Zan 6
6
Zozii ya ncaatabhliwli ‑ngbi nyɩ 'nyɩ
(Mat 14.13-21; Mak 6.30-44; Luk 9.10-17)
1Ɩmɩ ‑naa 'la leen, Zozii ya Galileenyia, ma la ‑awlɛ 'lɛ Tibeliadɩnyia na 'tɔ. 2Ncaabhutukpa gɩlɩa 'mɔɔ, sa ma yaa 'ciinzizielɩlobholia ɔ nʋa 'lɛ 'nyɩ ɔ 'nyɩ 'lɛ guzenyaa na 'lɩ. 3Zozii ya 'kike bhlo 'wlu ‑gblaa 'nyɩ ɔya ɔla gɩlɩnyaa* ya sakʋ. 4Zifʋnyaa* 'la geyliinwlʋfɛtlɩa* yaanɩa cɩmɛ.
5Zozii ya 'wlu 'kʋ 'bhli 'nyɩ ya ncaabhutukpa 'lɩ, ma cia 'mɔɔ 'bhlɩ, 'nyɩ ɔ ya Filipʋ neencla lebhe: «'Ndagbazɩ ‑a ‑cɩ kaa 'lɛ 'flawi ‑pɩalɩ ɩya ncɛlɩ ‑naa 'kaa 'lɛ li bha?» 6Ka ɔ nyɩtɛa 'lɛ ɩmɩ ‑naa ɩya ɔ 'kaa ɔla pɔɔtɛtɛa 'lɩ, sa ɔ ‑cia tooto ɩmɩa ɔ cɩ 'kaa 'lɛ nʋ na. 7Filipʋ yɔɔ neenŋonu lebhe: «Ka ‑a ‑kaa clɩɩ ‑gwlɩɩ 'kʋgba 'la lobholi 'la dluuplʋdala 'la 'flawi ‑pɩa 'titio na, ɩ cɩ 'ta zubholi ɩya nclɔɔ nclɔɔ 'ka 'klipɛ 'bhebhe 'lɩ.» 8Ɔla gɩlɩnyaa 'la nɩkplaan bhlo, Andlee, Simɔɔn Pɩɛlɩ bholi, yɔɔ 'cla lebhe: 9«Ŋodico bhlo ‑kʋ ‑da, ɔ ‑ka 'flawi ‑ngbi ɩya ‑zlii ‑mɔsɔ. ‑Ma, 'Lɩsaa ɩmɩ ‑naa ‑glɩa 'lɛ ncaabhutukpa ‑naa 'la da bha?»
10Zozii ya 'cla lebhe: «A gba ɩya ma kʋsa.» ‑Piti ‑zua 'dɛ 'la ‑dɩklea, 'nyɩ ma ya sakʋ. Ma cɩa ‑sa ncaatabhliwli ‑ngbi 'wlʋ. 11Zozii ya 'flawia 'ma, ɔ ya Laagɔ bhɔlʋ 'nyɩ ɔ ya gba ma yɩɩ ncɛlɩa poli. Ɔ ya ‑zliia ‑ma 'ma 'nyɩ ɔ ya sɛɛ bhlogbɩɩ nʋ. Saa ma 'clalɩa 'lɛ na sɛɛ ɔ nyɩa 'lɛ maa. 12Daa, ma li 'lɛ 'nyɩ ma lo 'lɛ na, Zozii ya ɔla gɩlɩnyaa 'cla lebhe: «A 'wlalɩ 'klia ‑ɩ ‑to 'lɛ na 'wlu ɩya ‑ylɛylɛ 'la 'ka nyumo.» 13Ma ya 'flawua ‑ngbia 'la 'klia ‑ɩ ‑toa 'lɛ ncɛlɩa wlɩɩn na 'kʋbhli 'nyɩ ma ya ‑toku 'kʋgba ‑mɔsɔ yeli. 14Ncɛlɩa 'lɩ 'lɛ 'ciinzizielɩlobholi ‑naa ɔ wlʋ 'lɛ nʋda na 'ciin na, ma ya 'cla lebhe: «‑Anɔ ‑naa, ɔmɔ ‑ɔ ‑glɩ 'lɛ ‑zaagbʋsa Laagɔnekʋnyɩtɛnyɔa*, ‑ɔ ‑cɩ kaa 'lɛ ‑laagɔzɔan ci na.» 15‑Masa Zozii ‑cia 'lɛ sɛɛ lebhe, ka ma cɩ 'kaa 'mɔɔ 'lɛ 'kʋbhli ɩya ma 'kaa 'mɔɔ 'lɛ nyɩbhɛlʋ plee na, ɔ ya dɩpɩa 'wlʋ 'nyɩ ɔmɔ bhlogbɩɩ ya ‑awlɛ 'kikea 'wlu cɔlɔ.
