1 Timotea 2
2
Tapelo mwa Keleke
1Taba ya pili ye ni kupa kikuli likupo ni litapelo li fitiswe ku Mulimu bakeñisa batu kamukana. Ba lapelelwe ka buitumelo. 2Ku lapelelwe malena ni babusi kamukana kuli lu kone ku pila ka buiketo ni kozo, lu nze lu itingile ku Mulimu mi lu li ba ba ikuteka kwa maneku kaufela. 3Ki yona nto ye nde ye tabisa Mulimu, Mupilisi wa luna. 4N'a bata kuli batu kaufela ba piliswe mi ba zibe niti. 5Mulimu ki a li muñwi, mi ku na ni a li muñwi feela ya kopanya Mulimu ni batu hamoho, yena mutu yo, ili Jesu Kreste. 6N'a itobohile ku lukulula batu kaufela. Ki bona bupaki bo bu tile ka nako ye swanela, bwa kuli Mulimu u bata batu kamukana kuli ba piliswe. 7#2 Tim 1.11 Le, ki lona libaka ha ni lumilwe ku ba muapositola ya swanezi ku luta Balicaba litaba ze amana ni tumelo ni niti. Ha ni pumi. Ni bulela niti!
8Cwale, ni lata kuli kai ni kai banna ba lapele. Kono ba swanezi ku ba banna ba ba ipeile ku Mulimu, mi ba ba kona ku yemisa mazoho a bona ka tapelo ku si na bunyemi kamba likañi mwa lipilu za bona. 9#1 Pit 3.3 Hape, ni lata kuli basali ba apale ka mukwa o swanela, ili ka mukwa o bonisa kutwisiso ni buikokobezo. Ba si ke ba ikabisa ka ku comateka mishomo ye miñata mwa milili, ka ku apala likabiso za gauda, za macwe a butokwa kamba liapalo ze ca mali a mañata. 10Kono ba ikabise ka likezo ze nde, kakuli ki zona ze lukela basali ba ba ipiza balumeli. 11Basali ba itute, ba nze ba kuzize, mi ba ishuwile. 12Ha ni lumeleli basali ku luta kamba ku ba ni maata fahalimw'a banna. Ba swanezi ku kuza. 13#Sim 2.7, 21-22 Kakuli Adama n'a bupilwe pili, mi kihona ku taha Eva. 14#Sim 3.1-7 Mi hape, ha si Adama ya n'a pumilwe. Ki yena musali ya n'a pumilwe, mi a tula mulao wa Mulimu. 15Kono musali h'a na ku ba mwa kozi ka nako ya ku pepa, haiba a tundamena mwa tumelo ni lilato, mi a ikenisa ka buiswalo.
Currently Selected:
1 Timotea 2: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.