2 KALATA NYƐRƐ 16
16
Biro in o be Israɛl
(Zɔk 1 Wan 15.17-22)
1Asa ɔɔ wan tɛ pɛ ɓu-taar-zua-mɔɔrɔ-ɗoŋ-kpɔk, ɓɛɛ Baɛsa wannu Israɛl ba biro dúk nɛ̀ Juda. A̧ ɗafa ŋgárá saaye Rama wen gɔna nú Asa wannu Juda. 2Asa kaia lɔr in bu-mbɔi, o mbɔi-tua ko GASA WAN in mbɔi-tua ko wannu tom ha̧ Bɛn-Hadad wannu Aram sɛn Damas tɔ̧ nɛnɛ: 3«Nɔɔ-tɔk a̧a̧ sɛn mgbara'm in mɛɛ, mgbara dáà kɔ‘m in dáà kɔ-mɛ. Hegɔ mi tom nɛ́ bu-mbɔi in lɔr ha̧ mɛ. Mɛ̀ nɛ́ɛ̀ gbin nɔɔ-tɔk kɔ-mɛ in Baɛsa wannu Israɛl, wen ká a̧ tɛ́ɛ̀ daŋ ba biro dúk nɛ̀‘m!»
4Bɛn-Hadad zia wen ko wannu Asa, ɓɛɛ a̧ tom o gasa wi-duk-zu o wi-biro kɔ̧-a̧ sitɛ o ye Israɛl; wa bìí Iyɔŋ, Dan, Abɛl-Maim gú nɛ̀ o ye-a-mɔ nɛ̀ zika gasa ye Nɛftalii lɛŋ. 5Ŋgimbi nɛ̀ Baɛsa zia nyɛrɛ mɔ‘i, a̧ kaɗa mboo garo ye Rama ɓɛɛ a̧ e tom-aa duk. 6Wannu Asa saa o be Juda, ɓɛɛ wa kai o ta in o te nɛ̀ Baɛsa mbo so nɛ garo Rama yaknɛ, nɛ́ɛ̀ mbó nɛ̀ o garo Geba in Mispa.
Asa pi̧i̧ wi-tɔ̧-wen oi nú Sɔ̧ Anani zɔɓɔ
7Tɛ ŋgimbi'i, wi-tɔ̧-wen oi nú Sɔ̧ tɛɛ kpa Asa wannu Juda, ɓɛɛ tɔ̧ ha̧ a̧: «Hee mɔ'ɔ nɛ̀ mɛ ɛka tɛ-mɛ nɛ̀ Aram, ɓɛɛ mɛ e ɛka tɛ nɛ̀ GASA WAN Sɔ̧ kɔ-mɛ duk ga, o wi-biro ko wannu Aram yuu ɗɔɔ ŋgai kɔ-mɛ. 8Bo nɛ o be Egiptɛ in o be Libii mɔi̧a so kpa ŋmaa ɓɛɛ duk nɛ́ ŋga o wi-biro nɛ̀ a̧a̧ so nɛ̀ o keekee-biro in o wi-daŋ-nyaŋa nɛ̀ dɔka-a na nde? Zu-a'i, bo nɛ GASA WAN aa wa er-mɛ wen nɛ̀ mɛ ɛka so tɛ-mɛ nɛ̀ a̧ na nde? 9GASA WAN zɔk nɛ mɔ zu nù lɛŋ, wen gbaka o wi nɛ̀ e ta nɛ̀ a̧. Hegɔ tɛ mɔ‘i, mɛ dee mɔɔ-mgbele. Kinii, mɛ tɛ de biro wese lɛŋ.» 10See Asa nyima in wi-zɔk-mɔ, ɓɛɛ a̧ pi̧ a̧ zɔɓɔ, wen see-aa nyima in a̧ sɛn tɛ mɔ‘i. Asa usa kànà bɔnɛ ha̧ o ŋma bíí tɛ ŋgimbi'i mbɛt.
Fio ko Asa
(Zɔk 1 Wan 15.23-24)
11Nyɛrɛ ko Asa tɛ ku̧u̧naŋ-a hɔ sɔŋkur-aa yɔra zaŋ kalata ko o wannu Juda in Israɛl. 12Asa baa ŋma ŋga zɛɛ-nyima-naŋ tɛ ɓu-taar-zua-mɔɔrɔ-ɗoŋ-naar pɛ ɔɔ-wan kɔ̧-a̧. Tɛ nyimmɔ‘i, a̧ e ta nɛ̀ GASA WAN na, ɓɛɛ a̧ ma nɛ yì sitɛ o wan-nyina. 13Asa fea, ɓɛɛ wa gun a̧ si ɗoŋ o dáà kɔ̧-a̧ tɛ ɓu-naar-zua-kpɔk pɛ-wan kɔ̧-a̧. 14Wa guna a̧ sɛn kɔ̧ fio n'aa za̧a̧ so sɛn ye ko David. Wa pi̧i̧ a̧ gɔn gado nɛ̀ wa aa so nɔ̧́-nyama nɛtɛ nɛtɛ sɛnɛ. Wa dɔɔ fuu-nyama nɛ̀ dɔka-a tu̧ nɛ̀ tɛ-a.
Currently Selected:
2 KALATA NYƐRƐ 16: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.