2 KALATA NYƐRƐ 18
18
Josafat yee ɗoŋ Akab wannu Israɛl
(Zɔk 1 Wan 22.1-4)
1Josafat kpaa mbɔi nɛ̀ dɔka-a in hura-nin mbɛt. A̧ kpaa nam in wannu Akab nɛ̀ ɗoŋ kóò. 2Ɗoŋ pɛ tikiɗi, a̧ zira mɛ nɛ̀ɛ́ zɔk Akab sɛn Samarii ɓɛɛ Akab gbɛ o sami in o ndai nɛ̀ dɔka-a ha̧ a̧ in o bíí nɛ̀ yaa in a̧. Akab yee ɗɛɗɛ-a wen ha̧ a̧ mɛ nɛ̀ɛ́ e a̧ wen bíí Ramot nú Galad. 3Akab wannu Israɛl aka Josafat wannu Juda hee mɔ'ɔ ga: «Mɛ kɔ̧ɔ̧ mɛ nɛ in am mɛ bi Ramot nú Galad nde?» Ɓɛɛ a̧ kifi nú tɔ̧ nɛnɛ: «Mɔ nɛ tɛ kpa mɛ, tɛ kpa'm; mɔ nɛ tɛ kpa o bíí kɔ-mɛ, tɛ kpa o bíí kɔ‘m mbɛt. Ɛɛ tɛ nɛ in mɛɛ si yí biro.»
Zɔkamɔ ko o wi-tɔ̧-wen oi nú Sɔ̧ ko Akab
(Zɔk 1 Wan 22.5-12)
4Josafat tɔ̧ɔ̧ ha̧ wannu Israɛl woyo: «Mɛ̀ kíí mgbara wen ko GASA WAN sɛ!»
5Wannu Israɛl mɔi̧a o wi-tɔ̧-wen oi nú Sɔ̧ kɔ‘i tɛ gɔmŋmaa-naar, ɓɛɛ ak wa: «A̧‘m nɛ́ɛ̀ bi Ramot nú Galad náà, kóó ká‘m nɛ na nde?» Wa kifa nú: «Ɛ̀nɛ̀ nɛ̀, Sɔ̧ aa wa er wannu kaɗi!»
6Josafat tɔ̧a̧: «Ŋma wi-tɔ̧-wen oi nú Sɔ̧ bo hɛ̧ɛ̧ ha̧ a̧ mɛ ak GASA WAN h’ɛ́ɛ́ na nde?»
7Wannu Israɛl tɔ̧ɔ̧ ha̧ Josafat: «Ŋma bíí kpɔk a̧a̧ sɛnɛ n’ɛɛ nyɛma mɛ ak mgbara taamɔ ko GASA WAN nɛ̀ ɗoŋ-aa, ɓɛɛ kɔ‘m, mi kɔ̧ a̧ na, wen a̧ tɔ̧ wen tɛ‘m de na; kànà nɛ́ ɗaŋ wen. Wi’ɛi nɛ́ Michee bem ko Yimla.» Josafat tɔ̧a̧: «Wannu, k’ɛ́nɛ́ tɔ̧ wen hegɔ na!»
8Wannu Israɛl saa ŋma gasawi tɛnɛ, ɓɛɛ tɔ̧ ha̧ a̧: «Mɛ̀ sá Michee bem ko Yimla tɛnɛ nɛ̀ haya-a.»
9Wannu Israɛl in Josafat wannu Juda aa so nɛ́ laa-wan tɛ, ɓɛɛ wa ya zu damti sɛn bee-gara nú ye Samarii. O wi-tɔ̧-wen oi nú Sɔ̧ lɛŋ tɔ̧ nɛ wen oi nú Sɔ̧ sɛn ti wa. 10Sidekia bem ko Kɛnana ɗafa ŋma zak nɛ̀ boi e zu ɓɛɛ tɔ̧: «GASA WAN'e ndé, ɛnɛ tɛ gɔm Aram gbɛ nɛ̀ o zak nɔ'ɔ.» 11Ɓɛɛ o wi-tɔ̧-wen oi nú Sɔ̧ tɔ̧ nɛ kpɔk wen'e ndé: «Ɛ̀nɛ̀ dáŋ si Ramot nú Galad; ɛ́nɛ́ tɛ gbin biro! GASA WAN tɛ e ye'i er'nɛ́!»
