JAK 1
1
Fanamɔ
1Nɛ́ mi Jak, wi-de-tom ko Sɔ̧ in ko Gasa Wan Jesu Krist, a̧ tom kalata’ɛ ha̧ o zuduk bíí ko Sɔ̧ ɓu-zua-yiitoo nɛ̀ pɛsa dam zaŋnu; mi fana ɛ́nɛ́.#Mt 13.55; Mk 6.3; Tom 15.13; Gal 1.19
Nɔɔ-ŋgiɗi tɛ́ bɔnɛ
2O nya'm, ɛ̀nɛ̀ nɔ́ ŋgiɗi tɛ̀ o mɔ nɛ̀ ba tɛ‘nɛ́ lɛŋ nɛ̀ tortɛ, 3wen ɛ́nɛ́ iŋa o weamɔ we nɛ́ kɔ̧ɔ̧ɗɔɔwen k’ɛ́nɛ́ h’ɛ́nɛ́ mɛ́ kpa nɔɔ-ŋgiɗi. 4Ɓɛɛ nɔɔ-ŋgiɗi k’ɛ́nɛ́ a̧ dúk kànà nɛ́ kpasamɔ war kpɔk, wen h’ɛ́nɛ́ mɛ́ nyɛm sɛnɛ tɛ́ mɔ lɛŋ, ŋma mɔ ɓan na. 5Kà ŋma bíí mgbara'nɛ́ nɛ́ bòó nɛ̀ iŋa-mgbara-mɔ na, a̧ a̧ kɔfi er Sɔ̧, ɓɛɛ Sɔ̧ ha̧a̧ ha̧ a̧, wen Sɔ̧ nɛ́ wi nɛ̀ ha̧ mɔ ha̧ bíí lɛŋ, nɛ̀ dɔka-a in nɛ̀ desee. 6Wi’ɛi a̧ ák mɔ‘i nɛ̀ kɔ̧ɔ̧ɗɔɔwen; ká a̧ si káfɛ́ tikiɗi na, wen wi-si-kafɛ hɔɔ ŋmaa in pɛŋa-yì nɛ̀ búk ba si hɛ̧ɛ̧ si hi̧i̧. 7Ká pɛrti bíí hegɔ ta'e Gasa Wan tɛ́ ha̧ ŋma mɔ 8ha̧ wi nɛ̀ taamɔ kɔ̧-a̧ kɛ̧ɛ̧ yiitoo tɛ̀ o deemɔ kɔ̧-a̧ lɛŋ nɛtɛ nɛtɛ na.
Wisan in wanmbɔi
9Nya yɛ nɛ̀ kpa mɔ dɔk na a̧ dúk nɛ̀ tortɛ ŋgimbi nɛ̀ Sɔ̧ tɛ́ ba a̧ e ŋgɔn. 10Ɓɛɛ nɛ̀ wanmbɔi a̧ dúk nɛ̀ tortɛ ŋgimbi nɛ̀ Sɔ̧ tɛ́ gbɔsi a̧ si ɗɔɔ, wen tika-a ko wanmbɔi hɔɔ ŋmaa in aia-a ko do-te.#Es 40.6-7 11Wen wese daŋ, kà kpɔr kaɗi ɓɛɛ dɔɔ zɔ̧ kor, do-a aia a nù, ɓɛɛ déè kɔ̧-a̧ kaɗa; mɛ̀ nɛ́ hegɔ a̧ wanmbɔi tɛ́ yu nɛnɛ mgbara o demɔ kɔ‘i.
O weamɔ
12Wi nɛ̀ duk nɛ̀ nɔɔ-ŋgiɗi tɛ̀ weamɔ duk nɛ̀ desee, wen kà weamɔ‘i nɛ́ kaɗa, a̧ tɛ́ kpa mɔɔ-wan nɛ̀ duk nɛ́ duka-kpasa nɛ̀ Sɔ̧ ha̧a̧ so nú wen-aa ha̧ o wi nɛ̀ kɔ̧a̧ a̧. 13Ká ŋma bíí nɛ̀ mɔ we tɔ̧‘e weamɔ‘i tɛ̀ɛ́ nɛ̀ tɛ́ Sɔ̧ na, wen ŋma mɔ nɛ̀ tɛ́ we Sɔ̧ mɛ́ de ɗaŋmɔ bó na, ɓɛɛ Sɔ̧ nɛ̀ tɛ-a beka we bíí na mbɛt. 14Mɛ̀ nɛ́ wɔ-mɔ ko bíí kpɔk kpɔk a̧ ɔr bíí mɛ́ de ɗaŋmɔ. 15Kà wɔ-mɔ bá zaŋ kaɗi, ɓɛɛ koo ɗaŋmɔ; ɓɛɛ kà ɗaŋmɔ gásí kaɗi, ɓɛɛ koo fio.
