Kawˇlawˇsehˇ li‸ 1
1
Awˬ chawˇ hui hta‸ dawˇ nawˇ ve hkawˇ
1Gʼuiˬsha ve a loˍ cawˇ ve hta‸ pa taw, Yeˍsuˆ Hkri‸ ve tcuh yaˇ hpeh‸ ve ngaˬ Pawˇlu‸ leh awˬ viˉ awˬ nyi Tiˆmoˉseˍ ngaˬ huiˉ maˬ lehˬ, Kawˇlawˇsehˇ venˇ awˬ hkʼaw lo chehˇ ve Hkri‸ yaˇ hui leh, Hkri‸ awˬ hkʼaw lo ka ti‸ yeˬ ve awˬ viˉ awˬ nyi teˇ hpaˍ hta‸ li‸ chi teˇ kʼoˆ bvuh‸ laˇ ve yoˬ.
2Ngaˬ hui ve Awˬ pa Gʼuiˬsha ve awˬ bon awˬ shinˉ leh dawˇ sha gaˇ sha tuˬ nawˬ hui geh cawˬ piˇ-oˆ.
Co ha hpawˇ yawˇ hui cuˇ yiˍ maˍ yiˍ cawˬ tuˬ Pawˇlu‸ bon lawˬ ve
3Nawˬ hui awˬ pon ngaˬ hui bon lawˬ ve teˇ yanˇ, ngaˬ hui ve Jawˇmawˇ Yeˍsuˆ Hkri‸ ve Awˬ pa Gʼuiˬsha hta‸ hkʼaˬ htaˆ ka‸ chiˇ mvuh ve yoˬ. 4Awˬ lawn kʼo, nawˬ hui Yeˍsuˆ Hkri‸ hta‸ yonˍ ve awˬ lawn maˇ kʼoˆ, Hkri‸ yaˇ hkʼa peu-eˬ hta‸ nawˬ hui ha‸ ve awˬ lawn maˇ kʼoˆ, ngaˬ hui gʼa kaˇ ve hta‸ pa taw Gʼuiˬsha hta‸ chiˇ mvuh ve yoˬ. 5Chi hkʼoˆ ka‸, mvuhˇ naw ma lo nawˬ hui awˬ pon ha‸ shaˉ taˍ ve dawˇ law ve teˇ ceuˬ cawˬ ve hta‸ pa taw htawˇ, ngaˬ hui Gʼuiˬsha hta‸ chiˇ mvuh ve yoˬ. Dawˇ law ve chi awˬ lawn awˬ tehˬ awˬ na ve ha lehˬ ve bon hkawˇ hta‸ maˍ ve awˬ hkʼaw lo nawˬ hui gʼa kaˇ ve yoˬ. 6Ha lehˬ ve bon hkawˇ oˇ ve lehˬ, nawˬ hui geh gaˬ la peuˬ ve awˬ hkʼoˆ ka‸, miˬguiˬ hkʼoˆ teˇ kaˬ le le lo awˬ shiˍ naw‸ la uiˍ la chehˇ ve hkʼe, nawˬ hui gʼa kaˇ leh Gʼuiˬsha ve awˬ bon hta‸ awˬ tehˬ awˬ na gʼa shiˍ ve teˇ nyi hta‸ tanˬ leh, nawˬ hui awˬ hkʼaw lo htawˇ, awˬ shiˍ naw‸ la leh uiˍ la chehˇ ve yoˬ. 7Awˬ lawn oˇ ve hta‸ nawˬ hui gʼa shiˍ ve lehˬ, ngaˬ hui geh teˇ geh kanˉ te ve, ngaˬ hui ha‸ ve Eˇpaˍhpaˍraˆ geh nawˬ hui gʼa henˇ taˍ peuˬ. Yawˇ lehˬ, ngaˬ hui awˬ pon Hkri‸ ve ka ti‸ yeˬ ve kanˉ te shehˍ hpaˇ hpeh‸ leh, 8Awˬ ha hpu awˬ hkʼaw lo nawˬ hui ngaˬ hui hta‸ ha‸ ve awˬ lawn yawˇ ngaˬ hui hta‸ hto laˇ ve yoˬ.
