Heˍbrehˇ li‸ 1
1
Gʼuiˬsha yawˇ ve Yaˇ hpu hta‸ cuˇ leh kʼoˆ maˍ laˇ peuˬ ve awˬ lawn
1Gʼuiˬsha lehˬ, aˬ sho-eˬ htaˇ tcuh kaˍ paˍ teˇ hpaˍ hta‸ cuˇ leh, awˬ puˍ awˬ pi teˇ hpaˍ hta‸ laiˉ ceuˬ awˬ hkʼaw lo laiˉ pawˆ tawˇ yaw piˇ ve yoˬ. 2Awˬ leh meuˇ ve awˬ nyi awˬ haˉ chi awˬ hkʼaw lo, yawˇ ve Yaˇ hpu hta‸ cuˇ leh, yawˇ ngaˬ hui hta‸ tawˇ kʼaw‸ yaw laˇ peuˬ. Awˬ shinˉ hkʼa peu-eˬ hta‸ caˇ shehˍ hpaˇ hpeh‸ tuˬ, Yaˇ hpu oˇ ve hta‸ Gʼuiˬsha leuˆ yuˬ taˍ ve yoˬ. Gʼuiˬsha yawˇ hta‸ cuˇ leh, sha hpa‸ laˬ hpa‸ htaˆ hkʼa peu-eˬ hta‸ te hpanˍ taˍ ve yoˬ. 3Yaˇ hpu lehˬ, Gʼuiˬsha ve awˬ me‸ awˬ hponˇ hta‸ ba tawˆ la leh, Gʼuiˬsha nyi ma taˍ ve hkʼa shuˍ shuˍ, yawˇ taˍ ve yoˬ. Kanˇ paˆ hkʼa biˇ cawˬ ve yawˇ ve tawˇ hkawˇ hta‸ cuˇ leh, hkʼa cawˬ ve hkʼa peu-eˬ hta‸ yawˇ ha‸ shaˉ leh ga piˇ chehˇ ve yoˬ. Chaw yaˇ ve venˇbaˆ teˇ hpaˍ hta‸ yawˇ tsuhˇ baˬ peuˬ hkʼaw‸ nawˉ, mvuh kuiˬ lo chehˇ ve kanˇ paˆ uiˍ shehˍ hpaˇ ve la‸ sha paˉ lo yawˇ mui taˍ ve yoˬ.
Mvuhˇ naw ma tcuh yaˇ hui a‸ kehˉ Yaˇ hpu uiˍ ve
4Mvuhˇ naw ma tcuh yaˇ hui da‸ ve awˬ meh cawˬ ve a‸ kehˉ yawˇ gʼa taˍ ve awˬ meh lehˬ da‸ leuˉ ve yoˬ. Chi hkʼa shuˍ shuˍ, yawˇ lehˬ yawˇ hui a‸ kehˉ uiˍ leuˉ da‸ leuˉ ve yoˬ.
5Nawˬ lehˬ ngaˬ ve Yaˇ hpu yoˬ.
Ya‸ nyi ngaˬ nawˬ ve Awˬ pa hpeh‸ la peuˬ,
teh‸ Gʼuiˬsha lehˬ mvuhˇ naw ma tcuh yaˇ hkʼaˬ ve teˇ gʼaˇ hta‸ kʼoˆ piˇ jaw le.#Chi 2:7 Maˇ heˆ kʼo,
Ngaˬ lehˬ yawˇ ve awˬ pa hpeh‸ leh,
yawˇ ngaˬ ve yaˇ hpeh‸ tuˬ yoˬ, teh‸ Gʼuiˬsha lehˬ mvuhˇ naw ma tcuh yaˇ hkʼaˬ ve teˇ gʼaˇ hta‸ kʼoˆ piˇ jaw le.#2Rsv 7:14
6Chi hkʼoˆ ka‸, yaˇ uiˍ hta‸ miˬguiˬ hkʼoˆ peu laˇ ve teˇ yanˇ,
Gʼuiˬsha ve mvuhˇ naw ma tcuh yaˇ
hkʼa peu-eˬ yawˇ hta‸ oˉ kʼoˍ pui loˬ,
teh‸ yawˇ kʼoˆ piˇ ve yoˬ.#Chi 97:7 7Mvuhˇ naw ma tcuh yaˇ teˇ hpaˍ awˬ lawn Gʼuiˬsha kʼoˆ ve,
Yawˇ ve tcuh yaˇ teˇ hpaˍ hta‸
mvuhˇ haw hkʼa shuˍ shuˍ hpeh‸ tcuh leh,
yawˇ ve awˬ ceˬ teˇ hpaˍ hta‸ aˬ miˍ ha hkʼa shuˍ shuˍ hpeh‸ tcuh ve yoˬ, teh‸ yawˇ kʼoˆ taˍ ve yoˬ.#Chi 104:4
8Ya‸ hkʼaˇ, Yaˇ hpu ve awˬ lawn chi hkʼe kʼoˆ ve,
Gʼuiˬsha-oˬ, nawˬ ve kʼaw jaw co co taiˍ taiˍ yeˬ chehˇ ve yoˬ.
