Iˉsaˍtaˆ li‸ 1
1
Jawˇmawˇ ma Vaˍshaˍtiˍ jawˇmawˇ hta‸ maˇ yawˆ maˇ yan te ve
1Jawˇmawˇ lonˉ Aˍshaˍruˆ lehˬ, Paˇshaˇ mvuhˇmiˬ hkʼaw cawˬ ve Suˇsanˍ venˇ lonˉ hkʼaw chehˇ taˍ leh, mvuhˇmiˬ 127 peˆ hta‸ uˉ peunˍ chehˇ ve yoˬ. 2Yawˇ uˉ peunˍ chehˇ ve mvuhˇmiˬ lehˬ, Kaˇlaˇnaˆ mvuhˇmiˬ leh Suˍdanˍ mvuhˇmiˬ awˬ kaˍ lo cawˬ ve mvuhˇmiˬ hkʼa peu-eˬ hpeh‸ ve yoˬ.
3Yawˇ jawˇmawˇ te ve 3 hkʼaw‸ teˇ hkʼaw‸ gaˬ htaˇ, yawˇ ve ma‸ poˍ lonˉ leh a ma‸ lonˉ teˇ hpaˍ awˬ pon pawehˇ lonˉ teˇ maˬ te piˇ ve yoˬ. Paˇshaˇ mvuhˇmiˬ leh Meˍdiˆ mvuhˇmiˬ ve ma‸ poˍ lonˉ teˇ hpaˍ leh, mvuhˇmiˬ awˬ hoˉ awˬ naˬ hkʼa peu-eˬ oˇ kaˬ lo gaˬ la ve yoˬ. 4Jawˇmawˇ lehˬ, ha pa 6 maˬ hkʼa gaˬ pawehˇ lonˉ te leh, yawˇ ve mvuhˇmiˬ hkʼaˬ ma paw sha ve leh, awˬ me‸ awˬ hponˇ hkʼaˬ ma uiˍ ve hta‸ hpeu‸ maˍ piˇ chehˇ ve yoˬ.
5Oˇ hkʼe te peuˬ hkʼaw‸ nawˉ, jawˇmawˇ lehˬ Suˇsanˍ venˇ hkʼaw hkʼa chehˇ ve chaw hkʼa peu-eˬ awˬ pon hti caˇ hti dawˬ ve pawehˇ lonˉ teˇ maˬ kʼaw‸ te piˇ ve yoˬ. Pawehˉ lonˉ chi hta‸ jawˇmawˇ ve hko hkʼaw lo teˇ shinˉ hkʼa biˇ te piˇ ve yoˬ. 6Hko chi ve hta‸ nyi sha tuˬ hkʼa deh‸ gu taˍ ve yoˬ. Haˉ pui hkuiˉ daw duˇ ti leh, hpu la‸ kawˬ teˇ hpaˍ te keu peuˬ hkʼaw‸ nawˉ, nyi naˆ meuˉ lehˍ ve aˉ caˆ hkeh yuˬ hteˇ leh, hpa hpu hpa naw teˇ hpaˍ yuˬ ko taˍ ve yoˬ. Oˇ kaˬ lo teh taˍ ve mui hkʼawˇ teˇ hpaˍ lehˬ, hpu leh shi ceh tiˉ yuˬ te taˍ leh, nyi sha tuˬ laiˉ ceuˬ te taˍ ve yoˬ. 7A pehˉ meuˇ gʼuiˬ keu dawˬ tuˬ ve kawˆ teˇ hpaˍ htawˇ shi ceh tiˉ te taˍ leh, kawˆ oˇ ve teˇ maˬ leh teˇ maˬ maˇ shuˍ da‸. Jawˇmawˇ lehˬ, chaw hkʼa peu-eˬ hta‸ hkʼe leˇ taw piˇ chehˇ ve yoˬ. 8A shu yawˇ dawˬ gaˇ ve hkʼe dawˬ tuˬ jawˇmawˇ tawˇ piˇ taˍ ve yoˬ.
