Wlɔ 9
9
Laagɔ 'la 'lɔlʋa ɔ sla 'lɛ de na
1Wɔlɩa n cɩ 'kanɩ 'lɛ nyɩtɛ na, ɩ ‑glɩ ‑nʋawlɛ. Klisi 'la 'ŋlɩa nɩkplaan, 'n zʋ 'ta yodi. 'Nyɩ ‑Kplɔkplɔ ‑Wugoa* li 'na wɔɔgugwiea 'la ‑danʋfʋɛ. 2Ɩmɩ ‑ɩ ‑glɩ 'lɛ lebhe cɩɩnkalɔa ‑ʋ ‑kʋ 'na pɔlɛa 'ciin na, ʋ 'ghli 'nyɩ 'na sɛsʋa 'ta bhɩada ‑ka. 3‑Ghɛɛ, n ‑waa lebhe ‑munzue bho ‑amʋ 'titi ɩya n ‑ya Klisi ‑sasalɩ cɩ, n bholiecɩa n ‑ya maasɔ 'wlʋlʋ 'lɛ 'lɔlʋa bhlogbɩɩ nɩkplaan na mala gbʋ. 4Ma ‑glɩ Izlayɛlɩnya*. Laagɔ ya maa ɔla 'cuo ple, ɔ ya maa ɔla 'klʋagbaa pala, ɔya maasɔ ya mɛnɩ, ɔ ya maa ‑jlɩmaa 'nyɩ, ɔ ya maa gʋgwlasa pala, 'nyɩ ɔ ya 'lɛ ‑ndanyɩ ta ɔ ya 'lɛ maa 'nyɩ. 5Maa ‑ɔ ‑glɩ 'lɛ Laagɔ 'la 'lɔlʋa tocɩa 'la valɩnɩkpla, 'nyɩ 'nyɛkɛa 'la 'sasʋʋn, maa nɩkplaan Klisi 'wlʋlʋ 'lɛ, ɔmɔa ‑ɔ ‑glɩ 'lɛ Laagɔ, ‑ɔ ‑zilo 'lɛ ‑tɛtɛa 'fɩan 'kʋ, 'nyɩ ‑ɔ ‑palɩɔ 'lɛ 'nyu 'lʋkʋlʋkʋ ɩya 'lʋkʋlʋkʋ na. Ɩ kʋ sɛɛ!
6‑N 'ta le ka Laagɔ 'la niwɔlɩa 'ta 'lɛ 'kʋglalɩ. ‑Masa maa ‑ɔ 'wlʋlʋ 'lɛ Izlayɛlɩ nɩkplaan na, ‑n 'ta maa 'fɩan ‑ɔ 'ta 'lɛ Izlayɛlɩ 'la cuoa ‑glɩ. 7'Nyɩ Ablaamʋ 'la valɩnɩkpla, ‑n 'ta maa 'fɩan ‑ɔ 'ta 'lɛ ɔla 'cuo 'titi ‑glɩ. ‑Masa, ka Laagɔ 'claa 'lɛ Ablaamʋ lebhe: «Izakɩ 'la valɩnɩkpla, ama ma ‑cɩ ka 'lɛ ‑naa 'cuo la.» 8Ɩ sa ‑zɔn lebhe: ‑N 'ta 'nyɛkɛa 'la 'cuoa ‑ɔ 'ta 'lɛ Laagɔ 'la 'cuoa ‑glɩ, ‑ma ɔla ‑ndanyɩa ɔ ta 'lɛ na, ɩla 'cuoa ‑tɛɛ ma la 'lɛ ɔla valɩnɩkpla. 9'Nyɩ 'lɩka ‑ndanyɩa 'la wɔɔnyɩtʋa. Ʋ cla lebhe: «Lioa ‑ʋ ci 'lɛ 'yɛpɩ na, clɩɩ ‑naa ‑ka 'kʋcɩlɩ na, n cɩ 'ka ‑awlɛ ci ɩya Salaa 'ka ŋodico wlɩɩn kalɩ»
10'Nyɩ ‑n 'ta ɩmɩ ‑naa ‑tɛɛ. ‑Ma Ghlebeka 'nɩa ‑ma ‑kʋ. ‑A tokadɔ Izakɩ ‑glɩ 'lɛ ɔla daplɩcuoa ma to. 11‑Ma, 'cuoa 'ta ka kaa ‑valɩɔ ɩya ma ka 'nanɩ ‑aana nyinyi nʋ. Na, ɩmɩa Laagɔ bhɔsʋa 'lɛ na, ɩ 'ka 'lɛ 'kʋglalɩ, saa ɔ ‑wa 'lɛ na, 12‑ofi lebhe ‑n 'ta nʋnʋgbɩa ɔ kope 'ta 'lɛ 'ciin, ‑ma ɔmɔ ‑ɔ la 'lɛ na, ɔ ya gba 'nyɩ ma ya Ghlebeka 'cla lebhe: ‑Lɩɩ kpasaa, ɔmɔ ‑ɔ ‑cɩ 'ka leencoa lobho. 13Sa ɩ ‑zieo lebhe: N ya Zakɔpʋ 'ma, 'nyɩ n ya Esayuu 'kwlaan 'pa.
