Wlɔ 4
4
Ablaamʋ 'la pɔɔtɛtɛa 'la wɔlɩ
1Na, wɔɔsaa ‑a cɩa 'lɛ ‑a tokadɔ Ablaamʋ 'la gbazɔ nyɩtɛ bha? 'Lɩsaa ɔ 'lɩanɩa 'lɛ ɔla 'wluun bha? 2Ɩ ‑kaa ‑kʋ lebhe Ablaamʋ 'la nʋnʋgbɩa ‑ɩ ‑kɔɔ 'kʋnylugolunyɔ ple na, 'dɛndlana ɔ cɩ mino 'nyɩ ɔ cɩ gbɩɩnkpoli, ‑ma ‑n 'ta sɛɛ ɩ 'ta 'lɛ Laagɔ 'la gbazɔ ‑kʋ. 3‑Masa ka Zieziewɔlɩa* cla 'lɛ lebhe: Ablaamʋ ya ɔla pɔɔtɛtɛa Laagɔ 'kʋ zʋ, 'nyɩ Laagɔ yɔɔ 'lɛ 'ma le 'kʋnylugolunyɔ. 4Nclɔɔa ‑ɔ nʋ 'lɛ lobholi na, ɔla dluuplʋlɩɛa 'ta lʋʋa ma vɔɔ 'lɛ na ‑glɩ, ‑ma ɩ ‑glɩ ɔla dlua 'la ‑plʋlɩɛ. 5‑Ma ɔmɔa ‑ɔ nʋ 'ta 'lɛ lobholi, 'nyɩ -ɔ zʋ 'lɛ ɔla pɔɔtɛtɛa ɔmɔa ‑ɔ ple 'lɛ nyinyinʋnyɔ 'kʋnylugolunyɔ na 'kʋ na, ka Laagɔ 'mɔɔ 'lɛ le 'kʋnylugolunyɔ, ɔla pɔɔtɛtɛa 'la gbʋ. 6‑Anɩ ‑naa 'la gbʋ, dɛ Daviti bhlɩ 'lɛ nclɔɔa Laagɔ kope 'ta 'lɛ ɔla nʋnʋgbɩa 'ciin, 'nyɩ ɔ ma 'lɛ le 'kʋnylugolunyɔ na, 'la 'nanɩkʋlɩɛa 'la 'lʋa 'nyɩ ɔ cla 'lɛ lebhe:
7 Ma ‑kʋ 'nanɩ,
maa mala ‑ngasitʋlɩɛa ya 'lɛ ‑vɔɔ,
'nyɩ mala nyinyia 'la ‑tobhua ya 'lɛ 'wlu 'wlʋ na.
8 Ɔ ‑kʋ 'nanɩ,
nclɔɔa Laagɔ 'manɩ 'ta 'lɛ ɔla nyinyia 'kʋ na.
9Na, 'nanɩ ‑naa, maa ‑ɔ ‑dɩɔ 'lɛ 'kʋ na, ma 'nɩ ‑tɛɛ ɩ ‑glɩ 'lɛ bha, ‑ma ɩ ‑glɩmʋ maa ‑ɔ 'ta 'lɛ 'kʋdɩɔ na, ma 'nɩ bha? 'Nyɩ ka ‑a cla 'lɛ lebhe Laagɔ ya Ablaamʋ 'ma le 'kʋnylugolunyɔ ɔla pɔɔtɛtɛa 'la gbʋ. 10Na, 'nsasa ɩ 'plɩplɩlɩa 'lɛ bha? Daa ɔ ‑dɩɔa 'lɛ 'kʋ na, ‑ma daa ɔ 'ta ka kaa 'lɛ 'kʋ ‑dɩɔ na bha? ‑N 'ta daa ɔ ‑dɩɔ 'lɛ 'kʋ naa, ‑ma daa ɔ 'ta ka kaa 'lɛ 'kʋdɩɔ na. 11Ɩla leen, dɛ ɔ ‑dɩɔ 'lɛ 'kʋ le 'kʋdɩlɩɛa 'ka 'kʋnylugolulɩɛa ɔ 'lɩlɩ 'lɛ pɔɔtɛtɛa nɩkplaan, daa ɔ 'ta ka kaa 'lɛ 'kʋdɩɔ na, 'la ghleda 'plɩ. ‑Sa ɔ 'plɩ 'lɛ maa ‑tɛtɛa ‑ɔ ‑ka 'lɛ pɔɔtɛtɛ na ma to. Ɔ ‑glɩ maa ‑ɔ 'ta 'lɛ 'kʋdɩɔ na, ma to, ɩya maa ‑ma ma 'ka 'kʋnylugolunya 'plɩ. 12'Nyɩ ɔ ‑glɩ 'lɛ maa ‑ɔ ‑dɩɔ 'lɛ 'kʋ na ‑ma ma to, maa ‑anʋa ‑ɔ 'ta 'lɛ 'kʋdɩɔ bhlobhlo, ‑ma ‑ɔ 'plɩlɩ 'lɛ pɔɔtɛtɛa ‑a tokadɔ Ablaamʋ 'lɩ 'lɛ 'fɩɔn 'nyɩ ɔ ya 'lɛ 'kʋdɩɔ na 'la 'bɩa 'kʋ na.
