Wlɔ 2
2
Laagɔ 'la 'tɩtɩplalɩɛa 'nylugolu 'kʋ
1Nclɔɔ, ‑mɔa ‑ɔ pla 'lɛ ‑n 'yʋ 'tɩtɩ na, ‑mɔɔ ‑ma ‑n 'ta 'tɩtɩplalɩɛa ‑zɔn ‑kʋmʋ bha? Sa ‑n ‑ka ‑n 'yʋ 'tɩtɩpla na, ‑mɔɔ 'titi ‑ncɩ ‑n gʋa 'lɛ, ‑masa n nʋmʋ sɛɛ bhlogbɩɩ, ‑mɔa ‑ɔ ‑pla 'lɛ 'tɩtɩa na. 2‑Ma, ‑a ‑ci lebhe maa ‑ɔ nʋ 'lɛ ‑sa 'la nʋnʋgbɩa na, ‑nʋawlɛ nɩkplaan Laagɔ plalɩ 'lɛ maa 'tɩtɩ. 3Na, ‑n gugu lebhe ‑n cɩ Laagɔ 'la 'tɩtɩa ‑zɔn 'wlʋ bha? ‑Mɔa ‑ɔ pla 'lɛ maa ‑ɔ nʋ sɛɛ na 'tɩtɩ, 'nyɩ ‑n nʋmʋ 'lɛ maa 'bhisa na, 4ka ‑n bu 'ta 'lɛ ɔla dananɔ 'kadiea, ɔla pɔɔklalɩɛa ɩya ɔla pɔlɛkʋnanɔa bha? 'Nyɩ ‑n cibhlili 'ta 'lɛ lebhe ka dananɔ ‑naa falɩɔ 'lɛ kwlacalalɩɛ 'la ‑gugwiea 'kʋ bha? 5‑Ma ‑n ‑tli 'lɛ 'nyukwliin 'nyɩ ‑naa pɔlɛa 'ta 'lɛ ‑wa lebhe ‑ɛ 'ka kaci na, dɔgbɛ 'la 'bhaklɔ ‑n tɩta 'lɛ ncɩ, dɔgbɛclɩɩa 'la gbʋ, daa Laagɔ 'la 'tɩtɩplalɩɛa ‑ɩ 'nylugolu 'lɛ 'kʋ na, cɩ 'ka 'lɛ ɩcɩ pala, 6ɩya nclɔɔ nclɔɔ 'kɩɩ 'lɛ nɩkplaan ɔla nʋnʋgbɩa 'la dluuplʋlɩɛa 'lɩlɩ na. 7Jabhʋa ‑ʋ ‑kʋ 'lɛ 'lʋkʋlʋkʋ ɩya 'lʋkʋlʋkʋ na, ‑kʋ ʋ ‑nyɩɔ maa ‑anʋa ‑ɔ vi 'lɛ ‑nwɔ 'nanɩnʋlɩɛ nɩkplaan, 'nyɩ ‑ɔ 'matɩlɩ 'lɛ 'klʋagba, 'ŋwleenfalɩlɩɛ, ɩya jabhʋa ‑ʋ ‑kʋ 'lɛ 'lʋkʋlʋkʋ ɩya 'lʋkʋlʋkʋ na, Laagɔ wlɩɩn na. 8‑Ma maa ‑ɔ ‑bhoo 'lɛ macɩ 'kʋ, ‑ɔ mʋnʋ 'lɛ ‑nʋawlɛa gbatlɩ, 'nyɩ ‑ɔ 'nyɩ 'lɛ ɩmɩa ‑ɩ 'ta 'lɛ 'kʋnylugolu na 'klʋ na, Laagɔ 'la dɔgbɛa ‑kʋ maa 'kʋ, 'nyɩ mala gbʋa 'fɩan ‑wlʋɔ 'lɛ pɔlɛ 'kʋ. 9Na, 'kwlɩbhɩɛ ɩya pɔɔvʋ ‑glɩ maa ‑ɔ nʋ 'lɛ ‑abhɔlɛgbɩ na 'la da, Zifʋnyaa* ‑bɛɛ ɩya mala leen, maa ‑ɔ 'ta 'lɛ Zifʋnya ‑glɩ na. 10'Klʋagba, 'ŋwleenfalɩlɩɛ ɩya pupue ‑glɩ maa ‑ɔ nʋ 'lɛ 'nanɩ na 'la da, Zifʋnyaa ‑bɛɛ ɩya mala maa ‑ɔ 'ta 'lɛ Zifʋnya ‑glɩ na. 11‑Masa Laagɔ gbazlɩlɩ 'ta nɩkplaan na.
