Johani 15
15
Jeso ngu Musaansa Mwini Mwini
1“Ndime musaansa mwini mwini, Taata ngu mulimi. 2Inzho kufwumbwa mutabi uutazhali mulyuume ulookosola, pele wezo uuzhala ulookokola kwaamba uzhalishe. 3Umwe ndamusalazha kale u mazwi ngundamukananina. 4Amukakatile kwangu, ame kulyuumwe. Kwiina mutabi uukonzha kuzhala micelo wini bulyo utali ku cishiko camusaansa, umbona bobo amwe tamukonzha kuzhala micelo cita kamuli kulyuume.
5“Ume ndime isamu lya musaansa, umwe muli mitabi. Wezo uukalilila kwangu ame kwakwe nguukaazhala micelo minji minji, kaambo kuti mwaandaana ame kwiina ncimukonzha kucita pe. 6Kuti muntu takalilila mulyuume, uli ukoya mutabi wakosolwa wamana wazuma. Mitabi iili bobo ilabwezwa u kusowelwa mu mulilo ukutentwa. 7Ubobo kuti mwakalilila mulyuume u mazwi aangu akalilila muli umwe, mulakonzha kukumbila kufwumbwa ncimuzanda mulakapewa. 8Taata ulapewa bulemu kuti mwazhala micelo minji minji, amwe ndilelyo nimukaalitondezha ati muli ba shiciiya bangu. 9Umbona mbwaamufwini Taata ame ndimufwini, inzho amushaale mu lufwuno lwangu. 10Kuti mweebamba Milawo yangu, mulakalilila mu lufwuno lwangu, umbona mbundakeebamba Milawo yaka Taata ukukalilila mu lufwuno lwakwe.
11“Ndamushimwina aza kwaamba lutangalo lwangu lube muli umwe, alo lutangalo lwenu lumaninine. 12#Joh 13:34; 15:17; 1 Joh 3:23; 2 Joh 1:5Mulawo wangu nguwezu, amufwunane umbona mbwiimufwini ame.” 13Kwiina muntu uukwete lufwuno lukando luli bolya, lwakwaaba bumi bwakwe ukaambo kabalongwaakwe. 14Mwaakucita nshindamulailila mulaakuli balongwaangu. 15Nshicimwiti linji ati batwanga bangu nkaambo batwanga tabacizhi ncaacita shimatwangaabo. Inzho ndaakumwita ati muli balongwaangu, nkaambo ndakamushimwina shoonse nshindakateelela kwa Taata. 16Mwiina kunsala, ndime indakamusala kwaamba muukuya mukazhale micelo minji minji iitakaamana. Inzho Taata ulakamupa kufwumbwa ncimukaakumbila mwizhina lyangu. 17Ubobo ndamulailila kwaamba amufwunane umwi uumwi.
Bantu Baanshi Balakasula Bana Kilisito
18Kuti bantu baanshi bakamusule mukazhibaluke ati ndime bakataanguna kusula. 19Mwaakuli baanshi ano, inshi yoonse ilaakumufwini ukoya banamuzhaabo. Pele ume ndakamusala kuhwa anshi yezhi, tamucili baanshi pe, nciceco inshi nciimuswile. 20#Mat 10:24; Lk 6:40; Joh 13:16Kamwaazhibaluka mazwi ngundakamushimwina akuti, mutwanga tali mukando kubaala shimatwangaakwe. Na ume bantu bakampenzha, amwe balakamupenzha umbona. Na bakaatambula mazwi angu, amwe enu balakaatambula. 21Pele balakacita shoonse sheshi ukambo kangu, nkaambo tabamwizhi wakantuma. 22Kuti indatakeza kubayiisha, nibaakwiina mulandu wa cibi, pele inzho bayina cilitamizho kumulandu wa cibi cabo pe. 23Wezo uunswile, ulimuswile u Taata. 24Kuti indatakacita milimo itanacitilwe akati kabo, nibaakwiina mulandu wa cibi. Nikuba bobo bakeebona milimo yangu, pele bakansula ume antoomwi u Taata. 25#Inte 35:19; 69:4Sheshi shakacitwa umbona mbukulembelwe mu milawo yabo ati, “Bakansula bwiina ukaambo.”
26Pele muyohwi ulakashika, wezo ngunkaatuma kuhwa kwa Taata, walo uuli ngu Moza walushinizho uuhwa kwa Taata. Nguukeza kupa bumboni bumpandulula. 27Amwe mbubona muli bakamboni bangu kaambo twakaakuli amwe kuhwa ku makancilo.
Currently Selected:
Johani 15: ILL
Highlight
Share
Copy
Want to have your highlights saved across all your devices? Sign up or sign in
Ila New Testament © Bible Society of Zambia, 2015.