Joel 1
1
1Nâlekab oᴋausinga Joelemut Petuilib erninganut tikitoᴋ.
2Tamanna tusarsiuk, ilipse inutoᴋaujose, siutiselo manisarsigik, ilipse nunamiojose tamapse. Taimaitoᴋalauᴋâ uvlupsingne, atâtapselônêt uvlunginê?
3Kitorngapsingnut oᴋautigisiuk, ᴋitorngaselo oᴋautjilit ᴋitorngamingnik, tâpkoalo ᴋitorngangit kinguvângolârtunik.
4Kopergut minaumikliutigijangit piglertârait nerrivait piglertâraillo minaumikliutigijangit piglertat nerrivait, piglertallo minaumikliutigijangit piglertaujat nerrivait.
5Tupaleritse, ilipse taladlartose, ᴋealuselo; nipjarlugitse, vainemik imertudlartose, vaine mamaktoᴋ pivlugo; ᴋanipsingnit pêjartaungmat.
6Inôᴋatigêksuit majorarsimangmatta nunamnut, sôngodlartut, kitiksaungitullo; kiguteᴋarput loevib kigutingititut, erᴋlerpaᴋarpullo loevetut sôngojotut.
7Napârtuga vaineliksataliksaᴋ asserorpât, napârtugalo paungatannaktaliksaᴋ serᴋomipât; sunairutimarikpât suksaujungnaitilugolo; akkerungit ᴋaᴋorsititauvut.
8Ogguarit uigasuktut poksajamik atisimajotut inôsungnime uiksanga pivlugo.
9Tunergutiksaᴋ nerᴋiksaᴋ tunergutiksarlo imiksaᴋ noᴋartitauvuk Nâlekab iglunganit; ajoᴋertuijut, Nâlekab kivgangit, ogguarput.
10Perorsêvik asserortauvoᴋ, nuna ogguarpoᴋ; senaugaksaᴋ asserortauvoᴋ, vainiksat iptêrutivut, orᴋsuksallo ᴋunolerput.
11Kangusudlaritse, ilipse perorsêvilerijose, ᴋeadlaritse, ilipse vaineliksalerijose, senaugaksat senaugâluksallo pivlugit; katersoraksat perorsêvingme sujudlarmatta.
12Napârtoᴋ vaineliksatalik iptêrutivoᴋ, napârtorlo paungatannaktalik ᴋunolerpoᴋ; napârtut kingminaujarsoaksatalik pâlmillo mamaᴋtuniglo paungalît, ilâ, perorsêviub napârtungit ilûnatik iptêrutivut; ᴋuviasungneᴋ assiongmat inuit ᴋitorngangine.
13Kaigitse, poksajanik atisileritse, ogguarluselo, ilipse ajoᴋertuijose; ᴋeadlaritse, ilipse kivgartortose tunerguservingme; ᴋaigitse, poksajanik atisimavluse, inangagitse unnuaᴋ nâvlugo, ilipse kivgartortose Gudimnik; senaugaᴋ tunergutiksaᴋ, tunergutiksarlo imiksaᴋ ᴋaitaujungnairmatta Gudipse iglunganut.
14Nerritailiviksamik âᴋiksoileritse, katimaniksamik opinartomik katimaᴋojileritse, angajoᴋaujut nunablo inungit ilûnatik katimalit Nâlekab Gudipse iglungane, Nâlekamullo ᴋaigarsugitse.
15Kapianarmêk uvloᴋ tâmna, Nâlekab uvlunga ᴋanidlarmat, tikilârporlo asserorsaijotut Ajugaᴋangitomit.
16Nerᴋiksaᴋ pêrtaungilâᴋ ijipta sânganit, ilâ, ᴋuviasungneᴋ erᴋiertornerlo Gudipta iglunganît?
17Karngasûtit auvut ibjub iluane; ᴋematulivît sunairutisimavut, ilijiviksat serᴋomitauvut; senaugaksat iptêrutingmatta.
18Kappê! Tuktuvait âlavut! Nergjutit ungôrtat siarklerput, nerrinasugviksaᴋanginamik; ilâ, saukat katimgajut perlilerput.
19Nâlegaᴋ, ilingnut ᴋaigarsukpunga; ikoma nungûtsisimangmat nerrinasugvingnik puilaveᴋangitomêtunik, ikoâlanerublo napârtut perorsêvingmêtut tamaita ikipait.
20Ilâ, nergjutit perorsêvingmêtut angâjorarput ilingnut, kôt imeᴋasût imairutingmatta, ikomablo nerrinasugvît puilaveᴋangitomêtut nungumagit.
Currently Selected:
Joel 1: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.