Nawˬ ve mvuhˇmiˬ hta‸ hteˇ lehˍ cawˇ lehˍ nawˬ uˉ peunˍ ve yoˬ.
9Nawˬ hteˇ ve cawˇ ve hta‸ ha‸ leh, aˇ hteˇ maˇ cawˇ ve hta‸ canˇ ve yoˬ.
Chi hta‸ pa taw nawˬ ve Gʼuiˬsha lehˬ,
nawˬ ve awˬ chawˇ teˇ hpaˍ hta‸ pfuhˍ piˇ ve a‸ kehˉ,
lehˬ ve naˍ manˇ nawˬ hta‸ yawˇ pfuhˍ laˇ peuˬ, teh‸ kʼoˆ ve yoˬ.#Chi 45:6-7
10Peuˬ leh,
Jawˇmawˇ Gʼuiˬsha-oˬ, awˬ hkuiˉ puiˍ htaˇ nawˬ miˬguiˬ hta‸ te hpanˍ taˍ leh,
mvuhˇ naw ma hta‸ htawˇ nawˬ ve la‸ sheh te hpanˍ taˍ ve yoˬ.
11Oˇ ve teˇ hpaˍ luˬ kʼai tuˬ yoˬ.
Ya‸ hkʼaˇ, nawˬ lehˬ hkʼaˬ htaˆ ka‸ yeˬ chehˇ tuˬ yoˬ.
Oˇ ve hkʼa peu-eˬ veu‸ kʼaˇ hkʼe piˍ kʼai tuˬ yoˬ.
12Aˉ po‸ lonˉ hta‸ lo‸ taˍ ve hkʼa shuˍ shuˍ,
oˇ ve teˇ hpaˍ hta‸ nawˬ lo‸ leh kʼaw‸ pa piˇ tuˬ yoˬ.
Ya‸ hkʼaˇ, nawˬ hkʼaˬ htaˆ ka‸ hkʼa shuˍ shuˍ hpeh‸ leh,
nawˬ ve awˬ hkʼaw‸ htawˇ maˇ peuˬ maˇ leh, teh‸ kʼoˆ ve yoˬ.#Chi 102:25-27
13Oˇ ve awˬ hkʼoˆ ka‸,
Nawˬ ve canˇ paˍ teˇ hpaˍ hta‸
nawˬ ve hkui sheh awˬ hawˉ lo ngaˬ taˍ htaˇ hkʼa gaˬ,
ngaˬ ve la‸ sha paˉ lo mui chehˇ-oˆ, teh‸ Gʼuiˬsha lehˬ mvuhˇ naw ma tcuh yaˇ hkʼaˬ ve teˇ gʼaˇ hta‸ kʼoˆ piˇ jaw le.#Chi 110:1
14Mvuhˇ naw ma tcuh yaˇ hkʼa peu-eˬ lehˬ, htaiˍ hkʼaw‸ ve awˬ shinˉ hta‸ gʼa caˇ tuˬ ve chaw hui awˬ pon kanˉ te tuˬ, tcuh taˍ ve awˬ ha teˇ hpaˍ hpeh‸ ve maˇ heˆ laˇ.
Currently Selected:
Heˍbrehˇ li‸ 1: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.