Hiobe 1
1
Hiobib akluininga; ᴋanoêninga, ᴋenuêningalo.
1Anguteᴋalaukpok nuname Uzemik atelingme, Hiobemik atelingmik. Tâmna nellâgôlaukpok, idluartôlunelo, Gûdemiglo sivôralaukpok, idluitullitaililunelo;
2Ernetâlaukporlo 7 inik, panetâlunelo pingasunik.
3Nergjuteᴋotingillo saugat 7,000 diolaukput, Kamêlillo 3,000 diolaukput, tuktuvaillo aiparêngolaukput kakᴋautinut 500 dinut, siuteᴋoktojullo 500 diolaukput, kivgangillo unuktovaksôlaukput; opinarnelionersaulaukporlo ilûnainit nuname taunanêtome nunaᴋartunit.
4Erningillo nerrimaraksamik âkᴋiksoijartorput, attunit iglomingne, uvlomingne; tilliklerpullo innatauᴋojilutiglo najamingnik pingasunik, nerrimârᴋataunermut tâpkonunga imerᴋataunermullo.
5Nerrimârnerublo uvlungit sorailaukpatta, Hiobe tilliklilaukpok tagvunga ivsornaitipaillo, makkilunelo uvlarârsukut, tunnijilunelo tunnergutinnik otaksanik, unnurningit malliklugit. Hiobe isumagame: Ernikka idluitullijungnarajarput, Gûdelo allarungnarajarlugo ômattimingne. Taimailiulaukpok Hiobe uvlut tamaita.
6Pijoᴋalaukporle uvlut illangane, Gûdib ᴋittorngangit tikkimatta nangeriartorlutiglo Nâlekab sânganut, Sâtanasibtauk tikkiᴋattigivait.
7Nâlegarle Sâtanasemut oᴋarpok: Nakit pivît? Sâtanasib Nâlegak kiovâ oᴋarlunelo: Nuna ingergavigilaukpara.
8Nâlegak Sâtanasemut oᴋarpok: Kivgara Hiobe kamagilaungikiûk? Adseᴋangimat nuname, nellâgôrlune idluartôvlunelo, Gûdemik sivôravok idluitullitaililunelo.
9Sâtanasib Nâlegak kiovâ oᴋarlunelo: Isumavît Hiobe akkilertaunane Gûdemik sivôrangmat?
10Nangminek tâmna, iglunga, pigijangillo tamaita avaluliulaukpattit. Aggangita pinniarningit tamaita pitsartutilaukpattit, perᴋutingillo siamarsimavut nuname.
11Aggaktille issakit aktorlugillo tamaita pigijangit: sunaubva, oᴋarnerlotiginiarpâtit kênarnut.
12Nâlegak Sâtanasemut oᴋarpok: Ahâk tamaita pigijangit aggangnêlit; tâpsomunga nangminek kisiane aggaktit illitailikit. Tagva Sâtanase aularpok Nâlekamit.
13Uvlormele taipsomane erningit paningillo nerrimârtillugit, Weinetortillugillo ᴋattangutimik angajuklionerpâb iglungane:
14Taiguijok tikkipok Hiobemut oᴋarlunelo: Tuktuvait makpiterailaukput, (perorsêvingmik) siuteᴋoktojullo tâpkoa saniane pisulaukput iviksuᴋatalingme;
15Tagva Sêbamiut ittârput tiguvaillo, ullimârpaillo angutit kivgat saviksûb kênanganut, uvangalo ᴋemâjotôlaukpunga, oᴋautigilugo illingnut perᴋovlunga.
16Tâmna oᴋartillugo sulle, ôma assia tikkipok oᴋarlunelo: Gûdib ikkomanga ᴋattalaukpok ᴋillangmit, ikkipaillo saugat kivgallo, nerrilaitalo, uvangalo ᴋemâjotôvunga oᴋautigilugo illingnut perᴋovlunga.
17Tâmna oᴋartillugo sulle, illangat tikkipok oᴋarlunelo: Kaldêamiut ᴋattimgajoᴋartitsivut pingasunik, opingarpaillo Kamêlit, tigulugillo, kivgallo ullimârpait saviksûb kênanganut, uvangalo ᴋemâjotôvunga oᴋautigilugo illingnut perᴋovlungo.
18Tâmna oᴋartillugo sulle illangat tikkipok oᴋarlunelo: Ernitit panitillo nerrimâlaukput imerlutiglo ᴋattangutimik angajuklionerpâb iglungane;
19Ahâglo tagva akkunaksoak sunaᴋajuitomit tikkipok, iglulo akkingmivigidlarpâ terreᴋungitigut sitamattigut ochotilâllo inosuktut ᴋânginut toᴋolugit; uvangalo ᴋemâjotôvunga oᴋautigilugo illingnut perᴋovlunga.
20Tagva Hiobe nikkovipok, annorânelo allikpâ, Niaᴋunelo sallivâ, pâmakterlunelo nunamut, opigosuklunelo.
21Oᴋalarmelo: Ussingavlunga anânama timinganit pilaukpunga, ussingavlunga ingerarniarivunga tagvunga. Nâlekab tunnilaukpait, Nâlekab tiguvait; Nâlekab atinga nertortaule!
22Tamakkonane tamaine Hiobe idluitullilaungilak, pinniaranelo sunamik sillainartomik Gûde akkerartorlugo.
Currently Selected:
Hiobe 1: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.