Zozii ya 'nyi 'kʋtaan namʋnʋ
(Mat 14.22-33; Mak 6.45-52)
16Daa 'ylʋ mʋ 'lɛ na, Zozii 'la gɩlɩnyaa* ya 'nyia cɩ wkli. 17Ma ya gɔlʋ bhlo nɩkplaan 'tɔ, ma tɔa 'nyi 'nyɩ ma mʋnʋa Kapɛnayumʋ ‑gbazɩa. 'Tutu yaanɩa tooto pla, ‑ma Zozii 'ta ka kaa maa ŋeni. 18‑Bubo ya 'ma 'nyɩ 'nyia vʋanɩa. 19Ma ya gɔlʋa 'lu, ma ya mʋ ‑aan ‑kiloo ‑ngbi 'bhisa 'kʋ, 'nyɩ ma ya 'lɛ Zozii 'nyia 'kʋtaan namʋnʋda 'lɩ, ɔ cili gɔlʋa 'bɩɩn. Na, ŋanɔ ya maa pla. 20‑Ma ɔ ya maa 'cla lebhe: «‑Amʋ ‑kʋ 'lɛ, ŋanɔ 'la 'bhlaa anyɩ.» 21Na, ma yaa wabha le ma 'kaa 'mɔɔ gɔlʋa nɩkplaan 'ma 'nyɩ 'kplookʋ ʋ ya 'lɛ gbazɩa ma mʋa 'lɛ na, 'la 'nyigboa 'kʋ 'pɛ.
‑Alawleea 'matɩ Zozii
(Mat 14.34-36; Mak 6.53-56)
22Daa ‑zeli ze 'lɛ na, ‑alawleea ‑a ‑toa 'lɛ 'nyigboa 'kʋ na, ya luoli lebhe Zozii ‑ya ɔla gɩlɩnyaa* 'taa nebhlo mʋnʋ, ‑ma gɔlʋa bhlogbɩɩa ‑ʋ ‑kʋa 'lɛ 'dɛ na, ʋmʋ gɩlɩnyaa bhlobhlo pla 'lɛ 'nyɩ ma ya 'lɛ mʋ. 23'Bhlɩmɔɔn, gɔlɩa ‑anɩ ya Tibeliadɩdua 'kʋ 'wlʋlʋ 'nyɩ ɩ ya daa ‑Kwlenyɔa bhɔlʋlʋ 'lɛ Laagɔ 'nyɩ ma lili 'lɛ 'flawia na 'pɛ. 24Na, daa ‑alawleea 'lɩ lebhe Zozii 'ta 'dɛ ‑kʋ 'nyɩ ɔla gɩlɩnyaa ‑ma 'ta 'dɛ kʋ na, ma ya gɔlɩa nɩkplaan 'tɔ 'nyɩ ma yɔɔ Kapɛnayumʋdua nɩkplaan 'matɩkan mʋ.
