2 KALATA NYƐRƐ 1
1
NYƐRƐ MƆ KO SALOMƆŊ, WANNU ISRAƐL
1Salomɔŋ bem ko David yora nɛ̀ nɔa-a tɛ wan. GASA WAN Sɔ̧ kɔ̧-a̧ duka so in a̧, ɓɛɛ de ha̧ a̧ mɛ duk nɛ́ tu̧u̧-tɛ wannu.
Salomɔŋ kɔfa Sɔ̧ wen kpaa iŋa-mgbara-mɔ
(Zɔk 1 Wan 3.4-15)
2Salomɔŋ saa o be Israɛl lɛŋ, o gasawi zu o wi-biro booro in gɔmŋmaa, o wi-gɔn-kita in o gasawi Israɛl lɛŋ; o wi nɔ‘i nɛ́ o gasawi nutua. 3A̧ yaka in giiwi lɛŋ si kusa-fara nɛ̀ duk so sɛn Gabaɔŋ, wen mɛ̀ nɛ́ sɛn hi̧i̧ a̧ Tua-kpa-ŋmaa in Sɔ̧ duk so sɛnɛ; mɛ̀ nɛ́ tua-laa nɛ̀ Moisɛ wi-de-tom ko GASA WAN dee so sɛn ŋga-gbárà. 4Ɓɛɛ nɛ̀ ko kuɓa ko Sɔ̧, David foo so daŋnɛ nɛ̀ Kiriat-Yearim si fara n'aa ɗafa so e wen-aa, wen a̧ dee so tua-laa ha̧ a̧ sɛn Jerusalɛm.#2 Sam 6.1-17; 1 Kal Ny 13.5-14; 15.25—16.1 5Ɓɛɛ fara-ɗafi-sɔ̧ nɛ̀‘i dee nɛ̀ ndɛrɛ, nɛ̀ Bɛsalɛl bem ko Urii, be-koo Hur dee so, duka hi̧i̧, ti fara-duk ko GASA WAN. Mɛ̀ nɛ́ fara'i a̧ Salomɔŋ in giiwi kɔ̧ɔ̧ so mɛ gasi GASA WAN sɛnɛ.#Gboa-a 38.1-7 6Sɛn hi̧i̧, Salomɔŋ daŋa si fara-ɗafi-sɔ̧ nɛ̀‘i dee nɛ̀ ndɛrɛ, ti GASA WAN, ká̧ Tua-kpa-ŋmaa, ɓɛɛ a̧ dɔ kpoo-sɔ̧ tɛ duk-aa booro ɗafi nɛ̀ sɔ̧.
7Mɛ zɛ‘i, Sɔ̧ hɔɔ zu ha̧ Salomɔŋ, ɓɛɛ tɔ̧ ha̧ a̧: «Mɛ̀ ák mɔ nɛ̀ mɛ kɔ̧ɔ̧ er-am.» 8Salomɔŋ kifa nú ha̧ Sɔ̧: «Nɛ́ ɛ́nɛ́ a̧ usa so gasa kɔ̧ɔ̧mɔ ha̧ dáà kɔ‘m David, ɓɛɛ ɛnɛ de ha̧‘m mɛ ɔ wan oi-aa. 9Kinii, GASA WAN Sɔ̧, wen n’ɛnɛ tɔ̧ɔ̧ ha̧ dáà kɔ‘m David a̧ hɔ́ gba̧a̧, wen nɛ́ ɛ́nɛ́ a̧ dee ha̧‘m mɛ ɔ wan zu dukbíí'ɛ nɛ̀ ɔ dɔka hee fuunu ga’ɛ.#Ku̧u̧ 13.16; 28.14 10Kinii, ɛ̀nɛ̀ há̧ iŋa-mgbara-mɔ in de taamɔ ha̧‘m, ha̧‘m mɛ iŋ nɛ́ɛ́ nɔ̀ nɛ̀ yuwar-a ti dukbíí'ɛ. Nɛ́ o'o nyɛma mɛ ɔ wan zu dukbíí k’ɛ́nɛ́ nɛ̀ dɔka hegɔ'ɔ o?»
11Sɔ̧ tɔ̧ɔ̧ ha̧ Salomɔŋ: «Hee mɔ'ɔ nɛ̀ see-mɛ kɔ̧ɔ̧ mɔ‘i ga, hee mɔ'ɔ nɛ̀ mɛ ak mbɔi, o kpaamɔ, kóó gasamɔ na, mɛ ak fio ko wisɛn kɔ-mɛ na, kóó duka-a zaŋnu ɗoŋ-aa nyɛi̧ na mbɛt, ɓɛɛ mɛ aka kɔ-mɛ nɛ́ iŋa-mgbara-mɔ in de taamɔ wen duka-a zu dukbíí kɔ‘m n'am ee mɛ zu wa ga, 12mi ha̧a̧ iŋa-mgbara-mɔ in de taamɔ ha̧ mɛ, ɓɛɛ mi ha̧ mbɔi, o kpaamɔ in gasamɔ ha̧ mɛ, nɛ̀ o wannu nɛ̀ yaa nɛti in nɛ̀ ɗoŋ beka kpa na.»
13Salomɔŋ pia ɗoŋ nɛ̀ kusa-fara Gabaɔŋ nɛ̀ tɛ Tua-kpa-ŋmaa pii Jerusalɛm, ɓɛɛ a̧ ɔ wan zu Israɛl.#1 Wan 10.26-29
Ŋgai in mbɔi ko Salomɔŋ
(Zɔk 1 Wan 10.26-29; 2 Kal Ny 9.25-28)
14Salomɔŋ mɔi̧a o keekee in o wi-daŋ-nyaŋa. A̧ a̧a̧ so nɛ̀ o keekee-nyaŋa booro-nɛ-gɔmŋmaa-naar in o wi-daŋ-nyaŋa booro-ɓu-zua-yiitoo n'aa kɛ̧ɛ̧ si tɛ o ye-a-mbɔi biro, ɓɛɛ a̧ e oi-aa katɛ a̧ sɛn Jerusalɛm.#1 Wan 5.6 15A̧ dee ha̧ bu-mbɔi in lɔr mɛ dɔk sɛn Jerusalɛm hee ta ga, in ha̧ o te-gbatui mɛ dɔk hee o te-mbɔra ká̧ gba-tɔp#1.15 gba-tɔp: texte tɔ̧ɔ̧ Bas-Pays. ga. 16Kpar nyaŋa ko Salomɔŋ tɛ́ nɛ̀ Egiptɛ in Silisii. O wi-ɗɔr-mɔ ko wannu nɛ̀ɛ̀ hi̧fi so wa sɛn Silisii.#Wee-ɗoŋ-he 17.16 17Gɛnɛ keekee-nyaŋa Egiptɛ nɛ̀ wa hi̧fi so piinɛ nɛ́ kɔya sede gɔmŋmaa-mɔɔrɔ-ɗoŋ-kpɔk, ɓɛɛ gɛnɛ nyaŋa kpɔk nɛ́ kɔya sede gɔmŋmaa-nɛ-ɓu-mɔɔrɔ. O wannu Hit in o wannu Aram hi̧fi so kànà kɔ‘i nɛ̀ ɗoŋ wa.
Ɗafamɔ wen mboo Tua ko Sɔ̧
(Zɔk 1 Wan 5.15-32; 7.13-14)
18Salomɔŋ tɔ̧ɔ̧ ha̧ wa mɛ de ŋma Tua wen nin GASA WAN in ŋma tua-wan wen kɔ̧-a̧ mɛ tɛ-a.
Currently Selected:
2 KALATA NYƐRƐ 1: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.