Proverbionan 1
1
1Ata e proverbionan di rei Salomon#1 Reinan 4:32; Proverbionan 10:1; 25:1 di Israel, yu di David. 2E proverbionan akí ta duna bo sabiduria di bida#Hakobo 1:5; 3:13-17 i ta koregí bo manera di biba; nan ta profundisá bo komprondementu di tópikonan difísil; 3nan ta prepará bo pa haña e korekshon ku ta kumbiní bo pa biba un bida ku ta bon den bista di Dios i di hende, pa trata tur hende sin hasi distinshon i pa ta un hende rekto. 4E proverbionan akí ta siña hende, ku no tin eksperensia den kosnan di bida, konosé bida. Esun hóben ta haña konosementu i ta siña kon skohe bon kaminda. 5Tambe e proverbionan akí ta laga e hende ku ta sabí kaba amplia su konosementu i esun ku ta inteligente kaba nan ta duna direkshon 6pa komprondé kosnan difísil manera proverbio, wega di palabra, charla i charada di hendenan sabí. 7Pa bo bira sabí bo mester tin rèspèt di Dios#Job 28:28; Salmo 111:10; Proverbionan 9:10; 15:33; Sirag 1:14 promé. Esun ku no tin rèspèt di Dios ta menospresiá sabiduria di bida i e no ta aseptá korekshon tampoko.
8Yu, tende di bo tata i di bo mama,
no rechasá nan palabranan yen di sabiduria.
9Pasobra e palabranan ei ta drecha bo karakter
manera un kadena òf un korona
ta drecha aparensia di un hende.#Proverbionan 6:20-21; Sirag 6:29
10Yu,
si pekadónan ke kalanchá bo,
no tuma aden!#Salmo 1:1
11Si nan bisa: ‘Ban ku nos.
Ban mata un hende.
Ban ataká un inosente djis pa prèt.
12Ban no!
E n' ta skapa,
ban mand'é bibu reino di morto.
Ni su sombra nan lo no mira mas.
Ban yud'é bira skina.
13Nos lo haña tur sorto di rikesa;
nos kasnan lo ta yen di kos presioso.
14Djòin nos,
samsam ta parti e botin.’
15Yu,
keda leu,
kita for di nan kaminda.
16Pasobra ta gusta nan ta gusta maldat,
nan ta kla pa mata hende.#Isaías 59:7; Romanonan 3:15
17Meskos ku un para pa motibu di hamber tòg ta bula drenta un kui
ku el a mira nan pone,
18asina nan pashon ta laga nan kai
den e trampa ku nan mes a pone.
Nan a sali pa drama sanger di otro hende,
pero ta nan mes sanger ta kore.
19Asina ta pasa ku tur
ku hasi nan mes riku na un manera deshonesto:
ta nan mes graf nan ta koba.
20Sabiduria ta grita,
pafó riba kaya,
i den parke e ta lanta su bos.
21Na porta di siudat,
meimei di tur boroto,
e ta grita bisa e hendenan:#Proverbionan 8:1-3; Sabiduria 6:12-16
22Boso sin eksperensia di bida,
kuantu tempu mas boso ta keda gusta ineksperensia?
Kuantu tempu mas esnan ku ta bira lomba pa bondat
ta sigui bira lomba?
I e kènsnan?
Kuantu tempu mas nan ta odia konosementu?
23Si bo a bai tras di mi atvertensia,
lo mi a habri mi kurason pa bo
i laga bo sa mi pensamentu.
24Pero pasobra bo a rechasá mi, ora mi a yama,
i ningun hende no a paga atenshon, ora mi a saka man,
25pasobra bo a rechasá mi bon konseho
i no ker a tende di atvertensia,
26p'esei lo mi hari bo mizeria tambe;
hasi chèrchè ora bo drenta pániko.
27Ora bo drenta pániko,
ora mizeria ataká bo,
diripiente,
manera un tempestat,
manera un warwarú
i bo pèrdè rosea,
sustu kohe bo kurpa,
28e ora ei, sí e ora ei sí lo bo grita yama mi,
pero kontestá lo mi no kontestá,
e ora ei lo bo buska mi,
pero keda sin haña mi.
29Pasobra boso tabata rechasá tur konosementu
i no tabata mustra di tin rèspèt di SEÑOR.
30Boso no ker a tuma mi konseho
i tabata despresiá mi korekshon.
31P'esei boso lo kosechá loke boso a sembra,
e skupi ku boso a skupi na shelu, ta kai den boso mes kara.
32Pasobra terkedat ta pone hende ku no tin eksperensia di bida bai pèrdí
i indiferensia ta pone hende ku no tin rèspèt di Dios keda destruí.
33Pero esnan ku ta tende di mi por biba trankil,
nan no tin nodi di tin miedu ni sustu.
Currently Selected:
Proverbionan 1: BPK13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013