2 PIERRE 1
1
Fanamɔ
1Nɛ́ mi Simɔŋ-Pierre, wi-de-tom nɛ̀ duk nɛ́ betom ko Jesu Krist a̧ tom kalata’ɛ ha̧ o wi nɛ̀ a̧a̧ nɛ̀ gbà de#1.1 gbà dé: úsí nɛ́ mɔ nɛ̀ gɛnɛ-a ɔ́ ŋgáyá. kɔ̧ɔ̧ɗɔɔwen hee k’ɛ́ɛ́ ga, wen zu deemɔ nɛ̀ yuwar-a ko Sɔ̧ k’ɛ́ɛ́, nɛ̀ duk nɛ́ Wan-kpasi-wi, Jesu Krist. 2Ɛ̀nɛ̀ kpá deemɔ nɛ̀ ta-tɛ ko Sɔ̧ in ga̧a̧mɔ nɛ̀ dɔka-a nɛ̀ ɗoŋ iŋa Sɔ̧ in Jesu, Gasa Wan k’ɛ́ɛ́.
Saa-sara in hoka bíí tɛ́ tom ko Sɔ̧
3Hegɔ, ŋgayamɔ ko Sɔ̧ ha̧a̧ mɔ lɛŋ nɛ̀ nyɛma mɛ́ gbak yɛ tɛ duka-a k’ɛ́ɛ́, in tɛ yuu Sɔ̧; tɛ́ mɔ‘i a̧ dee h’ɛ́ɛ́ mɛ́ iŋ wi nɛ̀ saa so yɛ tɛ mgbák gasamɔ in dee demɔ kɔ̧-a̧. 4Nɛ́ tɛ́ mɔɔ nɔ‘i a̧ dee h’ɛ́ɛ́ mɛ́ kpa o gba demɔ nɛ̀ Sɔ̧ ha̧a̧ so nú wen-aa h’ɛ́ɛ́ nɛti; k’ɛ̀nɛ̀ nɛ́ kpaa mɔ n'aa ha̧a̧ nú sɛnɛ, ɛ́nɛ́ tɛ́ gbo tɛ̀ o wɔ mɔɔ-ɗaŋ-mɔ nɛ̀ ɔ wan zaŋnu, h’ɛ́nɛ́ mɛ́ ye tɛ́ mɔ, wan mɛ́ tɛ́ duka-a ko Sɔ̧. 5Wen hegɔ, ɛ̀nɛ̀ há̧ ŋgai tɛ‘nɛ́ lɛŋ wen ha̧ deemɔ nɛ̀ de-a mɛ́ ndaɗi in kɔ̧ɔ̧ɗɔɔwen k’ɛ́nɛ́, wen ha̧ iŋamɔ mɛ́ ndaɗi in deemɔ nɛ̀ de-a, 6ha̧ kasa-zu mɛ́ ndaɗi in iŋamɔ, ha̧ nɔɔ-ŋgiɗi mɛ́ ndaɗi in kasa-zu, ha̧ yuu Sɔ̧ mɛ́ ndaɗi in nɔɔ-ŋgiɗi, 7ha̧ kɔ̧ɔ̧ o nya-wi mɛ́ ndaɗi in yuu Sɔ̧, in ha̧ kɔ̧ɔ̧mɔ mɛ́ ndaɗi in kɔ̧ɔ̧ o nya-wi. 8Kà o mɔɔ nɔ‘i dúk tɛ‘nɛ́ nɛ̀ dɔka-a, bek’ɛnɛ dúk de ŋma mɔ na, na, ɓɛɛ wa tɛ́ de h’ɛ́nɛ́ mɛ́ iŋ Gasa Wan k’ɛ́ɛ́ Jesu Krist siti, 9ɓɛɛ bíí nɛ̀ bó nɛ̀ o mɔɔ nɔ‘i na nɛ́ wi-boma-yí nɛ̀ tam nɛ́ mɔ nɛ̀ nú-tum; tɛ-a bìí ɗoŋ-aa'e wa ɗafa so war-tɛ-a wen ɗaŋmɔ n'aa dee so nɛti.
10Wen hegɔ, o nya'm, ɛ̀nɛ̀ há̧ ŋgai tɛ‘nɛ́ gan kuti-a wen h’ɛ́nɛ́ mɛ́ yor ndaɗi tɛ́ sara in hoka'nɛ́ ko Sɔ̧. K’ɛ̀nɛ̀ dé mɔ hee mɔ‘i ga, ɛ́nɛ́ beka tik na ɓɔnsɛnɛ. 11Hegɔ, Sɔ̧ tɛ́ kpɛk'nɛ́ nɛ̀ de-a mɛ́ ye tɛ́ Wan nɛ̀ duk kpoo nɛ kpoo; Wan'i nɛ́ ko Gasa Wan in Wan-kpasi-wi k’ɛ́ɛ́ Jesu Krist.
