Johani 12
12
Jeso Wananikwa Mafwuta ku Betani
(Matayo 26:6-13; Maako 14:3-9)
1Nikwakashaala mazuba ali cisambomwi kalitana kushika Ipobwe lya Kwiitilila, Jeso wakashika mu munzhi wa Betani mwakaakukala Lazalo wezo ngwaakabusha ku bafwu. 2Inzho bakamwiikila ukumusenjelela cilalilo cakumusekelela, Malita nguwakaakusengela. Lazalo kali uumwi wa babo bakaakulya u Jeso. 3#Lk 7:37, 38Maliya wakabweza impawo yamafwuta a dula, akaakununka kalonze nkaambo akapangwa iinsende yabwema bubotu. Amane wakananika shituta shaka Jeso ukushishoba umasusu aakwe. Ubobo muŋanda mwakezula bwema bubotu bwamafwuta azo. 4Ngoonaawo Judasi shikaliyoti umwi wa bashiciiya baka Jeso, wezo nguwena wakaakuli shikumwaaba wakaamba ati, 5“Nkaamboonzhi aza mafwuta ncaatauzhiwa myaanda yotatwe yamali, amana azo mali naapewa bapushi?” 6Nakaamba bobo kootali muzeezo wakuyohwa bapushi, pele nkaambo kakuti kali mutewu, mbwaakaakuli ngumuzobozhi wankomo, keba mali amwi ukuliyohwa mwini munzhila shakwe.
7Jeso wakamwaambila ati, “Mulece bulyo wezo mukaintu. Aza mafwuta wakaula kulibambila kuzhikwa kwa mubili wangu. 8#Ciz 15:11Bapushi mulaakuli abo lyoonse, pele ume tatuukuli amwe lyoonse.”
Bakanza Kumuyaya Lazalo
9Inzho ba Juda banji-banji nibakazhiba ati Jeso uli ku Betani, bakaya koko, kabatayi kubona bulyo Jeso pele u kubona Lazalo wezo ngwaakabusha ku bafwu. 10Ubobo bapaizhi bakando bakakanka kukanza kuyaya Lazalo, 11nkaambo kakuti ba Juda banji-banji nibakamubona bakakanka kushikaka injiisho shabo u kushoma Jeso.
Jeso Wanjila ca Bwami mu Jelusalemu
(Matayo 21:1-11; Maako 11:1-11; Luka 19:28-40)
12Nibwakaca inkamu inkando ya bantu bakaakuzhile kwi Pobwe lya Kwiitilila yakateelela ati Mwami Jeso uleza ku Jelusalemu. 13#Inte 118:25, 26Ubobo bakatema malala u kuya kumucinga balaya bupozomoka ati,
“Naatembulwe Leza!
Ulilonjelwe wezo uuzhiza mwizhina lya Mwami Leza,
Leza amulonjezhe Mwami wa Izilaili!”
14Inzho Jeso bakamuletelela mwana wa mbongolo amane waliza, umbona mbukulembelwe ati,
15 #
Zaka 9:9
“Utatiyi,
Mu munzhi wa Ziyoni,
nguwezo Mwami wako uleza bwiza,
ulilizile mwana wa mbongolo.”
16Lutaanzhi ba shiciiya bakwe bayina nibakaateelelesha aza makani kushikila buzuba Jeso mbwaakabushiwa mu bulemu. Ndilelyo nibakazhibaluka ati makani aza akakulembelwe kaakanana sha Jeso ulimwi shesho shintu shakamucitikila kale Jeso.
17Bantu banji-banji mbucakaakuli abo naakamoompolola Lazalo mu cuumbwe ukumubusha ku bafwu bakaba bakamboni ba shintu shesho ulimwi bakatolele kuta bushaamba. 18Nciceco ncibakaila kumucinga nkaambo bakateelela ati nguwakacita citondezho ceco ca nsana. 19Ubobo ba Falisi bakaamba ati, “Kwiina ncitukacita! Amubone bantu mucishi coonse bamucilila!”
Ba Giliki ba Mukapula Jeso
20Inzho kakuli ba Giliki bamwi bakaakwiile kukomba kwipobwe lelyo. 21Baba bakeza kwa Filipo uuhwa mu munzhi wa Betisaida mucishi ca Galilaya bamwita ati, “Twalomba tulazanda kubona Mwami Jeso.”
22Ngoonaawo Filipo wakamushimwina Andulu aza makani, bamane bakaya antoomwi kwa Jeso. 23Jeso wakaingula ati, “Cashika ciindi cakuti Mwanaa Muntu alemekwe. 24Cini cini ndamwaambila ati, kuti insece ya maila yatashangwa mwihu kwaamba ifwe, lyoonse ilaakuli insece yomwi bulyo. Pele kuti yashangwa mwihu, ilakazhala insece shinji-shinji. 25#Mat 10:39; 16:25; Mk 8:35; Lk 9:24; 17:33Wezo uufwini bumi bwakwe ulakabusowekelwa, pele uutabufwini bumi bwakwe ano anshi ulakayana bumi butamana. 26Kufwumbwa muntu uunsebezela, ulyeelele kuncilila, kwaamba koko nkumbele aze mutwanga wangu akabe ko. Kufwumbwa muntu uunsebezela ulaakulemekwa kwa Taata.”
