Yoohanee 5
5
Yisufa farumma afainni faiqí moo andeeqaisoo ufafa.
1Yisufa Kariree maqamaaqai kaqikaaqoo marinoo doo miqooqari findimaqeenoo Yuda maqannaasa amaanara qoomaqirafa firaafa kambiqaaninnanara qufanoo Yisufa irisee minni ooru finau. 2Yeerusaree maqusa faandaamura kooqi sipsipa kooqi fee qimarufa marinau. Mi kooqina aaqa nammari farumma firaafa marinau. Mi farummana afainni aana fiqu imarunnai qaindaira moodaanai qisauku qaindaira marinau. Mi farummana auqu Beetasata farummee qimariqau. 3Mi qaindairana ameemaanai auqaanai aurirana oosana oosana maree marusa misa mina ameemaanai ooqumari maree mi farummana afaiqara fiqummambi mariqau. [ 4Karaambaiqa qangiroo moo fannoo inaarunaindari narí kai iriseenoo moodaa kari moodaa kari aqufufanoo mi nammarina auqeesoofanoo indaaru mi nammarinaki keeqoofa mifa keeqafufanoo narí aurirana taikasee fimarinau. Miqi marunara misa aurimarusa moomoosa Beetasata nammari afainni rakisida mariqau.] 5Faiqí moo kisaaqasaa aurimarufa misaki marinau. Moo fasiqa aiku asauku taikasee moo fasiqa asaukuqara taikasee dinni aiku taikasee dinni oonu qaaramoo marasee (38) aukuana dinee uqee marufa marinau. 6Yisufa mi fasiqana qafoofanoo maqasaa faiqaqee ufanoo Oo kisaaqasaa aurimari fee qimaseenoo mi fasiqana maaqi qimasee irammirinau. Anee findifirara aididanoo fee.
7Mi dinee fasiqafa mina iriseenoo maaqi qimasee qimaminau. Oo rakisirafa, Anutuna qangiroo maa nammarina auqamasaifaqa yafee qini mareeqee minaki quqaannoo fee qinee anuqi marunaqa moo fannoo kai kaqi kaqi aqufida taikasaida fidaqa.
8Yisufa mina iriseenoo quandaki qimaminoo qinau. Doo findi finana aneenna qaari raqandaamamareena doo fua. 9Doo mi fasiqafa aaqee uqanna doo mikari kai doo findi finoo narí qaari maramaree finau. Mi faasaanna Yisufa andeeqasoo faasaana Yuda maqannaasa Saririqa misa amaana faasaana marinau.
10Yuda maqannaasa uriqararausa mi fasiqana aurimaruna qafamasee aqiqa qiqau. Maana amaana faasaana maridanoo maasa sandufa rukieenana aneenna qaari aakai maqeenana nanaree sandufa rukiaidanee.
11Mi fasiqafa qinau, qini andeeqaqisaifa aneenna qaari raqandaamamaree fuannee qifaqa qeeqa qaari daakai maqa maree fidaqa.
12-13Misa mina iriseeqa irammiriqau. Yafee aniara aneenna qaari raqandaainana fuannee qifanee mi fasiqafa sia Yisuna auqu irinau. Faiqí anaasee moomoo marufanoo misaki kukeeqafufanoo mi fasiqafa sia amiqimasee qafanau.
14Kasooqaqee marikinoo amaana maqaki mi fasiqana paqurimandee Yisufa maaqi qimaseenoo qimaminau. Doo fee maqee qafeenee Doo findifuananoo doo maqee aneenna mandainaina minnimasaa. Sia miqinanoo kafaa mandainaina firaafa uqanna anisaa aqufuannoo.
15Mi fasiqafa mina iriseenoo oonuree Yuda maqannaa rakisirausa paqurimaseenoo qimanniminoo qinau. Yisufa kai qini amiqi mandaifaqa findi fiqa. 16Rakisirausa mina iriseeqa doo miqooqari Yisuna arira ufa qimariqau. Yuda maqannaa amaana faasaana andeeqaisoonara arirariqau. 17Yisufa mina iriseenoo rakisirausa maaqi qimasee qimanniminau. Qini qikoofa sia moo faasaana minnisaidanoo aiqama faasaana ainainidanoo. Qinee faqa miqikaimmianauranoo.
