Jeremia 2
2
Ku sa sepahala kwa Isilaele
1Muñ'a Bupilo a ni bulelela, 2ku y'o zibisa mañi ni mañi ya mwa Jerusalema litaba za hae ze li,
“Ni sa hupula mo n'o sepahalela
ha n'o sa li yo munca,
mo n'o ni latela
ha lu sa z'o nyalana.
U ni latelezi mwa lihalaupa,
mwahal'a naha ye n'e sa limiwi.
3Isilaele, u n'o li wa ka.
U n'o li kalulo ye nde ka ku fitisisa
ya mutamuno wa ka.
Ni nyandisize
ba ba ne ba ku utwisize butuku
kamukana,
mi ni ba kenyize mwa maswenyeho.
Ni bulezi, na, Muñ'a Bupilo.”
Sibi sa bo kukw'a Isilaele
4Mu teeleze linzwi la Muñ'a Bupilo, mina baikulu ba Jakobo, mina masika a Isilaele. 5Muñ'a Bupilo u li,
“Bumaswe bo ba fumani ku na
bo kukw'a mina,
bo ba ni hanezi, ki bufi?
Ba lapezi maswaniso a si na tuso,
mi ni bona ha ba sa na tuso.
6Ba ni fulalezi,
niha ni ba punyuhisize mwa Egepita
mi na ba etelela mwa lihalaupa,
mwa naha ya malundu ni misima,
naha ye omile ye na ni kozi,
mo ku si na ya zamaya mwateñi
mi ili mo ku si na ya ina mwateñi.
7Ni ba tisize mwa naha ye nunile,
ku t'o ikola likutulo za yona
ni lika ze ñwi ze nde za yona.
Kono ba til'o silafaza naha ya ka.
Ba sinyize naha ye ne ni ba file.
8Baprisita ha ba si ka buza kuli,
‘Muñ'a Bupilo u kai?’
Bazibi ba mulao ha ba si ka ni ziba.
Babusi ba ni fetuhezi.
Bapolofita ba bulezi ka libizo
la Baale,
mi ba lapezi maswaniso a si na tuso.
Muzeko wa Muñ'a Bupilo ni batu ba hae
9“Mi cwale na, Muñ'a Bupilo,
ni ka tisa taba ya ka
ku lwanisa batu ba ka hape.
Ni ka na ni ba zekisa
hamoho ni bana ba bana ba bona cwalo.
10Mu ye kwa wiko,
mwa soli sa Sipera, mu y'o bona.
Mu lume batu kwa Kedare, kwa upa,
ba y'o talimisisa hande ka tokomelo.
Kana se si cwana
si kile sa ezahala pili, naa?
11Kana ku na ni sicaba
se si kile sa cinca milimu ya sona,
niha i n'e si milimu luli?
Kono batu ba ka ba ni cincize
ka milimu ye si ke ya ba tusa,
na, Mulimu ya n'a ba tiselize libubo.
12Mi cwale, na, Muñ'a Bupilo,
ni laela kuli lihalimu
li nyanganyiswe ki sabo,
li komoke ni ku imbwetukela.
13Batu ba ka ba ezize libi ze peli.
Ba ni tuhezi, na, ni li liwelu-welu
la mezi a mande.
Mi ba ikepezi masima
ili masima a sa yemisi mezi.
Mupuzo wa ku sa sepahala kwa Isilaele
14“Isilaele ha si mutanga.
N'a si ka pepwa a li mutanga.
Cwalehe, kiñi h'a zumiwa ki lila
za hae?
15Li mu honezi sina litau.
Li tiisize ku hona.
Li ezize naha ya hae lihalaupa,
minzi ya hae i fetuhile mabumbuywa,
mi ha ku na ya ina mwateñi.
16Ee, batu ba mwa Nofi ni Takapanesi
ba kwankumuzi katendele ka hae.
17Isilaele, ki wena ya ipizelize zeo!
U ni tuhezi, na, Muñ'a Bupilo,
Mulimu wa hao,
ha ne ni sa ku etelela mwa nzila.
18Cwale s'o sepile ku si fumana
ka ku ya kwa Egepita ki sifi?
Kana u sepile ku y'o nwa mezi
a mwa Nuka ya Nile, nji?
U sepile ku y'o fumanañi
ka ku ya kwa Asiria?
Kana u sepile ku y'o nwa mezi
a mwa Nuka ya Yuferati, nji?
19U ta utwiswa butuku ki bumaswe
bwa hao,
mi ku zwa kwa hao ku na
ku ta ku atula.
Kihona u ta ituta mo bu inezi butata
ni bumaswe
bwa ku tuhela Muñ'a Bupilo,
Mulimu wa hao,
ni ku sa mu saba.