Usamɔ nɛ‘i tɛ́ kasi
12Hegɔ ɛ́nɛ́ iŋa mbɛt, kóó ɛ̀nɛ̀ dúk nɛ̀ nɔa-a tɛ́ kpasawen nɛ̀ a̧a̧ sɛnɛ kinii’ɛ mbɛt, mi kɔ̧ɔ̧ kana mɛ́ mbaŋ tɛ‘nɛ́ ɓɔnsɛnɛ zu mɔɔ nɔ'ɔ. 13Mi taa nyɛma kànà ha̧‘m mɛ́ tɔ̧ mbɔrɔ h’ɛ́nɛ́ ŋgimbi n'am biti duka-a zaŋnu’ɛ, h’ɛ́nɛ́ mɛ́ duk nɛ̀ yí, 14wen mi iŋa'e ŋgimbi kɛ̧ɛ̧ tɛ̀ yɛ nɛ̀ ŋmaa hɛɗa kaɗi, hee mɔ'ɔ nɛ̀ Gasa Wan k’ɛ́ɛ́ Jesu Krist usa ha̧‘m ga. 15Ɓɛɛ mi tɛ́ kii kànà nɛ̀ de-a wen h’ɛ́nɛ́ mɛ́ kpa yuwar ɗoŋ yaka-a kɔ‘m, ha̧ tɛ‘nɛ́ mɛ́ mbaŋ ɗoŋ usamɔ nɔ‘i tɛ́ mɔ lɛŋ.
Yuwar nɛ̀ wen ko Sɔ̧ tɛ̀ɛ́ só nɛnɛ
16Wen bó nɛ́ ɛ́ɛ́ tɔ̧ɔ̧ wen ŋgayamɔ in tɛa-a ko Gasa Wan k’ɛ́ɛ́ Jesu Krist h’ɛ́nɛ́ hee to nɛ̀‘i gɔn nɛ́ tɛ-wi tɔ̧ nɛnɛ'ɛ ga na; ɓɛɛ mɛ̀ nɛ́ wen n’ɛ̀ɛ̀ zɔka mgbák gasamɔ kɔ̧-a̧ nɛ̀ gbaayí yɛ. 17A̧ kpaa zɔnamɔ in gasamɔ er Sɔ̧ Dáà, ŋgimbi nɛ̀ ŋma tiger gboo nɛ̀ tɛ́ zɔm gasamɔ ko Sɔ̧ tɔ̧ nɛnɛ ha̧ a̧‘e: «Wi’ɛ nɛ́ Bem kɔ‘m n'am kɔ̧ɔ̧ nyɛmna, desee kɔ‘m lɛŋ dúk zu a̧.»#Mt 17.1-5; Mk 9.2-7; Lk 9.28-35 18Ɛ́ɛ́ nɛ̀ tɛ̀ yɛ zia tiger'i nɛ̀ yiwese, ŋgimbi n’ɛ̀ɛ̀ duka nɛnɛ in a̧ zu sa̧a̧ kaya mɛ̀.
19Zu-a'i, ɛ́ɛ́ a̧a̧ nɛ̀ wen ko o wi-tɔ̧-wen oi nú Sɔ̧ nɛ̀ duk nɛ́ kpasamɔ. Nɛ́ mɔ h’ɛ́nɛ́ mɛ́ zɔk mɔ sɛnɛ nɛ̀ de-a, wen wen'i duk hee lamba nɛ̀ nyɛk ti-tum ga, hɔ ŋgimbi nɛ̀ mɔ tɛ́ gɔn, ɓɛɛ sɔra-tuyɛ nyɛka kɔ̧ see'nɛ́. 20Hegɔ, ɛ̀nɛ̀ íŋ mɔ'ɔ nɛ̀ de-a: ŋma bíí nyɛm mɛ we ɗoŋ wen ko o wi-tɔ̧-wen oi nú Sɔ̧ nɛ̀ a̧a̧ zaŋ Yɔramɔ nɛ̀ ta-tɛ-wi na. 21Bó nɛ́ taamɔ ko bíí a̧ dee ha'i mɛ́ tɔ̧ wen oi nú Sɔ̧ na ndó-ndó-ndó, ɓɛɛ nɛ́ Sa̧a̧ Ɔmi a̧ baa bíí tɔ̧ nɛ̀ wen oi nú Sɔ̧.
Currently Selected:
2 PIERRE 1: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.