Zozii ‑glɩ 'lɛ 'flawoa ‑ʋ nyɩ 'lɛ jabhʋa na
25Na, ncɛlɩa ya Zozii 'nyigean 'lɩlɩ, 'nyɩ ma yɔɔ neencla lebhe: «Canyɔ, 'nsasa ‑n nʋnʋa 'lɛ 'nyɩ ‑n ya 'lɛ ‑wɔlʋ ŋeni bha?» 26Zozii ya maa neeŋonu lebhe: «N solu anyɩ, ɩ ‑glɩ ‑nʋawlɛ, ‑n 'taan ka a 'matɩ 'taan 'lɛ, ‑ofi lebhe a ya ghledɩa a 'lɩ 'lɛ 'ciin na 'la ‑zɔn 'nu, ‑ma ka a 'matɩɩn 'lɛ ‑ofi lebhe a ya 'flawi li 'nyɩ a ya lo. 27A 'la nʋa nyɩa ‑ɩ cɩ ka 'lɛ nyumo na, ɩla lobholi, ‑ma a nʋ nyɩa ‑ɩ gwlɛlɩ 'lɛ 'nyɩ ɩ nyɩ 'lɛ jabhʋa ‑ʋ ‑kʋ 'lɛ 'lʋkʋlʋkʋ ɩya 'lʋkʋlʋkʋ na 'la lobholi. Nclɔɔa 'Cʋa* -cɩ kɩɩ 'lɛ anyɩ 'nyɩ, sa ɔmɔ To Laagɔ zʋ 'lɛ ɔla 'kukuunkpoa 'kʋ.» 28Na, ma yɔɔ neencla lebhe: «'Nsasa ‑a ‑cɩ kaa 'lɛ Laagɔ 'la lobholia nʋnʋnʋ bha?» 29Zozii ya maa neenŋonu lebhe: «Laagɔ 'la lobholia, ɩmɩ -ɩ ‑glɩ 'lɛ lebhe a kalɩ ɔmɔa ɔ lobhu 'lɛ na 'la pɔɔtɛtɛ.» 30Ma ya ‑awlɛɔ neencla lebhe: «‑Ma ‑mɔ, ghleda saa ‑n ‑cɩ kaa 'lɛ anyɩ pala ɩya ‑a ka 'lɛ ‑naa pɔɔtɛtɛ ‑kalɩ bha? Lobholi saa ‑n -cɩ kaa 'lɛ nʋ bha? 31Daa ‑a tokadɔcɩa ‑kʋa 'lɛ 'pʋpʋa nɩkplaan na, ma ya nyɩa ‑ɩ wlʋ 'lɛ ‑laagɔɔn na li. Saa ɩ ‑zieo 'lɛ lebhe: Ɔ ya maa 'flawoa ‑ʋ 'wlʋlʋ 'lɛ ‑laagɔɔn na, lida 'nyɩ» na. 32‑Ma Zozii ya maa 'cla lebhe: «N solu anyɩ, ɩ ‑glɩ ‑nʋawlɛ, ‑n 'ta Moyizi 'ta 'lɛ anyɩ 'flawoa ‑ʋ 'wlʋlʋ 'lɛ ‑laagɔɔn na 'nyɩ, ‑ma n To, ɔmɔ ‑ɔ nyɩ 'lɛ anyɩ 'flawoa 'titia ‑ʋ 'wlʋlʋ 'lɛ ‑laagɔɔn na. 33Sa, 'flawoa Laagɔ nyɩ 'lɛ na, ʋmʋ ‑ʋ ‑glɩ 'lɛ ʋmʋa ‑ʋ 'wlʋlʋ 'lɛ ‑laagɔɔn 'nyɩ ‑ʋ nyɩ 'lɛ ncɛlɩ jabhʋa na.»