9Hkʼe te leh, nawˬ hui yonˍ leh ha‸ ve awˬ lawn ngaˬ hui gʼa kaˇ ve teˇ nyi hta‸ tanˬ leh, nawˬ hui awˬ pon ngaˬ hui hkʼaˬ htaˆ ka‸ bon lawˬ chehˇ ve yoˬ. Co ha hpawˇ ve cuˇ yiˍ maˍ yiˍ leh dawˇ pawnˍ dawˇ shiˍ puiˉ ve hkʼa peu-eˬ awˬ hkʼaw lo, Gʼuiˬsha ve a loˍ hta‸ nawˬ hui hkʼa biˇ biˇ shiˍ tuˬ ngaˬ hui bon lawˬ ve yoˬ. 10Nawˬ hui oˇ hkʼe shiˍ ve kʼo, Jawˇmawˇ Yeˍsuˆ hta‸ keunˍ da‸ ve hkʼe nawˬ hui te kʼai leh, teˇ ceuˬ le le awˬ hkʼaw lo yawˇ nawˬ hui hta‸ nyi hkʼaˇ suh tuˬ yoˬ. Chi hkʼoˆ ka‸, da‸ ve kanˉ teˇ ceuˬ le le awˬ hkʼaw lo nawˬ hui awˬ shiˍ naw‸ la tuˬ leh, leuˉ leh Gʼuiˬsha hta‸ shiˍ maˇ la tuˬ yoˬ. 11Yawˇ ve awˬ me‸ awˬ hponˇ kanˇ paˆ uiˍ ve pa taw, nawˬ hui ha lehˬ ha kʼa ve awˬ hkʼaw lo nyi ma yeˬ leh yeunˇ hkanˍ puiˉ tuˬ, nawˬ hui kanˇ paˆ hkʼa biˇ cawˬ tuˬ awˬ pon htawˇ ngaˬ hui bon lawˬ ve yoˬ. 12Hkʼe te leh, awˬ gʼeuˆ awˬ hkʼaw lo chehˇ ve Hkri‸ yaˇ teˇ hpaˍ geh teˇ geh ngaˬ hui awˬ shinˉ caˇ keunˍ ve chaw hpeh‸ la tuˬ te laˇ shehˍ hpaˇ Awˬ pa hta‸ nawˬ hui chiˇ mvuh tuˬ yoˬ. 13Awˬ pa lehˬ, naˆ ho‸ ve kanˇ paˆ awˬ hkʼaw lo ngaˬ hui hta‸ ponˬ laˇ peuˬ leh, yawˇ ha‸ ve Yaˇ hpu ve mvuhˇmiˬ awˬ hkʼaw lo lo‸-e tcuh laˇ ve yoˬ. 14Yaˇ hpu oˇ ve awˬ hkʼaw lo ngaˬ hui htaiˍ hkʼaw‸ ve hta‸ gʼa ve yoˬ. Htaiˍ hkʼaw‸ ve oˇ ve lehˬ, venˇbaˆ hpehˇ laˇ ve teˇ ceuˬ yoˬ.
