2 KALATA NYƐRƐ 32
32
O be Asirii bìí Juda
(Zɔk 2 Wan 18.13; Es 36.1)
1Ɗoŋ mboozu ko Ezɛkias ha̧ GASA WAN, Senakerib wannu Asirii baa zu dúk nɛ̀ o ye-ŋgárá nù Juda wen ha̧ a̧ mɛ ba. 2Ŋgimbi nɛ̀ Ezɛkias zɔka'e Senakerib tɛɛ mɛ bi Jerusalɛm, 3a̧ baa keta in o gasawi gú nɛ̀ o gasa wi-biro kɔ̧-a̧ wen kpee zu-zer nɛ̀ ɓir nɛ̀ ɗoŋ ye. Wa kpɛka, 4ɓɛɛ bíí nɛ̀ dɔka-a mɔi̧ mɛ kpe o be-zer in o yì nɛ̀ fok zu nù‘i tɔ̧ nɛnɛ: «Bo nɛ ɔ dee ha̧ o wannu Asirii mɛ hɔ hɛ̧ɛ̧, ɓɛɛ wa kpaa yì nɛ̀ dɔka-a na.» 5Ezɛkias yee tɛ mboo o garo in o fara-pɛm-mɔ nɛ̀ gbina'i nɛ̀ kin-tɛ. A̧ mboo o wan mɛ zu garo, a̧ ɗafa Milo sɛn ye ko David, dui nɛ̀ dɔka sɛ́ɛ̀ in o ŋgee. 6A̧ aa so o gasa wi-biro mɛ ya zu dukbíí, ɓɛɛ a̧ mɔi̧ wa pii katɛ a̧ sɛn nú garo saaye'i ha̧ nɛ̀ nɔɔ-ŋgiɗi ha̧ wa tɔ̧ nɛnɛ: 7«Ɛ̀nɛ̀ yá nɛ́ ŋga-wi in o wi-kpee-see! K’ɛ́nɛ́ yu mɔ in k’ɛ́nɛ́ de kíì ti wannu Asirii gú nɛ̀ gíí wi-biro nɛ̀ a̧a̧ in a̧ na, wen wi nɛ̀ a̧a̧ ɗoŋ yɛ a̧a̧ nɛ̀ ŋgai gan wi nɛ̀ a̧a̧ ɗoŋ-aa. 8Kɔ̧-a̧ nɛ́ géé ŋgai-tɛ ko bíí a̧ duk in a̧, ɓɛɛ k’ɛɛ, GASA WAN Sɔ̧ k’ɛɛ a̧a̧ in yɛɛ mɛ gbak yɛ in mɛ de biro in yɛɛ!» Dukbíí kpaa ŋgai tɛ wen ko Ezɛkias wannu Juda.
Tom ko Senakerib ha̧ o be Jerusalɛm
(Zɔk 2 Wan 18.17-37; Es 36.2-22)
9Ɗoŋ mɔ‘i, Senakerib wannu Asirii nɛ̀ ɓɔna so sɛn Lakis in o wi-biro kɔ‘i toma wa sitɛ Ezɛkias wannu Juda, in o wi Juda nɛ̀ a̧a̧ so in a̧ sɛn Jerusalɛm mɛ tɔ̧ ha̧ wa: 10«Senakerib wannu Asirii tɔ̧ɔ̧ ndé, wi n’ɛnɛ e nɛ̀ ta'nɛ́, s’ɛnɛ ya nɛnɛ sɛn saaye Jerusalɛm'i nɛ́ o? 11Zɔ́k Ezɛkias ɔr nɛ́ ɛnɛ h’ɛ́nɛ́ mɛ fe wɔ in wɔ-yì, tɛ tɔ̧a̧-a̧ n'aa tɔ̧ h’ɛ́nɛ́‘e ndé, GASA WAN Sɔ̧ kɔ‘i tɛ gbo wi er-am wó‘i. 12Bó nɛ́ Ezɛkias a̧ gbina o kusa-fara in o fara-ɗafi-sɔ̧ ko GASA WAN Sɔ̧ kɔ‘i, ɓɛɛ tɔ̧ ha̧ o be Juda in o be Jerusalɛm mɛ ɗafi sɔ̧ in mɛ dɔ fuu-nyama zu kpɔk fara-ɗafi-sɔ̧'ɛ ɓɛɛ na nde? 13Ɛ́nɛ́ iŋ so mɔ nɛ̀ mi in o dáà kɔ‘m dee in oi o dɔka dukbíí zaŋnu’ɛ lɛŋ na