34Na, ma ya Zozii 'cla lebhe: «‑Kwlenyɔ, 'maa 'nyɩ ‑anyɩ 'flawo ‑naa clɩɩa 'fɩan.» 35Zozii ya maa 'cla lebhe: «‑Amʋ ‑glɩ 'lɛ 'flawoa ‑ʋ nyɩ 'lɛ jabhʋa na. Ɔmɔa ‑ɔ ciliin 'lɛ na, ŋɔmʋ cɩ 'ta kɩnɩɔ 'bhla. Ɔmɔa ‑ɔ ‑ka 'lɛ 'na pɔɔtɛtɛ na, 'nyutʋ cɩ 'ta kɩnɩɔ 'bhla. 36‑Ma n yɩɩ anyɩ solu: Ala 'ci ya 'lɩ, ‑ma a 'ta pɔɔtɛtɛ ‑ka. 37Maa ‑tɛtɛa Toa 'nyɩɩn 'lɛ na, cɩ 'kaan cili 'nyɩ ɔmɔa ‑ɔ ciliin 'lɛ na n cɩ 'tɔɔ ‑jlukuun 'pa. 38Sa ka n 'wlʋ 'lɛ ‑laagɔɔn le n 'ka ɔmɔa ‑ɔ lobhuun 'lɛ na, 'la pɔɔsa nʋ, ‑ma ‑n 'ta ‑amʋ 'titi 'na pɔɔsa. 39'Nyɩ ɔmɔa ‑ɔ lobhuun 'lɛ na, ɔla pɔɔsaa ‑ɩ ‑glɩ 'lɛ lebhe 'na tea ne ɩya maa ɔ 'nyɩ 'lɛ na, bhlogbɩɩ 'la mlɔa, ‑ma bhɩalɩclɩɩa 'kʋ, n ‑bho maa 'kwɩɩn 'kʋ. 40'Lɩka n To 'la pɔɔsaa. Ɔ ‑wa lebhe ncaatʋtʋʋntʋa ‑ɔ lɩ 'lɛ 'Cʋa 'nyɩ zʋɔ 'lɛ ɔla pɔɔtɛtɛa 'kʋ na, ɔ 'lɩ jabhʋa ‑ʋ ‑kʋ 'lɛ 'lʋkʋlʋkʋ ɩya 'lʋkʋlʋkʋ na, ɩya bhɩalɩclɩɩa 'kʋ, n bhoo 'kwɩɩn 'kʋ.»
41Na, Zifʋnyaa* ya Zozii wɔlɩcɩgbalɩɛ bhɔ, sa ɔ yaa 'cla lebhe: «N ‑glɩ 'flawoa ‑ʋ 'wlʋlʋ 'lɛ ‑laagɔɔn na.» 42'Nyɩ ma claa lebhe: «‑N 'ta Zozɛfʋ ‑yowli Zozii bha? ‑A 'ta ɔ to ɩya ɔ 'nɔ ‑ci bha? 'Nsasa ɔ cɩ 'lɛ mino 'nyɩ ɔ cɩ 'lɛ ‑yaka 'cla lebhe ‑laagɔɔn ɔ wlʋ 'lɛ bha?» 43Zozii ya ‑awlɛ wɔɔnyɩtʋ 'ma 'nyɩ ɔ ya maa 'cla lebhe: «A 'nylugolu wɔɔgbalɩɛa! 44Nclɔɔ bhlogbɩɩ cɩ 'ta mino, ɔ 'kaan cili ɩ ‑ka ‑kʋ le Toa ‑ɔ lobhuun 'lɛ na, 'ta kaan ‑mɔ ‑la na, 'nyɩ ‑amʋ n cɩ 'kɔɔ bhɩalɩclɩɩa 'kʋ, 'kwɩɩnkʋbho. 45Laagɔnekʋnyɩtɛnyaa* 'la ‑afluwaa bhlo nɩkplaan ɩ ‑zieo lebhe: Laagɔ -cɩ ka 'lɛ maa ‑tɛtɛa ca. Ncaatʋtʋʋntʋa ‑ɔ po 'lɛ Toa 'nyukwliin, 'nyɩ ‑ɔ ma 'lɛ ɔla wɔlɩa na, ka ‑ɔ ciliin 'lɛ. 46'Nyɩ nclɔɔ bhlogbɩɩ 'ta ka ‑azla Toa 'lɩ, ɩ ‑ka ‑kʋ lebhe ‑n 'ta ɔmɔa ‑ɔ 'wlʋlʋ 'lɛ Laagɔ cɩ na. Ɔmɔ, ɔ ya Toa 'lɩ. 47N solu anyɩ, ɩ ‑glɩ ‑nʋawlɛ, ɔmɔa ‑ɔ ‑ka 'lɛ pɔɔtɛtɛ na, ɔ ‑ka jabhʋa ‑ʋ ‑kʋ 'lɛ 'lʋkʋlʋkʋ ɩya 'lʋkʋlʋkʋ na.
