Baatuli 2
2
Lingeloi la Muñ'a Bupilo li taha mwa Bokimi
1Lingeloi la Muñ'a Bupilo la zwa mwa Giligali ku ya kwa Bokimi, mi la y'o li kwa Maisilaele, “Ni mi zwisize mwa naha ya Egepita ni ku mi tisa mwa naha ye ne ni sepisize bo kukw'a mina. Na li, ‘Ha ni na ku sinya bulikani bwa ka ni mina ni kamuta. 2#Mut 34.12-13; Mul 7.2-5 Mu si ke mwa iswala bulikani ni batu ba ba yahile mwa naha mo. Mu swanezi ku yahulula tutala twa bona.’ Kono ha mu si ka eza mo ne ni mi bulelezi. A mu bonehe, ze mu se mu ezize cwale! 3Hakulicwalo, na mi bulelela kuli ha ni na ku leleka batu ba, ha mu nze mu sutelela. Ba ta ba lila za mina, mi milimu ya bona i ta ba muliko o maswe ku mina.” 4Lingeloi ha li se li bulezi cwalo, batu ba Isilaele kaufela ba kala ku lila. 5Kikabakaleo sibaka seo ha si bizwa Bokimi. Ba ezeza Muñ'a Bupilo litabelo hona foo.
Lifu la Joshua
(Josh 24.28-31)
6Cwale Joshua a hasanyeza ba sicaba sa Isilaele mwa libaka za bona, mi yo muñwi ni yo muñwi a y'o luwa naha y'a n'a filwe. 7Maisilaele ba sebeleza Muñ'a Bupilo, Joshua ha n'a sa pila, mi ni mwamulaho a lifu la hae, ba zwelapili ba nze ba mu sebeleza cwalo ha ne ku sa pila bazamaisi ba sicaba ba ba ne ba ziba linto kaufela ze ne ba ezelizwe Maisilaele ki Muñ'a Bupilo. 8Mutang'a Muñ'a Bupilo, yena Joshua mwan'a Nuni, a shwa a nz'a na ni lilimo ze mwanda ka ze lishumi. 9#Josh 19.49-50 A bulukiwa mwa sibaka sa hae, mwa naha ya habo, ili mwa Timinati-Heresi, mwa naha ya malundu ya Eferaimi, kwa mutulo wa Lilundu la Gaashi. 10Litaka za Joshua kaufela ba shwa, mi ba ba ba tatama ba kala ku libala Muñ'a Bupilo ni lika z'a n'a ezelize Maisilaele.
Maisilaele ba tuhela ku sebeleza Muñ'a Bupilo
11Cwale sicaba sa Isilaele sa foseza Muñ'a Bupilo, mi sa sebeleza bo Baale. 12Ba tuhela ku sebeleza Muñ'a Bupilo, Mulimu wa bo kukw'a bona, yena Mulimu ya n'a ba zwisize mwa naha ya Egepita. Ba kala ku sebeleza milimu i sili, milimu ya batu ba ba ne ba pila ni bona. Ba kubamela milimu yeo, mi ba nyemisa Muñ'a Bupilo. 13Ba tuhela ku sebeleza Muñ'a Bupilo, mi ba sebeleza bo Baale ni Ashitaroti. 14Muñ'a Bupilo a nyemela hahulu Maisilaele, mi a tuhela lila za bona li ba lwanisa ni ku ba uzweza. A tuhelela lila ze ne ba beile mwahali, li ba tula, mi Maisilaele ba palelwa ku isileleza. 15Ka nako kaufela ha ne ba y'o lwana, Muñ'a Bupilo n'a ba fulalela, sina mw'a n'a bulelezi kuli u ta eza cwalo. Ba kena mwa butata bo butuna.
16Cwale Muñ'a Bupilo a fa Maisilaele bazamaisi ba ba na ni maata, ba ba ba pilisize ku ba ba ne ba ba lwanisa. 17Kono ha ba si ka isa pilu kwa bazamaisi bao. Ha ba si ka sepahala ku Muñ'a Bupilo, mi ba sebeleza milimu i sili. Bo ndat'a bona ne ba mamezi litaelo za Muñ'a Bupilo, kono lusika lo lwa tuhela kapili ku eza cwalo. 18Nako kaufela Muñ'a Bupilo, ha n'a ba fa muzamaisi, ki yena ya n'a mu tusa ni ku pilisa sicaba kwa lila za sona muzamaisi yo ha n'a sa pila. Muñ'a Bupilo n'a ba shwela makeke kakuli ne ba tonga mwa butata ni manyando a bona. 19Kono sicaba ne si eza kuli muzamaisi h'a shwa, sona ne si kutela mwa mikwa ya sona ya kale, mi ne si eza ze maswe ku fita ze ne ba ezize ba pili. Ne ba latelela milimu i sili, ba i sebeleza ni ku i lapela. Ne ba tundamena ka toho-tata ku ya ka linzila za bona ze maswe. 20Muñ'a Bupilo a nyemela hahulu Isilaele, mi a li, “Sicaba se, si sinyize bulikani bo ne ni laezi bo kukw'a bona kuli ba bu buluke. Kono ba palezwi ku ni utwa. 21Kabakaleo ha ni sa na ku leleka sicaba nihaili si li siñwi ku ze siilwe mwa naha ki Joshua h'a shwa. 22Ka mukwa wo ni ta bona kamba Maisilaele ba ta ni latelela, sina mo ne ba ezelize bo kukw'a bona.” 23Cwale Muñ'a Bupilo kih'a tuhela macaba a n'a si ka ba kale mwatas'a Joshua, mi h'a si ka a leleka kapili.
Currently Selected:
Baatuli 2: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.