Ni bulezi, na, Muñ'a Bupilo,
Mulimu wa hao.
Isilaele u hana ku lapela Muñ'a Bupilo
20“Isilaele, kwakale u hanile maata
a ka.
U hanile ku ni utwa,
mi wa li, ‘Ha ni na ku ku sebeleza!’
Kono fa lilundu le liñwi ni le liñwi
le litelele,
ni kwatas'a kota ye ñwi ni ye ñwi
ya muluti o munde
u ezize sina lihule.
21Ni ku calile sina kota ye nde
ya veine,
sina peu ye nde ka ku fitisisa.
Kono bona mo s'o inezi!
U s'o swana ni kota ya veine
ye bolile, ye ni sa lati.
22Niha u ka tapa ka lunembwe,
ni ku sebelisa mulola o muñata,
ni sa bona matampa-tampa a milatu
ya hao.
Ni bulezi, na, Mulimu Muñ'a Bupilo.
23U ka bulela cwañi kuli ha u si ka
isilafaza,
kuli ha u si ka lapela Baale?
Bona m'o ezelize sibi mwa musindi.
Bona z'o ezize.
U swana ni mwan'a kamele ya s'a bata
ku pahamwa,
ya mata-mata a nz'a lukuluhile.
24U swana ni mbongolo ye sihali
ye twaezi ku mata-mata mwa naheñi
ha i se i bata poho.
Ki mañi ya ka kona ku i tibela?
Ha ku na poho ye ka ikataza ku i bata,
kakuli i pahamwa ka nako ni nako.
25Isilaele, tokomela mahutu a hao
a si ke a tokwa makatulo,
ni mumizo wa hao
u si ke wa omelela.
Kono u li, ‘Batili! Tuso ki ifi?
Ni latile balimu ba balicaba,
mi ni ta ba kolomana.’
Isilaele u swanela ku utwiswa butuku
26“Sina mo li swabelanga lisholi
ha li swelwi,
ni mina batu ba Isilaele
mu ta swabiswa cwalo, q2 kaufel'a mina,
malena ni bana ba malena,
baprisita ni bapolofita ba mina.
27Kamukan'a mina mu ta swaba,
mina ba ba li kwa kota,
‘Ki wena ndat'a luna,’
ni kwa licwe, mu li,
‘Ki wena m'a luna.’
Ze li ta ezahala
kakuli mu ni fulalezi,
mi ha mu si ka talima ku na.
Kono ha mu zielehile,
mwa ni kupa kuli ni tahe
ni t'o mi pilisa.
28“I kai milimu ye mu ikezelize?
Ha mu zielehile,
i mi pilisehe, haiba i kona.
Juda, u na ni milimu ye miñata
sina minzi ya hao.
29Pilaelo ye mu na ni yona ka na,
ki ifi?
Kaufel'a mina mu ni fetuhezi.
30Ni mi natile,
kono ha ku si ka ba ni tuso.
Ha mu si ka lata ku kalimelwa.
Mu bulaile bapolofita ba mina
sina tau ye buhali.
31Kaufel'a mina, mu teeleze
ka tokomelo se ni bulela.
Isilaele, kana ku wena ni kile na ba
sina naha ye omelezi,
sina naha ye na ni kozi, nji?
Kiñihe, batu ba ka, ha mu li
mu ta ikezeza mo mu latela,
kuli ha mu sa tola mu taha ku na?
32Kikuli musali yo munca a ka libala
mikabo ya hae,
kamba munyaliwa ku libala musisi
wa hae wa sinawenga?
Kono batu ba ka ba ni libezi
ka mazazi a mañata a sa baliwi.
33Mwa ziba hande-nde ku ndongwama
linyazi.
Mane mu se mu lutile basali
ba ba maswe mikwa ya mina.
34Liapalo za mina
li na ni matampa-tampa a mali a batu
ba babotana ba ba si na mulatu,
mali a batu ba ba si ka punya mandu
a mina.
“Kono fahalimw'a lika ze kamukana
mu li,
35‘Ha ni na mulatu.
Kaniti Muñ'a Bupilo
h'a sa ni nyemela.’
Kono na, Muñ'a Bupilo, ni ta ku fa
mulatu
kakuli u bulela kuli ha u si ka eza
sibi.
36Kiñi ha mu fumana bunolo cwalo
kwa ku cinca mikwa ya mina?
Mu ta zwafiswa ki Egepita,
sina mo ne mu zwafiselizwe ki Asiria.
37Mu ta zwa hape ni mwa Egepita,
mu nze mu inyongamezi ka maswabi.
Na, Muñ'a Bupilo,
ni hanile be ne mu sepile,
mi ha mu na ku fumana tuso ku bona.”
Currently Selected:
Jeremia 2: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.