ƐSTƐR 1
1
Gbaŋa ko wannu Zɛrzɛs
1Duka so nɛ́ ŋgimbi nɛ̀ Zɛrzɛs ɔɔ so nɛ̀ wan zu o zika-nù gɔmŋmaa-nɛ-ɓu-yiitoo-zua-mɔɔrɔ-ɗoŋ-yiitoo, ku̧u̧naŋ-a nɛ̀ Indɛ hɔ nɛnɛ Etiopii mɛ.#Ɛsd 4.6 2Ɗoŋ baa wan ko wannu Zɛrzɛs, a̧ tɛ̀ɛ̀ duk zu damti nɛ̀ a̧a̧ sɛn ŋgárá Suzɛ, 3ɓɛɛ nɛ́ tɛ́ taar pɛ ɔɔ-wan kɔ̧-a̧‘i a̧ a̧ dee nɛ̀ gbaŋa ha̧ o gasawi in o wi-de-tom kɔ̧-a̧, o gasa wi-biro Pɛrsɛ in Mɛdɛ, ká bá nɛ̀ o be-wan in o gasawi zu zika-nù mbɛt. Wa mɔi̧a ŋmaa lɛŋ kpa ti a̧. 4A̧ usa dɔka mbɔi in gasa mɔɔ-wan kɔ̧-a̧ ha̧ wa tɛ ɔɔ-zɛ gɔmŋmaa-nɛ-ɓu-mɔɔrɔ-ɗoŋ-taar.
5Ɗoŋ ŋgimbi'i, wannu dee mbe gbaŋa sɛn bee-gara tua-wan kɔ‘i ha̧ o bíí ŋgárá Suzɛ, mɔ nɛ̀ tɔ̧‘e o gasawi gú nɛ̀ o geɗek wi lɛŋ. Gbaŋa'i ɔɔ nɛ́ zɛ mɔɔrɔ-ɗoŋ-yiitoo. 6Wa kuna o de yí-laa nɛtɛ nɛtɛ tɛ de toka gbɛ̧ nyak, ɓɛɛ wa ba kun tɛ o de káná nɛ̀‘i dee nɛ̀ bu-mbɔi, e tɛ o mbiŋ nɛ̀‘i dee nɛ̀ bu ta. Nɛ́ mɔ'ɔ nɛ̀ wa aa o gado nɛ̀‘i dee nɛ̀ lɔr in bu-mbɔi zu fara nɛ̀‘i yɔka nɛ̀ o de ta nɛtɛ nɛtɛ nɛ̀ kpaa-a ɔ ɓana. 7Wa a̧a̧ so nɛ́ o mɔɔ-nɔ-mɔ nɛ̀‘i dee nɛ̀ lɔr, yí-a#1.7 texte nú hébreu saa nin o de yí-laa in o de yí-ta nɛtɛ nɛtɛ nɛ‘i iŋ nɛ̀ de-a na. nɛtɛ nɛtɛ; dɔ̧ɔ̧ dɔka so gan kere, nyɛm nɛ̀ ɗoŋ yuwar ha̧a̧mɔ ko wannu.
8Wannu tɔ̧ɔ̧ so ha̧ o bíí mɛ nɔ mɔ hee mɔ'ɔ nɛ̀ see-wa kɔ̧ɔ̧ ga. A̧ tɔ̧ɔ̧ ha̧ o wan-duk-zu nyɔŋmɔ mɛ ha̧ mɔ lɛŋ nɛ̀ o bíí kɔ̧a̧ ha̧ wa. 9Ko-wan Vasti dee war gbaŋa kɔ‘i in o okoo sɛn kɔ̧̀ kira ko wannu mbɛt.
Tika-a ko Vasti
10Sɛn tɛ mɔɔrɔ-ɗoŋ-yiitoo ɔɔ-zɛ, dɔ̧ɔ̧ pi̧i̧ wannu tɛ tortɛ, ɓɛɛ a̧ tɔ̧ ha̧ o kpàná kɔ̧-a̧ mɔɔrɔ-ɗoŋ-yiitoo nɛ̀ ya ɓɔn mgbák katɛ a̧; mɛ̀ nɛ́ Mɛhuman, Bizɛta, Harbona, Bigta, Abgata, Zɛtar ká bá nɛ̀ Karkas, 11ha̧ wa mɛ nɛ̀ɛ́ sa ko-wan Vasti tɛnɛ nɛ̀ oi mɔɔ-gu-zu ko ko-wan, mɛ usi déè kɔ̧-a̧ ha̧ o gasawi in o dukbíí nɛ̀ mɔi̧a, wen a̧ yora so zɔŋa nyɛmna. 12Ɓɛɛ ko-wan Vasti bɛ̧ sara nú o betom nɛ̀ wannu toma'i. Nɛ́ mɔ'ɔ nɛ̀ see wannu ɗaŋa, see-aa tu̧u̧ nyɛmna, bó nɛ́ mɔɔ-tɔ̧ na.