18Yuda maqannaasa mi ufana iriseeqa doo kuqa ariraree qiqau. Misa Yisunara amaana faasaana sandufa rukiasaifaqee qimariqau. Sia minara kai mifa Anutunara narí akoo fee qunara minara faqa arirari mariqau. Mifa Anutunara qini qikoo fee qunara misa nanaree maqasaa fasiqa fannoo unna qidana Anutuna amanakai maridee qidanee qimasee arirariqau.
Anutufa narí amaaku Yisuna aiqama ainaina afeeka amu ufafa.
19Yisufa kafaa qimanniminau. Qinee kuqaa anoona ufa inni qimannimidaqa. Qinee sia moo ainaina qeeqaraa auqaidaqa qeeqa qikoona qafamasee mifa indeekai idaqa. Akoofa moo ainaina auqaifanoo amaaku miqikaimmidanoo. 20Qini qikoofa narí amaaku qiniara kaaqa amuqusifanoo minara qiniara ridanoo narí aiqama ainaina auqaina qini faqa kai uqaqifiqaidanoo. Maqee maa fasiqafa firaa teeroo maraidanoo aukuana aukuana apatara aupuree marifanoo qini qikoofa dadaaqifaqa andeeqasauna innee mina qafee fee. Kasooqaqee qini qikoofa firaa ainaina dadaaqinaqa auqaanaqa qafee tautifanoo naaquqeenoo nimudaani faqa kai qumooqukamasaannoo. 21Qini qikoofa kuqira fasiqauqa findifumannisaidanoo. Qinee faqa miqikai iqa qeeqa didiranannoo kai kaqi marirana akaqausa nimianaura. 22Qini qikoofa sia maa maqanasaaqaraasa mandufa irisee andeeqannisaannoo. Narí amaaku qini qimiqaifaqa qeeqa qikoona Anutuna iriramau misa manda ufa andeeqannisaanaura. 23Aiqamausa qini qikoona Anutunara naaquqaanifeera miqinau. Qiniara naaquqaindee kai iqa qini qikoonara naaquqaanifeera miqinau. Faiqí moo fannoo moona amaaku sia mina aqoondikinafa mina akoona faqa miqikai inana miqanda qisakoosa sia niqoondikinnaranoo.
24Yisufa Yuda maqannaa rakisirausa kaqi qimannimidanoo qinau. Qinee kuqaa anoona ufa inni qimannimidaqa faiqí moo fannoo qini ufa irisee qini diqiqamaqoona saqarikinafa mifa doo naaru mariranaki maridanoo. Miqinna fasiqafa sia Anutuna arirufaki mariannoo. Anutuna narirana doo maa maqee aiqaaqareenoo kaqi mariranaki doo keeqanoo maridanoo. 25Qinee anoona ufa inni qimannimidaqa. Moo aukuana doo adeedi ranoo marida doo animaridanoo maa maqanasaa kaqi maridaqa Anutuna nariranaki mariusa kuqufusa Anutuna amaaku qinaqa iriseeqa doo narirafa ainaaqarainaqa kaqi mariranaki keeqeefaranoo. 26Kaqi marira oosana qini qikoonaki kai marifanoo faiqí anaasee nimidanoo. Miqikai inoo naramaaku qini faqa kai kaqi marira nimira oosana doo qini qimiqaisa maridaqa. 27Mifa Anutufa narí amaakuara faiqí nimaaku fee qimasee faiqí anaasee mandainaina andeeqannisarana narí amaaku qinisaa quqaqaisa maridaqa. 28Innee qini mi ufana irisee sia tautiaqa. Kasooqaqee moo aukuana anirainaqa aiqama madikaki kuqirausa mariasa misa faqa Anutuna amaaku qini ufa iriseeqa madikakiqari findi fifaranoo. 29Akaqausa andeeqara oosana maree marusa findifi kaqi mariranaki fifaranoo. Akaqausa manda oosana maree mariusa misa findi fiqa Anutuna ufa firaanaki aqufifaranoo.