14Na, wɔɔsaa ‑a nabhe ‑a kaa 'lɛ nyɩtɛ bha? Ka Laagɔ 'ta 'lɛ 'kʋnylugolunyɔ ‑glɩ bha? ‑Wɔɔ, ‑n 'ta sɛɛ! 15‑Masa ɔ ya Moyizi 'cla lebhe:
Ɔmɔa n ‑wa 'lɛ lebhe n cɩ ŋaazɩɩn 'lɩ na,
n cɩɔ ŋaazɩɩn 'lɩ,
'nyɩ ɔmɔa n ‑wa 'lɛ lebhe n cɩ 'nanɩ nʋ na,
n cɩɔ 'nanɩ nʋ.
16Na, ɩ 'ta saa nclɔɔ ‑wa 'lɛ na, ‑aana ɔla 'sɩslɩlɩɛ 'la wɔlɩ ‑glɩ, ‑ma Laagɔ 'la ŋaazɩɩnlɩlɩɛa 'la wɔlɩ ɩ ‑glɩ 'lɛ. 17‑Sa Zieziewɔlɩa* nɩkplaan, Laagɔ 'cla 'lɛ Ejibhitibhlɩa 'la ‑kwletoa lebhe: «‑Gblɩgblɩsa n ‑too 'lɛ 'kʋ le n 'kɔɔ 'kʋ 'tɔlʋ ɩya n 'ka 'na 'tɛtɩa pala ɩya n 'ka gba ‑laagɔzɔn bhuoa 'ka 'na 'ŋlɩ cibhlili.» 18'Lɩka ‑sa, ɔmɔa ɔ ‑wa 'lɛ lebhe ɔ 'ka ŋaazɩɩn 'lɩ na, ɔ lɩɔ 'lɛ ŋaazɩɩn, 'nyɩ ɔmɔa ɔ ‑wa 'lɛ lebhe ɔ 'ka ɔla pɔlɛa 'tɛbhalɩ na, ɔ 'tɛbhalɩɛ 'lɛ.
Laagɔ -kalɩ ‑tɛtɛa 'fɩan ‑jioli 'kʋ
19‑Ma ‑n ‑cɩ kaan 'cla lebhe: «‑Masa, nclɔɔ bhlogbɩɩ cɩ 'ta 'lɛ ɩmɩa Laagɔ ‑wa 'lɛ na gbatlɩmʋnʋlɩɛ mino na, 'lɩsaa 'la gbʋ ɔ sanɩ ‑awlɛ 'lɛ ‑anyɩ 'bɩ bha?» 20Na, ‑mɔɔ nclɔɔ, 'lɩsaa ‑n ‑glɩa 'lɛ ɩya ‑n ya Laagɔ 'kaa 'lɛ wɔlɩ 'tɩtɔ bha? Mamɛnyide cɩ ala nʋnyɔa 'cla lebhe: «'Lɩsaa 'la gbʋ ‑n yaan 'lɛ ‑sa nʋ bha?» 21Mamɛmanyɔa, ‑n 'ta ɔmɔ ‑ɔ 'ta 'lɛ ɔla mamɛa ɛ to ‑glɩ bha? Na, ɔ cɩ 'ta mamɛa bhlogbɩɩ 'ma, ɩya 'ka gbakabhadakɔ ɩya ‑dakɔa ‑ʋ 'ta 'lɛ gbʋ kalɩ na ma bha?
22Na, Laagɔ ya wabha lebhe ɔ 'ka ɔla dɔgbɛa pala, ɩya ɔ 'ka gba ɩya ma 'ka ɔla 'tɛtɩa cibhlili. Na, ‑dakwɩa ɔ cɩ 'kaa 'lɛ dɔgbɛ 'kʋ 'manɩ, 'nyɩ ‑ɩ ‑nʋɔ 'lɛ le ‑ɩ ka mlɔ na, ɔ ya ɩla gbʋ, pɔlɛ kla ‑gbɔɔn 23le ɔ 'ka gba ɩya ma 'ka ɔla 'klʋagbaa ɔ pala ‑dakwɩa ɔ 'lɩ 'lɛ ŋaazɩɩn na, ala 'ghliloa cibhlili. ‑Dakwɩ ‑naa ɔ pʋ 'lɛ 'kʋklʋʋn 'nyɩ ɔ bhɔsʋa 'lɛ ɔla 'klʋagbaa 'la gbʋ na, 24‑anyɩa ɔ la 'lɛ na, ‑anyɩ ‑ɔ ‑glɩɩ 'lɛ. ‑N 'ta maa ɔ lalɩ 'lɛ Zifʋnyaa* sidiin na 'tɛɛ, ‑ma maa ɔ lalɩ ‑awlɛ 'lɛ maa ‑ɔ 'ta 'lɛ Zifʋnya ‑glɩ na sidiin na ‑masɛɛ.