Hkri‸ suh ve pa taw ngaˬ hui Gʼuiˬsha hta‸ cawˇ da‸ hawˍ da‸ ve
15Yawˇ lehˬ, chaw yaˇ mawˬ maˇ hpeh‸ ve Gʼuiˬsha ve awˬ ho‸ awˬ han hpeh‸ leh, hpanˍ taˍ ve hkʼa peu-eˬ awˬ hkʼaw lo yaˇ kaoˬ hpeh‸ ve yoˬ. 16Mvuhˇ naw ma hkʼoˆ leh miˬguiˬ hkʼoˆ ve awˬ ceuˬ teˇ hpaˍ maˇ kʼoˆ, mawˬ hpeh‸ ve leh mawˬ maˇ hpeh‸ ve awˬ ceuˬ teˇ hpaˍ maˇ kʼoˆ, kʼaw jaw teˇ hpaˍ, jawˇmawˇ teˇ hpaˍ, uˉ peunˍ shehˍ hpaˇ teˇ hpaˍ leh kanˇ paˆ uiˍ shehˍ hpaˇ teˇ hpaˍ maˇ kʼoˆ, awˬ ceuˬ hkʼa peu-eˬ yawˇ awˬ hkʼaw lo te hpanˍ taˍ ve yoˬ. Awˬ ceuˬ hkʼa peu-eˬ yawˇ hta‸ pa taw leh yawˇ awˬ pon te hpanˍ taˍ ve yoˬ. 17Teˇ ceuˬ ka‸ maˇ cawˬ sheˍ htaˇ ka‸, yawˇ cawˬ taˍ ve yoˬ. Awˬ ceuˬ hkʼa peu-eˬ yawˇ awˬ hkʼaw lo yeˬ chehˇ ve yoˬ. 18Yawˇ lehˬ, Hkri‸ yaˇ awˬ moˍ ve oˉ kʼoˍ hpeh‸ leh, Hkri‸ yaˇ awˬ moˍ lehˬ, yawˇ ve awˬ to hpeh‸ ve yoˬ. Yawˇ lehˬ, awˬ hkuiˉ puiˍ hpeh‸ leh hkʼa peu-eˬ awˬ hkʼaw lo yawˇ awˉ lawˉ peuˇ ve teˇ gʼaˇ hpeh‸ tuˬ, suh kuiˬ lo awˉ lawˉ kʼaw‸ te‸ tu la ve teˇ gʼaˇ hpeh‸ ve yoˬ. 19Awˬ lawn kʼo, yawˇ awˬ hkʼaw lo biˇ ve awˬ ceuˬ hkʼa peu-eˬ cawˬ tuˬ Awˬ pa nyi hkʼaˇ suh leh, 20la‸ ka hkʼoˆ lo sheˆ ve yawˇ ve awˬ suhˍ hta‸ pa taw, miˬguiˬ hkʼoˆ ve awˬ ceuˬ teˇ hpaˍ maˇ kʼoˆ, mvuhˇ naw ma hkʼoˆ ve awˬ ceuˬ teˇ hpaˍ maˇ kʼoˆ, awˬ ceuˬ hkʼa peu-eˬ Gʼuiˬsha yawˇ awˬ to hta‸ cawˇ da‸ hui da‸ hpeh‸ tuˬ te ve yoˬ.
21Ponˬ laˬ htaˇ nawˬ hui lehˬ, yawˇ hta‸ hpaˆ da‸ leh haiˬ ve kanˉ hta‸ te ve awˬ hkʼaw lo nyi ma hpawˇ yawˇ ve canˇ paˍ hpeh‸ ve yoˬ. 22Ya‸ hkʼaˇ chi beu‸ lehˬ, yawˇ awˬ suhˍ awˬ shaˍ awˬ to hkanˍ suh ve pa taw, yawˇ nawˬ hui hta‸ kʼaw‸ cawˇ da‸ hawˍ da‸ piˇ lawˬ peuˬ. Yawˇ chi hkʼe te ve lehˬ, nawˬ hui da‸ kehˬ ve chaw, venˇbaˆ taˍ kuiˬ maˇ cawˬ ve chaw leh, shu kʼoˆ kuiˬ yaw kuiˬ maˇ cawˬ ve chaw hpeh‸ ve awˬ hkʼaw lo, Gʼuiˬsha hta‸ chiˇ a‸ piˇ tuˬ awˬ pon yawˇ te ve yoˬ. 23Nawˬ hui gʼa kaˇ taˍ peuˬ ve ha lehˬ ve bon hkawˇ hta‸ caˉ da‸ ve dawˇ law ve teˇ ceuˬ awˬ hkʼaw lo maˇ jiˆ leh, yonˍ ve teˇ ceuˬ hta‸ awˬ hkuiˉ puiˍ taˍ leh yeˬ chaweh vawˆ taˍ ve kʼo, yawˇ chi hkʼe chiˇ a‸ piˇ hpeh‸ tuˬ yoˬ. Mvuhˇ naw ma awˬ hawˉ lo cawˬ taˍ ve, hkʼa hpanˍ taˍ ve te‸ chehˇ ve awˬ ceuˬ hkʼa peu-eˬ hta‸ ha lehˬ ve bon hkawˇ oˇ ve shu maˍ piˇ taˍ peuˬ. Ngaˬ Pawˇlu‸ htawˇ ha lehˬ ve bon hkawˇ oˇ ve hta‸ maˍ piˇ shehˍ hpaˇ hpeh‸ la ve yoˬ.
