Marik 1
1
TIN AD’UD’A YAM ZLA D’A DJIVID’A HI JESUS-D’A
(1.1-13)
Tchid’a wala hi Jean ma le suma batembina
(Gol Mat 3.1-12; Luc 3.1-18; Jn 1.19-28)
1Wana nad’u tinda hi Zla d’a Djivid’a yam Jesus Christ Alona Goroma. 2D’igi a b’ir kur mbaktumba hi ma djok vun Alona Isai-d’a na ala:
Alona mi dala:
Gola! An mba ni sun man ma sunda avorongû.
Ni mam ma mba mi min lovot mangina.
3Wani ni dela hi ma nga mi er ad’um hur fula ala:
Agi minigi lovota hi Ma didinid’a,
agi minigi lovot mam mba gureid’a d’ingêru na.
4Jean ma le suma batemba mi nde woi hur fula, nga mi tchi wala ala: Agi mbud’ugi hurugi yam tcho magid’a, agi lagi batemba. Hina wani, Alona mba mi vat hurum mbei yam tcho magid’a.
5Suma kur ambas sa Jude-d’a ki suma Jerusalem-ma pet a buzuk iza gevemu. Azi de tcho mazid’a woyo, tua ba mi lazi batemba kur alum ma Jurdê-na.
6Jean baru mam mba tchuka ni tumus djambala ki d’i’â djinda furumu, te mama nabureina kayuma mi. 7Nga mi tchi wala mi suma ala: Sama ad’eng mamba kal mandina nga mi djï blogonu. An tan ndak á grif kä á but ziyo atuguru mama d’i. 8An lagi batemba ni ki mbina, wani mamu, mba mi lagi batemba ni ki Muzuk ma bei tchod’a ba na.
Batemba hi Jesus-d’a ki kuk mamba
(Gol Mat 3.13—4.11; Luc 3.21-22; 4.1-13)
9Kur bur máma Jesus mi tcholï Nazarat kur ambas sa Galile-d’a, mi mba, Jean mi lum batemba kur alum ma Jurdê-na. 10Kid’a Jesus nga mi tup pei akulo aduk mbinid’a, atogo hina zak mi we akulod’a ti mal leyo, Muzu’â hAlonina mi surop kam kä d’igi gugud’a na. 11Ata yi máma dela ti tcholï akulo ti dala: Angî Goron ma an hurun vang heîna; tan ndi lan djivid’a heî kangû.
12Ata yi máma na wat, Muzu’â hAlonina mi im hur fulâ. 13Jesus mi le burâ dok fid’i hur fulâ, Seitan nga mi kugumu. Mi nga aduk azureina, malaikana a mba, a nga lum sunda mi.
JESUS MI TCHI WALA ADUK SUMA AVO GALILE
(1.14—9.50)
Jesus mi yi suma tchiuna fid’i
(Gol Mat 4.12-22; Luc 4.14-15; 5.1-11)
14Ata yima a ge Jean dangeina dana, Jesus mi mba kur ambas sa Galile-d’a, mi tchi wal Zla d’a Djivid’a hAlonid’a. 15Mi dala: Yina ndak wa, kayam Alona mi mba wa adigagi á te leu mamba yam andagad’a. Agi mbud’ugi hurugi yam tcho magid’a, agi hagi gagazid’a yam Zla d’a Djivid’a mi.
16Kid’a Jesus nga mi tit avun apo d’a Galile-d’id’a, mi we Simon azi ki wiyema Andre a nga tchuk abeina kä kur apod’a, kayam azi ni suma tchiuna. 17Jesus mi dazi ala: Agi mbeyegï ad’unu; an mba ni mbud’ugi suma tchiu suma. 18Atogo hina zak, azi ar abei mazina kä, a i ad’umu.
19Mi kal avok hina nde, mi we Jacques azi ki wiyema Jean Zebede groma. Azi nga kur alumba, a nga min ir abei mazina. 20Atogo hina zak mi yaziya. Azi ar abuzi Zebede ki suma a le sun nda beged’ina kur alumba, a i ad’umu.