25Wɔlɩ ‑naa, ɔ nyɩtɛ 'lɛ ɔla nekʋnyɩtɛnyɔ Ozee 'la ‑afluwaa nɩkplaan lebhe:
«'Lɔlʋa ‑anʋa ‑ʋ 'taa 'lɛ 'na 'lɔlʋ ‑glɩ na,
n cɩ 'kʋʋ 'na 'lɔlʋ la.
'Nyɩ ɔmɔa ‑ɔ 'taa 'lɛ 'na 'ŋlɔ ‑glɩ na,
n cɩ 'kɔɔ 'na ‑wawaŋlɔ la.
26 'Nyɩ daa ma 'clalɩa maa lebhe
ma 'ta 'na 'lɔlʋ ‑glɩ na,
ma cɩ 'ka maa ‑jaja Laagɔ 'la 'cuo la.»
27Izayii ‑ma, ɔ ya Izlayɛlɩnya* 'la gbʋ 'cla lebhe: «Ka Izlayɛlɩcuoa ‑ka ‑zu le ‑gezɔn 'la 'nyonu 'titio na, maa nɩkplaan 'la 'pɛpɛa ‑ɔ ‑cɩ ka 'lɛ -to na, ma ‑ɔ cɩ ‑ka 'lɛ gbʋʋnsalɩɛ 'lɩ. 28‑Ghɛɛ, ‑Kwlenyɔ cɩ 'ka ɔla niwɔlɩa ‑tɛtɛa 'kʋglalɩ ‑dʋdʋa 'kʋ, 'nyɩ ɔ cɩ 'ta didleli.» 29Izayii ‑sakasaka ‑ɔ 'claa ‑awlɛ 'lɛ lebhe:
«Tavʋkandia 'la ‑Kwlenyɔa 'taa ‑anyɩ valɩnɩkplaa tea na,
Sodɔmʋ ɩya Gomɔlʋdia 'bhisa 'kʋ ‑ala gbɩa cɩ 'kaa 'lɛ kʋ.»
Pɔɔtɛtɛ ‑ɛ ple 'lɛ nclɔɔ 'kʋnylogolunyɔ
30Na, wɔɔsaa ‑a nabhe ‑a kaa 'lɛ nyɩtɛ bha? Ka ‑a nabhe ‑a ka 'lɛ 'cla lebhe ncɛlɩa ‑ɔ 'ta 'lɛ Zifʋnya* ‑glɩ, 'nyɩ ‑ɔ 'matɩ 'taa 'lɛ 'kʋnylugolulɩɛ na, ma yɩɩ 'lɩ. 'Kʋnylugolulɩɛa ‑ɩ 'wlʋlʋ 'lɛ pɔɔtɛtɛ nɩkplaan na, ɩla wɔlɩa ‑a nyɩtɛ 'lɛ. 31‑Ma Izlayɛlɩnyaa* ‑ɔ 'matɩa 'lɛ ‑jlɩmaa ‑a -cɩ kaa 'lɛ maa 'kʋnylugolunya ple na, ma ya ɩmɩa ma 'matɩlɩa 'lɛ ‑jlɩmaa nɩkplaan na 'sɛpɛlɩ. 32'Lɩsaa 'la gbʋ bha? ‑Ofi lebhe ma 'ta 'kʋnylugolulɩɛ ‑naa pɔɔtɛtɛ nɩkplaan 'matɩlɩ. Ma yaa gugu lebhe mala nʋnʋgbɩa nɩkplaan ma cɩ 'ka 'mɩɩ 'lɛ 'lɩlɩ, 'nyɩ ma ya 'lɛ cokwiea ‑ɛ palɩ 'lɛ sa na gozo. 33‑Masa ɩ ‑zieo lebhe:
'Lɩka n zʋ Siyɔɔndua nɩkplaan cokwie ‑gluu,
‑ɛ ‑glɩ cokwiea ma gozo 'lɛ na,
cokwiea ‑ɛ gba 'lɛ 'nyɩ ncɛlɩ bhli 'lɛ na.
‑Ma ɔmɔa ‑ɔ ‑cɩ 'kɛɛ 'lɛ ɔla pɔɔtɛtɛa 'kʋ zʋ na,
'ɔ cɩ 'ta ‑zo 'lɩ.
Currently Selected:
Wlɔ 9: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.