Joel 1
1
ADESÂ HI DJERINA
(1.1—2.17)
1Wana ni zla d’a Ma didina mi dat mi Joel Petuwel goromid’a:
Mbad’a hahle suma b’lak ahlena ki baktarad’a
2Agi suma nglona,
agi humugi zla d’a wanda.
Agi suma nga kaka kur ambasina,
agi tinigi humugiya.
Vama hina na mi le kur atchogoi magid’a
d’oze mi le kur atchogoid’a habuyogid’a zu?
3Agi dagizi woi mi grogina,
ar grogina a dazi woi mi grozina,
grozina a dazi woi mi suma
kur atchogoi d’a sä avokina mi.
4Vama dodob’odjod’a ti arama,
djera mba d’i tumu;
vama djera ti arama,
teb’rezena mba mi tumu;
vama teb’rezena mi arama,
djer galagana mba mi tum mi.
5Agi suma gurud’ugi ki sümina,
agi zlid’igi akulo, agi tchigiya.
Agi suma tche süm guguzlud’a heîna pet,
agi tchigi tchi ma hohoud’a,
kayam a kagi wa süm guguzlud’a avunagiya.
6Ades ahle suma b’lak ahlena
a mba wa kur ambas manda.
A ni suma ad’engâ,
ablawazi ndak á ndumba d’i.
Siyazi ni d’igi sï azlona na,
agingâzi ni d’igi aging azlo d’a modod’a na mi.
7A b’lak guguzlu manda,
a kragan tulum mana woi grib’ing,
a tum huyogom mbei pet,
abozi mi mbut hapa mi.
8Agi tchigi tchi ma hohoud’a
d’igi gor weid’a ti tchuk dodora atat
á tchi mad’a ndjuvut ma d’umba na.
9A mbeï nga ki he d’a hawa d’a afuta
ki he d’a hawa d’a süm guguzlud’a
kur gong nga kud’ora hi Ma didinid’a d’i.
Ni kayam ndata ba, suma ngat buzu suma
a nga le sunda mi Ma didinina
a nga tchiya.
10A b’lak asinena woyo,
andagad’a ti mbut hohoud’a,
kayam a b’lak gemena woyo,
süm guguzlu d’a awilid’a ad’ut ti kä,
mbulâ mi sid’am mi.
11Suma zuma a mbut hohoud’a,
suma zum guguzlud’a a nga yor tazi
yam gemena kawu orsâ,
kayam vama dut nga d’uo d’a.
12Guguzlud’a ti lugod’a,
tulumeina a yak keyo,
grenatna kamulongeîna kagu poma,
kagu ma kur asinena pet mi so woyo.
Furîd’a ti dap pei aduk suma.
D’el tad’a bei te tena á tchen Ma didina
13Agi suma ngat buzuna,
agi tchugugi dodora atagiya,
agi yorogi tagiya.
Agi suma lagi sunda ata yima ngal ahle suma ngat buzunina,
agi tchigiya.
Agi suma lagi sunda mAlo manina,
agi tchugugi dodora atagiya,
agi mbeï burugi kä andjege.
Kayam a nga mba ki he d’a hawa d’a afuta
ki he d’a hawa d’a süm guguzlud’a
kur gong nga kud’ora hAlo maginid’a d’uo d’a.
14Agi tchagi wala yam d’el tad’a bei te tena,
agi togogi tok ka a tinit irat vata,
agi togogi suma nglona ki suma kur ambasina pet
kur gong nga kud’ora hi Ma didina Alo maginid’a,
agi tchenem tchen nda hud’a mi.
Burâ hi Ma didinina
15Alë! Ni bur ma me na ge?
Kayam burâ hi Ma didinina mi ar wa go,
nga mi djï d’igi b’lak ka tcholï
ata Ma ad’engêm kal petnid’a na.
16A yo wa tena woi ireya,
furîd’a ki hur ma hapma a dap wa woi
kur gong nga kud’ora hAlo meinid’a mi.
17Andjaf awuna mi so wa woi bei deîd’a,
avureina va nga kuruzi d’i,
yima ngom ahlena mi b’lak keyo,
kayam gemena mi dap peyo.
18Ahle suma abageina a nga zam tazi ngola,
d’uwar ma nglona nga mi tcha tata
kayam yima te hatna mi nga d’i,
d’uwar ma gureina pî nga mi fe ndaka mi.
Tchenda hi ma djok vunid’a
19Ma didina, an nga ni tchi kangû,
kayam akud’a ti ngal wa
yima te hat ma hur fulîna woyo,
sin akud’a ti ngal wa
agu ma hur asinenina woi pet mi.
20Ahle suma abageina a nga tchi kangû,
kayam mbiyo ma laud’a mi so wa woyo,
akud’a ti ngal wa yima te hat ma hur fulîna woi mi.
Currently Selected:
Joel 1: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.