48‑Amʋ, ‑ɔ ‑glɩ 'lɛ 'flawoa ‑ʋ 'nyɩ 'lɛ jabhʋa na. 49'Pʋpʋa nɩkplaan, a tokadɔcɩ ya nyɩa ma la 'lɛ 'manɩa na li, ‑ma ma ya 'ku. 50‑Ma 'flawoa ‑ʋ 'wlʋlʋ 'lɛ ‑laagɔɔn na, ncaatʋtʋʋntʋa ‑ɔ liu 'lɛ na, ɔ cɩ 'tanɩ 'ku. 51‑Amʋ ‑ɔ ‑glɩ 'lɛ 'flawoa ‑ʋ 'wlʋlʋ 'lɛ ‑laagɔɔn 'nyɩ ‑ʋ nyɩ 'lɛ jabhʋa na. Ɔmɔa ‑ɔ -cɩ ka 'lɛ 'flawo ‑naa li na, ɔ cɩ kʋ 'lʋkʋlʋkʋ ɩya 'lʋkʋlʋkʋ. 'Nyɩ 'flawoa n cɩ 'ka 'lɛ 'nyɩ na, ʋmʋ ‑glɩ 'lɛ 'na 'nyɛkɛa n 'nyɩ 'lɛ le ‑laagɔzɔan 'la ncɛlɩa 'ka jabhʋa 'lɩ na.»
52Ɩmɩ ‑naa 'kʋ Zifʋnyaa bhlobhlo 'tɩtɔanɩa wɔlɩ 'nyɩ ma claa lebhe: «'Nsasa ‑anɔ ‑naa cɩ 'lɛ ‑anyɩ ɔla 'nyɛkɛa lida 'nyɩ bha?» 53‑Ma Zozii ya maa 'cla lebhe: «N solu, anyɩ ɩ ‑glɩ ‑nʋawlɛ, ɩ ‑ka ‑kʋ lebhe a 'ta Nclɔɔa 'Cʋa 'la 'nyɛkɛa li 'nyɩ a 'ta ɔla ‑dolua 'mla na, a cɩ 'ta jabhʋa acɩ nɩkplaan kalɩ. 54Ɔmɔa ‑ɔ li 'lɛ 'na 'nyɛkɛa 'nyɩ ‑ɔ mla 'lɛ 'na ‑dolua na, ɔ ‑ka jabhʋa ‑ʋ ‑kʋ 'lɛ 'lʋkʋlʋkʋ ɩya 'lʋkʋlʋkʋ na 'nyɩ ‑amʋ n cɩ 'kɔɔ leenbhɩalɩclɩɩa 'kʋ 'kwɩɩnkʋbho. 55Sa, 'na 'nyɛkɛa ‑glɩ nyɩ 'titi 'nyɩ 'na ‑dolua ‑glɩ 'lɛ nʋ 'titi. 56Ɔmɔa ‑ɔ li 'lɛ 'na 'nyɛkɛa 'nyɩ ‑ɔ mla 'lɛ 'na ‑dolua na, ɔ ‑kʋʋn nɩkplaan 'nyɩ n ‑kʋɔ 'lɛ nɩkplaan. 57Saa jabhʋa Toa ‑ɔ lobhuun 'lɛ na, gba 'lɛ 'nyɩ jabhʋa ‑kʋʋn 'lɛ nɩkplaan na, ɔmɔa ‑ɔ -cɩ ka 'lɛ 'na 'nyɛkɛa li na, n cɩ 'ka gba ɩya ɔmɔ ‑ma, jabhʋa 'kɔɔ nɩkplaan kʋ. 58Na, 'lɩka 'flawoa ‑ʋ 'wlʋlʋ 'lɛ ‑laagɔɔn na. Ʋ 'ta ‑kʋ le ʋmʋa a tokadɔcɩa li 'lɛ na. Maa, ma ya 'ku, ‑ma ɔmɔa ‑ɔ cɩ ka 'lɛ 'flawo ‑naa li na, ɔ cɩ kʋ 'lʋkʋlʋkʋ ɩya 'lʋkʋlʋkʋ.» 59'Lɩka wɔlɩa Zozii 'bhli 'lɛ 'kʋ, daa ɔ ‑kʋa 'lɛ Kapɛnayumʋdua 'la bhibhiepalʋa* ‑zɔn cada na.