12Betom nɛ̀ nɛ̀ɛ̀ so mɛ sa Michee tɔ̧ɔ̧ ha̧ a̧: «O wi-tɔ̧-wen oi nú Sɔ̧ ko wannu lɛŋ tɔ̧ nɛ de wen tɛ-a; hegɔ, wen kɔ-mɛ a̧ nɛ́ kana nɛ́ ɗoŋ kɔ-wa mbɛt! Mɛ̀ tɔ̧́ nɛ́ de wen.»
13Michee tɔ̧a̧: «Hee GASA WAN duk kpasa ga, nɛ́ wen n'aa tɛ tɔ̧ a̧‘m tɛ tɔ̧ mbɛt.»
14A̧ hɔɔ katɛ wannu, ɓɛɛ wannu ak a̧: «Michee, ɛ̀ɛ̀ nɛ́ɛ̀ bí Ramot nú Galad náà, kóó k’ɛɛ nɛ na nde?»
A̧ kifa nú: «Ɛ̀nɛ̀ nɛ́! Ɛ́nɛ́ tɛ gbin biro, GASA WAN tɛ e ye'i kɔ̧ er wannu.»
15Wannu tɔ̧ɔ̧ ha̧ a̧. «Mɛ̀ nɛ́ war géè a̧‘m tɛ de nɛnɛ ha̧ mɛ mɛ kan mɔ tɔ̧ nɛ́ kpasawen nɛ̀ nin GASA WAN ha̧‘m ge?»
16Michee kifa nú:
«Mi zɔka o be Israɛl nɛ̀ pɛsa dam zu kaya
hee o sami nɛ̀ wi-dai-a bo na ga;
GASA WAN tɔ̧a̧:
‹O wi nɔ'ɔ bó nɛ̀ wan-dai-wa ɓɔna!
Kóó o ndé a̧ sí ɗoŋ tɛ kɔ‘i zaŋ ga̧a̧mɔ.› »#Tɔra-bíí 27.17; Ez 34.5; Mt 9.36; Mk 6.34
17Wannu Israɛl tɔ̧ɔ̧ ha̧ Josafat: «Bo nɛ mi baa tɔ̧ so ha̧ mɛ na nde? A̧ tɔ̧ ŋma de wen-tɛ‘m na, kànà nɛ́ ɗaŋ wen ɓɛɛ!»
18Michee tɔ̧a̧: «Ɛ̀nɛ̀ zíí wen ko GASA WAN: ‹Mi zɔka GASA WAN fara duk zu damti kɔ‘i, ɓɛɛ o gíí wi-biro mɛ yiwese ya ŋgɔn katɛ a̧ nɛ̀ war gale in nɛ̀ war wiiko mbɛt,› 19ɓɛɛ GASA WAN ak wa: ‹Mɛ̀ nɛ́ o'o tɛ ɔr Akab wannu Israɛl mɛ nɛ̀ biro sɛn Ramot nú Galad ha̧ a̧ mɛ fe o?› Ɓɛɛ ger wen kɔ-wa ye ŋmaa na. 20Ɓɛɛ ŋma ɔmi gbo pii ti yor ti GASA WAN, ɓɛɛ tɔ̧: ‹Nɛ́ mi'i tɛ ɔr a̧.› GASA WAN aka a̧: ‹Mɛ tɛ ɔr a̧ hee ge?› 21A̧ kifa nú: ‹Mi tɛ nɛ ɓɛɛ mi duka nɛ́ ɔmi ndela kɔ̧ nú o wi-tɔ̧-wen oi nú Sɔ̧ kɔ̧-a̧ lɛŋ.› GASA WAN tɔ̧ɔ̧ ha̧ a̧: ‹Mɛ tɛ ɔr a̧; mɛ a̧a̧ nɛ̀ ŋgai mɛ de hegɔ. Mɛ̀ nɛ̀, ɓɛɛ mɛ̀ dé hegɔ.›
22«Kà GASA WAN a̧ ee ɔmi ndela kɔ̧ nú o wi-tɔ̧-wen oi nú Sɔ̧ kɔ-mɛ lɛŋ, mɛ̀ nɛ́ wen nɛ̀ tɔ̧, a̧ nɛ̀ tɛ-a tɔ̧ nɛ́ wen ɗaŋmɔ zu mɛ.»
