2 KALATA NYƐRƐ 29
29
Ezɛkias wannu Juda
(Zɔk 2 Wan 18.1-4)
1Ezɛkias ɔɔ wan, ka a̧ a̧a̧ so nɛ̀ pɛ ɓu-yiitoo-zua-mɔɔrɔ, ɓɛɛ a̧ ɔ wan Jerusalɛm pɛ ɓu-yiitoo-zua-mɔɔrɔ-ɗoŋ-naar. Nin nàà kɔ̧-a̧ duka so nɛ́ Abi, boko-bem ko Zakarii. 2Ezɛkias dee mɔ nɛ̀ yuwar-a ti GASA WAN, kànà hee ko dáà kɔ̧-a̧ David ga.
Bura war Tua ko GASA WAN
3Tɛ kuti pɛ-wan kɔ̧-a̧, tɛ kuti fio-zɛ, a̧ hu̧i̧a̧ o kpar-nú Tua ko GASA WAN, ɓɛɛ a̧ ɗafi. 4A̧ saa o wi-ɗafi-sɔ̧ in o be Levii tɛnɛ a ká̧ nú tua nɛ̀ duk nɛ̀ war daŋa-wese, 5ɓɛɛ a̧ tɔ̧ ha̧ wa: «O be Levii, ɛ̀nɛ̀ zíí wen kɔ‘m! Ɛ̀nɛ̀ ɗáfí war-tɛ‘nɛ́, ɛ̀nɛ̀ búr war Tua ko Sɔ̧ ko o dáà k’ɛ́nɛ́ tɛ kaia o ndiŋmɔ lɛŋ yinɛ zu sa̧a̧-fara, 6wen o dáà k’ɛɛ dee ŋgazu, ɓɛɛ wa de ɗaŋmɔ ti GASA WAN Sɔ̧ k’ɛɛ; wa ee a̧ duk, wa bɛ̧ɛ̧ zɔka mɔ sitɛ sa̧a̧-fara kɔ̧-a̧, ɓɛɛ wa zik ɗoŋ e ha̧ a̧. 7Wa kpee o nú Tua ko Sɔ̧, e nɛnɛ ha̧ lamba mɛ bi, wa kaɗa dɔɔ fuu-nyama in dɔɔ kpoo-sɔ̧ kɔ̧ sa̧a̧-fara ko Sɔ̧ ko Israɛl. 8Mɔ‘i dee ha̧ see GASA WAN mɛ tu̧ zu Juda in Jerusalɛm; hegɔ a̧ siŋa dukbíí pi̧ tɛ gasa bɔnɛ in mɔɔ-gɔn-hiɗi-wi, hee mɔ'ɔ n’ɛnɛ zɔk nɛ̀ yí‘nɛ́'ɛ ga. 9Mɛ̀ nɛ́ wen zu mɔ‘i a̧ o dáà k’ɛɛ fee nɛnɛ yí-biro, ɓɛɛ wa kai o bem k’ɛɛ nɛ̀ bara-biro yaknɛ.
10«Kinii, kɔ‘m, mi kɔ̧ɔ̧ mɛ nɔ tɔk in GASA WAN Sɔ̧ ko Israɛl wen ha̧ ŋgaya tu̧u̧-see nɛ̀ a̧a̧ kɔ̧ see-aa mɛ yu zu yɛ. 11Ɓɛɛ nɛ̀ war-a k’ɛ́nɛ́ o wiyɛ, k’ɛ́nɛ́ o nya'm, k’ɛ́nɛ́ ir tɛ‘nɛ́ ir de nɛ̀ mɔ na, wen nɛ́ ɛnɛ a̧ GASA WAN hoka mɛ yor ti a̧, h’ɛ́nɛ́ mɛ ɗafi a̧, dɔ nɛ̀ fuu-nyama, zɔn nɛ̀ a̧.»
12-14Tɛ wen'i o be Levii nɛ̀ gboo yor nɛ́ mɔɔ nɔ'ɔ:
Tɛ nú-gara ko Kehat nɛ́ Mahat bem ko Amasai in Jɔɛl bem ko Azaria.
Tɛ nú-gara ko Mɛrari nɛ́ Kis bem ko Abdi in Azaria bem ko Yehalɛl.
Tɛ nú-gara ko Gɛrsɔŋ nɛ́ Yɔa bem ko Zima in Edɛn bá nɛ̀ bem ko Yɔa.
Tɛ nú-gara ko Elisafaŋ nɛ́ Simri in Yeiɛl.
Tɛ nú-gara ko Asaf nɛ́ Zakarii in Matania.
Tɛ nú-gara ko Heman nɛ́ Yehiɛl in Simɛi.
Tɛ nú-gara ko Yedutun nɛ́ Sɛmaya in Uziɛl.
