Jeremia 1
1
Lohateny
1Tenin’i Jeremia zanak’i Helkiasy, iray amin’ireo mpisorona any Anatôta#1,1 Anatôta: tanàna ao amin’ny zaratanin’i Benjamina, izay nomena honenan’ny mpisorona (Jôs 21,18). Tao no nahaterahan’i Jeremia (toko 11,21)., amin’ny tanin’i Benjamina. 2Natao taminy ny tenin’i Iaveh tamin’ny andron’i Josiasa, zanak’i Amôna, mpanjakan’i Jodà, tamin’ny taona faha-13 nanjakany; 3sy tamin’ny andron’i Jôakima, zanak’i Josiasa mpanjakan’i Jodà, hatramin’ny farany taona faha-11, nanjakan’i Sedesiasa zanak’i Josiasa, mpanjakan’i Jodà, hatramin’ny namaboana an’i Jerosalema, tamin’ny volana faha-5#1,3 Volana faha-5: izany no volana faha-5n’ny taona nifindrana ho any amin’ny fahababoana..
1. TENIN’ANDRIAMANITRA NAMELY AN’I JODÀ SY I JEROSALEMA
1. Tamin’ny andron’i Josiasa
Ny niantsoana an’i Jeremia
4Tonga tamiko ny tenin’i Iaveh, nanao hoe:
5«Efa fantatro talohan’ny namoronana anao
tao am-bohoka ianao,
ary raha mbola tsy naloaky ny kibon-dreninao ianao,
dia efa nohamariniko;
notendreko ho mpaminany ho an’ny firenena.»
6Dia hoy izy:
«Indrisy, Iaveh Tompo ô,
tsy mahay miteny aho fa zaza#1,6 Zaza: Amin’ny Israelita, dia atao zaza, raha toa mbola tsy nahatratra 30 taona; i Jeremia angamba tamin’izay dia efa nahatratra 20-25 taona eo ho eo..»
7Fa hoy Iaveh tamiko:
«Aza manao hoe: ‹Zaza aho›,
fa handeha ho any amin’izay rehetra anirahako anao ianao,
ary hilaza izay rehetra handidiako anao.
8Aza manana izay tahotra akory ianao
eo anatrehan’izy ireo,
fa momba anao hamonjy anao Aho,»
- teny marin’i Iaveh! -
9Dia naninjitra ny tanany i Iaveh,
ka nanendry ny vavako, ary hoy i Iaveh tamiko:
«Indro ataoko eo am-bavanao ny teniko;
10ary indro aho anio manendry anao,
ho eo amin’ny firenena amam-panjakana,
hanongotra sy hanjera,
hamery sy handrava,
hamboly sy hanorina#1,10 Hanongotra sy hanjera... hamboly sy hanorina: Famaizana sy faharavana no hotorin’i Jeremia, ary koa fanamboarana indray sy fanomezam-pahasoavana..»
11Dia izao no tenin’i Iaveh natao tamiko:
«Inona no hitanao, ry Jeremia?»
Ary hoy aho:
«Mahita rantsan’ny amandie#1,11 Rantsan’ny amandie: Ny amandie no hazo mamòny voalohany amin’ny lohataona, ka oharina aminy ny mpiambina. aho.»
12Ka hoy i Iaveh tamiko:
«Nahita tsara ianao, fa mahatsiaro
ny teniko#1,12 Mahatsiaro ny teniko, na hoe mitandrina ny teniko. aho, hanatanterahako azy.»
13Dia tonga tamiko fanindroany ny tenin’i Iaveh nanao hoe:
«Inona no hitanao?»
Ary hoy aho:
«Mahita vilany mangotraka#1,13 Vilany mangotraka. Ny sasany milaza fa i Jodea na i Jerosalema ihany izany, ny sasany kosa milaza fa i Nabokodonozora mbamin’ny tafiny. aho;
ary avy any amin’ny lafiny avaratra no iaviany#1,13 Avaratra no iaviany: Na dia ao atsinanan’i Jerosalema aza no nisy ny Kaldeanina, dia avy avaratra no iaviany sahala amin’ny Asirianina raha avy hanafika an’i Palestina, satria ny efitr’i Arabia dia tsy azon’ny tafika aleha..»
14Ka hoy i Iaveh tamiko:
«Avy any avaratra no hiroatan’ny loza
hanjò ny mponina rehetra amin’ny tany.
15Fa inty aho miantso ny fianakaviana rehetra
amin’ny fanjakana any avaratra,
- teny marin’i Iaveh. -
Ka ho avy izy, ary samy hametraka ny seza fiandrianany
eo am-pidiran’ny vavahadin’i Jerosalema,
eo anoloan’ny mandany rehetra manodidina,
ary eo anoloan’ny tanànan’i Jodà rehetra.
16Dia hamoaka ny didim-pitsarana hanameloka azy ireo Aho,
noho ny haratsiany rehetra, fa nandao Ahy izy ireo,
dia nanolotra emboka tamin’andriamani-kafa,
ary nivavaka tamin’ny asan-tanany.
17Fa ianao kosa: misikìna,
mitsangàna ary lazao aminy
izay rehetra handidiako anao.
Aza mangovitra eo anatrehany,
fandrao ataoko mangovitra eo anatrehany ianao.
18Indro Aho anio manao anao ho tanàna mimanda,
andry vy ary manda varahina,
eo anatrehan’ny tany rehetra,
eo anatrehan’ny mpanjakan’i Jodà,
sy ny mpanapaka eo aminy,
eo anatrehan’ny mpisorony, eo anatrehan’ny vahoakany.
19Hiady aminao izy ireo,
nefa tsy hahefa na inona na inona aminao,
satria momba anao Aho,
hamonjy anao Aho; - teny marin’i Iaveh.-»
Currently Selected:
Jeremia 1: MBC
Highlight
Share
Copy
Want to have your highlights saved across all your devices? Sign up or sign in
Baiboly Katolika © La Société Biblique Malgache, 2003.