Jesus mi dik muzuk ma tchona woi kur sana
(Gol Luc 4.31-37)
21Jesus azi ki mam suma hata a kal avo Kapernayum. Kur bur ma sabatna mi kal kur gong nga toka hi Juif-fîd’a, nga mi hat suma. 22Azi le atchap yam hat mamba, kayam nga mi had’azi kad’enga, wani nga d’igi suma hat gata na d’i.
23Ata yi máma, sama nga ki muzuk ma tchona kuruma, mi nde tam mbei kur gong mazi d’a toka. Mi er ad’um akulo mi dala: 24Jesus ma Nazarat-na, vama ndolong ki sed’emi ni me ge? Ang mba á bami woi zu? An wang tetet ala angî Ma bei tcho ma Alona sunungîna.
25Jesus mi ngobom ala: Ang ba! Ang nde woi kurumu. 26Muzuk ma tchona mi pred’em daraweî, mi er ad’um akulo, mi nde woi kurumu.
27Suma pet a le atchap, a nde djop tazi ala: Ni me na ge? Hat ndata ni hat ta awili zu? Kayam me sa máma nga mi he vuna mi muzuk ma tchona pî, mi ge yam kä ad’umu. 28Atogo hina zak, zlam mbi nde yina pet yam andaga d’a Galile-d’a.
Jesus mi sut suma tugud’eid’a ablaud’a
(Gol Mat 8.14-17; Luc 4.38-41)
29Kid’a Jesus azi ki Jacques ki Jean a buzuk kei kur gong nga toka hi Juif-fîd’a, azi kal avo hi Simon azi ki Andre. 30Simon akunomba ti nga burâ kä, tat nga d’i kumurud’u. Atogo hina zak, azi de Jesus kad’u. 31Mi hut gevet go, mi vat abod’u, mi tcholot akulo. Ata yi máma, tat ta kumura ti arad’u, nga d’i lazi sunda.
32Fladege d’a afata nik dad’a, suma a mba ki suma tugud’eid’a pet zlapa ki suma a nga ki muzuk ma tchona teteng kuruzina mi Jesus. 33Suma kur azì mámina pet a togï avun gonga. 34Mi sut ablau suma kur andjaf tugud’ei mazi d’a teteng nga nga d’i lazi ndakid’a, mi dik muzuk ma tchona woi ablaud’a kur suma mi. Mi ar nga muzuk ma teteng ma tchona a de zlad’a d’i, kayam me mi wum tetet.
Jesus mi tit kur ambas sa Galile-d’a
(Gol Luc 4.42-44)
35Ki pipir ra yina nga bei fod’a tua d’a, Jesus mi tchol ndabua, mi i abagei ata yima sa nga kua d’uo na. Ata yi máma, nga mi tchen Alona. 36Simon azi ki ndroma a nga halamu. 37A fum a dum ala: Suma pet a nga halangû.
38Mi hulong dazi ala: Ei i ata yima dingâ kur azì ma gurei ma gogona. Djivid’a an tchi wala sä kua mi. Ni kayam ndata ba, an mba kur duniyad’a. 39Mi kal kur ambas sa Galile-d’a pet, nga mi tchi wala kur gongîyo mazi suma toka, nga mi dik muzuk ma teteng ma tchona woi kur suma mi.
Jesus mi sut sama libina
(Gol Mat 8.1-4; Luc 5.12-16)
40Sama libina mi mba gen Jesus, mi grif kä avoromu, mi tchenem ki labiyad’a, mi dum ala: Le ang mina ni, ang ndak á yagan ndeyo.
41Jesus hurum mi hat kamu, mi mat abomu, mi domu, mi dum ala: An mina, ar libi mangâ mi yak keyo. 42Atogo hina zak, libi mama mi yak keyo, tam mbut djivid’a mi. 43Ata yi máma Jesus mi hum vuna kad’enga, mi gum abua, 44mi dum ala: Ang gol tang djiviya! Ang de mi sa d’i, wani ang iya, ang simat tang mi ma ngat buzuna mAlona, ang he vama ngat buzu ma Moise mi he vuna kama yam yak manga á tagazi woi ala ang yak wa woi da’. 45Wani mi ndabua, mi nde tchi wal zla ndata woi avogovok gak Jesus mi fe nga lovota á kal kur azì máma pid’ak ki, wani mi nga nabageya. Suma a tcholï ata yina pet a mba gevemu.
Currently Selected:
Marik 1: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.