Nehemiya 1
1
Fare za̰ya ge Nehemiya ne Ursalima pal
1Fare ge Nehemiya ge Hakaliya vya ne.
Saba Kislev go, del wara azi ge gan Artazerzes ne zi, mbi ne suwal ga̰l Susa go. 2Mbi sele Hanani ma ne naa a̰me ma mbo ne suwal Yuda ya. Mbi ele nama fare ne Yuda ge ne gá suwal ya be ge a pál nama to ma, ne suwal Ursalima pe me. 3A jan mbi go: «Naa ge a ne gá suwal ya be ge a pál nama to ma, a ya kḭḭmi ge ɓaŋlaŋ ne saaso zi. Ursalima gulum ga̰l swaga a̰me ma gá pṵṵl, na viya̰ wak ga̰l ma tilla swaga me.»
Kaɗeya ge Nehemiya ne
4Swaga ge mbi ne za̰ fare mbe ma no, mbi kat seɗe fyalla, dam ma gḛ mbi ka ke kḭḭmi, mbi ka wan asiyam, mbi ka kaɗe Dok ge ne digi zi ya. 5Mbi jan go:
«O Bage ɗiŋnedin, Dok ge ne digi zi ya, Dok ge ɓaŋlaŋ, na ge naa ne sya na vo, ge ne koy wak tuli, ne kwa a̰se ge na ne, ne nama ge nama laar ne wa̰ na ma, ge ne koy na wak honna ma. 6Só mo togor ya se, dó mo ndwara ya mbi pal, za̰ kaɗeya ge mo dore ne. Se no, mbi kaɗe ya go ɗaal ne gyala, ne mo dore Israyela vya ma pe. Pore sone ge i ge Israyela vya ma ne ke mo ndwara se, i ne i bá ma, i ke sone. 7I ke sone ge kakatak mo ndwara se, i be koy mo wak honna ma, ne mo eya ma, ne mo njaŋgeya ma ge mo ne ho̰ mo dore Musa to. 8Mbi kaɗe mo, dwa ne fare ge mo ne jya̰ mo dore Musa, mo jya̰ go: ‹Kadɗa aŋ saŋge mbi aŋ go̰r ya, mbi mbo ɓarse aŋ pehir ge ɗogle ma buwal zi#Lev 26:33, Dwa 4:27, 28:64.#Dwa 30:1-5.. 9Amma kadɗa aŋ gwan ja mbi ta, aŋ koy mbi wak honna ma, ne ke mborra nama pal me, ko a pá aŋ mbo suwar pe ndegɗe ya puy ɗe, mbi mbo kote aŋ ya ge suwal ge mbi ne tá na go mbi dḭl mbo ka tolla na go go.› 10I mo dore ma, ne mo naa ma ge mo ne zu i ne tok pool ge mo ne ne. 11O Bageyal, só mo togor za̰ kaɗeya ge mo dore ne, ne kaɗeya ge mo dore ge ne sya mo vo ma ne. Hage mo dore viya̰ ma̰ no, na ɓó kwa a̰se ne ndu mbe ta!»
Ago mbi ka ndu ge ne tyare gan jiya̰l wak.
Currently Selected:
Nehemiya 1: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.