San Juan 20
20
Nguruban Jesús
(Mt. 28:1-10; Mr. 16:1-8; Lc. 24:1-12)
1No zhë galo laka che'n sman, dox garzi'l, nakao ra' ngwa Mari Madalen ro' ba' plo miga'ch Jesús, orze' une xa', lë' ke kwa'n nayao' ro' ba', nax la tu lad. 2Orze' karre miëk una' plo nzho Simón Per kun xtu men che'n Jesús xa' más nichë'l Me, nzhab una':
―¡Pas nzho cho ngulo' kwerp che'n Señor che'n be le'n ba', no ñanu xa'i, mbaino yent cho nane plo ñanu xa'i!
3Orze' nzhatswi' Per kun xtu xa' nak men che'n Jesús ze' ro' ba'. 4Karre nzha rop bixa' ro' ba', per galo laka xa' ze' mizhin ro' ba' lo Per. 5Orze' ndixni xa' le'n ba', une xa' nax nab tsa lar kwa'n ngurël Jesús ze', per nangayot xa' le'n ba'. 6No gax tich xa' re' mizhin Simón Per, no tuli nguio Per le'n ba', orze' une xa' nab tsa lar ze' nax, 7no nu une xa', lar kwa'n ngurël yek Jesús or miga'ch Me, naxtsai tu lad, chul laka nayë'che gax plo nax lar kwa'n ngurël Jesús. 8Orze' nu xa' kwa'n mizhin galo laka ze' nguio le'n ba'. Or une xa' rë kure', ngwayila xa'i. 9Ter nzobni' lo Yech che'n Dios, lë' Jesús naki'n ruban, per nagat zobyek bixa' kure'. 10Orze' ña rë men che'n Me ze' par lizh bixa'.
Ngurulo Jesús lo Mari Madalen
(Mr. 16:9-11)
11No lë' Mari mia'n ro' ba', kiyo'n xa'; no dub kiyo'n xa', ndixni xa' le'n ba', 12orze' une xa', chop ganj nak lar bëo laka; tu xa' nzob plo una yek Jesús, mbaino xtu xa' nzob plo una ni' Me. 13Lë'chi minabdi'zh rop ganj re' lo Mari, nzhab bixa':
―Una', ¿chon kiyo'nal?
Unkab Mari:
―Kiyona porke naneta cho ñanu kwerp che'p Señor da, no naneta plo ngwala' bixa'i.
14No laore milox midi'zh Mari kure', lë'chi miëk xa' al tich xa', no une xa', lë' Jesús nzo ze', per nangalibe't xa' chi Jesuze, 15orze' nzhab Jesús lo xa':
―Una', ¿chon kiyo'nal? ¿Cho kikwa'nal?
Per lë' Mari mile' xigab, xa' nikina rë ya nzhi'b ze' xa' re', kuze' nzhab Mari lo xa' re':
―Lë' go, chi go mbi'y kwerp che'n Señor da, bineu plo ngwala' goi, par yakane.
16Lë'chi nzhab Jesús:
―¡Mari!
Orze' miëk Mari, milibe' Mari Jesuze, no kun widi'zh hebreo midi'zh Mari:
―¡Rabuni! (widi'zh kwa'n gab Maestr).
17Orze' nzhab Jesús:
―Nazenta'l da, porke lë'da laore bi' plo nzho Xuza, per bizë no guzhe lo rë men da, lë'da bi' plo nzho Xuza, Me nak ska Xuz go; lo Dios da, Me nak ska Dios che'n go.
18Orze' ngwayab Mari Madalene lo más rë men che'n Jesús, nzhab xa', lë' xa' une Jesús, mbaino nzhab xa' rë kwa'n nzhab Jesús lo xa'.
Ngurulo Jesús lo rë men che'n Me
(Mt. 28:16-20; Mr. 16:14-18; Lc. 24:36-49)
19No mis zhë ze', or mizhël la lyuo, zhë galo laka che'n sman, nzhin rë men che'n Jesús le'n yo', naye nayao' ro'i por nizheb bixa' lo rë men Israel, xa' nak zhi'n. Lë'chi nguio Jesús ze' plo nzhin rë men che'n Me, no nguzo Me garol sao' plo nzhin bixa', no nzhab Me:
―¡Dios le' ya go wen!
20No or midi'zh Me kure', orze' milu' Me ya' Me plo nguzob rë klab ze', no ta' laxto' Me plo ndid xa' lans, orze' dox nizak laxto' rë men che'n Me or une bixa' Me. 21Kuze' xtu wëlt nzhab Jesús:
―¡Dios le' ya go wen! Mbaino nela mixë'l Xuza da, se'ska xëla go.
22Orze' milabi Me lo rë men che'n Me, no nzhab Me:
―Yo Sprit che'n Dios laxto' go, 23nes par or gab go, gat nzë'bxkitra' tu men, orze' Dios miche' la rë kwa'n nzë'b xki xa' re'; per rë xa' kwa'n gab go, nache't Dios kwa'n nzë'b xki xa', orze' sa' ka gake.
Une Max, walika nguruban Jesús
24Lë' Max nak tu xa' nzho xid dub tu dusen men che'n Jesús, no nu nzhab men lë xa': “Xa' kwach”, no gat nzot Max kun lë' bixa' or ngurulo Me lo bixa', 25kuze' nzhab bixa' lo Max:
―Lë'no une Señor che'n be.
Per unkab Max:
―Chi nanen plo ngwa klab ya' Me, no chi nakon bikwen ya'n ze', mbaino chi nayo ya'n plo ndid xa' lans, nayilatne.
26Or nded xon ngubizh, xtu wëlt migan rë men che'n Jesús le'n yo' ze', orze' nu Max nzho xid bixa', no naye nayao' ro' yo', orze' nguio Jesús ze', no nguzo Me garol sao' plo nzhin bixa', orze' nzhab Me lo bixa':
―¡Dios le' ya go wen!
27Tuli ka nzhab Jesús lo Max:
―Di'nu bikwen ya'l re', no biwi' ya'n; no di'nu ya'l ta' laxto'n re'. Nagaktra'l tu xa' nen par yilai, sino gok tu xa' ñila da.
28Mikab Max orze':
―¡Go nak Señor da, mbaino Dios da!
29Nzhab Jesús:
―Por unel rë kure', ngwayilal da. Per rë xa' ñila da ter gat ne xa' da, orze' nazhon nzha rë xa' re' kun Dios.
¿Por kwan mizob Juan kure' lo yech?
30Dilant lo rë men che'n Me, nayax ra' kwa'n nazhon mile' Jesús kwa'n gat zobni't lo yech re', 31per rë kwa'n nzobni' lo yech re', lë'i nzobni' par yila go, lë' Jesús nak Krist, Xga'n Dios; no por yila go Me, lë' go ban par dubta' kun Dios.
Currently Selected:
San Juan 20: zca
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.