13Zu mɔ‘i, a̧ saa o wan-ba-keta zu o heembea in yuwar duka-a ko o bíí nyɛm nɛ̀ ɗoŋ deemɔ kɔ-wa, ha̧ wa mɛ kii mɔ tɛ mɔ‘i ha̧ a̧. 14O ŋma gasawi mɔɔrɔ-ɗoŋ-yiitoo ko o bíí Pɛrsɛ in Mɛdɛ nɛ̀ yaa so katɛ wannu nɛ̀ mɔɔ nɔ'ɔ: Karsɛna, Setar, Admata, Tarsis, Mɛrɛs, Marsena, ká bá nɛ̀ Mɛmukan. O wi nɔ‘i a̧a̧ so mgbara o kuti-wi nù‘i; wa a̧a̧ nɛ̀ ŋgai mɛ hɔ ti wannu mbɛt. 15Wannu aka wa: «Hee mɔ'ɔ nɛ̀ ko-wan Vasti mbo zu tɛ saa-sara ko wannu nɛ̀ toma nɛ̀ o kpàná kɔ‘i nɛnɛ ha̧ a̧ na ga’ɛ, nɛ́ ge a'i tɛ de in a̧ nyɛm nɛ̀ ɗoŋ heembea ko nù k’ɛɛ ge?»
16Mɛmukan kifa nú ti wannu in o gasawi, ɓɛɛ tɔ̧: «Bo nɛ Vasti ee nɛ́ wannu ɛ̀nɛ̀-wi tɛ geemɔ na, ɓɛɛ a̧ ee nɛ́ o gasawi in dukbíí tɛ o zika-nù k’ɛɛ lɛŋ tɛ geemɔ mbɛt. 17O okoo lɛŋ tɛ zii nyɛrɛmɔ nɛ̀ kóò ko wannu dea'i, ɓɛɛ wa tɛ e o wíì kɔ-wa mbɛt tɛ geemɔ. Wa tɛ ya tɔ̧ nɛnɛ‘e: ‹Wannu Zɛrzɛs baa tom so sa ko-wan Vasti, ɓɛɛ a̧ bɛ̧.› 18Ɓɛɛ sɔsɔɔ‘i yak nɛnɛ, o kóò ko o gasawi nù Pɛrsɛ in Mɛdɛ nɛ̀ zia nyɛrɛ mɔ nɛ̀ kóò ko wannu dea'i, tɛ de ŋgazu in o gasawi lɛŋ, ɓɛɛ ee wíì kɔ-wa tɛ geemɔ; hegɔ mɔ‘i tɛ aŋ nɛ́ nyimsea ko o wiwii a ŋgɔn. 19Kà wannu nɛ kɔ̧a̧, a̧ a̧ há̧ nú ha̧ wa mɛ yɔr mɔ zaŋ heembea ko Mɛdɛ in Pɛrsɛ nɛ̀‘i beka kpai na mɛ tɔ̧‘e: ‹Vasti beka pii ɗoŋ tɛ wannu mɛ duk ko-wan ɓɔna, ɓɛɛ wannu tɛ ba nɛ́ ŋma mbe kóò nɛ̀ dee gan a̧ e oi-aa.› 20Hegɔ, bíí tɛ iŋ heembea ko wannu dam zu o dɔka nù kɔ̧-a̧ lɛŋ, ɓɛɛ mɔ‘i tɛ de ha̧ o okoo lɛŋ mɛ tu̧ tɛ o wíì kɔ‘i, kóó nɛ́ o gasawi, kóó nɛ́ o geɗek wi.»
21Wen'i dee tɛ wannu in o gasawi kɔ‘i, ɓɛɛ a̧ ndak ɗoŋ wen ko Mɛmukan'i. 22Wannu toma o kalata dam tɛ nù kɔ‘i lɛŋ, ha̧ o zika-nù kpɔk kpɔk nyɛm nɛ̀ ɗoŋ yuwar yɔramɔ kɔ-wa, ha̧ o dukbíí kpɔk kpɔk nyɛm nɛ̀ ɗoŋ nú kɔ-wa, ha̧ o wan-kóò lɛŋ mɛ duk wan zu kira kɔ‘i, usi nɛ̀ nú kɔ‘i ha̧ o bem kɔ‘i.
Currently Selected:
ƐSTƐR 1: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.