15Wa mɔi̧a ŋmaa nyɛm nɛ̀ ɗoŋ nú-gara kɔ-wa, wa ɗafa war-tɛ-wa ɓɛɛ wa bur war Tua ko GASA WAN mbɛt, nyɛm nɛ̀ ɗoŋ wen ko wannu in nyɛm nɛ̀ ɗoŋ mɔ nɛ̀ GASA WAN kɔ̧a̧. 16O wi-ɗafi-sɔ̧ yee kɔ̧ Tua ko GASA WAN ha̧ wa mɛ bur war-a, ɓɛɛ wa pɛ o ndiŋmɔ nɛ̀ wa kpaa kɔ̧ gasa bɛr-tua ko GASA WAN gbonɛ si nú zala. O be Levii kaia mɔɔ nɔ‘i gbonɛ saaye nɛ́ɛ̀ a kɔ̧ gboŋgo Sɛdrɔŋ.
17Wa ku̧u̧ so naŋ ɗafa war mɔ tɛ kuti wese tɛ kuti fio-zɛ; ɓɛɛ tɛ mɔɔrɔ-ɗoŋ-taar ɔɔ-zɛ, wa hɔa tɛ nutua nɛ̀‘i ye nɛnɛ si kɔ̧ gɔna-bɛr-tua ko GASA WAN. Bura war Tua ko GASA WAN dea tɛ zɛ mɔɔrɔ-ɗoŋ-taar; hegɔ, nɛ́ tɛ ɓu-zua-mɔɔrɔ-ɗoŋ-kpɔk ɔɔ-zɛ tɛ fio-zɛ a̧ tom-aa kaɗa nɛnɛ.
Wa dee gbaŋa Tua ko GASA WAN woyo
18O be Levii nɛ̀ɛ́ tɛ ko wannu Ezɛkias, ɓɛɛ tɔ̧ ha̧ a̧: «Ɛɛ bura war Tua ko GASA WAN lɛŋ, fara-dɔ-kpoo-sɔ̧, taŋe e brɛt zu-a ha̧ Sɔ̧, in o mɔ nɛ̀ a̧a̧ sɛnɛ lɛŋ, 19gú nɛ̀ o mɔ nɛ̀ wannu Ahaz ɗaŋa war-a ŋgimbi n'aa ee nɛ̀ Sɔ̧ duk. Ɛɛ kaia wa a si ɗoŋ woyo, ɓɛɛ ɛɛ ɗafi wa; mɔɔ nɔ‘i a̧a̧ ti fara-dɔ-kpoo-sɔ̧ ha̧ GASA WAN.»
20Mɛ bin mɛ tutuyɛ sut, wannu Ezɛkias mɔi̧a o gasawi saaye, ɓɛɛ a̧ daŋ si kɔ̧ Tua ko GASA WAN. 21Wa kaia o wiwii ndai mɔɔrɔ-ɗoŋ-yiitoo, vala sami mɔɔrɔ-ɗoŋ-yiitoo, be-sami mɔɔrɔ-ɗoŋ-yiitoo in vala gbadua mɔɔrɔ-ɗoŋ-yiitoo mbɛt ha̧ nɛ̀ ha̧a̧mɔ-gaŋmɔ wen kpaa ea-ɗaŋmɔ nú tua ko wannu in sa̧a̧-fara in zu o be Juda. Wannu tɔ̧ɔ̧ ha̧ o wi-ɗafi-sɔ̧, o bezaŋ Arɔŋ mɛ dɔ kpoo-sɔ̧ zu fara-ɗafi-sɔ̧ ko GASA WAN. 22Nɛ́ mɔ'ɔ nɛ̀ wa gɔna o ndai, ɓɛɛ o wi-ɗafi-sɔ̧ ɗu tɔk-aa gbai a zu fara-ɗafi-sɔ̧. Wa gɔna o vala sami in o be-sami mbɛt, ɓɛɛ wa gbai tɔk-aa a zu fara-ɗafi-sɔ̧. 23Ɓɛɛ nɛ̀ war ko o vala gbadua wen kpaa ea-ɗaŋmɔ, wa kaia wa nɛnɛ a ti wannu in ti gíí o be Israɛl nɛ̀ mɔi̧a; ɓɛɛ wannu in o ŋma bíí e er zu wa. 24O wi-ɗafi-sɔ̧ gɔna o gbadua nɔ‘i, ɓɛɛ gbai tɔk-aa a zu fara-ɗafi-sɔ̧ wen ha̧ o be Israɛl nɛ̀ oi-aa lɛŋ mɛ kpa ea-ɗaŋmɔ. Wannu ha̧a̧ so kànà nú‘e, o dùk ha̧a̧mɔ nɔ‘i yiitoo'i, dɔɔ-kpoo-sɔ̧ in ha̧a̧mɔ-gaŋmɔ, mɛ̀ nɛ́ wen zu o be Israɛl.
