Wlɔ 11
11
Laagɔ 'ta ka Izlayɛlɩnyaa 'kwlaan 'pa
1Na, n cla neen lebhe: Ka Laagɔ 'pa 'lɛ ɔla 'lɔlʋa 'kwlaan bha? ‑Wɔɔ, ɔ 'ta kʋʋ 'kwlaan 'pa! ‑Ofi lebhe, ‑amʋ 'titi n ‑glɩ Izlayɛlɩnyɔ*, Ablaamʋ 'la valɩnɩkpla 'la nɩkplaan 'la nclɔɔ ɩya Bɛnzamɛɛn 'la 'lɔkpʋnyɔ. 2Laagɔ 'ta ɔla 'lɔlʋa ɔ pʋ 'lɛ 'kʋklʋʋn 'nyɩ ɔ sla 'lɛ de na 'kwlaan 'pa. ‑Aana ka a 'ta 'lɛ ɩmɩa Zieziewɔlɩa* bhli 'lɛ 'kʋ, daa Elii gba 'lɛ Izlayɛlɩnyaa wɔlɩ cɩ, Laagɔ ‑deliin na ‑ci bha? Ɔ ya 'cla lebhe: 3‑Kwlenyɔ, ma ya ‑naa nekʋnyɩtɛnya 'bhla 'nyɩ ma ya 'lɛ ‑naa gʋgwlagbatɩcɩa gbɔlʋ. ‑Amʋ bhlogbɩɩ ‑tɛɛ ‑ɔ ‑to 'lɛ, 'nyɩ ma 'matɩnɩ 'lɛ 'na 'bhlada. 4‑Ma, 'nsasa Laagɔ ŋonu ‑ŋonunuo 'lɛ neen bha? Ɔ yɔɔ 'cla lebhe: N ya ncɩ ncaatabhliwli ‑ngbɔɔsɔ gbɛga, ‑ɔ 'ta 'lɛ Baalɩ ‑deliin ‑kukoonkplii sasla na. 5Na, 'sɛtɛɛ bhlogbɩɩ, 'bhlɛsʋ ‑naa ‑masɛɛ nɩkplaan, Laagɔ ya ‑awlɛ ncɛlɩ te, ɔla dananɔa bhlobhlo 'la gbʋ. 6'Nyɩ, ɩ ‑ka ‑kʋ lebhe ɔla ‑danaanɔa bhlobhlo 'la gbʋ na, 'dɛndlana, ‑n 'tanɩ mala nʋnʋgbɩa 'la gbʋʋ, sa ɩ ‑kaa sɛɛ ‑kʋa na, ɔla dananɔa 'tanɩ dananɔ ‑glɩ.
7Na, wɔɔsaa ‑a nabhe ‑a kaa 'lɛ nyɩtɛ bha? Ka ‑a nabhe a ka 'lɛ 'cla lebhe, Izlayɛlɩnyaa 'ta ɩmɩa ma 'matɩa 'lɛ na 'lɩ. ‑Ma, maa sidiin, Laagɔ 'la deslasla -naanʋa 'lɩɩ 'lɛ. ‑Ɔ ‑glɩ 'lɛ ‑da -naanʋaa na, ɔ ya mala pɔlɩa 'tɛbhalɩ, 8saa ɩ ‑zieo 'lɛ lebhe:
Laagɔ ya maa 'wugoa ‑ʋ ŋɔmʋ 'lɛ na 'nyɩ,
ɔ ya maa 'ci 'nyɩ le ma 'la ka salɩ,
ɔ ya maa 'nyukwli 'nyɩ le ma 'la ka 'nu.
'Nyɩ, sɛɛ bhlogbɩɩ ɩ ‑kʋ ka ‑azla 'lɛ ‑aan ‑yaka.
9Daviti ‑masɛ ya 'cla lebhe:
'Naa 'tlɔnblɩa ma palɩ 'lɛ sa na 'plɩ
mala ‑gbosu,
mala ‑dada,
mala 'kpamu
ɩya mala 'cia 'ka ɩmɩa ma 'matɩ 'lɛ na 'lɩ!
10 'Naa mala 'cia pla 'tutu ɩya ɩ 'la 'lɩanɩ sa.
'Maa 'klu maa kɔɔn clɩɩa 'fɩan.
11Na, ka n cla 'lɛ neen lebhe: Ka ma bhli 'lɛ ɩya ma 'la kanɩ 'kʋbho bha? ‑N 'ta sɛɛ! ‑Ma mala ‑ngasitʋlɩɛa ‑bɔɔ ‑ɩ gba 'lɛ 'nyɩ maa ‑ɔ 'taa 'lɛ Zifʋnya* ‑glɩ na, ma ya 'lɛ gbʋʋnsalɩɛ 'lɩ le Izlayɛlɩnyaa 'ka maa woze 'kʋ ‑plalɩ. 12Na, mala ‑ngasɩtʋlɩɛa ‑ka ‑sa ‑laagɔzɔan 'nanɩkadɩ nʋ, 'nyɩ mala bhliliea ‑ka maa ‑ɔ 'ta 'lɛ Zifʋnya ‑glɩ na 'la 'nanɩ 'plɩ na, 'nanɩa ‑anɩsaa maa ‑tɛtɛa 'la gbʋʋnsalɩɛa cɩ 'taa 'lɛ ‑lamʋ bha?
