Jakobo 5
5
Kelezo kwa bafumi
1Cwale, mu ni teeleze, mina bafumi! Mu lile mi mu bokolole kabakala manyando a' ka mi tahela! 2#Mat 6.19 Bufumu bwa mina bu bolile, mi liapalo za mina li cilwe ki mafele. 3#Litu 29.10-12 Gauda ya mina ni silivela li tezi mafumi, mi mafumi ao a ta paka za mina kakuli a ta ca nama ya mina sina mulilo. Mu kubukanyize bufumu mwa mazazi ao a mafelelezo. 4#Mul 24.14-15 Ha mu si ka holisa batu ba ba sebeza mwa masimu a mina. A mu utwe lipilaelo za bona! Lililo za ba ba kutula lico za mina, li fitile mwa lizebe za Mulimu, Mulena ya Maata! 5Bupilo bwa mina, mwa lifasi, i n'e li bwa ku ikola ni minyaka. Mu inuniselize feela ku bulaiwa. 6#But 2.10-20 Mu atuzi ni ku bulaya mutu ya n'a si na mulatu, mi h'a si ka hana.
Pilu-telele ni tapelo
7Banabahesu, mu be ni pilu-telele ku fitela Mulena a taha. Mu bone pilu-telele ya mulimi, h'a litezi simu ya hae ku tisa kutulo ya butokwa. U libelezi ka pilu-telele ku fitela litabula, pula ya masehulo ni ya mafelelezo ha i se i nelile. 8Ni mina cwalo mu be ni pilu-telele. Sepo ya mina i tiye kakuli lizazi la ku taha kwa Mulena li se li li fakaufi.
9Mu si ke mwa bilaela yo muñwi ka yo muñwi, banabahesu, kuli Mulimu a si ke a mi atula. Muatuli u fakaufi, mane u s'a itukiselize ku kena! 10Banabahesu, mu hupule bapolofita ba ba bulezi ka libizo la Mulena. Mu nge mutala wa bona, ba ba bile ni pilu-telele mwahal'a butata ni manyando. 11#Job 1.21-22; 2.10; Lipi 103.8 Luli ba na ni litohonolo kakuli ba itiizise. Mu utwile ka za pilu-telele ya Jobo, mi mwa ziba mw'a mu ezelize Mulimu kwa mafelelezo. Kakuli Mulena u tezi makeke ni mukekecima.
12 #
Mat 5.34-37
Sihulu, banabahesu, mu si ke mwa konka, nihaikaba ka lihalimu, kamba ka lifasi, kamba ka sika sifi ni sifi. Mu bulele feela, mu li, “Eeni” ha mu itumelela, ni “Batili” ha mu latula. Mu tokomele kuli mu si ke mwa kena mwa katulo ya Mulimu.
13Kana ku na ni yo muñwi ku mina ya zielehile? A lumbeke ka lipina. 14#Mar 6.13 Kana ku na ni ya kula? A bize bahulu ba keleke ba ba ka t'o mu lapelela, ni ku mu toza oli ka libizo la Mulena. 15Tapelo yeo, ha i eziwa ka tumelo, i ta pilisa mutu ya kula. Mulena u ta mu folisa, mi libi z'a ezize u ta li swalela. 16#Litu 4.26 Hakulicwalo, mu bulelelane libi za mina, mi mu lapelelane kuli mu foliswe. Tapelo ya mutu ya lukile i na ni maata hahulu. 17#1 Male 17.1; 18.1; Litu 48.2, 3 Elia ne li mutu ya n'a swana ni luna. A lapela ka pilu ya hae kaufela kuli pula i si ke ya nela, mi ya nga lilimo ze talu ni likweli ze silezi i sa neli. 18#1 Male 18.42-45 A lapela hape. Pula ya suluha, mi lifasi la melisa lico.
19Banabahesu, yo muñwi wa mina a keluha mwa niti, mi yo muñwi a mu kutise. 20#Tob 12.9; Mash 10.12; 1 Pit 4.8 Mu hupule kuli mutu ufi ni ufi ya sikulula muezalibi mwa bumaswe bwa hae, u ta pilisa moya wa muezalibi yo kwa lifu, mi libi ze ñata li ta swalelwa kabakala hae.
Currently Selected:
Jakobo 5: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.