16O nya'm n'am kɔ̧ɔ̧ nyɛmna, k’ɛ́nɛ́ ɔr tɛ‘nɛ́ tɛ́ mɔ‘i na. 17Ha̧a̧mɔ lɛŋ nɛ̀ duk nɛ́ kpasamɔ in nɛ̀ nyɛma sɛnɛ zir nɛ̀ ŋgɔn nɛ̀ tɛ Dáà ko sa̧a̧mɔ. Sɔ̧ fo tɛ̀ mɛ́ kpai kà tum dé nɛnɛ na mbɛt. 18A̧ koo yɛ nɛ̀ ɗoŋ kpasawen nyɛm nɛ̀ ɗoŋ mɔ n'aa kɔ̧a̧, h’ɛ́ɛ́ mɛ́ ya nɛ́ kuti zu-mɔ mgbara o mɔ n'aa dea lɛŋ.
Ziamɔ in deemɔ
19O nya'm n'am kɔ̧ɔ̧ nyɛmna, ɛ́nɛ́ nɛ́ o wi-iŋ-mɔ; zer'nɛ́ a̧ kɔɓi wen nɛ̀ haya-a, ɓɛɛ ká nú‘nɛ́ tɔ̧ wen hai na, ká see'nɛ́ kur nɛ̀ haya-a na mbɛt. 20Wen wi-de-nyimsea de tom nɛ̀ yuwar-a nyɛm yí Sɔ̧ na. 21Hegɔ, ɛ̀nɛ̀ é mɔ nɛ̀ de ndiŋ in ɗaŋ deemɔ dúk, ɓɛɛ ɛ̀nɛ̀ kpɛ́k wen ko Sɔ̧ nɛ̀ guna kɔ̧ see'nɛ́ nɛ̀ mɔka-see, wen wen'i nyɛma mɛ́ kpasi'nɛ́.
22K’ɛ́nɛ́ ɔr tɛ‘nɛ́ tɛ̀ yaa-a nɛ̀ desee zii nɛ̀ wen ko Sɔ̧ ɓɛɛ na, ɓɛɛ ɛ̀nɛ̀ dé nɛ́ tom-aa nɛ̀ mbetɛ. 23-24Hegɔ wi nɛ̀ zii wen ko Sɔ̧ ɓɛɛ de mɔ nɛ̀ wen'i usi na, hɔɔ ŋmaa in ŋma bíí nɛ̀ zɔk yí nɛ̀ mɔɔ-zɔk-yí, ɓɛɛ ɗoŋ n'aa zɔka mgbák yí-a nɛ̀ wa koo nɛ̀ a̧ kaɗi, kà a̧ yák, ɓɛɛ a̧ iŋ oi yí-a ɓɔna. 25Wi nɛ̀ zɔk heembea wan nɛ̀ nyɛma sɛnɛ nɛ̀ de ha'i mɛ́ kpa zu, de nɛ̀ mɔ-a, kà wi’ɛi nyɔ́ŋ nin sɛnɛ, nɛ̀ bó nɛ́ zia-a nɛ̀ ɗoŋ zer géè ɓɛɛ na, wi’ɛi tɛ́ kpa toka-de-yoŋgo tɛ́ mɔ n'aa tɛ́ de.
26Wi nɛ̀ ta'e wi a̧a̧ tɛ̀ yuwar-gasa-sɔ̧, kà a̧ íŋ dora leɓ‘a na, a̧ ɔr nɛ́ tɛ-a nɛ̀ tɛ-a, ɓɛɛ yuwar-gasa-sɔ̧ kɔ̧-a̧‘i nɛ́ geemɔ. 27Yuwar-gasa-sɔ̧ nɛ̀ nyɛma sɛnɛ in nɛ̀ ɔ sa̧a̧ nɛ́ mɔ'ɔ: gbaka o be-oi in o ko-gera tɛ̀ dita-see kɔ-wa, in zɔka tɛ-wi nɛ̀ mɔɔ-zaŋnu ká‘i tɛ́ɛ̀ ɗaŋ war-tɛ-wi.
Currently Selected:
JAK 1: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.