Wɔɔnyɩtʋa ʋmʋ ‑ʋ nyɩ 'lɛ jabhʋa
60Ma 'nu 'lɛ ɩmɩ ‑naa na, Zozii 'la gɩlɩnya ‑bhutukpa ya 'cla lebhe: «Wɔɔnyɩtʋ ‑naa 'tɛ! Ncaasaa ‑ɔ -cɩ kʋʋ 'lɛ 'kʋŋonu bha?» 61‑Ma Zozii ‑cia 'lɛ sɛɛ lebhe ɔla gɩlɩnyaa* gbaa wɔlɩ na, ɔ ya maa neencla lebhe: «Wɔlɩ ‑naa, ɩmɩ ‑ɩ 'dɩdɔ 'lɛ anyɩ bha? 62'Nyɩ daa a cɩ 'kanɩ 'lɛ Nclɔɔa 'Cʋa* 'lɩ ɩya ɔ 'ka 'lɛ gbazɩa ɔ ‑kʋa 'lɛ ‑gblaa naa? 63'Wugoa ʋmʋ ‑ʋ nyɩ 'lɛ jabhʋa, 'nyɛkɛa bhlobhlo nʋ 'ta lʋʋ ‑ylɛylɛ. Wɔlɩa n solu 'lɛ anyɩ na, ɩ ‑glɩ 'Wugo ɩya jabhʋ. 64‑Ma bhloonbhloon ‑kʋ anyɩ sidiin ma 'ta pɔɔtɛtɛ ‑ka.» Sa bhɔdaa tooto, Zozii ‑cia maa ‑anʋa ‑ɔ 'taa 'lɛ pɔɔtɛtɛ ‑ka na ɩya ɔmɔa ‑ɔ -cɩ kaa 'mɔɔ 'lɛ 'pɛlʋ zʋ na. 65'Nyɩ ɔ ya ‑awlɛ 'cla lebhe: «'Lɩka wɔlɩa 'la gbʋa n 'cla 'lɛ anyɩ lebhe: Nclɔɔ bhlogbɩɩ cɩ 'ta mino ɔ 'kaan cili ɩ ‑ka ‑kʋ lebhe Toa 'tɔɔ ɩla ‑jiolia 'nyɩ na.»
66‑Ɩ 'manɩɔ 'lɛ 'dɛ na, ɔla gɩlɩnyaa, ‑bhutukpa ya cɔlɔ 'nyɩ ma 'tanɩɔ gɩlɩ. 67Na, Zozii ya 'kʋgba ‑mɔsɔa neencla lebhe: «Anyɩ ‑ma, a ‑wa le a cɩ mʋmʋ bha?» 68Simɔɔn Pɩɛlɩ yɔɔ neenŋonu lebhe: «‑Kwlenyɔ, ncaasaa ‑a -cɩ kaa 'lɛ mʋnʋ bha? ‑Mɔ ‑ka 'lɛ wɔɔnyɩtʋa, ‑ʋ nyɩ 'lɛ jabhʋa ‑ʋ ‑kʋ 'lɛ 'lʋkʋlʋkʋ ɩya 'lʋkʋlʋkʋ na. 69'Nyɩ ‑anyɩ, ‑a ‑ka ‑naa pɔɔtɛtɛ 'nyɩ ‑a ‑ci sɛɛ lebhe, ‑mɔ ‑glɩ 'lɛ Laagɔ 'la ‑Kplɔkplɔnyɔa.» 70Zozii ya maa 'cla lebhe: «‑N 'ta ‑amʋ ‑ɔ 'ta 'lɛ anyɩa 'kʋgba ‑mɔsɔa desla bha? ‑Ma 'bhlɩmɔɔn, bhlo ‑kʋ anyɩ sidiin ɔ ‑glɩ 'devlo!» 71Zuda, Simɔɔn Iskalɩɔtʋ ‑yowli ɔ saa 'lɛ, sa ɔmɔ -ɔ -cɩ kaa 'mɔɔ 'lɛ 'pɛlʋ zʋ, ɔmɔa ‑ɔ ‑glɩ 'lɛ 'kʋgba ‑mɔsɔa 'la nɩkplaan bhlo na.
Currently Selected:
Zan 6: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.