13‑Masa, daa Laagɔ ta 'lɛ Ablaamʋ ɩya ɔla valɩnɩkplaa ‑ndanyɩa le ma cɩ 'ka ‑laagɔzɔan ‑aja 'kʋ lili na, ‑n 'ta ‑jlɩmaa 'la 'kʋplɩlɩlɩɛ 'la gbʋ ɔ 'tɩɩ 'lɛ maa ta, ‑ma 'kʋnylugolulɩɛa Ablaamʋ 'lɩlɩ 'lɛ pɔɔtɛtɛa nɩkplaan na 'la gbʋ. 14Sa, ɩ ‑ka ‑kʋ le ‑jlɩmaa 'la 'kʋplɩlɩlɩɛ nɩkplaan ‑ajaalinyaa ‑ka ‑aja lili na, 'dɛndlana, pɔɔtɛtɛa ‑glɩ 'kpɔkpɔ, 'nyɩ ‑ndanyɩa ‑ma ya 'kpɔkpɔ 'plɩ, 15‑ofi lebhe ‑jlɩmaa, Laagɔ 'la dɔgbɛa a lamʋ 'lɛ. Daa ‑jlɩmaa 'ta 'lɛ ‑kʋ na, ‑jlɩmaa 'la tʋlɩɛ ‑ma 'ta 'dɛ ‑kʋ.
16Na, pɔɔtɛtɛ 'kʋ ma 'plɩlɩ 'lɛ 'nyɩ ma 'plɩ 'lɛ ‑ajaalinyɔ, ɩya ‑ajaa 'ka vavalʋʋ 'plɩ. Ɩya ‑ndanyɩa 'ka ‑anyɩa 'fɩan ‑a toa Ablaamʋ 'la valɩnɩkplaa ‑tɛtɛa 'nɩ 'plɩ. ‑Masa, ‑n 'ta ‑jlɩmaa 'la 'lɔlʋa to ‑tɛɛ, ɔ 'ta 'lɛ ‑glɩ, ‑ma ɔ ‑glɩmʋ pɔɔtɛtɛa 'la 'lɔlʋa ‑ma ʋ to. 17‑Masa ɩ ‑zieo lebhe: N yɔɔ ‑sa le n ka 'lɔlɩ ‑bhutukpa to 'plɩ. Laagɔ, ‑ɔ nyɩ 'lɛ 'kua jabhʋ, 'nyɩ ‑ɔ la 'lɛ lɩɩa ‑ɩ 'ta 'lɛ ‑kʋ na le ɩ 'ka kʋ na, 'ci 'kʋ, ɔ ‑glɩ ‑a to. Ɔmɔ ɔ zʋ 'lɛ ɔla pɔɔtɛtɛa 'kʋ. 18Sa daa pɔlɛkʋtɛlɔ ‑ylɛylɛ 'taanɩa 'lɛ ‑kʋ na, Ablaamʋ ya Laagɔ pɔlɛkʋtɛbhalɩ, 'nyɩ ɔ yɔɔ ɔla pɔɔtɛtɛa 'kʋ zʋ. ‑Sa ɔ 'plɩ 'lɛ 'lɔlɩ ‑bhutukpa to, saa ɩ ‑zieo 'lɛ lebhe: ‑Sa ‑naa valɩnɩkplaa cɩ 'ka 'lɛ zubholi. 19Ɔ ‑cia sɛɛ lebhe ɔla 'nyɛkɛa ya cɔbha, ɔ cɩanɩa ‑sa liowli ‑gwlɩɩ ‑ngbi kalɩ, 'nyɩ Salaa ‑ma yaanɩa ‑gblaa, 'bhlɩmɔɔn, ɔla pɔɔtɛtɛa 'ta cɔbha. 20Ɔ 'ta wɔlɩɩn 'ylɩylɩlɩ ɩya ɔ 'la 'ka ‑ndanyɩa ‑delikʋtɛbhalɩ, ‑ma ɔla pɔɔtɛtɛa yɔɔ 'tɛtɩɩn zʋ 'nyɩ ɔ ya Laagɔ 'klʋagba 'nyɩ. 21Ɔ ‑kaa pɔɔtɛtɛ lebhe ɩmɩa Laagɔ ya 'lɛ ‑ndanyɩ 'kʋ talɩ na, ɔ ‑ka 'tɛtɩ ɩya ɔ kɩɩ 'kʋglalɩ. 22'Lɩka wɔlɩa 'la gbʋa Laagɔ 'mɔɔ 'lɛ le 'kʋnylugolunyɔ na.
23Na, ‑n 'ta ɔmɔ bhlogbɩɩ 'la gbʋ ɩ 'ta 'lɛ ‑zieo lebhe: Laagɔ yɔɔ 'ma le 'kʋnylugolunyɔ, 24‑ma ‑anyɩ ‑ma ‑ala gbʋ, ‑anyɩa Laagɔ cɩ 'ka 'lɛ 'ma le 'kʋnylugolunya, ‑masa ‑a ‑ka ɔmɔa ‑ɔ ‑bho 'lɛ ‑ala ‑Kwlenyɔ Zozii 'kwɩɩn 'kʋ na 'la pɔɔtɛtɛ na. 25Ma yɔɔ ‑sa ‑ala nyinyia 'la gbʋ, 'nyɩ ɔ ya 'lɛ 'kwɩɩnkʋbho, ‑ala 'kʋnylugolulɩɛ 'la gbʋ.
Currently Selected:
Wlɔ 4: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.