Wlɔ 13
13
A kalɩ ‑kwletocɩa 'la zʋlɩɛ
1'Naa nclɔɔ nclɔɔ ‑la ɔcɩ ‑dʋdʋ 'kʋ ɩya ɔ 'nyɩ ‑kwletocɩa ‑ɔ ‑kwle 'lɛ na. Sa, ‑kwleliea ‑tɛtɛa 'wlʋlʋ Laagɔ wlɩɩn. 'Nyɩ ɔmɔ ‑ɔ zʋ 'lɛ maa ‑ɔ ‑kʋ 'lɛ na kpo 'kʋ. 2Na, ɔmɔa ‑ɔ mʋnʋ 'lɛ ‑kwleto gbatlɩ na, ɩmɩa Laagɔ zʋ 'lɛ kpo 'kʋ na, ɩmɩ ɔ mʋnʋ 'lɛ gbatlɩ. 'Nyɩ, maa ‑ɔ nʋ 'lɛ sɛɛ na, cɩ 'ka ɩla gbaylɩsalɩɛa 'lɩ. 3‑Masa, nclɔɔa ‑ɔ nʋ 'lɛ 'nanɩ na, ‑kwleto 'la ŋanɔ 'bhla 'tɔɔ, ‑ma ɔmɔa ‑ɔ nʋ 'lɛ nyinyi na, ɔmɔ mala ŋanɔ bhla 'lɛ. Na, ‑n 'ta wa lebhe ‑kwleto 'la ŋanɔ 'bhlɔɔ na, 'dɛndlana, 'maa nʋ 'nanɩ ɩya ɔ 'kɔɔ 'ŋwleenfalɩ. 4Sa, Laagɔ ɔ lobho 'lɛ ‑naa 'nanɩnʋlɩɛ 'la gbʋ. ‑Ma, gbazɩ ‑n ‑ka nyinyi nʋ na, 'naa ŋanɔ 'bhlɔɔ, sa ‑n 'ta 'kpɔkpɔsa lɛtɛa 'tɔɔ 'lɛ wlɩɩn ‑kʋ. Ɔ ‑ka nclɔɔ gbaylɩsada ‑kʋ na, Laagɔ ɔ lobho 'lɛ le ɔ 'ka ɔla dɔgbɛa wɔɔnyinyinʋyɔ 'kʋ ‑salɩ. 5Ɩla gbʋ, dɛ ɩ ‑fata 'lɛ lebhe nclɔɔ ‑la ɔcɩ ‑dʋdʋ 'kʋ ɩya ɔ 'nyɩ ‑kwleto, ‑n 'ta le ɔla dɔgbɛa bhlobhlo 'la 'gululɩɛ 'la gbʋʋ, ‑masa ‑ala wɔɔgugwiea 'clalɩɩ ‑anyɩ na, ɩla gbʋ.
6Wɔlɩ ‑naa ‑sakasaka 'la gbʋ, dɛ a plʋ 'lɛ ‑lapoo. 'Nyɩ maa a plʋʋ 'lɛ wlɩɩn na, Laagɔ 'nyɩ 'lɛ maa 'dɛ 'la lobholia 'klʋlɩda. 7Na, a ‑plʋ nclɔɔ nclɔɔ, ɔla dlua. ‑Ɩ ‑glɩ ‑lapoo, 'nyiyilie, ‑aana zʋlɩɛ, a ‑plʋ nclɔɔ nclɔɔ ɔla lʋʋa 'la dlua a ‑ka 'lɛ na.
A wabhawabhalɩ
8A 'la kalɩa nclɔɔ bhlogbɩɩ 'la dlu, ‑n 'ta le ‑walʋa a cɩ ka 'lɛ wabhawabhalɩ na, 'la dlua ‑tɛɛ na. Sa, ɔmɔa ‑ɔ ‑wa 'lɛ ɔ 'yʋ na, ɔ ya ‑jlɩmaa ‑tɛtɛa 'kʋglalɩ. 9‑Masa, ‑jlɩmaa ‑a cla 'lɛ lebhe: ‑Naa 'matɩa ‑n 'yʋ 'la 'ŋlɔ, ‑naa 'bhlaa nclɔɔ, ‑naa ghlia 'wi, ‑n yʋʋ 'la lʋʋ 'la kalɩɔ dɔgbɛ, ɩya ‑daa ‑naanaa ‑tɛtɛa, wɔɔkle ‑naa ‑glɩ ala 'wlu: Wabha ‑n 'yʋ le ‑ncɩ 'bhisa. 10‑Walʋ nʋ 'ta nclɔɔ wɔɔnyinyi ‑ylɛylɛ cɩ. Na, ‑walʋ ‑ʋ ‑glɩ 'lɛ ‑jlɩmaa ‑tɛtɛa 'la 'kʋglalɩlɩɛ.
A bhɔsʋa ɩya a ‑bɛ Klisi 'la ciclɩɩa
11A ‑cinɩ 'lɛ 'bhlɛsʋa nɩkplaan ‑a ‑kʋ 'lɛ na, a cibhlili sɛɛ lebhe ala 'claanwlʋŋwacɩ ‑ɛ ŋeni 'lɛ. ‑Masa ‑yaka, gbʋʋnsalɩɛa mɛɛnɩ ‑anyɩ cɩ ‑gbɔɔn 'nyɩ ɩ plɩ 'bhlɛsʋa nɩkplaan ‑a zʋlʋa 'lɛ ‑ala pɔɔtɛtɛa Klisi 'kʋ na cɩ. 12Sa da yaan zili 'nyɩ zezezelia ya cɩ mɛ na. Na, ‑a tenɩ 'tutua nɩkplaan 'la nʋnʋgbɩa ɩya ‑a zʋnɩ zezezelia 'la tavʋlɩɩa cɩ. 13‑A namʋnʋ ‑nʋawlɛ nɩkplaan le saa ma namʋnʋ 'lɛ zezezeli nɩkplaan na. ‑A 'la 'plɩa nyagbulinya ɩya nʋgbumlanya. ‑A 'la lia dɩbʋ ɩya ‑badaaglu. ‑A 'la 'slaa 'slagbʋ ɩya a 'la ‑pla woze. 14‑Ma, a zʋ ‑Kwlenyɔ Zozi Klisi 'la tavʋlɩɩa cɩ ɩya a 'la tea acɩ 'nyɛkɛa 'la lɩɩa 'la pɔlɛa ɛ ple 'lɛ na ‑zɔn le a 'ka sɛsɛɛ lɩɩ ‑mizimizia 'la 'tʋa ‑ʋ bhlɛɛ 'lɛ na ‑sa.
Currently Selected:
Wlɔ 13: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.