Wlɔ 10
10
Zifʋnyaa ɩya ‑daa ncɛlɩa 'fɩan ‑ka ‑Kwlenyɔ bhlo
1Bholiecɩnyɩ, wɔlɩa ‑ɩ ‑kʋʋn 'lɛ pɔlɛ 'ciin Zifʋnyaa* 'la gbazɔ, ɩya ɩmɩa n 'clalɩ 'lɛ Laagɔ 'na bhibhiea nɩkplaan mala da na, ɩmɩ ‑ɩ ‑glɩ 'lɛ lebhe ma 'lɩ gbʋʋnsalɩɛ. 2N ‑lio mala ‑danʋfʋɛ lebhe ma ‑wa ‑gbɔɔn lebhe ma cɩ Laagɔ lobho, ‑ma ɩ 'ta ɔla cibhlililie 'titi 'kʋ 'slalɩ. 3Sa, ma 'ta 'lɛ 'kʋnylugolulɩɛa ‑ɩ 'wlʋlʋ 'lɛ Laagɔ wlɩɩn na cibhlili, 'nyɩ ma ya 'lɛ 'matɩ lebhe ma 'ka maa 'titi ma 'nɩ kpo 'kʋ zʋ na, dɛ ma 'ta 'lɛ macɩ Laagɔ 'la 'kʋnlyugolulɩɛa ‑zɔn zʋ. 4‑Masa, Klisi ‑glɩ 'lɛ ‑jlɩmaa 'la 'wlukodaa, ɩya ncaatʋtʋʋntʋa ‑ɔ cɩ 'lɛ ɔla pɔɔtɛtɛ kalɩ na, ɔ 'ka kʋnylugolunyɔ 'plɩ.
5'Lɩka saa Moyizi nyɩtɛ 'lɛ 'kʋnylugolulɩɛa ‑ɩ 'wlʋlʋ 'lɛ ‑jlɩmaa nɩkplaan na ɩla wɔlɩa na, ka ɔ 'cla 'lɛ lebhe: Nclɔɔa ‑ɔ ‑cɩ kaa 'lɛ 'kʋplɩlɩ na, ala 'kʋplɩlɩɛa nɩkplaan ɔla jabhʋa cɩ 'ka 'lɛ 'wlʋlʋ. 6‑Ma 'lɩka saa 'kʋnyluglulɩɛa ‑ɩ 'wlʋlʋ 'lɛ pɔɔtɛtɛ nɩkplaan na, bhli 'lɛ 'kʋ na. Ɩ cla lebhe: ‑Naa 'claa ‑na pɔlɛa nɩkplaan lebhe: Ncaasaa ‑ɔ cɩ ‑ka 'lɛ ‑laagɔɔn ‑gblaa bha? Sa, Klisi ya tooto kwli na. 7‑Aana, ‑naa 'claa lebhe: Ncaasaa ‑ɔ ‑cɩ kaa 'lɛ 'bhukua ‑ʋ 'ta 'lɛ 'wlukoda ‑ka na nɩkplaan kwli bha? ‑N ‑ka sɛɛ gba na, Klisi ‑n cla 'lɛ lebhe ɔ ‑bho 'kua sidiin 'kʋ. 8Na, wɔɔsaa 'kʋnylugolulɩɛa ma 'lɩlɩ 'lɛ pɔɔtɛtɛ nɩkplaan na nyɩtɛa 'lɛ ‑sa bha? Ka ɩ cla 'lɛ lebhe: Wɔɔnyɩtʋa ‑kʋɔ cɩ, ʋ ‑kʋɔ neen ɩya pɔlɛ 'ciin. Wɔɔnyɩtʋ ‑naa, ʋmʋ ‑ʋ ‑glɩ 'lɛ pɔɔtɛtɛ 'la wɔlɩa ‑a plici 'lɛ na. 9Na, ‑n ‑ka ‑naa nea cɩ ‑sasalɩ, 'nyɩ ‑n ‑ka 'cla lebhe Zozii ‑glɩ ‑Kwlenyɔ, 'nyɩ ‑n ‑ka ‑naa pɔlɛa nɩkplaan pɔɔtɛtɛ ‑ka lebhe Laagɔ yɔɔ 'kwɩɩnkʋbho na, ‑n cɩ gbʋʋnsalɩɛ 'lɩ. 10‑Masa, ‑n ‑ka ‑naa pɔlɛa nɩkplaan pɔɔtɛtɛ ‑ka na, dɛ ‑n plɩ 'lɛ 'kʋnylugolunyɔ, 'nyɩ ‑n ‑ka ‑naa nea cɩsasalɩ 'nyɩ ‑n ‑ka nyɩtɛ na, ‑n lɩ 'lɛ gbʋʋnsalɩɛ. 11‑Masa, ka Zieziewɔlɩa* cla 'lɛ lebhe: Ncaatʋtʋʋntʋa ‑ɔ ‑ka ɔla pɔɔtɛtɛ na, 'ɔ cɩ 'ta ‑zo 'lɩ. 12Na, wɔlɩ bhlogbɩɩ ‑sasalɩ 'ta Zifʋnyɔ* ɩya ɔmɔa ‑ɔ 'ta 'lɛ Zifʋnyɔ ‑glɩ na cɩ. Maa ‑tɛtɛa ‑ka ‑Kwlenyɔ bhlo, 'nyɩ maa ‑tɛtɛa ‑ɔ lɔɔ 'lɛ na, ɔ nʋ maa 'nanɩa. 13‑Masa, Ncaatʋtʋʋntʋa, ‑ɔ ‑cɩ ka 'lɛ ‑Kwlenyɔ 'la 'ŋlɩa la na, ɔ cɩ gbʋʋnsalɩɛ 'lɩ.
