SOFONII 1
1
1Wen ko GASA WAN nɛ ee nú Sofonii, bem ko Kusi
be-koo Gedalia, bezaŋ Amaria, nutua ko Ezɛkias,
ŋgimbi wan ko Josias, wannu Juda, bem ko Amɔŋ, nɛ mɔ'ɔ.#2 Wan 22.1—23.30; 2 Kal Ny 34.1—35.27
Wese kita ko GASA WAN
2GASA WAN'e:
«Mi tɛ ɗaŋ mɔ zu nù'ɛ yinɛ lɛŋ.
3Mi tɛ kum o bíí in o saɗi,
o nɔ̧́í̧ gu nɛ o zoro,
mi tɛ kum o ɗaŋ bíí nɛ oi ɗaŋ deemɔ kɔ-wa.
Ŋma oi ndaa bíí kpɔk
n'am tɛ e zu nù'ɛ bo na.
Ɛ mi GASA WAN a̧ tɔ̧ wen’ɛ.
4Mi tɛ de ŋmaa in Juda,
si kpa nɛ o bíí Jerusalɛm lɛŋ.
Mi tɛ bi nin Bal yinɛ fara’ɛ
gu nɛ o gasa wi-de-tom kɔ̧-a̧
in o wi-ɗaf'a mbɛt.
5Mi tɛ kum o wi-daŋ-zu tua
gasi nɛ o sɔra,
gu nɛ o bíí nɛ gu nù ti GASA WAN,
ɓɛɛ tɛ̀ɛ̀ kan mɔ nɛ nin sɔ̧ kɔ-wa Milkɔm mbɛt.
6Mi tɛ kum o wi nɛ e GASA WAN duk,
nɛ pii ɗoŋ tɛ a̧
mɛ ai nú ha̧ a̧ na mbɛt.»
7Ɛ̀nɛ̀ dúk nɛ oi nú ti GASA WAN Sɔ̧,
wen wese kita ko GASA WAN hɛɗa kaɗi.
GASA WAN ɗafa mɔɔ-ɗafi-sɔ̧,
ɓɛɛ a̧ ɗafi war-tɛ o wi n'aa saa.
8GASA WAN tɔ̧a̧:
«Wese-ɗafa-sɔ̧ kɔ‘m,
mi tɛ de ŋmaa in o gasawi,
o be-wan ká bá nɛ̀ oi wi
nɛ ba nɛ yuwar deemɔ ko o gɔni-duk.
9Wese'i, mi tɛ de ŋmaa
in o wi nɛ kpíɗí nú dadaa nú tua ko sɔ̧ kɔ-wa,
ká bá nɛ̀ o wi nɛ ɔr mɔ,
ɓar nɛ mɔ er o bíí si kɔ̧ tua ko sɔ̧ kɔ-wa.»
10GASA WAN tɔ̧a̧:
«Wese'i, wi tɛ zii hiɗimɔ sɛn nú garo Zoro,
in gɔfamɔ ko o bíí tɛ mbe ye,
ká bá nɛ̀ gasa giti mɔ zu kaya mɛ.
11Ɛ́nɛ́ o wi-ɔ-see-ye Jerusalɛm,
ɛ̀nɛ̀ áí nú,
wen o wi-ɗɔr-mɔ lɛŋ kuma kaɗi
gu nɛ o wi-kpai-sede.
12Ŋgimbi'i, mi tɛ du wee kii nɛ mɔ sɛn Jerusalɛm,
ɓɛɛ mi tɛ de ŋmaa in o wi
nɛ ya ɓɔn tɛ ɗaŋ deemɔ kɔ‘i tɔ̧ nɛnɛ‘e:
‹GASA WAN nɛ duk nɛ kɔ‘i'i de demɔ na,
a̧ de ɗaŋmɔ na mbɛt.›
13Bíí tɛ kai mbɔi kɔ-wa yaknɛ,
bíí tɛ ɗaŋ tua kɔ-wa gbin a nù ŋgɛ́rɛ́m-ŋgɛ́rɛ́m;
wa baa so tua kɔ-wa e ŋgɔn,
ɓɛɛ wa beka ɔ sɛnɛ na;
wa waa so fɔ nyak-dɔ̧ɔ̧,
ɓɛɛ wa beka nɔ dɔ̧ɔ̧-a̧a̧ na mbɛt.»
14Wese kita ko GASA WAN hɛɗa kaɗi!
Wese'i hɛɗa dɔ̧́ɔ̧́ kaɗi;
wese'i hɔɔ hɔɔ kaɗi.
O bíí tɛ hiɗi mɔ nɛ paŋ nú;
wese'i kóó nɛ o ŋgaŋa-wi tɛ kii gbakamɔ.
15Wese'i nɛ́ wese ŋga nyimsea,
wese ŋga bɔnɛ in dita-see,
wese ɗaŋamɔ lɔ́kɔ́tí-lɔ́kɔ́tí, puturu,
wese gba tum in ti-tum kpɔ̧́ɔ̧́-kpɔ̧́ɔ̧́,
wese gba búk-kórò in tura-zan ndír-ndír;
16wese-dɔm-mbia in gayamɔ-biro
si zu o ye-ŋgárá in o ŋga fara-pɛm-mɔ.
17GASA WAN tɔ̧a̧:
«Mi tɛ pi̧ ŋga bɔnɛ zu o bíí;
wa tɛ nɛ nɔ hee o wi-boma-yí ga,
wen wa dee ɗaŋmɔ in GASA WAN.
Tɔk tɛ-wa tɛ pɛsi dam fara lɛŋ;
o bíí tɛ hui nyak zaŋ-wa a taŋ hee yɔsɛ ga.»
18Kóó bu-mbɔi gu nɛ lɔr beka kpasi wa na;
wese nyimsea ko GASA WAN,
wese-de-gɔya tɛ-wi ko GASA WAN
tɛ kpɔr hee wee ga;
nù tɛ ɗaŋ, o bíí tɛ kum lɛŋ,
mɔ‘i tɛ duk nɛ mɔɔ-ari.
Currently Selected:
SOFONII 1: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.