2 WANNU 1
1
Elii in wannu Akazias
1Ɗoŋ fio ko Akab, Mɔab dee ŋgazu in *Israɛl.
2Akazias hɔ̧fa̧ so tik nù nɛ kɔ̧ bɛr-tua mɛ ŋgɔn sɛn Samarii, ɓɛɛ tɛ-a nyim nyim nɛ̀ ŋgaya-a. A̧ toma o betom tɔ̧ nɛnɛ ha̧ wa hee mɔ'ɔ ga: «Ɛ̀nɛ̀ nɛ́ɛ̀ zɔk Bal-Zebub, sɔ̧ ko o be Ekrɔŋ; a̧ a̧ tɔ̧́ ha̧‘m, mi tɛ kpasi tɛ zɛɛ kɔ‘m’ɛ nde?»
3Tɛ ŋgimbi'i betom ko GASA WAN tɔ̧ɔ̧ ha̧ Elii be Tisbe: «Mɛ̀ kúr ŋgɔn, ɓɛɛ mɛ̀ wé ti o betom ko wannu Samarii. Mɛ̀ tɔ̧́ ha̧ wa'e ndé, ŋma Sɔ̧ bo *Israɛl na, sa wa nɛ́ɛ̀ ak nɛ́ Bal-Zebub, sɔ̧ ko o be Ekrɔŋ nde? 4Hee mɔ'ɔ nɛ̀ wa dee hegɔ ga, GASA WAN'e ndé: ‹Mɛ beka kur ŋgɔn gɔn gado-zɛɛ kɔ-mɛ‘i na, mɛ tɛ fe nɛ̀ mbetɛ!› » Ɓɛɛ Elii si kɔ‘i ɗoŋ. 5O betom pia ɗoŋ tɛ Akazias, ɓɛɛ a̧ ak wa: «Ɛnɛ pia ɗoŋ wen ge nde?»
6Wa kifa nú-wa: «Ŋma wiwii kpaa ŋmaa in yɛɛ, ɓɛɛ nɛ́ mɔ'ɔ n'aa tɔ̧ɔ̧ h’ɛ́ɛ́‘e, ɛ̀ɛ̀ sí ɗoŋ tɔ̧́ ha̧ wannu nɛ̀ toma yɛ tɛnɛ‘i, GASA WAN tɔ̧ɔ̧ ndé: ‹Ŋma Sɔ̧ bo sɛn *Israɛl na, sa mɛ tom nɛ bíí mɛ nɛ̀ɛ́ ak nɛ́ Bal-Zebub, sɔ̧ ko o be Ekrɔŋ'ɛ nde? Mɛ̀ nɛ́ hegɔ nɛ mɛ beka kur ŋgɔn sɛn gɔn gado-zɛɛ kɔ-mɛ‘i ɓɔna; mɛ tɛ fe nɛ̀ mbetɛ!› »
7Wannu aka wa: «Wi nɛ̀ wee ti'nɛ́ ɓɛɛ nɛ̀ tɔ̧ɔ̧ o wen nɔ‘i h’ɛ́nɛ́‘i duk hee ge?»
8Wa kifa nú ha̧ a̧‘e: «Nɛ́ ŋma bíí nɛ̀ pi̧i̧ nɛ́ buma-a a̧a̧ sɛnɛ, ɓɛɛ a̧ mar ŋma laa-ndàrá guntir-aa.» Ɓɛɛ wannu tɔ̧: «Mɛ̀ nɛ́ Elii be Tisbe!»#Mt 3.4
9Wannu toma ŋma wi-duk-zu o wi-biro ɓu-mɔɔrɔ in o wi-biro kɔ̧-a̧ mbɛt nɛnɛ tɛ Elii. Elii duk so nɛ nù zu kaya, ɓɛɛ wi’ɛi tɔ̧ ha̧ Elii: «Bíí ko Sɔ̧! Wannu'e ndé, mɛ̀ zìr!»