14Na, 'nsasa ma cɩ 'kɔɔ 'lɛ lalalɩ bha? Ɩ ‑ka ‑kʋ lebhe ma 'ta ɔla pɔɔtɛtɛ ‑ka na. 'Nyɩ 'nsasa ma cɩ 'ka 'lɛ ɔla pɔɔtɛtɛ 'lɩlɩlɩ bha? Ɩ ‑ka ‑kʋ lebhe ma 'ta ka ɔla wɔlɩ 'nu na. 'Nyɩ 'nsasa ma cɩ 'kaa 'lɛ ɔla wɔlɩa 'nununu bha ɩ ‑ka kʋ lebhe nclɔɔ bhlogbɩɩ 'tɔɔ plici na? 15'Nyɩ 'nsasa ma cɩ 'kɔɔ 'lɛ plici ‑plicili bha? Ɩ ‑ka ‑kʋ lebhe ma 'ta maa lobhu na bha? Dɛ ɩ ‑zieo lebhe: Maa ‑ɔ la 'lɛ 'dɩ 'nanɩ na, maa ‑tete ma ‑ka ‑jaka.
16‑Ma ‑n 'ta maa ‑tɛtɛa ‑ɔ 'ta 'lɛ Dɩnanɩa* 'ma. ‑Masa Izayii yaa 'cla lebhe: ‑Kwlenyɔ, ncaasaa -ɔ ya 'lɛ ‑ala pliciea ‑nʋawlɛ la bha? 17Na, plicie nɩkplaan pɔɔtɛtɛ 'wlʋlʋ 'lɛ, 'nyɩ ɩmɩa ma plici 'lɛ na, ɩ ‑glɩ Klisi 'la wɔlɩa.
18Na, n cla neen lebhe: Ka Zifʋnyaa 'ta 'lɛ ɩmɩ ‑naa 'nu bha? Ma ya 'nu. ‑Masa Zieziewɔlɩa cla lebhe:
Ma ya mala ‑blɩɩzɔan ‑dʋdʋa 'kʋ daa ‑tɛtɛa 'nunu,
'nyɩ mala wɔɔnyɩtʋa ya ‑laagɔzɔn bhuoa 'kʋ 'cɩlɩ.
19Na, n cla neen lebhe: Ka ma 'ta 'lɛ ɩla ‑zɔn 'nu bha? Ma ya 'nu, ‑masa Moyizi yaa tooto 'cla lebhe:
«N cɩ 'ka anyɩ 'lɔlʋa ‑ʋ 'ta 'lɛ 'lɔlʋ ‑glɩ na, 'la woze pɔlɛɛn zʋ,
ɩya n 'ka 'lɔlʋa ‑ʋ 'ta 'lɛ wɔlɩ ‑ci na 'kʋ 'plɩlɩ,
ɩya n 'ka anyɩ dɔgbɛɛn zʋ.»
20Izayii mʋ ‑awlɛ 'kʋklʋʋn 'nyɩ ɔ cla lebhe:
«Maa ‑ɔ 'matɩ 'ta ‑amʋa 'lɛ na, ma yaan 'lɩ,
'nyɩ maa ɔ 'taan 'lɛ lʋʋ ‑ylɛylɛ 'clalɩ na,
n ya 'lɛ maa ncɩ pala.»
21‑Ma Izlayɛlɩnyaa* 'la gbazɔ, Izayii ya 'cla lebhe:
«Zezezeli bhuoa ‑tɛtɛa, 'lɔlʋa ‑ʋ 'ta 'lɛ 'na zʋlɩɛ ‑ka,
'nyɩ ‑ʋ ciliin 'lɛ gbatlɩ na,
n yʋʋ sɔ ‑tla.»
Currently Selected:
Wlɔ 10: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.