nde? O sɔ̧ ko tugun bíí zu nù nɛtɛ nɛtɛ kpasa o bíí kɔ-wa yinɛ er am nde? 14Nɛ́ ge sɔ̧ ge mgbara o sɔ̧ ko o tugun bíí nɔ'ɔ nɛ̀ o zɔmdáa kɔ‘m kuma’ɛ a̧ foo bíí kɔ‘i gbonɛ er-am ge? 15Ɛ̀nɛ̀ zii, ká Ezɛkias ɔr'nɛ́ hegɔ ɓɔna! K’ɛ́nɛ́ zii wen kɔ̧-a̧ na, wen sɔ̧ ko ŋma tugun bíí, kóó sɔ̧ ko ŋma wan nyɛm mɛ gbo bíí kɔ‘i kɔ̧ er o zɔmdáa kɔ‘m in kɔ̧ er-am yinɛ na. Sɔ̧ k’ɛ́nɛ́ nyɛm mɛ gbo'nɛ́ er-am na.» 16O betom ko Senakerib tɔ̧ɔ̧ ɗaŋ wen ha̧ GASA WAN Sɔ̧ ko Israɛl in ha̧ Ezɛkias wi-de-tom ko Sɔ̧.
Senakerib da̧a̧ GASA WAN
(2 Wan 19.14-19; Es 37.14-20)
17Senakerib wannu Asirii yɔra kalata wen báá tɛ̀ wé nɛ̀ GASA WAN Sɔ̧ ko Israɛl, tɔ̧ nɛ̀ ɗaŋ wen ha̧ a̧ hee mɔ'ɔ ga: «Hee mɔ'ɔ nɛ̀ oi o dɔka sɔ̧ ko o ŋma tugun bíí zaŋnu gbo so bíí kɔ-wa er-am yinɛ na ga, Sɔ̧ ko Ezɛkias beka gbo o bíí kɔ‘i yinɛ er-am na mbɛt.»
18O betom ko Senakerib duka tɔ̧ wen nɔ‘i nɛ̀ hee ger nɛ̀ nú hébreu ha̧ o be Jerusalɛm nɛ̀ yaa zu garo wen pi̧i̧ kíì tɛ-wa in ha̧ gɛ̧ɛ̧mɔ mɛ ba wa wen kpaa yuwar mɛ ba ye. 19Wa duka tɔ̧ wen tɛ Sɔ̧ Jerusalɛm hee wen-tɛ géé-sɔ̧ ko oi o dɔka dukbíí nɛ̀ duk nɛ́ géé sɛka-te nɛ̀‘i dee dee nɛ̀ er ga.
Yuu-mɔ ko o be Asirii
(Zɔk 2 Wan 19.15,35-37; Es 37.15,36-38)
20Zu mɔ‘i, wannu Ezɛkias in wi-tɔ̧-wen oi nú Sɔ̧ Esaii, bem ko Amɔs aia nú si yiwese kɔfi nɛ̀ GASA WAN Sɔ̧ wen ha̧ a̧ mɛ gbak wa. 21Hegɔ, GASA WAN toma ŋma betom mɛ yiwese ɓɛɛ gbɛ o ŋgaŋa wi-biro, o gasa wi-duk-zu biro in o dita-bíí sɛn kɔ̧ gbagari ko wannu Asirii. A̧ sii ɗoŋ si nù kɔ̧-a̧ nɛ foe; ɓɛɛ ŋgimbi n'aa yee tua ko sɔ̧ kɔ̧-a̧, o bem kɔ̧-a̧ gɔma a̧ nɛ̀ gba-paa gbɛ.
22Mɛ̀ nɛ́ hegɔ a̧ GASA WAN kpasa nɛ Ezɛkias in o bíí Jerusalɛm er Senakerib wannu Asirii in er o ŋma wisɛn kɔ̧-a̧. A̧ ee ga̧a̧mɔ mgbara wa in o nu nɛ ya zik wa lɛŋ. 23Zu mɔ nɛ yaka'i, o bíí nɛ dɔka-a kaia ha̧a̧mɔ tɛnɛ sɛn Jerusalɛm ha̧ GASA WAN in ha̧ Ezɛkias wannu Juda nɛ kpaa so hura-nin ti o tugun bíí lɛŋ.