9Jawˇmawˇ ma Vaˍshaˍtiˍ htawˇ, hawˉ yehˬ hkʼaw lo yaˇ miˇ teˇ hpaˍ awˬ pon hti caˇ hti dawˬ ve pawehˇ te piˇ chehˇ ve yoˬ.
10Pawehˇ te ve 7 nyi teˇ nyi gaˬ htaˇ, jawˇmawˇ lehˬ a pehˉ meuˇ gʼuiˬ dawˬ leh ha lehˬ ha kʼa te chehˇ ve yoˬ. Oˇ htaˇ jawˇmawˇ lehˬ, jawˇmawˇ ma Vaˍshaˍtiˍ hta‸ ca kuˬ veu laˇ tuˬ, yawˇ ve awˬ ceˬ paˍ Meˍhuˆmanˍ, Biˇzaˍtaˆ, Haˍbawˇnaˆ, Biˆgaˍtaˆ, Aˍbaˍgaˍtaˆ, Zeˍtanˍ, Kaˍkaˆ hui hta‸ tawˇ piˇ ve yoˬ. 11Jawˇmawˇ ma lehˬ, awˬ hkiˇ awˬ naˬ da‸ jaˇ ve pa taw, yawˇ ve ma‸ poˍ lonˉ leh gaˬ la taˍ ve hkehˉ chaw teˇ hpaˍ hta‸ maˍ piˇ gaˇ ve yoˬ. 12Yawˇ hui jawˇmawˇ ma geh kʼai leh, jawˇmawˇ kʼoˆ laˇ ve tawˇ hta‸ ca kʼoˆ piˇ htaˇ, jawˇmawˇ ma lehˬ maˇ na yuˬ. Hkʼe te leh, jawˇmawˇ nyi ma zuhˆ jaˇ ve yoˬ.
13Hkʼe te leh, yawˇ hkʼaˬ hkʼe gʼa te tuˬ yawˇ ve a ma‸ lonˉ teˇ hpaˍ hta‸ na nyi ve yoˬ. 14Yawˇ hkʼaˬ htaˆ ka‸ kuˬ leh na nyi chehˇ ve a ma‸ lonˉ teˇ hpaˍ lehˬ, Kaˍsheˍnaˆ, Sheˍtaˆ, Aˍdaˍmaˍtaˆ, Taˍsuˆ, Meˍrehˆ, Maˍsaˍnaˆ, Maˍmuˆkanˍ hui hpeh‸ ve yoˬ. 15Mvuhˇmiˬ hkʼaw lo shu a‸ kehˉ dawˇ hkʼaˇ cawˬ ve a ma‸ lonˉ chi ve 7 gʼaˇ hta‸ jawˇmawˇ kuˬ yuˬ leh, yawˇ hui hta‸ chi hkʼe kʼoˆ piˇ ve yoˬ. Ngaˬ ve awˬ ceˬ paˍ teˇ hpaˍ hta‸ hpehˇ leh jawˇmawˇ ma Vaˍshaˍtiˍ hta‸ ca kuˬ tcuh ve yoˬ. Ya‸ hkʼaˇ, yawˇ maˇ laˬ. Ngaˬ hui yawˇ hta‸ hkʼaˬ hkʼe te piˇ cawˇ le, teh‸ yawˇ hui hta‸ na nyi ve yoˬ.