25A̧ kaia o be Levii a kɔ̧ Tua ko GASA WAN nɛ̀ o sɔkɔ, o kunde, in o koloŋ er-wa nyɛm nɛ̀ ɗoŋ tɔ̧ɔ̧-wen ko David, in ko o wi-tɔ̧-wen oi nú Sɔ̧ ko wannu, Gad in Nataŋ. Tɔ̧ɔ̧-wen tɛɛ so nɛ̀ tɛ GASA WAN, ɓɛɛ o wi-tɔ̧-wen oi nú Sɔ̧ we ɗoŋ-aa. 26Ŋgimbi nɛ̀ o be Levii baa fara nɛ̀ o mɔɔ-mbɛr nɛ̀ David dee so, ɓɛɛ nɛ̀ o wi-ɗafi-sɔ̧ kaia mbia kaɗi, 27Ezɛkias tɔ̧ɔ̧ ha̧ wa mɛ dɔ kpoo-sɔ̧ sɛn fara-ɗafi-sɔ̧. Ŋgimbi nɛ̀ dɔɔ-kpoo-sɔ̧ ku̧u̧ naŋ, wa ŋmaa nú-wa tɛ gima zɔn nɛ̀ GASA WAN, dɔm nɛ̀ mbia in mbɛr nɛ̀ o kunde nɛ̀ David wannu Israɛl dee so. 28Giiwi nɛ̀ mɔi̧a lɛŋ hira si ɗɔɔ gú nù, ɓɛɛ ká o wi-bii-gima a̧ bíí gima dɔm nɛ̀ mbia'i hegɔ hɔ ŋgimbi nɛ̀ dɔɔ kpoo-sɔ̧ kaɗa nɛnɛ. 29Ɗoŋ kaɗa dɔɔ kpoo-sɔ̧, wannu in o bíí nɛ̀ yaa in a̧ gbɛɛ zugur nú bá yí-wa gu nù. 30Wannu Ezɛkias in o gasawi tɔ̧ɔ̧ ha̧ o be Levii mɛ bìì gima nɛ̀ David in wi-de-tom oi nú Sɔ̧ Asaf dee so wen zɔna GASA WAN. Wa bia gima zɔn nɛ̀ a̧ nɛ̀ desee, ɓɛɛ wa gbɛ zugur-wa nù, ba yí-wa gu nù.
31Ezɛkias tɔ̧ɔ̧ ha̧ giiwi woyo: «Kinii, hee mɔ'ɔ nɛ̀ mɔ mɛ ha̧ a̧a̧ er'nɛ́ nɛ̀ dɔka-a wen ha̧a̧-a̧ ha̧ GASA WAN ga, ɛ̀nɛ̀ ɗɔ́lí pii ti, ɓɛɛ ɛ̀nɛ̀ káí o ha̧a̧mɔ-gaŋmɔ in o ha̧a̧mɔ-zɔnamɔ k’ɛ́nɛ́ tɛnɛ pii kɔ̧ Tua ko GASA WAN.» O bíí lɛŋ kaia o ha̧a̧mɔ tɛnɛ. O wi nɛ̀ see-wa hu̧i̧a̧ ha̧a̧ o kpoo-sɔ̧ mbɛt. 32Kpoo-sɔ̧ lɛŋ nɛ̀ o bíí kaia tɛnɛ duka nɛ́ ndai ɓu-mɔɔrɔ-ɗoŋ-yiitoo, vala sami gɔmŋmaa, be-sami gɔmŋmaa-yiitoo nɛ̀ wa dɔɔ nɛ̀ kpoo-sɔ̧ lɛŋ ha̧ GASA WAN. 33O oi saɗi-ɗafi-sɔ̧ nɛ̀ a̧a̧ so sɛnɛ nɛ́ o ndai gɔmŋmaa-mɔɔrɔ-ɗoŋ-kpɔk in o sami booro-taar. 34Hee mɔ'ɔ nɛ̀ o wi-ɗafi-sɔ̧ dɔk so wen ɓaa o saɗi-ɗafi-sɔ̧ lɛŋ na ga, o nya-wa, o be Levii gbaka wa hɔ ŋgimbi kaɗa tom, pɛm nɛ̀ ɗafa war-tɛ ko o ŋma wi-ɗafi-sɔ̧ sɛ. Tɛ ŋgimbi'i, o be Levii dee wɔ ɗafa war-tɛ gan ko o wi-ɗafi-sɔ̧. 35Wi ha̧ so kànà o nɔ̧́ kpoo-sɔ̧ sɛn zu fara-dɔ-kpoo-sɔ̧ mbɛt e see zu o ha̧a̧mɔ nɛtɛ nɛtɛ lɛŋ, bá nɛ̀ dɔ̧ɔ̧ mbɛt.
Mɛ̀ nɛ́ hegɔ a̧ wa ɗafa nɛ̀ yuwar gasa GASA WAN sɛn kɔ̧ Tua kɔ̧-a̧ woyo. 36Ezɛkias in dukbíí kpaa desee wen nɛ Sɔ̧ dea ha̧ mɔ‘i mɛ hɔ gba̧a̧ nɛ̀ haya-a, zik mɔ na.
Currently Selected:
2 KALATA NYƐRƐ 29: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.