Jeso Wakanana Makani a Lufwu Lwakwe
27“Akaka monzo wangu wapenga cini cini. Anu ŋambe acani? Sa ŋambe ati, ‘Taata nhuna kumapenzhi a ceno ciindi’? Pe pe, koku kupenga nkundakezhila. 28Taata, Leta bulemu kwizhina lyako.” Ngoonaawo kwizeulu kwakateelelwa izwi lyaamba ati, “Ndaleta kale bulemu, ulimwi ncileta bulemu.”
29Bantu banji-banji bakaakuzhimine awo bakaliteelela lelyo Izwi, bakaamba ati, “Yalila inhula.” Pele bamwi bakaamba ati, “Anjelo nguwaakukanana kwakwe.”
30Jeso wakaamba ati, “Leli Izwi lyateelelwa ukaambo kenu, kutali kangu. 31Inzho lubeta lwaanshi lwashika, inzho muleli waanshi ano ukalatandwa. 32Inzho ciindi ume ndakasumpulwa kuhwa anshi, ndakakwela boonse bantu kwangu.” 33Jeso wakaamba aza mazwi kutondezha lufwu lwakwe lwamapenzhi mbulukaaba.
34 #
Inte 110:4; Aiz 9:7; Eze 37:25; Dan 7:14 Bantu bakamwiingula ati, “Twakateelela mu mulawo waka Mozesi ati, Kilisito ulaakupona lyoonse. No uwe ncinzhi cikwaambya ati, ‘Mwanaa Muntu ulyeelele kusumpulwa kuhwa anshi?’ Nguni wezo Mwanaa Muntu nguuamba?” 35Jeso wakabaingula ati, “Mumuni ulaakucili amwe kwa kaindi kali mbukabele. Kamweenda mumuni nuuciliko kwaamba mushinze utamweenzha, nkaambo muntu weenda mu mushinze takuboni nkwaaya. 36Inzho nimucikwete mumuni amuushome, kwaamba mube bantu ba mumuni.” Amane kwaamba bobo Jeso wakaahwa wabazuba.
Ba Juda Bakaka Kumushoma Jeso
37Nikuba ati Jeso wakacita shitondezho shinji-shinji kaanzambwene, bayina nibakamushoma pe. 38#Aiz 53:1Ceci cakaba bobo kwaamba ati azuzucizhiwe makani akaamba Aizaya mushinshimi ati,
“Mwami anu mbubani
bakakooshoma mulumbe wesu,
ulimwi mbubani bakaashibona
insana shako inkando?”
39Ubobo bayina kumushoma Jeso umbona mbwakaamba Aizaya ati,
40 #
Aiz 6:10
“Leza waboofwaazha menso abo,
ulimwi weezumya myonzo yabo,
cakuti tabakonzha kubona u menso abo,
nikuba kuzhiba mu myonzo yabo,
ukusandukila kwakwe
kwaamba abaponye.”
41Aizaya wakaamba aza mazwi nkaambo wakabubona bulemu bwaka Jeso ukubupandulula.
42Pele nikuba bobo ba Juda u beendelezhi banji banji bakamushoma Jeso. Pele bayina kulwaamba lushomo lwabo kaanzambwene ukaambo kakutiya ba Falisi ati balabatanda mucikombelo caba Juda. 43Baba bakando, kabazanda kutembaulwa ku bantu kubaala kutembaulwa kwa Leza.
Lubeta lwa Mazwi aka Jeso
44Ngoonaawo Jeso wakapozomoka ati, “Wezo unshoma tashomi ume bulyo, pele ulamushoma u wezo wakantuma. 45Ulimwi kufwumbwa wambona, ati wamubona u wezo wakantuma. 46Ndakeza anshi kwaamba mbe mumuni wanshi, kwaamba kufwumbwa wezo ukaanshoma atakakala mu mushinze. 47Kufwumbwa uteelela mazwi angu amana taabamba, nshimupi mulandu pe, nkaambo ndiina kwiza kubeteka inshi, pele ndakezhila kwiifwutula. 48Babo bankaka ukutaatambula malailile aangu, balikwete uubabeteka. Mazwi ngundakaamba ngaakaamuzula kubuzuba bwamamanino. 49Nkaambo nshaamba mazwi a munsana shangu ndimwini, pele Taata wakantuma nguwampa mulawo wakwaamba mazwi ngunjelele kwaamba. 50Ubobo, ndizhi ati milawo yakwe ilapa bumi butamana. Shoonse nshiŋamba ndashaamba mbuli mbundakalaililwa kwa Taata.”
Currently Selected:
Johani 12: ILL
Highlight
Share
Copy
Want to have your highlights saved across all your devices? Sign up or sign in
Ila New Testament © Bible Society of Zambia, 2015.