Wlɔ 12
12
A namʋnɩ saa Klisi 'clalɩ 'lɛ na
1Na, bholiecɩnyɩ, Laagɔ 'la ŋaazɩɩnlɩlɩɛa 'la gbʋ, n zʋ anyɩ 'tɛtɩɩn le a 'ma acɩ ɩya a va Laagɔ le ‑teyiyimla ‑ɩ ‑ja 'lɛ, ‑ɩ ‑kplɔ 'lɛ, 'nyɩ ‑ɩ ‑ka 'lɛ Laagɔ 'tʋ na 'bhisa. Ɩmɩ ‑ɩ ‑cɩ ‑ka 'lɛ gʋgwlalɩɛa 'titia a cɩ 'kɔɔ 'lɛ gʋgwla na 'plɩ. 2A 'la gɩlɩa 'bhlɛsʋ ‑naa 'la nʋnʋgbɩa. ‑Ma, 'naa a 'lɩ dɩgalɩ ‑lelia ‑ɩ cɩ ka 'lɛ anyɩ kaci na, ɩya a 'ka ɩmɩa Laagɔ ‑wa 'lɛ na cibhlili. Ɩmɩa ‑ɩ nanɩ 'lɛ, ‑ɩ ‑kɔɔ 'lɛ 'tʋ 'nyɩ ‑ɩ ‑kʋ 'lɛ 'fɩkɔfɩkɔ na.
3Na, 'nanɩa Laagɔ nʋʋn 'lɛ le n 'plɩ Klisi 'la lobhulobhunyɔ* na ɩla 'sasʋʋn, n cla 'lɛ nclɔɔ nclɔɔ lebhe ɔ 'la 'maa ɔcɩ saa ɔ 'ta 'lɛ ‑kʋ na, ‑ma 'naa nclɔɔ nclɔɔ cibhlili ɔla saa ɔ ‑kʋkʋ 'lɛ na, daa pɔɔtɛtɛa Laagɔ 'nyɩɔ 'lɛ na cɩ 'lɛ ŋeni na ɩla 'sasʋʋn. 4‑Masa, saa 'nyɛkɛa bhlogbɩɩ ‑ka 'lɛ 'blɩ ‑bhutukpa, 'nyɩ ɩmɩa ‑tɛtɛa 'ta 'lɛ lobholia 'kʋ 'wlalɩ na, 5'sɛtɛɛ bhlogbɩɩ ‑anyɩ ‑ma ‑a ‑zu 'lɛ, 'nyɩ ‑a ‑glɩ 'lɛ 'nyɛkɛ bhlo Klisi nɩkplaan. ‑A ‑plaplalɩɔ nɩkplaan 'bhlɩmɔɔn, ‑ma nclɔɔ nclɔɔ ‑kʋ ɔla da. 6'Nyɩ ɩmɩa Laagɔ va 'lɛ ‑anyɩ na, ɩ ‑kʋ 'lɛ 'ci 'ci, 'nanɩa ‑ɔ nʋ 'lɛ nclɔɔ nclɔɔ na, ɩla 'sasʋʋn. Na, ‑laagɔnekʋnyɩtɛlɩɛ ‑ɔ ‑kɔɔ 'nyɩ na, 'maa nʋnʋɩ pɔɔtɛtɛ nɩkplaan. 7‑Anɔ ɔ ‑ka lobholɩɛ 'nyɩ na, 'naa ɔ lobho. ‑Anɔ bhlo ‑ka calɩɛ 'lɩ na, 'naa ɔ ca. 8‑Buun -naanɔ bhlo ‑ka 'tɛtɩɩnzʋlɩɛ 'lɩ na, 'naa ɔ zʋ ɔ 'yea 'tɛtɩɩn. 'Naa ɔmɔa ‑ɔ nyɩ 'lɛ na, ɔ 'nyɩnɩ pɔlɛ bhloon, ɔmɔa ‑ɔ kpa 'lɛ na, 'naa ɔ kpalɩ ‑nwɔvilieen, ɩya ɔmɔa ncɛlɩ ‑ka 'lɛ ŋaazɩ na, ɔ klalɩlɩ maa pɔlɛkʋmɛnɔɔn.