16Oˇ htaˇ Maˍmuˆkanˍ jawˇmawˇ hta‸ chi hkʼe kʼoˆ piˇ ve yoˬ. Jawˇmawˇ ma Vaˍshaˍtiˍ lehˬ, jawˇmawˇ nawˬ hta‸ tiˉ maˇ shawˍ maˇ caˆ te ve maˇ heˆ. Ngaˬ hui a ma‸ lonˉ teˇ hpaˍ leh mvuhˇmiˬ yaˇ hkʼa peu-eˬ ve hta‸ ka‸ maˇ shawˍ maˇ caˆ te ve yoˬ. 17Jawˇmawˇ ma oˇ hkʼe te ve awˬ hkawˇ hta‸ hkʼa gʼa kaˇ ve yaˇ miˇ teˇ hpaˍ htawˇ, a shu yawˇ ve awˬ hpawˇ hta‸ oˇ hkʼe te piˇ tuˬ yoˬ. Jawˇmawˇ lonˉ kuˬ ve htawˇ, jawˇmawˇ ma maˇ kʼai ve ceˇ, teh‸ yawˇ hui kʼoˆ tuˬ yoˬ. 18Paˇshaˇ leh Meˍdiˆ mvuhˇmiˬ hkʼaw ve awˬ hoˉ awˬ naˬ teˇ hpaˍ ve awˬ miˇ ma teˇ hpaˍ lehˬ, jawˇmawˇ ma oˇ hkʼe te ve awˬ hkawˇ hta‸ gʼa kaˇ ve kʼo, ya‸ puiˉ mvuhˇ maˇ hpeu‸ sheˍ htaˇ ka‸ awˬ lawn oˇ ve a shu yawˇ awˬ hpawˇ hta‸ kʼoˆ piˇ tuˬ yoˬ. Awˬ miˇ ma hkʼa peu-eˬ, a shu yawˇ ve awˬ hpawˇ hta‸ nyi ma zuhˆ jaˇ tuˬ yoˬ. 19Chi hta‸ pa taw jawˇmawˇ-oˬ, nawˬ nyi ma cawˇ ve kʼo, jawˇmawˇ ma Vaˍshaˍtiˍ hta‸ nawˬ mehˆ gʼuˇ suhˍ teˇ pawˆ ka‸ maˇ gʼa laˬ tuˬ tawˇ piˇ-oˆ. Tawˇ chi ve maˇ gʼa mehˉ kʼai tuˬ, Paˇ shaˇ leh Meˍdiˆ mvuhˇmiˬ ve awˬ liˇ uˉ paˍ teˍ li‸ daw hkʼaw lo bvuh‸ keu tcuh taˍ-o‸. Oˇ hkʼe te peuˬ hkʼaw‸ nawˉ, keunˍ da‸ ve yaˇ miˇ teˇ gʼaˇ hta‸ jawˇmawˇ ma kʼaw‸ te tcuh-o. 20Nawˬ ve tawˇ chi mvuhˇmiˬ hkʼaˬ ti chi ti lo hto feu piˇ ve teˇ yanˇ, yaˇ miˇ teˇ hpaˍ lehˬ a shu yawˇ ve awˬ hpawˇ paw sha ve maˇ kʼoˆ, haˍ gʼawˇ ve maˇ kʼoˆ, yawˇ hui hta‸ yawˆ yan puiˉ la tuˬ yoˬ, teh‸ jawˇmawˇ hta‸ kʼoˆ piˇ ve yoˬ.
21Jawˇmawˇ leh yawˇ ve a ma‸ lonˉ hkʼa peu-eˬ, tawˇ chi hta‸ nyi ma cawˇ ve yoˬ. Hkʼe te leh, jawˇmawˇ lehˬ Maˍmuˆkanˍ kʼoˆ ve hkʼe te ve yoˬ. 22Yawˇ uˉ peunˍ chehˇ ve mvuhˇmiˬ teˇ peˆ le le lo, li‸ bvuh‸ feu piˇ ve yoˬ. Li‸ oˇ ve hkʼaw lo chi hkʼe kʼoˆ taˍ ve yoˬ. Awˬ hpawˇ teˇ gʼaˇ lehˬ, yehˬ shehˍ hpaˇ hpeh‸ leh, yawˇ a loˍ cawˇ ve hkʼe kanˉ hkʼa peu-eˬ ve hta‸ te peuˬ hpeh‸ ve yoˬ, teh‸ bvuh‸ taˍ ve yoˬ.
Currently Selected:
Iˉsaˍtaˆ li‸ 1: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.