13Na, anyɩ n solu 'lɛ, anyɩa ‑ɔ 'ta 'lɛ Zifʋnya ‑glɩ na, lebhe: ‑Amʋ 'titia -ɔ ‑glɩ 'lɛ Klisi 'la lobhulobhunyɔ* maa ‑ɔ 'ta 'lɛ Zifʋnya ‑glɩ na 'bhlɩ na, ka n kpolili 'lɛ lobholia ɔ zʋʋn 'lɛ wlɩɩn na nɩkplaan, 14le n 'ka gba ɩya maa ‑anʋa n ‑ya maasɔ 'wlalɩ ‑dolua bhlogbɩɩ 'kʋ na 'ka sɛ woze ‑pla, ɩya ɩ 'ka ‑anʋa 'la gbʋʋnsalɩɛ 'plɩ. 15'Nyɩ mala gbɛgalɩɛa ‑ka ‑laagɔzɔan ‑ya Laagɔ 'la cɩzʋlʋlɩɛ 'plɩ na, daa ɔ cɩ ka 'lɛ sɔ fa ɩya ɔ 'ka ‑awlɛ 'lɛ maa 'ma na, 'nsasa ɩ cɩ 'ka 'lɛ kʋkʋlʋ bha? Ka ncɛlɩ cɩ 'ka 'lɛ 'kwɩɩnkʋbho ɩya ma 'ka 'lɛ jabhʋa nɩkplaan ble.
16Gbazɩ ma ‑ka 'pʋa 'la ‑bɛkaflawoa Laagɔ va na, 'pʋa ‑tɛtɛa ‑ʋ ‑to 'lɛ na ʋmʋ ‑masɛɛ ʋ ‑kplɔ. 'Nyɩ ‑sukplua ‑ka ‑kplɔ na, 'labhɩa ‑masɛɛ ‑kplɔ. 17Na, ɩ ‑ka ‑kʋ lebhe ma ‑ka 'labhɩ ‑anɩ 'dɩ 'nyɩ ‑mɔɔa ‑ɔ 'ta 'lɛ ‑olivusu 'titi ‑glɩ, ma ‑kɔɔ ɩla 'jeen ‑olivusua 'titi cɩ mɛmʋ le -mɔɔ ‑n ka sɛsɛ ‑sukplua 'la 'nyua 'mlamʋ na, 18-naa kpolilia 'labhɩa ma 'dɩ 'lɛ na gbɩɩn 'kʋ. ‑N cɩ mino 'nyɩ ‑n cɩ gbɩɩnkpoli 'bhlɩmɔɔn! ‑Ma, ‑n 'ta ‑mɔ ‑ɔ 'ta 'lɛ ‑sukplua ‑bhɛɛ, ‑ma ‑sukplua ʋmʋ ‑ʋ bhɛɔ 'lɛ. 19‑N cɩ ka sɛ 'cla lebhe: 'Labhɩ ma 'dɩ 'lɛ 'nyɩ ‑amʋ ma yaan 'lɛ sua cɩ mɛ. 20Ɩ ‑glɩ ‑nʋawlɛ. ‑Ma pɔɔtɛtɛ ɩ 'ta 'lɛ 'lɩ na, dɛ ma 'dɩɩ 'lɛ, 'nyɩ ‑mɔɔ, pɔɔtɛtɛ ‑n 'lɩ, dɛ ‑n kʋ ka 'lɛ 'dɛ. Na, ‑naa kpolia gbɩɩn, ‑ma ŋanɔ 'nyɩ ‑ʋ 'bhlɔɔ. 21‑Masa, Laagɔ 'ta 'lɛ 'labhɩa 'titi va na, ‑mɔɔ ‑masɛɛ ɔ cɩ 'tɔɔ va. 22Na, 'maa kope Laagɔ 'la ‑danaanɔa ɩya ɔla danyunoa 'ciin. Ɔ pala ɔla danyunoa maa ‑ɔ bhli 'lɛ na, 'nyɩ ‑mɔ ɔ palɔɔ 'lɛ ɔla ‑danaanɔa. Na, ka ‑tɛɛ 'nyɩ ‑n kʋʋ nɩkplaan, ‑ma ‑n 'ta sɛɛ na, ‑mɔɔ ‑masɛ, ‑n cɩ ka ‑dɩɔ. 23‑Ɔ ‑glɩ 'lɛ maa na, ma ‑ka kwlacala na, maa ‑masɛɛ ma cɩ 'ka sua cɩ mɛ. Sa, Laagɔ cɩ mino 'nyɩ ɔ cɩ ‑awlɛ maa sua cɩ mɛ. 24‑Masa, ‑mɔɔa ‑ɔ ‑glɩa 'lɛ sua ‑ʋ 'ta 'lɛ ‑olivusu 'titi ‑glɩ na 'la 'labhʋ na, ma ‑kɔɔ mʋ cɩ ‑sa, 'nyɩ ma ‑kɔɔ ‑olivusua 'titi, ‑n 'ta 'lɛ ʋla 'labhʋ ‑glɩ na cɩ mɛmʋ na, 'nsasa maa ‑naa, ‑ɔ ‑glɩ 'lɛ ‑olivusua 'titi 'la 'labhɩ na, maa cɩ 'taa 'lɛ maa sua ma ‑glɩ 'lɛ ʋla 'labhɩ na cɩ mɛ bha?
