Yoel 1
1
1Esaki ta palabranan di SEÑOR dirigí na Yoel, yu hòmber di Petuel.
Plaga di dalakochi ta anunsiá dia di SEÑOR
2Skucha mi, ansianonan,
habri orea, habitantenan di Huda:
Algu asina a yega di sosodé den boso bida
òf den tempu di boso antepasadonan?
3Konta boso yunan e kos akí,
i laga boso yunan konta nan yunan,
i eseinan atrobe konta nan yunan:
4Dalakochi a baha riba kunukunan,#Deuteronomio 28:38; Yoel 2:2-11; Amos 4:9; 7:1
trupa tras di trupa.
Loke esun trupa a laga, e otro a fretu;
nada no a sobra.
5Lanta fo'i soño, burachénan, i yora,
keha, boso tur, bebedónan di biña:
sin drùif lo no tin biña nobo pa boso!
6Un ehérsito di dalakochi,
fuerte i numeroso,
a invadí mi pais;
nan djentenan i nan kakumbeinnan, ta manera di leon.#Revelashon 9:8
7Nos matanan di wendrùif ta keda destruí,
nos palunan di figo ikou;
asta e kaska nan a kome kita afó,
e ta plamá tur kaminda,
e takinan a keda blanku blanku.
8Sea tristu, mi pueblo,
manera un muhé yòn ta bisti rou
pa e hòmber ku e tabata bai kasa kuné.
9No tin hariña mas, ni biña,
pa ofresé SEÑOR den tèmpel;
e saserdotenan, ku ta sirbi SEÑOR, ta tristu.
10Kunukunan a keda destruí,
tera ta na luto den tristesa.
A destruí e grano,
drùifnan a para seka,
zeta di oleifi a disparsé.
11Sinti boso destrosá, kunukeronan,
lamentá, plantadónan di wendrùif:
no tin trigo, no tin sebada,
pasobra kosecha a bai pèrdí.
12E mata di wendrùif a marchitá,
e palu di figo a seka.
Granatapel, palu di dadel, palu di aprikòt,
tur palu di fruta a seka.
Sí, legria di hende a kaba na nada.#Hoséas 4:3; Amos 4:6-9
13Bisti boso paña di rou i sea tristu, saserdotenan,
lamentá, boso ku ta hasi sirbishi na altá,
bisti boso paña di rou asta anochi,
boso ku ta sirbi mi Dios:
no tin grano ni biña
pa ofresé boso Dios den tèmpel.
14Proklamá un tempu di yuna,
yama un reunion solèm,
reuní ansianonan,
reuní tur habitante di pais,
den tèmpel di SEÑOR, boso Dios,
i pidi SEÑOR yudansa.
15Un kos ta warda nos
awor ku dia di SEÑOR ta yega serka!
E ta bini ku destrukshon,
mandá pa Todopoderoso.#Isaías 13:6; Ezekiel 30:2-3; Sofonías 1:14-18
16A destruí nos kuminda nos dilanti,
legria i kantamentu a disparsé
for di tèmpel di nos Dios.
17Simia ta seka den tera,
mangasina di grano i depósitonan ta dekaí,
pasobra no tin grano mas.
18Tende e bestianan grita,
nan ta dualu rònt,
pasobra no tin yerba mas pa kome;
asta e karnénan i kabritunan ta sufri.
19Abo mi ta invoká, SEÑOR,
pasobra kunukunan di yerba a kima seka,
palunan a kima.
20Asta e bestianan di mondi ta invoká Bo,
pasobra tur roi ta seku,
kunukunan di yerba a kima seka.#Amos 7:4-5
Currently Selected:
Yoel 1: BPK13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013