Zɛɛ ko Ezɛkias
(Zɔk 2 Wan 20.1-3,12-19; Es 38.1-3; 39.1-8)
24Tɛ ŋgimbi'i, Ezɛkias ɔɔ gasa zɛɛ nɛ̀ tɛ̀ɛ́ gbɛ a̧; a̧ aia nú ha̧ GASA WAN, ɓɛɛ GASA WAN zii kɔfamɔ kɔ̧-a̧, kpasi nɛ̀ a̧. 25Mɛ ɗoŋ, Ezɛkias mbo zu ha̧ GASA WAN na. Hegɔ a̧ gasa zu a̧ ɓɛɛ deemɔ‘i aŋ nyimsea ko Sɔ̧ pi̧ zu a̧, pi̧ zu nù Juda in zu Jerusalɛm mbɛt. 26Mɔ kpɔk, Ezɛkias in o bíí Jerusalɛm iŋa yɔɔ-kaya kɔ-wa, ɓɛɛ nyimsea ko GASA WAN tik zu wa ŋgimbi-wan ko Ezɛkias na.
27Ezɛkias a̧a̧ so nɛ̀ mbɔi in a̧ kpaa hura-nin nɛ̀ dɔka-a; a̧ ɗafa o fara-a-bu-mbɔi, o lɔr, o ta nɛ̀ gɛnɛ-a ɔ ŋgaya, o nɔ̧́-nyama, o ŋgee in o demɔ nɛtɛ nɛtɛ nɛ̀ sede-a ɔ ŋgaya. 28A̧ dee o dam wen aa alkamaari kɔ̧-a̧, fara-a-dɔ̧ɔ̧ in nɔ̧́, o ɓoramɔ wen o mɔ-dai kɔ̧-a̧ in o fara-nyɔŋ-mɔ kɔ-wa. 29A̧ dee o ye, a̧ kpaa o sami, o gbadua in o ndai nɛ̀ dɔka-a wen Sɔ̧ ha̧a̧ mbɔi ha̧ a̧ nyɛmna. 30Mɛ̀ nɛ́ Ezɛkias a̧ gera be-zer Gihɔŋ ɓɛɛ yì mbaŋ si ɗɔɔ nɛ̀ war yee-wese hɔ tɛ ye ko David. Mɔ nɛ̀ Ezɛkias dee so lɛŋ hɔɔ gba̧a̧. 31Hegɔ, ŋgimbi nɛ̀ o betom nɛ̀ wa toma so nɛ̀ Babilɔŋ nɛnɛ tɛ a̧ wen iŋa mɔ zu gasamɔ nɛ̀ dee zu nù kɔ̧-a̧ hɔa, GASA WAN wee Ezɛkias, ɓɛɛ e ha̧ a̧ mɛ de mɔ nɛ̀ ta-tɛ-a.
Sɔŋkur mɔ ko Ezɛkias
(Zɔk 2 Wan 20.20-21)
32Oi nyɛrɛ mɔ ko Ezɛkias nɛ̀ dea yɔra sɛn zaŋ Kalata zɔka mɔ ko wi-tɔ̧-wen oi nú Sɔ̧ Esaii bem ko Amɔs in sɛn zaŋ Kalata ko o wannu Juda in Israɛl nɛ̀ tɔ̧ wen zu yuwar mboozu ko Ezɛkias ha̧ Sɔ̧. 33Ezɛkias fea si ɗoŋ o dáà kɔ‘i, ɓɛɛ wa gun a̧ nɛ̀ war ŋgɔn sɛn ká̧ pɛsi-fio ko o bezaŋ David. O bíí Juda nɛ̀ oi zu in o bíí Jerusalɛm mɔi̧a hi̧i̧ fio kɔ̧-a̧ sɛn tɛ zɔnamɔ, ɓɛɛ bem kɔ̧-a̧ Manase ɔ wan oi-aa.
Currently Selected:
2 KALATA NYƐRƐ 32: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.