GALATII 1
1
De Mbe Wen ko Paul
1Nɛ́ mi Paul, wan nɛ̀ Jesu Krist in Sɔ̧ Dáà, nɛ̀ dee so ha̧ Jesu mɛ́ kur ŋgɔn tɛ fio hoka mɛ́ duk betom, nɛ̀ bó nɛ́ o bíí, kóó nɛ́ ŋma bíí kpɔk a̧ hoka'm na. 2Nɛ́ ɛ́ɛ́ in o nya-wi lɛŋ nɛ̀ a̧a̧ in am a̧ tom kalata’ɛ h’ɛ́nɛ́, o zuduk bíí ko Krist sɛn nú Galatii. 3Deemɔ nɛ̀ ta-tɛ in ga̧a̧mɔ ko Sɔ̧ Dáà k’ɛ́ɛ́ in Gasa Wan Jesu Krist a̧ duk in'nɛ̀ɛ́. 4Nɛ́ Gasa Wan Jesu Krist a̧ ha̧a̧ so tɛ-wi wen ɗaŋmɔ k’ɛ́ɛ́, mɛ́ ɓar yɛ yinɛ zaŋnu nɛ̀ de na’ɛ nyɛm nɛ̀ ɗoŋ mɔ nɛ̀ Sɔ̧ nɛ̀ dúk nɛ́ Dáà k’ɛ́ɛ́ kɔ̧a̧. 5Gasamɔ a̧ dúk nɛ́ kɔ̧-a̧ kpoo nɛ kpoo. Aamɛn.
Wa ɔra o wi Galatii yinɛ tɛ́ kpasa De Mbe Wen
6Ɗɛɗ‘am gɔna wen mi zia'e ɛ́nɛ́ zika ɗoŋ nɛ̀ haya-a e ha̧ Sɔ̧, wi nɛ̀ saa'nɛ́ nɛ̀ ɗoŋ deemɔ nɛ̀ ta-tɛ ko Krist, ɓɛɛ ɛ́nɛ́ kpɛk nɛ́ ŋma De Mbe Wen nɛtɛ. 7Weyaa, De Mbe Wen bo yiitoo na; mɛ̀ nɛ́ o ŋma bíí nɛ̀ kɔ̧ɔ̧ mɛ́ ɗaŋ De Mbe Wen ko Krist a̧ sakali'nɛ́. 8Kóó nɛ́ ŋma bíí, kóó nɛ́ ɛ́ɛ́, kóó nɛ́ ŋma betom mɛ́ yiwese a̧ tɔ̧ ŋma De Mbe Wen nɛtɛ h’ɛ́nɛ́, yak zu wan n’ɛ̀ɛ̀ tɔ̧ɔ̧ h’ɛ́nɛ́‘i, ɓɛɛ nɛ̀ fom a̧ bá wi’ɛi. 9Ɛ́ɛ́ baa tɔ̧ h’ɛ́nɛ́ kaɗi, ɓɛɛ mi tɔ̧ h’ɛ́nɛ́ woyo kinii'e nde: kà ŋma bíí tɔ̧ De Mbe Wen nɛtɛ h’ɛ́nɛ́, yak zu wan n’ɛ̀nɛ̀ zia'i, ɓɛɛ nɛ̀ fom a̧ bá wi’ɛi.
10Ɓɛɛ kinii mi kíí ha̧ bíí mɛ́ kpa desee zu'm náà, kóó Sɔ̧ nde? Mi kíí so mɛ́ de nɛ́ mɔ nɛ̀ tɛ́ de tɛ bíí? Kà‘m nɛ̀ kia mɛ́ de nɛ́ mɔ nɛ̀ tɛ de tɛ bíí, ɓɛɛ mi bó nɛ́ wi-de-tom ko Krist ɓɔna.
Saa sara ko Sɔ̧
11O nya'm, mi'e ndé, De Mbe Wen n'am tɔ̧ɔ̧ h’ɛ́nɛ́‘i bó nɛ́ taamɔ ko bíí na. 12Mi kpa er bíí na, kà bó nɛ̀ yamba-a tɛ́ ŋma bíí na mbɛt, ɓɛɛ nɛ́ Jesu Krist nɛ̀ ta-tɛ-a a̧ usa ha̧‘m.
13Ɛ́nɛ́ zia so nyɛrɛ duka-a kɔ‘m tɛ́ yuwar-gasa Sɔ̧ ko o Juif nɛti, ɓɛɛ ɛ́nɛ́ iŋa'e mi ee see-am lɛŋ tɛ dee ŋgamɔ in zuduk bíí ko Sɔ̧, kíí nɛ̀ war mɛ́ yai wa a taŋ mbɛt.#Tom 8.3; 22.4-5; 26.9-11 14Ŋgimbi n'am duka so nɛnɛ tɛ yuwar-gasa Sɔ̧ ko o Juif'i, ŋma bíí nɛ̀ pɛ k’ɛ́ɛ́ nyɛma ŋmaa tɛ zuduk kɔ‘m nɛ̀ gana'm nɛ̀ mboozu tɛ yuwar duka-a ko o zɔmdáa k’ɛ́ɛ́ bo na.#Tom 22.3
15Ɓɛɛ nɛ́ Sɔ̧ nɛ̀ ea'm nɛtɛ kɔ̧ zaŋ naa kɔ‘m a̧ saa'm nɛ̀ ta-tɛ; a̧ zɔka'e ɔ dee#Tom 9.3-6; 22.6-10; 26.13-18 16ha̧ a̧ mɛ́ usi Bem kɔ̧-a̧ ha̧‘m, wen ha̧‘m mɛ́ tɔ̧ wen ko Bem’ɛi mgbara o gɔni-dùk, ɓɛɛ mi ak ŋma bíí mɛ́ tɔ̧ mbɔrɔ ha̧‘m sɛ na. 17Mi daŋ si Jerusalɛm mɛ́ zɔk o wi nɛ̀ duka so betom ko Jesu nɛti ha̧‘m na mbɛt, ɓɛɛ nɛ́ si Arabii, a̧‘m yaka si sɛnɛ, sɛka'm bé tɛ̀ɛ́ pii ɗoŋ Damas. 18Dee pɛ taar kaɗi, sɛka'm biti nɛ̀ mɛ́ zɔk Pierre sɛn Jerusalɛm, ɓɛɛ mi ɔ in a̧ hi̧i̧ zɛ ɓu-zua-mɔɔrɔ.#Tom 9.26-30 19Mi zɔk ŋma betom nɛtɛ na mbɛt, kana nɛ́ Jak, nya ko Gasa Wan ɓɛɛ.
20Mɔ n'am yɔr h’ɛ́nɛ́'ɛ, nɛ́ kpasawen a̧‘m tɔ̧ ti Sɔ̧, bó nɛ́ ndela na.
21Ɗoŋ-aa'i mi nɛ̀ɛ́ sɛn nú Sirii in Silisii, 22ɓɛɛ o zuduk bíí ko Krist sɛn nú Judee iŋ kɔ‘i yí‘m na, 23ɓɛɛ nyɛrɛ mɔ kɔ‘m nɛ̀ wa zia nɛ́ mɔ'ɔ: «Wi nɛ̀ usi so bɔnɛ h’ɛ́ɛ́ nɛti’ɛ nɛ́ mɔ'ɔ nɛ̀ tɔ̧ nɛ́ wen kɔ̧ɔ̧ɗɔɔwen n'aa yai so yinɛ'ɛ.» 24Ɓɛɛ wa gasi Sɔ̧ wen zu'm.
Currently Selected:
GALATII 1: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.