12Na, ncɛlɩa ‑tɛtɛa ‑ɔ nʋ 'lɛ nyinyi, daa Moyizi 'la ‑jlɩmaa 'ta 'lɛ kʋ na, ma cɩ 'ka 'ku, ‑ma ‑n 'ta ‑jlimaa ‑zɔn. ‑Ma maa 'fɩan, ‑ɔ ‑kʋ 'lɛ ‑jlɩmaa ‑zɔn, 'nyɩ ‑ɔ nʋ 'lɛ nyinyi na, ‑jlɩmaa cɩ 'ka 'lɛ maa 'tɩtɩ ‑pla. 13‑Masa, maa ‑ɔ po 'lɛ ‑jlɩmaa 'nyukwliin na, ‑n 'ta maa ‑ɔ 'ta 'lɛ 'kʋnylugolunya ‑glɩ Laagɔ ‑deliin, ‑ma maa ‑ɔ 'plɩlɩa 'lɛ 'kʋ na. 14Gbazɩ maa ‑ɔ 'ta 'lɛ Zifʋnya ‑glɩ, 'nyɩ ‑ɔ 'ta 'lɛ ‑jlɩmaa ‑ka na, ma ka ɩmɩa ‑jlɩmaa bhli 'lɛ 'kʋ na 'kʋ 'plɩlɩ na, ‑jlɩmaa ‑kʋ maa nɩkplaan. Maa ‑ɔ 'taa 'lɛ ‑jlɩmaa ‑ka na, 15ma pala lebhe nʋnʋgbɩa ‑jlɩmaa 'clalɩ 'lɛ na, ɩ ‑ziea mala pɔlɩa 'ciin. Mala wɔɔgugwiea ɩya 'tɩtɩa mala pɔlɛa pla 'lɛ maa na, li 'dɛ 'la ‑danʋfʋɛa, sa ‑daanda, ɩ gɩ maa wɔlɩ 'kʋ, 'nyɩ ‑daanda, ɩ nyɩtɛ 'lɛ mala da. 16Na, ɩmɩ ‑naa ‑tɛtɛa -ɩ -cɩ ka 'lɛ 'dɛ 'la clɩɩa 'kʋ ‑zɔn 'wlʋ, saa Dɩnanɩa* bhli 'lɛ 'kʋ lebhe Laagɔ cɩ 'ka Zozi Klisi 'kʋ 'plɩlɩ ɩya ɔ 'ka ncɛlɩ 'la nʋnʋgbɩa ‑ɩ ‑zizieo 'lɛ na, 'la 'tɩtɩa ‑pla na.
