ nyi laˇ tuˬ ve maˇ heˆ. Nawˬ hui bon hkʼaˬ ma lawˬ ve htawˇ, ngaˬ na yuˬ laˇ tuˬ ve maˇ heˆ. Awˬ lawn kʼo, nawˬ hui ve la‸ sheh lehˬ venˇbaˆ hta‸ pa taw cha‸ chiˆ kʼai peuˬ. 16Da‸ kehˬ la tuˬ nawˬ hui a shu yawˇ awˬ to hta‸ tsuhˇ baˬ-o‸. Nawˬ hui te chehˇ ve cha‸ chiˆ ve kanˉ hkʼa peu-eˬ hta‸ baˬ taˉ-oˆ. 17Da‸ ve cawˇ ve hta‸ te puiˉ la tuˬ henˇ yuˬ-o‸. Hteˇ ve cawˇ ve teˇ ceuˬ kʼaw‸ cawˬ la tuˬ te-o. Shu fawˉ mehˍ ve hta‸ gʼa hkanˍ ve chaw hui hta‸ ga piˇ leh, yaˇcuˬshi leh mehˇchawˇma teˇ hpaˍ hta‸ ha kʼaˉ-oˆ, teh‸ Gʼuiˬsha kʼoˆ ve yoˬ.
18Gʼuiˬsha kʼaw‸ kʼoˆ ve, Laˬ-o‸. Ngaˬ hui jehˬ da‸ shaˍ. Nawˬ hui lehˬ venˇbaˆ hta‸ pa taw nyiˉ-ehˍ hpeh‸ chehˇ taˍ ve htawˇ, vaˇ meu-e hkʼa shuˍ kʼaw‸ hpu la tuˬ ngaˬ tsuhˇ baˬ laˇ tuˬ yoˬ. Nawˬ hui lehˬ awˬ suhˍ hkʼa shuˍ nyi ve htawˇ, yawˬ mvuh hkʼa shuˍ kʼaw‸ hpu la tuˬ yoˬ. 19Nawˬ hui ngaˬ ve tawˇ hta‸ na yuˬ ve kʼo, da‸ jaˇ ve awˬ shiˍ awˬ nu teˇ hpaˍ hta‸ gʼa caˇ tuˬ yoˬ. 20Ya‸ hkʼaˇ, nawˬ hui ngaˬ hta‸ chiˇ baˬ leh ngaˬ hta‸ kʼaw‸ hpfuhˆ ve kʼo, nawˬ hui gʼa suh tuˬ yoˬ. Ngaˬ Gʼuiˬsha chi hkʼe kʼoˆ taˍ peuˬve yoˬ.
Venˇbaˆ uiˍve venˇ
21Ponˬ laˬ htaˇ ka ti‸ yeˬ jaˇ ve venˇ lehˬ chi beu‸ meh maˬ lanˉ hkʼe kʼaw‸ hpeh‸ la peuˬ. Ponˬ laˬ htaˇ hteˇ ve cawˇ ve chaw teˇ hpaˍ venˇ oˇ ve hkʼaw chehˇ taˍ ve yoˬ. Ya‸ hkʼaˇ, chi beu‸ venˇ oˇ ve hkʼaw lo chaw hta‸ tiˇ pehˍ shehˍ hpaˇ teˇ hpaˍ ceh tiˉ kʼaw‸ chehˇ taˍ ve yoˬ. 22Yeˍruˆsaˍlehnˍ venˇ-oˬ, ponˬ laˬ htaˇ nawˬ lehˬ hpu hkʼa shuˍ hpeh‸ ve yoˬ. Ya‸ hkʼaˇ, chi beu‸ nawˬ lehˬ te‸ chiˉ awˬ hpfuhˇ maˇ kʼaw‸ cawˬ. Nawˬ lehˬ ponˬ laˬ htaˇ da‸ jaˇ ve a pehˉ meuˇ gʼuiˬ hkʼe hpeh‸ ve yoˬ. Ya‸ hkʼaˇ, chi beu‸ nawˬ lehˬ iˉ kaˆ ceh kʼaw‸ hpeh‸ ve yoˬ. 23Nawˬ ve awˬ hoˉ awˬ naˬ teˇ hpaˍ lehˬ, chaw hpfuhˆ teˇ hpaˍ hpeh‸ leh, chaw hkʼawˇ hui hta‸ awˬ chawˇ te da‸ chehˇ ve yoˬ. Yawˇ hui lehˬ hkʼaˬ htaˆ ka‸ shu geh la‸ shawnˍ yuˬ caˇ chehˇ ve yoˬ. Shaˉ nanˉ hkʼaw lo yaˇcuˬshi teˇ hpaˍ hta‸ yawˇ hui maˇ ga piˇ. Mehˇchawˇma hui ve tawˇ hta‸ htawˇ maˇ na yuˬ.