23Sidekia bem ko Kɛnana ɗɔŋa siti, mbɛr ká̧ yí Michee, ɓɛɛ tɔ̧: «Ɔmi ko GASA WAN gboo tɛ‘m nɛ̀ déè, sa tɔ̧ nɛ̀ wen ha̧ mɛ ge?»
24Michee tɔ̧a̧: «Mɛ tɛ zɔk, wese nɛ̀ mɛ tɛ hu̧si nɛnɛ nɛ̀ kɔ̧ gɔna-bɛr-tua nɛnɛ.»
25Wannu Israɛl tɔ̧a̧: «Ɛ̀nɛ̀ bá Michee, ɛ̀nɛ̀ mgbɔ́ a̧ siɗoŋ ha̧ wanye Amɔŋ in ha̧ Jɔas bem ko wannu, 26ɓɛɛ ɛ̀nɛ̀ tɔ̧́ ha̧ wa'e, wen ko wannu nɛ́ mɔ'ɔ: ‹Ɛ̀nɛ̀ pí̧ wi’ɛ kɔ̧ zɔɓɔ, ɓɛɛ ɛ̀nɛ̀ há̧ nɛ́ be brɛt in yì kɛ̧́ɛ̧́ ha̧ a̧ hɔ ŋgimbi n'am tɛ pii, ŋma mɔ kpa'm na.› »
27Michee tɔ̧a̧: «Kà mɛ nɛ́ pia nɛ̀ mbetɛ, ŋma mɔ kpa mɛ na, ɓɛɛ GASA WAN tɔ̧ wen nɛ̀ nú‘m na.» Ɓɛɛ a̧ tɔ̧ woyo: «Ɛ̀nɛ̀ zíí wen'i, ɛ́nɛ́ o bíí lɛŋ!»
Fio ko Akab
(Zɔk 1 Wan 22.29-40)
28Wannu Israɛl in Josafat wannu Juda kura mɛ nɛ̀ɛ́ bi Ramot nú Galad mɛ. 29Wannu Israɛl tɔ̧ɔ̧ ha̧ Josafat: «Mi tɛ kpai laa ha̧‘m mɛ ye biro; ɓɛɛ nɛ̀ kɔ-mɛ, mɛ̀ dúk nɛ̀ laa kɔ-mɛ.» Wannu Israɛl kpaia laa, ɓɛɛ wa yiitoo ye biro.
30Wannu Aram ha̧a̧ so nú ha̧ o wi-duk-zu o wan keekee-nyaŋa kɔ‘i'e, ká wa gbɛ o bem, kóó gasawi na; ɓɛɛ kànà nɛ́ wannu Israɛl kpɔk ɓɛɛ. 31Hegɔ o wan ko o wi-daŋ keekee-nyaŋa zɔka Josafat, ɓɛɛ tɔ̧: «Wannu Israɛl nɛ́ mɔ'ɔ mɛ‘i!» Ɓɛɛ wa zik a̧ e see-a mɛ bi a̧. Josafat ŋmaa nú tɛ hiɗi mɔ; GASA WAN gbaka a̧, ɓɛɛ fo wi nɔ‘i yinɛ zu a̧. 32Ŋgimbi nɛ̀ o wan ko o wi-daŋ keekee zɔka a̧ bo nɛ́ wannu Israɛl na, wa ee a̧ duk. 33Ŋma bíí pi̧i̧ kɔ‘i góò nɛ̀ nú tum, ɓɛɛ tok wannu Israɛl nɛ̀ woi laa-biro kɔ̧-a̧. Wannu tɔ̧ɔ̧ ha̧ baka-nyaŋa kɔ‘i: «Mɛ̀ zík nú nyaŋa, a̧ mɛ̀ mgbɔ́‘m gbonɛ yí-biro, wen mi baa da̧i̧.» 34Wese'i biro ŋgaia batɛ, ɓɛɛ wannu Israɛl yor ɓɔn kɔ̧ keekee-nyaŋa sɛn nú ye Aram, ɓɛɛ a̧ fe mɛ ga̧a̧mɔ.
Currently Selected:
2 KALATA NYƐRƐ 18: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.