9'Naa ala ‑walʋa, 'plɩ ‑walʋ 'titi. A zɔbhɛlɩ ‑abhɔlɛ ɩya wabha 'nanɩ. 10'Naa ‑walʋ kʋ anyɩ ‑gbaaglɩɩn, bholiecɩ 'bhisa ɩya a 'tɩtlakʋ ɩya a zʋzʋlʋ. 11A lobho ‑Kwlenyɔ ala pɔlɛa 'ciin, ‑nwɔvilie ɩya kplaankplaannʋlɩɛ nɩkplaan. 12A ‑ka 'lɛ pɔlɛkʋtɛlɔ na, 'naa pɔlɛ 'kʋ mɛma anyɩ, 'kwlɩbhɩɛ nɩkplaan, a kla pɔlɛ ɩya a 'la sɛa bhibhieli 'kʋ. 13A klalɩ a bholiecɩa ‑ɔ ‑mie 'lɛ na, ɩya a kla lowie 'kʋkpatɔlɩɛ nɩkplaan. 14A palɩ maa ‑ɔ sa 'lɛ anyɩ gbaylɩ na 'nyu. A palɩ 'nyu, ‑ma a 'la 'paa gbalʋ. 15Aya maa ‑ɔ nʋ 'lɛ ‑pɔpʋɛ na, nʋ ‑pɔpʋɛ, ɩya aya maa ‑ɔ tu 'lɛ na, 'tulu nebhlo. 16A kalɩ wɔɔnebhlo. A lia ‑tutule, ‑ma a ‑la ‑acɩ ‑dʋdʋ 'kʋ. A 'la laa acɩ dɩgalɩnya. 17A 'la 'maa nyinyi ɩya a 'la ‑plʋa nyinyi dlu. A 'matɩ lebhe a 'ka ɩmɩa ‑ɩ nanɩ 'lɛ na nʋ, ncɛlɩa 'fɩan 'ci 'kʋ. 18A ‑ka nʋsa ‑ka na, a nʋ saa 'fɩan a cɩ 'lɛ mino na, ɩya pupue kʋ aya ncɛlɩa 'fɩan ‑gbaaglɩɩn.
19'Na ‑wawabholiecɩnyɩ, a 'la ‑sa acɩ 'la kpa, ‑ma a te Laagɔ 'la dɔgbɛa ne ɩya ɛ nʋ. Sa, ɩ ‑zieo lebhe: ‑Kwlenyɔa nabhe, ‑Amʋ ‑ɔ ‑glɩ 'lɛ kpasanyɔa, ‑amʋ ‑ɔ cɩ ka 'lɛ nclɔɔ nclɔɔ, ɔla dlua ‑plʋ. 20‑Ma, gbazɩ ŋɔmʋ ‑ka ‑naa ‑zɔbhɛlɩgbanyɔ 'bhla na, 'maa 'nyɩɔ 'nyɩ ɩya ɔ 'ka li. 'Nyɩ 'nyutʋ ‑ʋ ‑kɔɔ 'bhla na, 'maa 'nyɩɔ 'nyu ɩya ɔ 'ka 'mla. ‑Masa, ‑n ‑ka sɛɛ nʋ na, ka ɩla gbɩa palalɩ le saa ‑n gbɔtɔlʋɔ 'lɛ ‑kosuunpɔzalɩ 'wlu na. 21Na, ‑naa 'talɩa ncɩ 'cin ɩya nyinyi 'la ‑sɩɔ, ‑ma 'maa 'plɩlɩ 'nanɩnʋlɩɛ 'kʋ ɩya ‑n ‑sɩa nyinyi.
Currently Selected:
Wlɔ 12: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.