DANIƐL 1
1
Daniɛl in o sɛm kɔ‘i
1Ɗoŋ taar pɛ ɔɔ-wan ko Jɔakim wannu Juda, Nabukɔdɔnɔsɔr wannu Babilɔŋ tɛɛ kɛr Jerusalɛm e nu.#2 Wan 24.1; 2 Kal Ny 36.5-7 2GASA WAN ee Jɔakim wannu Juda kɔ̧ er-a in o ŋma nyɛk mɛ kɔ̧ Tua ko Sɔ̧. A̧ baa a̧ in o mɔɔ nɔ‘i lɛŋ sinɛ sɛn nu Sinɛar, ɓɛɛ a̧ a o mɔɔ-ɗafi-sɔ̧ nɔ‘i sɛn kɔ̧ tua ko o sɔ̧ kɔ̧-a̧.#2 Wan 20.17-18; 24.10-16; 2 Kal Ny 36.10; Es 39.7-8
3Wannu ha̧a̧ nú ha̧ Aspɛnaz gasawi zu o wi-de-tom kɔ̧ tua kɔ‘i mɛ kai o ŋma be Israɛl tɛnɛ, kóó nɛ́ bezaŋ wannu, kóó nɛ́ bezaŋ o ŋma gasawi mbɛt. 4Wa tɛ ya nɛ o bíí nɛ yora ŋgaiwi; ká‘i zɔk wa ɓɛɛ ɔ dee tɛ-wi. Wa tɛ ya nɛ o haya wi-iŋ-mɔ nɛ yamba mɔ nɛtɛ nɛtɛ, nɛ taamɔ kɔ-wa nyɛma wen dee tom tɛ ko wannu. Wi tɛ usi nú ko o be Kaldee ha̧ wa in yuwar yɔra-a mbɛt. 5Wannu ha̧a̧ nú wen ha̧ wa mɛ ha̧ nɛ pɛrti nyɔŋmɔ n'aa nyɔŋ in pɛrti dɔ̧ɔ̧ n'aa nɔ ha̧ wa mɛ nɔ mbɛt. Wa tɛ usi mɔ ha̧ wa tɛ pɛ taar. Mɛ̀ nɛ́ sɛn ɗoŋ ŋgimbi'i a̧ o be-ŋgaiwi nɔ‘i tɛ ye nɛnɛ tɛ tom ko wannu.
6O bezaŋ Juda nɛ a̧a̧ so mgbara o be-ŋgaiwi nɔ‘i nɛ Daniɛl, Hanania, Misaɛl in Azaria. 7Wi-duk-zu o wi-de-tom kɔ̧ tua ko wannu gɔna mbe nin ha̧ wa. Ko Daniɛl nɛ Bɛltasar, ko Hanania nɛ Sadrak, ko Misaɛl nɛ Mɛsak, ɓɛɛ ko Azaria nɛ Abɛd-Nɛgo.
8Daniɛl taa mɔ nɛ kɔ̧ see'e, wi beka ɗaŋ war-tɛ-wi tɛ nyɔŋmɔ in tɛ dɔ̧ɔ̧ ko wannu na, ɓɛɛ a̧ kɔfi wi-duk-zu wa mɛ e a̧ wen ka a̧ tɛ ɗaŋ war-tɛ-a tɛ o nyɔŋmɔ nɔ‘i. 9Sɔ̧ dee ha̧ wi’ɛi mɛ kpa desee zu Daniɛl, ɓɛɛ kpɛk akamɔ kɔ̧-a̧‘i. 10Mɔ kpɔk, wi-duk-zu o wi-de-tom tɔ̧ɔ̧ ha̧ Daniɛl: «Mɔ n'am yu nɛ́ dáà wannu, wen mɛ nɛ a̧ nɛ ha̧a̧ nú wen nyɔŋmɔ in dɔ̧ɔ̧ k’ɛ́nɛ́. A̧ be tɛ̀ɛ́ zɔk'e tɛ‘nɛ́ dak dak mgbara o gbama-ŋgai k’ɛ́nɛ́, wen tɛ tik zu'm, ɓɛɛ a̧ ɓira zu'm pi̧ nu wen zu'nɛ́.»
11Daniɛl tɔ̧ɔ̧ ha̧ wi nɛ gasawi ee mɛ zɔk a̧ in Hanania, Misaɛl in Azaria hee mɔ'ɔ ga: 12«Ɛ̀nɛ̀ wé yɛ o wi-de-tom k’ɛ́nɛ́ sɛn tɛ zɛ ɓu ɛ̀nɛ̀ zɔk. Wa a̧ ha̧ nɛ o wa̧a̧-kpoo h’ɛ́ɛ́ nyɔŋ in gee yi h’ɛ́ɛ́ nɔ, 13ɓɛɛ ɛ̀nɛ̀ tɛ́ zɔk tɛ yɛ in ko o wi nɛ nyɔŋ mɔ ko wannu; hegɔ tɛ mɔ n’ɛnɛ tɛ zɔk, ɛ̀nɛ̀ tɛ de nɛ mɔ in yɛɛ o wi-de-tom k’ɛ́nɛ́.»
14A̧ kɔ̧ɔ̧ ɗɔɔ mɔ nɛ wa aka, ɓɛɛ a̧ we wa tɛ zɛ ɓu. 15Ɗoŋ nɛ zɛ nɔ‘i ɓu'i dama kaɗi, wa zɔka saŋa-yí-wa ɔ dee in wa ɔ ŋmaŋa gan oi o dɔka bíí nɛ nyɔŋ kɔ‘i nɛ mɔ ko wannu. 16Hegɔ wi-zɔk-wa ha̧ nyɔŋmɔ in dɔ̧ɔ̧ ko wannu ha̧ wa na, ɓɛɛ ha̧ nɛ o wa̧a̧-kpoo ha̧ wa ɓɛɛ.
17Sɔ̧ ha̧a̧ iŋamɔ ha̧ o be-ŋgaiwi nɔ‘i naar'i; a̧ dee ha̧ wa mɛ iŋ nú ko o wi nɔ‘i nɛ de-a in ha̧ wa mɛ iŋ mgbara mɔ mbɛt, ɓɛɛ nɛ̀ war ko Daniɛl, a̧ iŋa tɔ̧ɔ̧ gba̧a̧-zu nɛ‘i ɔ in hɔɔ-zu mbɛt.
18Ŋgimbi nɛ zɛ nɛ wannu Nabukɔdɔnɔsɔr gɔna so ha̧ wa dama kaɗi, wi-duk-zu o wi-de-tom kaia o be-ŋgaiwi lɛŋ nɛnɛ ti a̧. 19Wannu tɔ̧ɔ̧ nyɛrɛ in wa lɛŋ, ɓɛɛ mgbara wa'i, a̧ kpa o ŋma hee Daniɛl, Hanania, Misaɛl in Azaria ga na, ɓɛɛ wa ya kɔ-wa ɓɔn katɛ a̧. 20Tɛ mɔ ko iŋamɔ in iŋa-mgbara-mɔ lɛŋ nɛ wannu ak nɛ wa'i, a̧ zɔka'e wa gana o wan-gbana in o wi-de-mɔɔ-kifi tɛ zika-nù kɔ̧-a̧ lɛŋ war ɓu. 21Daniɛl ɓɔna tɛ ko wannu hɔ tɛ kuti pɛ-wan ko wannu Sirus.
Currently Selected:
DANIƐL 1: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.