24Chi hta‸ pa taw, Iˉsaˍreˍlaˆ ve kanˇ paˆ uiˍ ve Jawˇmawˇ Gʼuiˬsha kʼoˆ chehˇ ve tawˇ hta‸ na sheˍ. Ngaˬ ve canˇ paˍ teˇ hpaˍ-oˬ, ngaˬ nawˬ hui hta‸ kʼaw‸ te hkʼaw‸ laˇ tuˬ yoˬ. Chi teˇ pawˆ nawˬ hui ngaˬ hta‸ kʼaw‸ te sho‸ sha‸ laˇ gʼa tuˬ ve maˇ heˆ. 25Ngaˬ nawˬ hui hta‸ suhˉ jehˬ tuˬ yoˬ. Sho‸ hta‸ lawˍ ve hkʼe, chi beu‸ ngaˬ nawˬ hui hta‸ lawˍ leh, nawˬ hui awˬ hkʼaw lo maˇ da‸ maˇ kehˬ ve awˬ ceuˬ hkʼa peu-eˬ hta‸ ngaˬ yuˬ baˬ tuˬ yoˬ. 26Ponˬ laˬ htaˇ nawˬ hui gʼa jaw ve hta‸ shuˍ ve awˬ hoˉ awˬ naˬ teˇ hpaˍ ngaˬ nawˬ hui hta‸ kʼaw‸ piˇ laˇ tuˬ yoˬ. Oˇ htaˇ, Yeˍruˆsaˍlehnˍ venˇ hta‸ Hteˇ ve cawˇ ve leh ka ti‸ yeˬ ve venˇ, teh‸ shu kʼoˆ tuˬ yoˬ.
27Gʼuiˬsha lehˬ hteˇ ve cawˇ ve pa taw, Yeˍruˆsaˍlehnˍ venˇ leh venˇbaˆ dawˇ hpfuhˆ ve chaw hkʼa peu-eˬ hta‸ ponˬ piˇ tuˬ yoˬ. 28Ya‸ hkʼaˇ, yawˇ lehˬ venˇbaˆ te ve chaw leh yawˇ hta‸ hpfuhˆ ve chaw hkʼa peu-eˬ hta‸ ciˍ yanˍ piˇ tuˬ yoˬ. Yawˇ hta‸ chiˇ baˬ ve chaw hkʼa peu-eˬ hta‸ htawˇ, yawˇ tiˇ pehˍ piˇ tuˬ yoˬ.
29Suhˆ cehˬ hta‸ maˇ kʼoˆ, hko hkʼaw lo te taˍ ve shaˉ ho‸ hta‸ maˇ kʼoˆ, oˉ kʼoˍ pui ve chaw lehˬ gʼa dawˇ haˍ jaˇ tuˬ yoˬ. 30Yawˇ hui lehˬ goˇ kʼai chehˇ ve maˉ kuˇ cehˬ leh, chaw teˇ gʼaˇ ka‸ iˉ kaˆ maˇ pfuhˍ piˇ ve hko hkʼa shuˍ hpeh‸ kʼai tuˬ yoˬ. 31Goˇ jaˇ ve chi gʼawˇ hta‸ aˬ miˍ to‸ baˬ ve hkʼe, kanˇ paˆ uiˍ ve chaw teˇ hpaˍ lehˬ yawˇ hui te taˍ ve haiˬ ve kanˉ hta‸ pa taw, luˬ kuiˬ sheˆ kuiˬ lo gʼa gaˬ tuˬ yoˬ. Chaw teˇ gʼaˇ ka‸ ca tawˍ taˍ gʼa tuˬ ve maˇ heˆ.
Currently Selected:
Iˉsaˍyaˆ li‸ 1: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.