HEBREOS 1
1
Dios ha hablado por medio de su Hijo
1Mi jinguã Mizhocjimi o 'ñünbü o̱ mü'bü c'o profeta o zopjüji c'o Ãn mboxpalegöji, o xipjiji ja ga cja Mizhocjimi. Na puncjü c'ua ja va zopjüji, pero dya be xipjiji texe. 2Pero nudya yo cjë yo ya ni ma ra nguins'i nu xoñijõmü, Mizhocjimi o ndäjä c'ü nu T'i o ẽjẽ cja ne xoñijõmü. Nguec'ua sö rá pãrãgöji dya na jo, ja ga cja Mizhocjimi. Ngue c'ü nu T'i Mizhocjimi c'ü o dyät'ä ne jens'e 'ñe ne xoñijõmü, c'ua ja nzi va xipji c'ü nu Tata. Y je ngueje c'ü nu T'i, c'ü ya 'ñeme Mizhocjimi c'ü ra tsjapü o̱ cjaja texe yo. 3Me na nojo Mizhocjimi 'ñe me na jo. Nguec'ua je ga jñu's'ü ga cjanu c'ü nu T'i. Texe c'ua ja ga cja Mizhocjimi, je ixca cjatjonu c'ü nu T'i. C'ü nu T'i me na zëzhi c'ü; sido ra bübütjo ne jens'e 'ñe ne xoñijõmü hasta 'ma cja ra mama angueze c'ü dya cja ra bübü yo. Angueze o 'ñe ndÅ© va ngõtcüji Ãn nzhunc'öji. Pero o tetjo o bübütjo na yeje, cja nu o ma mimi cja o̱ jodyë Mizhocjimi c'ü manda a jens'e.
El Hijo de Dios es superior a los ángeles
4Mizhocjimi ya unü c'ü xenda pjëzhi na nojo c'ü o̱ T'i, que na ngueje c'o o̱ anxe Mizhocjimi c'o ixi cãrã a jens'e. C'ü rgá pãrãgöji c'ü xenda na nojo c'ü, ngue c'o jña c'o o mama Mizhocjimi. 5O xipji a cjava c'ü nu T'i:
Ixi ngue'tsc'e Ãn Ch'itsc'ö. Ne pa dya, ró jizhi que nu'tsc'e Ãn Ch'itsc'ö, eñe Mizhocjimi.
Pero c'o o̱ anxe c'o ixi cãrã a jens'e, nunca go xipji a cjanu Mizhocjimi c'o. Mizhocjimi xo mama:
Nutscö rá jizhigö c'ü ngue o̱ Tatazügö;
y angueze ngue Ãn Ch'igö c'ü, eñe Mizhocjimi.
Dya ngue c'o anxe c'o mi sjipji ngue nu T'i Mizhocjimi. 6'Ma o tsja Mizhocjimi o xipji c'ü nu T'i o ẽjẽ cja ne xoñijõmü, o mama Mizhocjimi va xipji c'o o̱ anxe:
Nu'tsc'eji, rà ndüñijõmüji a jmi Ãn Ch'igö rà ma'tc'eji i̱ṉ texeji, eñe Mizhocjimi.
7Je ga cjava ga nädä Mizhocjimi c'o o̱ anxe:
Yo Ãn anxe yo cjacö jmandago, bübü 'ma rà cjapcö ra jñetse nza cja o sivi 'ma pëpcö yo.
O 'ma jiyö, nza cja o ndajma, eñe Mizhocjimi.
8Pero o xipji a cjava c'ü nu T'i:
Nu'tsc'e Mizhocjimi, nunca ra nguarü rgui tsjague Jmu. Me na jo rgui mandague.
9Nu'tsc'e me i̱ ñegue i̱ tsjague c'o na jo. Nunca i̱ tsjague c'o na s'o, na ngue dya i̱ ñegue.
Nguec'ua rvá da'c'ö c'ü me na notsc'e. Nguec'ua in dyocjeji mäjä c'o, pero nu'tsc'e xenda i̱ṉ mäcje.
10Mizhocjimi xo xipji a cjava c'ü nu T'i:
Nu'tsc'e i̱ṉ Jmugue, i̱ dyät'ä ne jens'e 'ñe ne xoñijõmü ndeze mi jinguã. I̱ dyät'ä co in dyëtsjëgue yo.
11Nujyo, ra zädä 'ma ra chjorü yo; nu'tsc'e rà sido rà büntcje.
Nujyo, ra tjeze nza cja 'naja zëbitu yo.
12'Na bitu c'ü ya zëbitu, ra mbägäji cja rrũ jyeji 'na nuevo bitu.
Je xo rga cjanu rà chjotügue ne jens'e 'ñe ne xoñijõmü, cja rrĩ cambiague c'ua c'ü ri nuevo yo.
Nu'tsc'e nunca rà cambiague. Y rà sido rà bünc'e, eñe Mizhocjimi va xipji c'ü nu T'i.
13Mizhocjimi xo xipji c'ü nu T'i:
Mimigue cja Ãn jodyëgö.
Rà da'c'ü rà mandague hasta 'ma cja rà chõpü yo nuc'ü na ü'ü, eñe Mizhocjimi.
Pero c'o o̱ anxe Mizhocjimi, nunca go xiji c'ü ro manda a cjanu c'o. 14Anguezeji mbëpjitjoji cja Mizhocjimi. Nguec'ua ga xipji Mizhocjimi anguezeji ra ẽji, ra 'ñe mböxcöji rà texeji nutscöji ya ni ma ga jocüzü Ãn mü'büji e Jesucristo.
Currently Selected:
HEBREOS 1: mazDBL
Highlight
Share
Copy
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.