10Elii kifa nú ha̧ wan ko o wi-biro ɓu-mɔɔrɔ‘i: «Kà‘m nɛ́ bòò nɛ́ bíí ko Sɔ̧, wee a̧ tík nù nɛ̀ yiwese, ɓɛɛ a̧ a̧ dɔ́ mɛ in o bíí kɔ-mɛ ɓu-mɔɔrɔ'ɛ lɛŋ.» Wee ko Sɔ̧ tika nù nɛ̀ yiwese, ɓɛɛ dɔ wi’ɛi in o bíí kɔ̧-a̧ ɓu-mɔɔrɔ‘i.#Lk 9.54
11Wannu toma ŋma wi-duk-zu o wi-biro ɓu-mɔɔrɔ in o wi-biro kɔ̧-a̧ nɛnɛ woyo; a̧ tɔ̧ɔ̧ ha̧ Elii: «Bíí ko Sɔ̧, wannu ha̧a̧ nú hegɔ: ‹Mɛ̀ zír nɛ̀ haya-a!› »
12Elii kifa nú ha̧ a̧: «Kà‘m nɛ́ bòò nɛ́ bíí ko Sɔ̧ nɛ̀ mbetɛ, wee a̧ tík nù nɛ̀ yiwese, ɓɛɛ a̧ a̧ dɔ́ mɛ in o bíí kɔ-mɛ ɓu-mɔɔrɔ'ɛ lɛŋ.» Wee ko Sɔ̧ tika nù nɛ̀ yiwese, ɓɛɛ dɔ a̧ in o bíí kɔ̧-a̧ ɓu-mɔɔrɔ‘i lɛŋ.
13Wannu toma taar wi-duk-zu o wi-biro ɓu-mɔɔrɔ in o wi-biro kɔ̧-a̧; ŋgimbi n'aa hɔa, a̧ gbɛɛ zugur-aa nù ti Elii, ɓɛɛ ai nú ha̧ a̧ hee mɔ'ɔ ga: «Bíí ko Sɔ̧, duka-kpasa kɔ‘m in ko o wi-de-tom k’ɛ́nɛ́ ɓu-mɔɔrɔ'ɛ a̧ dúk nɛ́ gasamɔ sɛn yí‘nɛ́! 14Wee tika nù nɛ̀ yiwese, ɓɛɛ dɔ o wi-duk-zu o wi-biro yiitoo in o wi-biro kɔ-wa gɔmŋmaa lɛŋ gbɛ a nù. Kinii, mi ai nú h’ɛ́nɛ́, duka-kpasa kɔ‘m a̧ dúk nɛ́ gasamɔ sɛn yí‘nɛ́.»
15Ɓɛɛ betom ko GASA WAN tɔ̧ ha̧ Elii: «Mɛ̀ zír, mɛ̀ nɛ́ in a̧, ká mɛ de kíì na.» Elii kura, ɓɛɛ zir in a̧ sitɛ wannu, 16ɓɛɛ tɔ̧ ha̧ wannu hee mɔ'ɔ ga. «GASA WAN tɔ̧a̧ ndé, toma bíí nɛ̀ mɛ toma mɛ zɔk Bal-Zebub sɔ̧ ko o be Ekrɔŋ‘i, ŋma Sɔ̧ bo sɛn *Israɛl nɛ‘i nyɛma mɛ ak mgbara mɔ tɛ-a na nde? Mɛ beka kur gɔn gado-zɛɛ kɔ-mɛ‘i ɓɔna, mɛ tɛ fe nɛ̀ mbetɛ wen nɛ̀ mɛ dee hegɔ.»
17Akazias fea hee mɔ'ɔ nɛ̀ GASA WAN baa tɔ̧ so nɛ nú Elii ga. Hee mɔ'ɔ n'aa bo so nɛ̀ bem na ga, Yoram nya-a̧ ɔɔ wan oi-aa tɛ yiitoo pɛ-wan ko Yoram #1.17 Yoram: o Yoram nɔ'ɔ yiitoo’ɛ nɛ́ o bíí nɛtɛ nɛtɛ. bem ko Josafat wannu Juda.
18Oi o tom ko Akazias, mɔ n'aa dea, yɔra zaŋ Kalata Nyɛrɛ ko o wannu *Israel.
Currently Selected:
2 WANNU 1: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.