2Korinte ma 1
1
Wak sanna
1Bulus, bage temeya ge Kris Jeso ne, ne laar ɓyareya ge Dok ne ta, ne ná vya Timotawus. Ne ɓase ge Dok ne ma ge ne suwal Korinte go pe, ne naa ge mbegeya ge ne suwal Akaya go ma pet pe me. 2Kwa a̰se ne katɗa halas ge Dok ge nee Bá ne, ne ge Bageyal Jeso Kris ne na ka poseya ne aŋ.
Gugu gwanna ge Bulus ne hon Dok
3Uwareya hon Dok, ge nee Bageyal Jeso Kris Bá, ne Báá ge kwa naa a̰se, ne Dok bage iyal naa laar pet. 4Na sḛ bage ne iyal nee laar nee yál ma zi ne pet, ne laar iyalla ge nee ne ɓo na ne Dok ta, go no nee ba ɓol pool ge iyal naa ge ne yál zi ma pet laar me. 5Ago dimma ne yál njotɗa ne zuli nee pal ceɗed Kris zi go, go no me, nee ɓol laar iyalla zuliya ceɗed ne Kris ta no me. 6Kadɗa i njot yál ya go, da ne laar iyalla ge aŋ ne pe, ne máya ge aŋ ne pe me. Kadɗa i ɓó laar iyalla, da ne iyal aŋ laar pe, ne da pe aŋ wa̰ ta yál njotɗa ma zi. 7Swaga ge i ne dwat aŋ pal, i haŋgal ma e se, i da ne na kwarra go, ne jo̰ aŋ var yál njotɗa ge i ne, aŋ mbo ame laar iyalla ge i ne me.
8Ná vya ma, i ɓyare ke aŋ kwarra go, i ɓo yál ma gḛ ge be to ge suwal Asiya go, yál njotɗa mbe ma ɓyare waɗe i pal, yál mbe ma zi i dwa go i ma̰ ban i o̰yom ma. 9I dwa go a kun sarya siya ya i pal kun zo. A go no, ndwara go i ka̰ i saareya ma i sḛ ma pal to, amma Dok ge ne tan naa ge siya ma pal. 10A na zu i ne siya mbe no zi ya ne, mbo gwan zur i ta uwale. I da ne jobreya mbe no ne na pal, na sḛ mbo gwan zur i ta uwale. 11Aŋ me, aŋ mbo mbar i ne kaɗeya ge aŋ ne ma, ne da pe bobo ge O̰yom ne ge i ne ɓol na ne kaɗeya ge naa gḛ ne ta, na saŋge kaŋ ge gwan ne gugu hon Dok ne i pe naa gḛ ta me.
Bulus er dwatɗa ge mbo suwal Korinte
12Kaŋ ge ne é i uware ta, dimma ne haŋgal ge i ne ne ke sayda go, i ka ke mborra naa ge dunya ma buwal zi, amma aŋ sḛ ma ta cwacwagat zi ne fareba ge Dok zi, a be zwama ge naa dasana ma ne zi to, amma kwa a̰se ge Dok ne zi. 13I njaŋge aŋ fare a̰me ge ɗogle to, a na ge aŋ ne isi na, ge aŋ ne wan na pe tyatyat me, mbi dwat go aŋ mbo wan na pe tyatyat, 14ne jo̰ aŋ gale wan i fare pe tyatyat to ɗe, dam gwanna ge nee Bageyal Jeso ne go, aŋ mbo kat i kaŋ uware ta, i sḛ ma mbo kat aŋ kaŋ uware ta me.
15Da ne pe no, mbi ka ne saareya go, swaga ge mbi ne mbo det ja aŋ ta, mbi mbo gwan é aŋ ɓol kwa a̰se ge Dok ne ge ndwara azi. 16Mbi ɓyare go, ne aŋ ta mbi ba ɗage mbo suwal Makedoniya, ne Makedoniya ya, mbi ba gwan mbo ya aŋ ta, ne da pe aŋ ba hon mbi kaŋ ma ge ndwara mbyat mbi mbo suwal Yahudiya. 17Swaga ke dwatɗa mbe no go, mbi be dwat ɗugul to ɗaa? Ko dwatɗa ge mbi ne mbe ma no mbi ke nama duur pal ɗo, mbi ba kat ne vinna ge «o̰» ma ne «to» jwak mbi zi ɗaa? 18Amma Dok a fareba, fare janna ge i ne ma aŋ ta a be «o̰» ma ne «to» jwak to. 19Ago Dok vya, Jeso Kris, na ge i ne Silvanus ma ne Timotawus ma ne waage aŋ na be kat «o̰» ma ne «to» jwak to, amma na zi a «o̰» ne ɗeŋgo. 20Ago wak tuli ge Dok ne ma pet a ɓo vinna «o̰» na zi, da ne na ta uwale, ne gwan ne Dok vinna «A go» no ne uware na pe. 21Ndu ge ne hon i pool mḛya ndiŋ poseya ne aŋ Kris zi, ne na ge ne naŋge i, a Dok. 22A na sḛ e na logom i ta ne, a na ho̰ O̰yom nee dulwak ma zi ne ndwara ke nee kwarra go na mbo hon nee kaŋ kwaɗa ma.
23Dok a mbi bage sayda ne, kadɗa mbi kun hale, golgo na hṵ mbi uzi! Mbi be gwan’a suwal Korinte go to ndwara go na kaage mbi e dṵṵl aŋ pal to. 24I ɓyare e pool a̰me hon fareba ge aŋ ne pal to, amma i aŋ kaam ge temel ma ne ne laar saal ge aŋ ne pe, ago hon fareba zi, aŋ mḛ ne go pool.
Currently Selected:
2Korinte ma 1: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.