Yisuna oosana akooroou ufafa.
30Yisufa kaqi qimannimidanoo qinau. Sia qeeqaraa moo ainainianaura. Anutufa dadaaqinaqa faiqí anaasee ufa irisee andeeqannisaanaura. Sia qeeqa iriranamau afeekaikamandee fidaqa. Qini qikoofa qini diqiqamaqaimau kai fidaqa.
31Qinee qeeqaraa ufa qimannimianaqa siamma irifaranoo narikai qidaqinoo unna qidaqiifoo qifaranoo. 32-33Anutufa qini dadaaqimarifa maridanoo mifa anoona ufa kai qiniara qimarifa maridanoo, sia qeeqa kai qianaura mifa dadaaqiannoo. Innee Yuda maqannaa rakisirausa ufa anoona iriannee qimasee faiqí niqiqaifaqa Yoohaneefa nammari nimimarifunnai ooquree iriqau. 34Qinee sia maqasaa fasiqa moo qini dadaaqiranara randaidaqa Yoohaneenara qidaqa. Innee naaru mariranaki fuaqee qimasee maa ufana qimannimidaqa. 35Yoohaneefa nammari nimimarifa qoomara fooqaana marinoo kaaqa qaidanoo rupannoo inau. Innee mina kaaqa qaranaki qusasaa kai keeqafiqa asasida mariqau. 36Yoohaneefa nammari nimimaruna ufa anoona maru fanoo qinindi minaindi arusee uriqaranoo maridanoo. Qinee aniree faiqí sia amana auquaqaa ira ainaina qini qikoofa qimuna auqaqa fimarunna ainainna fannoo qini duqu firaaqoo uqeeraannoo. Uqeerainaqa qafamasee qiniara Anutufinaindari qumu fee qifaranoo. 37Sia qinee auqee marunafa kai qini duqu uqeeraidanoo. Qini qikoofa qini diqiqamaqaifa mifa faqa qiniara ufa qidanoo dadaaqidanoo. Innee Yuda maqannaa uriqararausa ooqaindari sia mina ufa irimariafanoo. Innee sia mina afiri qafaanara sia uqanna mina iriranamau firanara irimariafanoo. 38Innee qini qikoofa diqiqoonara sia mina irimariafanoo minara inniki sia mina ufa maridanoo. 39Innee Mooseena sandufa faqa Anutuna tamummaqara fasiqauqa akarakinaa ufa asaana ridaqa naaru marira aanara randaidaqa mi sandufafa kai qiniara qimannimimarifaqa sia irimariafanoo. 40Innee minara iridaqa sia qinee unnannai aniree naaru marirana maree mariafanoo.
41Yisufa Yuda maqannaa rakisirausa kaqi qimannimidanoo qinau. Qinee sia inni naanna raida faiqí qimooqiaqee qirainainara randaidaqa. 42Qinee inni irirana amiqimasee iridaqa niqafauna inni naundura nimuqusaki Anutunara rirafa sia maridanoo 43Qini qikoofa Anutufa qini diqiqoofaqa qumu marunaqa sia innee qiniara irisee asasamasee qifiqee animariafanoo. Moo fannoo kasooqaqee narí manda aidiranafaqaafa anirainaqa innee mina asasamasee oonu afiqee anifaranoo. 44Innee kaaqa naramooqirana naramooqiranara ridaqa Anutuna amooqiranara sia rimariafanoo. 45Innee qiniaree quandafinoo Anutufinnai maasa darira ufa qiannoofee fee qidee sia qianaura. Mooseefa mifa kai inniara nimaarusirufa qiannoo. Innee maasa minasaa kai mundimariasee qimariafanoo. 46Innee Mooseena sandufa fifau asaana rimariafanoo mina ufa iridaqau qiniara irini, qiniara akara rumaqoofa maridanoo. 47Innee mina ufa ririmma sia irimariafanoo naqimasee qini ufa irifaree. Sia amana irifaranoo.
Currently Selected:
Yoohanee 5: bjr
Highlight
Share
Copy
Want to have your highlights saved across all your devices? Sign up or sign in
© 2017 Wycliffe Bible Translators, Inc. All rights reserved.