Zifʋnyaa 'plɩlɩ 'ta ‑jlɩmaa 'kʋ
17‑Ma, ‑mɔ ‑n la ‑ncɩ Zifʋnyɔ*, ‑n ‑kʋlʋ ‑jlɩmaa, 'nyɩ ‑n kpolili ‑naa Laagɔ nɩkplaan. 18‑N ‑ci ɩmɩa ɔ ‑wa 'lɛ na, 'nyɩ ‑jlɩmaa 'la cibhliliea ya gba 'nyɩ ‑n ‑ci ɩmɩa ‑ɩ nanɩ 'lɛ na. 19‑N cla 'lɛ ‑ncɩ lebhe ‑n ‑glɩ 'citutunya 'la kpanyɔ, ɩya maa ‑ɔ ‑kʋ 'lɛ 'tutuun na mala zezezeli, 20maa ‑ɔ 'ta 'lɛ tuu ‑ci na mala dɩgalɩcanyɔ, ɩya maa ‑ɔ 'ta 'lɛ mala 'wlu 'la wɔlɩ ‑ka na mala canyɔ, ‑ofi lebhe ‑n ‑ka ‑jlɩmaa ‑a ‑glɩ 'lɛ wɔɔcibhlililie ɩya ‑nʋawlɛ 'la 'wlʋlʋdaa 'titi na. 21Na, ‑mɔa ‑ɔ ca 'lɛ ‑n 'yʋ na, ‑n camʋ 'ta ‑mɔ 'titi ‑ncɩ bha? ‑N plici le ma 'la ghlia, 'nyɩ ‑mɔ 'titi ‑n ghli. 22‑N tie le nclɔɔ 'la 'matɩa ɔ 'yʋ nʋŋlɔ, 'nyɩ ‑mɔ 'titi ‑n 'matɩ ‑n 'yʋ nʋŋlɔ. ‑N ‑zɔ ‑zlii, 'nyɩ ‑n ghli ɩla gʋgwlapalɩa ‑zɔn 'la lɩɩ. 23‑N kpolili 'lɛ ‑jlɩmaa nɩkplaan, 'nyɩ ‑n 'plɩlɩ 'taa 'lɛ 'kʋ na, ‑n sʋkpa Laagɔ cɩ. 24‑Masa, saa Zieziewɔlɩa* bhli 'lɛ 'kʋ na, anyɩ 'wluku ma nyumo 'lɛ Laagɔ 'ŋlɩ, maa ‑ɔ 'ta 'lɛ Zifʋnyaa ‑glɩ na sidiin.
25'Kʋdɩlɩɛa cɩ sɛ nʋnʋgbɩ 'nanɩ 'plɩ, ɩ ‑ka ‑kʋ lebhe ‑n ‑ka ‑jlɩmaa 'kʋ 'plɩlɩ na. ‑Ma, gbazɩ ‑n ‑ka ‑jlɩmaa tʋ na, ‑naa 'kʋdɩlɩɛa, ka ‑n ‑yɩɩsɩ ‑kʋ 'lɛ le nclɔɔa ‑ɔ 'ta 'lɛ 'kʋdɩɔ na. 26‑Ma gbazɩ nclɔɔa ‑ɔ 'ta 'lɛ 'kʋdɩɔ na, ‑ka ɩmɩa ‑jlɩmaa bhli 'lɛ 'kʋ na 'kʋ 'plɩlɩ na, ma cɩ 'tɔɔ 'ma le saa ɔ ‑dɩɔ 'lɛ 'kʋ na bha? 27‑Ɔmɔa ‑ɔ 'ta 'lɛ 'kʋdɩɔ 'nyɛkɛa nɩkplaan, 'nyɩ ‑ɔ 'plɩlɩ 'lɛ ‑jlɩmaa 'kʋ na, cɩ 'kɔɔ 'tɩtɩpla, ‑mɔa ‑ɔ ‑ci 'lɛ ‑jlɩmaa 'nyɩ ‑n ‑ya ‑naa 'kʋdɩlɩɛa 'plɩlɩ 'taa 'lɛ 'kʋ na. 28‑Masa ɩmɩa ma ‑jlɛ 'lɛ na, ‑n 'ta ɩmɩ ‑ɩ ple 'ta 'lɛ nclɔɔ Zifʋnyɔ, 'nyɩ 'kʋdɩlɩɛa 'la 'kpafʋa ma ‑jlɛ 'lɛ 'nyɛkɛa cɩ na, ‑n 'ta ʋmʋ 'ta 'lɛ 'kʋdɩlɩɛa 'titi ‑glɩ. 29‑Ma ɩmɩa ‑ɩ ‑zizieo 'lɛ na, ɩmɩ ‑ɩ ple 'lɛ nclɔɔ Zifʋnyɔ, 'nyɩ 'kʋdɩlɩɛa 'titi ‑glɩ 'lɛ pɔlɛ 'ciin 'la 'kʋdɩlɩɛa, ɩmɩa ‑ɩ 'wlʋlʋ 'lɛ 'Wugoa nɩkplaan na, ‑ma ‑n 'ta zieziejlɩmaa nɩkplaan ‑naanɩa. Na, 'lɩka nclɔɔa ‑ɔla 'klʋgbaa 'wlʋlʋ 'ta 'lɛ ncɛlɩ wlɩɩn, ‑ma a 'wlʋlʋ 'lɛ Laagɔ wlɩɩn na.
Currently Selected:
Wlɔ 2: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.