Pawˇlu‸ buiˇshaˆaˉnaˆ chaw hui awˬ pon kanˉ te ve awˬ lawn
24Chi beu‸ ngaˬ nawˬ hui awˬ pon gʼa tu‸ gʼa hkanˍ ve awˬ hkʼaw lo ngaˬ ha lehˬ chehˇ ve yoˬ. Hkri‸ ve tu‸ ve hkanˍ ve hkʼa cawˬ taˍ sheˍ ve teˇ hpaˍ hta‸ yawˇ ve awˬ to awˬ pon ngaˬ ve awˬ to awˬ hkʼaw lo biˇ la tuˬ ngaˬ te chehˇ ve yoˬ. Yawˇ ve awˬ to teh‸ kʼoˆ ve lehˬ, Hkri‸ yaˇ awˬ moˍ hta‸ kʼoˆ ve yoˬ. 25Gʼuiˬsha ve tawˇ hkawˇ hkʼa biˇ shiˍ piˇ hpeh‸ tuˬ, Gʼuiˬsha ngaˬ hta‸ leuˆ yuˬ laˇ ve hkʼe, Hkri‸ yaˇ awˬ moˍ awˬ pon ngaˬ kanˉ te shehˍ hpaˇ hpeh‸ ve yoˬ. Kanˉ chi Gʼuiˬsha ngaˬ hta‸ pe‸ laˇ ve lehˬ, nawˬ hui awˬ pon yoˬ. 26Gʼuiˬsha ve tawˇ hkawˇ lehˬ, aˬ sho-eˬ htaˇ teˇ co peuˬ teˇ co faˉ taˍ leh tcuhˉ kuiˬ naˉ jaˇ ve tawˇ hkawˇ hpeh‸ ve htawˇ, chi beu‸ yawˇ ve Hkri‸ yaˇ teˇ hpaˍ hta‸ yawˇ hpeu‸ maˍ piˇ taˍ peuˬ. 27Buiˇ shaˆ aˉ naˆ chaw hui awˬ pon tcuhˉ kuiˬ naˉ jaˇ ve tawˇ hkawˇ chi, awˬ me‸ awˬ hponˇ hkʼaˬ ma uiˍ jaˇ maˇ jaˇ ve awˬ lawn, Hkri‸ yaˇ teˇ hpaˍ hta‸ shiˍ piˇ tuˬ, Gʼuiˬsha yawˇ heuˆ gaˇ ve yoˬ. Tcuhˉ kuiˬ naˉ ve tawˇ hkawˇ oˇ ve lehˬ, Hkri‸ nawˬ hui awˬ hkʼaw lo chehˇ taˍ ve pa taw, nawˬ hui awˬ me‸ awˬ hponˇ gʼa tuˬ ve hta‸ dawˇ law chehˇ ve teˇ ceuˬ yoˬ. 28Yawˇ awˬ lawn ngaˬ hui bon maˍ ve yoˬ. Hkʼaˬ hkʼe te leh, chaw teˇ gʼaˇ le le Hkri‸ awˬ hkʼaw lo uiˍ la peuˬ ve chaw hpeh‸ leh, ngaˬ hui yawˇ hui hta‸ Gʼuiˬsha ve la‸ sheh hkʼaw chiˇ a‸ piˇ hpeh‸ tuˬ, ngaˬ hui lehˬ chaw teˇ gʼaˇ le le hta‸ shaˍ ti‸ piˇ leh, cuˇ yiˍ hkʼa peu-eˬ hta‸ yehˇ leh, chaw teˇ gʼaˇ le le hta‸ maˍ piˇ ve yoˬ. 29Oˇ ve awˬ pon ngaˬ gʼaˇ hte‸ te ve yoˬ. Yawˇ ngaˬ hta‸ kanˇ paˆ pe‸ laˇ leh ngaˬ awˬ hkʼaw lo gʼaˇ hte‸ te chehˇ ve hkʼe, ngaˬ htawˇ coˇ caˇ leh te ve yoˬ.
Currently Selected:
Kawˇlawˇsehˇ li‸ 1: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.