Izlayɛlɩnya cɩ 'ka gbʋʋnsalɩɛ 'lɩ
25Bholiecɩnyɩ, n 'ta ‑wa lebhe a kʋ ɩya a 'la cibhlilia wɔlɩ ‑naa ‑ɩ ‑zizielio 'lɛ ncɛlɩ 'ciin na, ɩya a 'la ka sɛsɛ acɩ wɔɔcibhlilinya la. Na, a cibhlili lebhe: Ka Izlayɛlɩnyaa*, ‑anʋa 'la pɔlɩa cɩ 'ka 'tɛbhalɩ ‑aan ɩya ma ‑ɔ 'ta 'lɛ Zifʋnyaa* ‑glɩ na, maa 'fɩan ‑ka Laagɔ 'lɔlʋa nɩkplaan ble. 26Ɩya ɩla leen Izlayɛlɩnyaa 'fɩan 'ka gbʋʋnsalɩɛ 'lɩ, saa ɩ ‑zieo 'lɛ lebhe:
Siyɔɔnkikea 'wlu gbʋʋnsanyɔa cɩ 'ka 'lɛ 'wlʋlʋ,
ɩya ɔ 'ka Zakɔpʋ ɩmɩa ‑ɩ 'ta 'lɛ laagɔ 'tʋ ‑ka na cɩ ‑sa.
27 'Nyɩ, daa n cɩ 'ka 'lɛ mala nyinyia cɩ ‑sa na,
'lɩka mɛnʋa n ‑ya maasɔ cɩ 'ka 'lɛ li na.
28Dɩnanɩa* 'la gbazɔ, ma ya Laagɔ 'la ‑zɔbhɛlɩgbanya 'plɩ, 'nyɩ ɩ ‑glɩ ala 'nanɩ. ‑Ma, ‑ɔ ‑glɩ 'lɛ lalɩɛa Laagɔ la 'lɛ maa na ɩla gbazɔ na, ma ‑glɩ ɔla ‑wawanya, 'nyɩ maa tokadɔcɩa 'la gbʋ ɔ ‑wa 'lɛ maa. 29Sa, Laagɔ ‑sa 'ta 'dɛ ɔla vavalɩɩa ɩya ɔla lalɩɛa. 30‑Masa, ‑godogodoa, ala 'nyi 'taa Laagɔ yi, ‑ma ‑pɔtɔnʋ, mala 'nyiyiliea ma 'ta 'lɛ 'lɩ na, ɩ ya gba 'nyɩ Laagɔ ya anyɩ ŋaazɩɩn 'lɩ. 31Na, 'sɛtɛɛ bhlogbɩɩ, ‑pɔtɔnʋ ‑ma, mala 'nyi yi 'ta 'lɛ Laagɔ, ɩya ŋaazɩɩnlɩlɩɛ ‑ɩ ‑kʋ 'lɛ anyɩ 'kʋ na, ɩ 'ka maa ‑masɛɛ 'kʋ ŋeni. 32Sa, Laagɔ ya ne te le ncɛlɩa 'fɩan 'la 'nyi 'la yio, ɩya ɔ 'ka maa ‑tɛtɛa ŋaazɩɩn 'lɩ.
33Laagɔ 'la 'ghliloa, ɔla dɩgalɩa ɩya ɔla wɔɔcibhlililie 'la nɩkplaantlʋlɔ 'ta bhloluda ‑ka. Ɔla 'tɩtɩplalɩɛ ɩya wɔɔgugwie, maa cɩ 'ta kɩnɩ ɩla ‑zɔn 'nu! 34‑Masa, ncaasaa ‑ɔ ya ‑azla 'lɛ ‑Kwlenyɔa 'la wɔɔgugwie cibhlili bha? ‑Aana ncaasaa ‑ɔ ya ‑azla 'lɛ ɔla dɩgalɩcanyɔ 'plɩ bha? 35'Nyɩ ‑awlɛ, ncaasaa ‑ɔ ya ‑azlɔɔ 'lɛ ‑bɛkada lʋʋ 'nyɩ, 'nyɩ ɔ cɩ 'kɔɔ 'lɛ ʋla dlua ‑plʋ bha? 36Sa, ‑tɛtɛa 'fɩan ‑glɩ ɔla da, ɔmɔ wlɩɩn ɩ 'wlʋlʋ 'lɛ, 'nyɩ ɔla gbʋ ɩ ‑kʋ 'lɛ. 'Naa 'klʋagba ŋenio 'lʋkʋlʋkʋ ɩya 'lʋkʋlʋkʋ. Ɩ kʋ sɛɛ!
Currently Selected:
Wlɔ 11: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.